31-5-2014:三十登長城day 2(part 2).國家政治與文化之中心

離開故宮時已經餓到不得了,但眼看四周完全唔似有嘢食﹗﹗但有架巴士載番大家去故宮嘅另一邊,多人等車都搭啦~初嚟報到實在唔係好熟邊度有嘢食,就搭去天安門啦﹗落車⋯又係乜都冇﹗結果,1蚊搭巴士,要用2蚊搭番地鐵過王府井搵食⋯SONY DSC 今個trip第一次踏足王府井大街﹗食乜呢食乜呢?SONY DSC

因為太餓了,所以第一眼見到邊間就入去邊間了~combine lunch

點菜係自己tick點心紙,南北食物都有,味道就一般般啦~反而個雞肉串有啲驚喜~炒菜心好油呀﹗經過呢餐之後我哋叫菜食就改叫砂鍋xx,烚菜好啲冇咁油~雖然食完冇話好有滿足感,但總算填飽肚子了~

有氣有力就可以繼續行程啦~大家睇睇下面嘅地圖:螢幕快照 2014-06-09 下午11.30.19

地圖頂部係今早行咗嘅故宮,而下午嘅focus就係故宮以南嘅一堆好密集嘅景點,其中包括天安門廣場、人民英雄紀念碑、毛主席紀念堂、人民大會堂、中國國家博物館、國家大劇院~當然冇可能全部由內至外都逛啦~有多三日就差唔多~SONY DSC

day身後嘅係毛主席紀念堂,不過我哋去嗰日冇開放~有興趣可以入去個官方網站度睇睇:

http://cpc.people.com.cn/GB/69112/113427/SONY DSC

天安門廣場正南方係呢個正陽門,好古色古香嘅建築呢~wiki話原本嘅正陽門早係五百年前嘅明朝就有了,不過二十世紀初時失過火,我哋今日見嘅正陽門係1914年時改建嘅~SONY DSC 形態非常生動嘅雕刻~SONY DSC

人民大會堂--可以入去參觀㗎~好似話每個省市都有屬於自己嘅廳~SONY DSC

另一邊嘅係中國國家博物館,我諗要入去行又係可以行一晝﹗官方網站:

http://www.chnmuseum.cn/tabid/40/Default.aspxSONY DSC

天安門廣場有大大個mon,大大咁播住啲影片,我哋參觀時好似播緊江蘇嘅介紹~SONY DSC

電視新聞成日見到嘅天安門﹗SONY DSC

雖然地方好闊好大,但⋯人人人人人人人~~~~~SONY DSC

大到呢~清潔嘅大叔大嬸要駕電動車嚟打掃﹗

我哋轉過去國家大劇院嗰邊~

話說今次去北京係街上有三樣嘢成日都見到,成日都想試,但又好驚食咗會肚痛嘅東東,最後三樣都試咗呀,覺得唔試就會好可惜咁,第時唔知有冇機會嘛~三樣分別係:老冰棍、酸奶同埋雪梨湯~combine ice

首先係老冰棍﹗特別嘅係佢超平﹗每支RMB1,而且周圍都有得賣﹗仲要啲大叔唔係推住冰櫃喎,而係用個紙皮箱裝住一堆,奇就奇在真係夠凍﹗RMB1嘅雪條,睇睇成份⋯得葡萄糖﹗其他啲化學嘢穩定劑之類吧~味道嘛,果然好單調,解渴就解渴嘅,但冇乜特別好食,試過就算了,有義氣夾手夾腳食埋佢囉~SONY DSC

國家大劇院非常優美又時尚嘅外型~SONY DSC

有隻落咗單嘅鴨鴨悠閒地暢泳呢~我哋後來入咗內部,抬頭就係呢個淺淺的水池了~SONY DSC

國家大劇院個門口係下一層,唔容易搵~SONY DSC

自拍一張招牌相先~SONY DSC

可以買飛入去參觀,有學生團體呢~SONY DSC

與其入去睇睇啲建築only,我哋不如睇下有冇啱睇嘅節目啦~好似上次去西班牙時都睇咗結他演出﹗(請參閱:2-11-2013:西班牙day 3(part 3).美味夜市場.異國的演奏會)SONY DSC

