期待已久嘅韓文課終於開學lu～～～～好開心丫﹗

不嬲我都喜愛學語文，英文屬於正規課程入面，又冇乜特別花工夫，當年比起同齡嘅朋友仔做多嘅嘢相信係寫信俾我啲筆友吧，即使到F.5準備會考時，放學去到自修室，第一件事都係回咗信先，練得我(當年)寫英文文章特別快，除咗識咗啲外國朋友之外(有德國啦、韓國啦、馬來西亞啦、仲有拉脫維亞﹗)，相信對我考試時作文都好有幫助﹗

普通話嘛，學校只有F.1正式讀咗一年，我主要嘅普通話訓練係細個時同爸讀書，我非常喜歡金庸嘅小說，我諗應該係高小定初中時？每晚食完晚飯後都拉住爸爸同我一齊讀「射鵰英雄傳」，每人用普通話讀一節，每日讀幾頁咁，慢慢越嚟越暢順了﹗近年令我普通話維持水準嘅應該係用手機打text，我估計打中文嚟講漢語拼音應該都差不多係最快嘅輸入法吧？smartphone點解咁smart，佢哋連詞語都認得，仲有學習能力添～最愛用頭一字母打晒成個詞語，你想打「劉德華」，打「l-d-h」就出來了，當然同時都會出現「李登輝」啦，你揀就ok了～點都快過倉頡or筆劃吧？(我又離題了⋯>_<“)

後來學嘅外語係西班牙文﹗F.3暑假嗰年去多倫多讀summer school，識咗啲南美朋友，墨西哥啦、委內瑞拉啦，返嚟就想學西班牙文﹗爸爸有位NET teacher同事識得有個大過我嘅姐姐學過西班牙文，最初就以私人補習方式學過一排，嗰陣都好用心㗎，個個星期要過去火炭度學，後尾好似個姐姐唔得閒定要去外國讀書，唔記得了，就中斷咗了～直至到大學時再正正式式係HKU嘅Language Centre學西班牙文學咗兩年幾，係year 3時太忙所以中途放棄咗～

近年超迷韓劇、Running Man、K-pop、韓食，早已蠢蠢欲動想學韓文，適逢今年年中轉返part-time，人冇咁忙可以學啦～其實早於七月時已經報咗名﹗九月正式開學﹗係CU同HKU嘅持續進修學院之中我揀咗HKU SPACE，主要係每星期一堂而已，每堂三個鐘，唔駛一星期出去兩次，而且我揀咗嘅上課地點係美孚，交通比較方便～如果認真學上去，可以讀三年，到時去韓國旅行應該可以講得非常自在，而睇節目分分鐘可以唔駛睇字幕添～

開學之前要預備一下，要買課本：

課程採用嘅Active Korean係英文教學嘅韓語學習課本，可以係「尋韓者」買到，唔係報名參加呢個course都唔知香港有間咁嘅韓文書店呢～有課本、小說、雜誌，仲有明星精品、CD甚麼的，係銅鑼灣嘅樓上店，韓迷可以得閒去逛下～尋韓者網頁：

http://www.hanchasaonline.com/index.php

到咗開學日子，係中學課室上堂，我都估到我會係年紀比較大嘅學生⋯:p睇落大多數同學仔係廿幾歲後生女，全班廿幾三十人，咁我啱啱reach三字頭，咁難免成為年紀較大一群了～當然女生佔咗八九成，男生佔少少數啦，學language十居其九都係呢個現象了，當年大學讀西班牙文都係女多男少～

開始時老師介紹下自己、介紹下課程，之後就學韓語字母～老師係講流利普通話嘅韓國人，所以教初班嚟講非常合適，又覺得好親切，到咗中班老師應該可以講多啲韓語少啲中/英文了～韓語字母之前我有自己買書學過，所以頭一兩堂應該都比較輕鬆，但之後到學句型、文法、生字甚麼就要打醒十二分精神啦﹗自己做堂上習作時，老師會逐一去每個學生旁邊叫大家發音俾佢聽，以確保大班學生之中大家都學得好，好細心呢～而且教學都好有趣味啊，除咗用powerpoint、用課本之外，仲有唱歌同埋遊戲﹗大家都上到笑咪咪～有興趣可以聽下呢首學vowels嘅歌：

http://youtu.be/I-bSgjMQWyE

課堂最尾大家玩bingo遊戲，將學咗嘅新詞語寫係九格紙上，兩位同學互相對戰，我呢啲自己去上堂嘅學生正好認識下同學仔﹗:D

雖然冇功課要交，但老師教咗我哋要登入e-learning嘅網頁溫習同埋預習呢，哇，配套真係好齊全，不愧係大學～

好期待下一個星期四呢～

HKU SPACE韓語課程：

http://hkuspace.hku.hk/prog/introductory-korean-part-1

Comments

comments