知道有個超級颱風杜蘇芮將會侵襲之後，一直上網密切留意狀況，不過台灣同香港唔同，可能因為地方大，唔係香港咁進入800km內就點、400km內就點，甚麼八號風球就停工停課，而係各地區會按風勢發出警告，同埋各縣市政府個別發出停工停課命令，所以未來幾日安排都存在好多未知之數~原本我哋打算住凱撒大飯店住兩晚，然後轉去另一間民宿多住三晚，始終呢邊房價貴一截，行程豐富、早出晚歸的話唔駛住咁貴，舒舒服服乾乾淨淨就好~但遇著超強颱風就唔係咁講法了，民宿冇三餐供應，又冇其他設施，如果打風附近餐廳唔開，可能就要三餐食便利店杯麵、飯糰、三文治之類，如果冇辦法補貨就會更糟糕~好在我哋當機立斷，即刻決定延長凱撒大飯店嘅住宿，留足五晚，起碼三餐可以食得好啲，活動空間可以大啲，唔駛好似糟糕灣咁嘅隔離生活~天都未光得透我哋就落lobby辦好手續，錢係花多咗好多，但個心安落好多~民宿嗰邊冇得退款，但答應俾我哋改期，一年內使用，咁都真係好好啦~
安樂晒，可以去食早餐了，冇錯，大家都非常早起身~
如果只有兩個人，坐呢啲「自修室位」都唔錯呢，望住咁靚嘅海~而家望出去，仲未有好打風嘅感覺~
凱撒嘅自助早餐結果我哋食足五日，乜都有機會試勻晒了(其實最終都係不停食自己鍾意嗰啲…)~自助早餐有幾個highlight，我鍾意鮮榨果汁，最好味係香蕉奶昔﹗
冇凍咖啡，但有冰塊、糖漿、牛奶供應(分佈唔同位置)，所以我可以自製﹗
曉最鍾意芝士焗薯，每日都去同一位置搵，不過菜式會有變化嘛，有時有有時冇~小朋友覺得沙律一定要有青瓜，點知出現過一日之後就冇再出現，後來有係冷麵搵到青瓜絲，另外又有中式嘅醃青瓜，可以頂住檔先~無論係早餐定晚餐，都有一排炸嘢，我唔明點會有人早餐就想食炸薯條同炸洋葱圈囉，原來真係有嘅，係阿詩~
食飽咗爸爸帶咗個小情人出去影相，呢個表情嘅曉真係爸爸先影到~
原本計劃墾丁最後嗰日先去海生館，打算朝早check out酒店，帶埋行李去海生館寄存，之後搭長途車返台北時瞓一覺，而家決定颱風到前先去海生館，睇下四日後臨走時有冇機會天氣好轉少少，可以出海~
我哋係酒店門口車站企圖睇下有冇墾丁街車時，就有一架的士嚟兜截我哋，喂，街車班次好唔穩定喎，不如搭的士啦~都好嘅，費事係交通上浪費太多精力，我哋就上車啦~
車上兩個女係度自娛，明明冇開音樂嚟聽，兩個自己係度high爆唱農夫啲rap，仲加埋動作添，你哋唔好騷擾司機叔叔駕車呀~
媽媽去買飛時小朋友嘅表情，有冇咁快咁熱呀？
買到飛入去了﹗
海生館最吸引人，一定係俾大家玩水嘅嬉水池，雖然早有玩水嘅準備，不如都係逛下展館先，唔好一開始就濕晒身啦~一定要讚下海生館嘅locker服務，免費之餘仲要可以無限次開關，我哋係度泡成日真係好有用~
我哋隨便睇下各種海洋生物，人唔算多，行得好自在~
媽媽導賞員
水族館約會+入咗鏡嘅詩
yeah
話說去旅行時係2023年7月，打呢篇blog嘅文字時應該係2023年底，但加埋啲相完成埋佢嘅呢一刻已經係2024年4月，去旅行時我已經減咗好多磅，先會著下短背心短裙仔，今日嘅我見到呢張相，先發現明顯嘅小肚子，今個夏天我要再著呢套衫，身型更加fit了~
其中特別要影相嘅係呢一缸小丑魚了~
詩最鍾意就係見到一樣嘢，然後問：「佢話咩呀？」你就要按嗰個情景幫嗰樣物件作啲對白，佢就會好滿意了，要知道，嗰樣嘢可能係死物呀下，例如餐廳說：「你快啲入嚟食嘢啦﹗」我都唔知點樣開始，總之呢一缸小丑魚就變成娃娃屋啦，我哋幫入面啲魚配音，好搞笑又好好玩，如果唔嗌住要走，可能可以「觀賞」一個鐘都得﹗
大約中午時份，出到去戶外，有少少香港「三號風球」嘅感覺，知道個風真係嚟緊了~
海生館仲有個兒童遊樂場，果然係適合一家大細去玩嘅好地方~
美人魚？>v<
係魷魚喎~
講起曉究竟算大膽定細膽，永遠都冇答案，雖然好驚玩機動遊戲，又好驚睇有緊張氣氛嘅電影，但呢個觸摸體驗池，佢係第一個伸隻手落去摸啲滑滑同拮拮嘅海洋生物囉~
係白鯨呀﹗記得第一次見白鯨時我真係好鍾意佢呢(請參閱：25-5-2013：釜山麗水day 1(part 3)．麗水世博之Aqua Planet水族館)，佢嘅表情永遠都好似微微笑咁~
其實佢哋一直問住「幾時去玩水」，好啦好啦，去啦去啦，我哋居然烈日當空嘅中午去咗玩水~
有啲人直接落去，寧願玩完換番乾淨衫褲，兩個就話索性換泳衣，雖然有更衣室，但要排長龍，我哋入洗手間換啦~
正﹗
兩隻去盡情玩水時，我同爸爸歎下休息下，飲下凍嘢，一樣咁正﹗
個池好淺水，一定安全，唯獨要提醒佢哋唔好曝曬太長時間啦，要匿埋係鯨魚尾巴下面之類，可以遮下陰~沖好身我哋去食嘢了~
海生館呢間比較似飯堂嘅餐廳，都可以算係旅程之中最唔好食嘅一餐~
好似去IKEA餐廳咁，用個托盤攞攞攞攞攞，行到尾就去收銀處埋單~
奇怪嘅係，每一樣食物個樣都幾靚咁，但真係冇乜味~
最終極係，居然連盒裝橙汁都唔好飲﹗﹗
anyway，總算填飽肚子+冇肚痛啦~哈~食飯乖乖嘅我哋，點都會盡量食晒啲嘢嘅~
食完嘢佢哋已經好攰，我話我只想睇埋斑海豹就ok，不嬲都好鍾意斑海豹，圓嘟嘟好可愛~我哋睇住平面圖去搵，居然搵咗好耐都未搵到隻斑海豹…
搵嘅途中入咗去一個好似有得玩遊戲嘅地方，但唔知搞乜，亂按一通冇乜結果之後就出番嚟了~
搵到佢了﹗
只係想同佢合照啫，佢都唔肯游過嚟~大家已經筋疲力盡，算吧啦~
臨走時見到好靚嘅水母佈置呢~
影番個招牌先~
走嘅時候又有的士司機向我哋兜搭，不過居然因為海生館職員放午飯，冇人開閘門，咁都得^^”？﹗我哋逛多一陣紀念品店就搭車返酒店休息休息啦~
國立海洋生物博物館
待續
前往其他台灣旅遊blog