結果我哋揀咗呢個來自捷克嘅管弦樂團演出﹗其他option有西班牙嘅Flamenco,但我見上次係西班牙睇完冇耐,加上上次睇到有少少瞓著(當然時差都好有關係啦),今次聽下音樂會啦~不過因為係即場,所以大多數門券都一早出售咗lu,有得揀嘅位唔多,我哋買嘅屬於中價飛,都要RMB400一張,下一篇blog大家就可以睇下個音樂廳同埋睇下個位靚唔靚了~

我哋買好飛之後都有好多黃牛問我哋買咩飛,我哋都冇理佢哋了,係大陸要買飛都係幫官方買好啲~真係估唔到連古典音樂會都會炒飛囉~SONY DSC

未夠鐘睇show我哋周圍逛逛先啦~路經呢個好有氣派嘅⋯私人宅邸,不得內進﹗

我哋諗住隨便亂逛,啱嘅食啲嘢夠鐘就返去睇show,點知越行越荒蕪﹗變成只有好多樹同埋民居~一間鋪頭都冇﹗而且越行越累⋯唔得了,既然要行,不如去王府井大街啦,如果要食嘢都機會大啲﹗於是我哋跳上咗的士~呢程的士真係最舒服嘅一程,有涼冷氣啦,又有寛闊柔軟嘅座椅啦,又靜啦,又可以徹徹底底咁休息一下﹗我真係好得我哋好冇志氣丫﹗去旅行竟然好enjoy搭的士﹗:p

落車又恢復元氣了﹗SONY DSC

呢個牌幾好bor~係北京其他地方都有見過~顯示咗區內時租車位嘅availability,大家就唔駛盲中中排長龍啦~SONY DSC

我喜愛嘅李敏鎬果然亞洲嘅人氣都好高﹗北京都見到佢嘅廣告呢~SONY DSC

嘩,正﹗行兩步見到王府井小吃街﹗應該可以好好掃一下街吧?combine wangfujing market

點知⋯雖然條街好熱鬧,但我哋幫趁唔到呢~有烤串,但⋯我會食嘅雞肉串呀魷魚串呀,同一間鋪頭會賣埋仲好鮮蹦活跳嘅蝎子串﹗﹗好驚嚇呀~~~~我要遠遠見到烤串就背住個方向﹗﹗其他食物都不太吸引(到我),啲北京人好鍾意食「爆肚」,好似話牛肚同羊肚都有的,我又唔食內臟嘅~炸醬麵嘛,晏晝又食咗咯~冰糖葫蘆day又唔會同我share~圖片右三呢個乾冰彩色飲品我真係不敢恭維,睇見都冇興趣~結果乜都冇食﹗但有趣嘅東東都睇咗唔少嘅~左二嗰張就相傳係「王府井」啦,右二嘅吹糖人都好有趣,左三又有街頭京劇表演﹗

結果都有幫襯買嘢飲﹗我之前咪話過想試又唔敢試嘅三樣東東嘅,我即日試埋雪梨湯了﹗其實外表同味道都好似台灣嘅冬瓜茶,涼茶咁嘅色,甜甜凍凍,但點解唔敢買呢,因為佢通常pre-pack咗好多杯堆係counter前面冇雪住﹗都唔知煲起咗幾耐⋯直至我見有一間放係雪櫃入面,好啦試下啦,唔試又唔心息喎~飲咗,ok,heehee,下次唔駛飲了﹗因為味道麻麻地~

我哋結果決定睇完show至食晚飯啦~搭番地鐵返去國家大劇院啦﹗SONY DSC路過有巴士車身廣告係宣傳斯里蘭卡旅遊呢﹗香港都未好多見斯里蘭卡嘅宣傳,估唔到係北京咁容易見到﹗會唔會成為潮流呢?大家對斯里蘭卡旅遊有興趣的話可以去下我個blog啊~(請參閱:斯里蘭卡旅遊blog)

待續

前往其他中國旅遊blog

Comments

comments

發表迴響

你的電子郵件位址並不會被公開。 必要欄位標記為 *