我哋返香港嘅班機早上九點起飛，所以天未光就要起身準備去機場啦，我哋諗住上飛機有嘢食，所以冇特別準備早餐，之前二舅母俾咗啲蕃茄仔、益力多呀，仲有酒店請我哋食嘅餅乾呀、牛奶呀，同埋day 2便利店買食剩嘅小麵包頂住檔先啦~即使先一晚咁夜瞓，所有人都非常合作地起到身梳洗預備出門口~
byebye，泉州，下次見﹗
我哋明明已經比約定司機嘅時間早落到酒店大堂集合，點解嚟送行嘅大舅父大舅母比我哋更早到？﹗仲帶埋最後俾我哋帶返香港嘅手信嚟添，實在太太太感激了~
其他人未落齊嚟，趁人少少，我哋反而多啲機會分別同大舅父同大舅母傾下計~
後來我先知道原來司機同我哋改遲咗pick up嘅時間，吓？預咁少時間去check in得唔得架？嚟嘅時候冇留意，走嘅時候先發現，原來晉江機場係一個非常細嘅機場，一日得幾班飛機，咁細嘅地方都有直航機來往香港？咪就係歷史嘅緣故囉，幾十年來有好多福建人移居香港，呢啲直航班機就係俾佢哋返嚟探親、掃墓，另外有兩班機飛馬尼拉，係喎，當年老公個爺爺同一啲親戚都係去菲律賓工作，嗰啲係菲律賓落地生根嘅福建人又係搭呢啲航班返鄉下~我哋嗰班機係當天嘅頭班機，司機知道早去到機場根本就未開門(對於香港人嚟講，機場夜晚會關門係有少少匪夷所思)，所以提議遲少少先出發~
去到真係得一班機嘅乘客係度check-in，我好期待上飛機啦，因為好肚餓了~同嚟嘅時候一樣，登機後、起飛前，直至飛機飛上天空中，所有機艙嘅窗都要落晒簾，仲好嚴正地公告唔准影相，好嚴格呢~未起飛時空姐就派咗同嚟嘅時候差不多嘅「維持生命」飛機餐，一個包、一包脆脆、一樽清水…umum…食咗冇咁肚餓，不過冇乜滿足感囉~機程一個鐘頭多啲啲就到，返到香港再食啦﹗
帶咗啲功課去，咁多日早出晚歸都未做過，而家悶悶地，做少少啦~
跟住就到大舅公五店市買嗰支麥芽糖棒棒糖出場啦，嗒下嗒下好快到~
我哋直畢搭機場巴士返屯門市中心，食咩？港式﹗近近地就太興啦﹗果然，廣東人係要食白飯，呢幾日每日都食咁多好嘢，就係冇食過我哋平時每日都食嘅白飯，係有啲掛住嘅~
福建探親之旅結束啦，下一個trip幾時去？係打完blog呢一刻嘅兩日後呀﹗喼都拎咗出嚟，聽日要執行李啦~
前往其他中國旅遊blog
