2-10-2006:Day 2@珠海御溫泉

再補番寫舊o既diary,我D「diary債」越來越大了…真是oh no~

第二朝瞓到8:30am,都算有充足o既睡眠~去食o左package包埋o既自助早餐,quality一般般啦,又唔係太中式又唔係太西式,但我都係想食D偏向西式o既早餐,佢有即煎o既荷包蛋呀﹗熱呼呼的,good﹗

不過油o左少少啦~

食飽飽之後再去最後一次o既溫泉,朝早都係人比較少,可以浸得自在D,可能今次o既假期時間比較鬆動吧,都唔會有種好趕呀好趕呀o既感覺,每個位置都可以輕鬆的enjoy一下﹗入o左去個「香薰房」,入呢個房都要幾苦心o架,因為唔可以著泳衣入去,要入更衣室著番件客服,入面靜靜暗暗的,有一張張搖搖梳化椅,俾人可以好relax咁躺上去休息一下,有D好寧靜o既音樂,我瞓著o左呢~呢朝真係係咁瞓,後來我o地又再去「地熱帶」,又睡了好一會﹗

浸到差唔多十二點都番房沖涼執o野check out lu~holiday差唔多到尾聲啦~再去中國餐館食lunch,幾個小菜依然好好味,鹽水鱸魚(超好味,魚肉唔似平時o既鱸魚咁鬆散,質地幾結實,魚味好濃,但好矜貴呢,每人得一至兩件。)、籠仔蒜蓉蒸菜心(是招牌菜吧,周圍幾乎張張枱都有食﹗)、潮州式涼瓜排骨(開頭以為個「潮州式」只係個名,好似南華D「俄羅斯忌廉湯」之類,原來真係唔同個喎,味道清清的,有D鹹酸菜係入面~)、蘆薈蒸蛋(超滑滑蒸蛋﹗但蘆薈o既質感…有少少似…似…鼻涕﹗oops﹗)、中湯~

食完lunch係附近逛逛、影下相,因為搭3:15:am o既車嘛,所以仲有好多時間,行到咁上下係花園o既露天茶座坐坐,飲o左杯奶昔,我o既草莓奶昔普普通通啦,似奶多過昔,唔係好濃稠,但o個度o既環境真係一流﹗

係車上梗係大瞓特瞓啦,要預備夜晚跟陳醫生call嘛~我又瞓家姐又瞓,佢個頭係咁跌落o黎呀~阻住我瞓﹗可惡﹗

去到珠海o既九洲港轉船番香港,回程冇去o既時候咁飄咁大浪,坐得舒服得多了,聽聽歌時間好快就過去啦~船上o既廣播講船上小賣部有咩食,哇,有超令人懷念o既「餐蛋麵」呀~

你覺唔覺呢,船上o既餐蛋麵係特別特別好食o架(一定要餐蛋,腿蛋都唔得﹗),以前去離島都一定要食下﹗但好耐冇食過lu~呢日都冇食,因為番到香港要食dinner嘛~

同爸媽姐食完飯就孤身上路了,今晚約o左組mate一齊番QE跟陳醫生on call~唉,中間發生o左一件倒霉o既事﹗好慘呀~~~~~~~~~~~~~~~~~

我係尖沙咀搭o左一架小巴,話會經佐敦地鐵站去黃埔喎,咁我咪諗住係佐敦落車o羅,點知架車一直冇經過D熟悉o既位置就到o左紅磡火車站﹗點解會咁o架?點解會咁o架?慘、慘、慘~

點算好?搭咩車都唔o岩…最終…都係行番過去醫院﹗係紅磡行番過去比原來由尖沙咀行過去仲遠,唉~最終都行得到o既,唯有安慰自己行多D路變美女啦~

仲有,好在有day同我傾住電話陪住我~

雖然呢晚冇emergency OT,但都好fruitful喎,睇o左兩個case,一個係neck mass,晏晝入院,陳醫生抽o左我o地好多submandibular swelling、trismus o既書,零識答,又教我o地睇CT neck~第二個case o岩o岩入院,係IO,佢直情俾我o地take history、做P/E,仲叫我o地記錄埋係牌板入面添,又教我o地prescribe D investigation、management o個D,教o左點樣計fluid replacement,如果我o地夠膽,直情可以俾我o地打drip﹗但大家都…唔…忘記了點做…

本來都預o左會過夜o架啦,但佢十一點幾就叫我o地走lu,原來佢都有得瞓覺~咁都好丫,又學到o野,又有得瞓,good呀~

前往其他中國旅遊blog

Comments

comments

在《2-10-2006:Day 2@珠海御溫泉》中有 2 則留言

  1. 真的不斷在訓呢~ 唔!~ 我都好怕d似鼻涕的野~ 如雪蛤膏~ 真的很核突!!!! 真的慘慘ta! 我好想知吊了鹽水/糖水是否會不餓?!~

  2. Re day: 咁真係好累嘛~ D地方又舒服~ 係呀,真係10慘﹗但同一個錯唔會犯兩次了﹗ 哈,你唔好親身試了﹗大吉利是﹗搵次機會問下吧~呀,阿乳應該試過喎…我家姐都試過﹗

發表迴響

你的電子郵件位址並不會被公開。 必要欄位標記為 *