本來想將鳥巢水立方放係同一篇blog，不過鳥巢嘅相片實在太澎湃了，水立方都係另起爐灶啦～今日天氣好熱，外表涼浸浸嘅水立方係咪都會帶俾我哋一份涼意呢？

我哋參觀完鳥巢之後，就按指示去上番電瓶車，有個司機已經係度等大家了，佢以超卷脷嘅R音同我哋講咗一句嘢，完全get唔到，我哋一頭霧水之際佢再慢少少講多次，原來話「先歇一會兒吧」，哦～冇錯，今日太陽好猛，一舊雲都冇，熱熱熱熱熱～～～～～之後大家又會見到我哋冇志氣嘅一面啦～

電瓶車未出發，我哋係度四周圍望望，原來草地上嘅燈都係小鳥巢設計呢，好有心思啊～

基本上鳥巢同水立方好近，大概5分鐘車程我哋就嚟到呢個巨型藍色啫喱了﹗

比起澳門學佢嘅海立方娛樂場，原著更高雅一啲、宏偉一啲、可親一啲～

入到去原來都係晶瑩剔透嘅天然採光呢～雖然有啲啲冷氣，但水立方並冇佢外表上面睇起嚟咁涼快～:p

我本來都知道裡面改建成為水上樂園，不過時間方面同行程安排方面唔許可，我哋都放棄咗係度游一游了～我有個同事話有嚟過水立方游水，佢話去比賽池的話要先通過測試，游下水俾教練睇下，發張cert俾你先可以係整個都3米深嘅比賽池度暢泳～不過今日比賽池都冇開放俾公眾啦，好似起緊個表演台係水中間，係咪有show開呢？

呢度就係比賽池了，仲有觸目驚心嘅高台跳水池﹗跳水嚟講都係我鍾意睇嘅奧運項目之一，中國隊又勁啦，運動員姿勢非常優美～

以前細個時媽咪鍾意睇跳水、體操，我哋都跟住鍾意睇呢啲優美嘅項目，但結咗婚之後嘅2012倫敦奧運，老公睇奧運唔揀擇，我亦跟住乜都睇，發現公路單車賽嘅魅力，後來睇咗漫畫飆速宅男之後，學多咗公路單車賽嘅戰術、唔同選手嘅特色，我相信下次再睇公路單車應該更有趣﹗同老公一齊睇奧運又睇多咗羽毛球啦、舉重啦、跆拳道啦⋯雖然倫敦奧運係我預備part 1考試前發生，但都忍唔住睇咗好多賽事呢～

介紹大家睇非常有魅力嘅飆速宅男漫畫：

http://zh.wikipedia.org/wiki/%E9%A3%86%E9%80%9F%E5%AE%85%E7%94%B7

講嘅係一個住係千葉縣，最愛動漫，個個星期踩住單車長途跋涉去秋葉原嘅宅男，憑住時時踩、落力踩，發展出佢自己都唔知嘅單車實力，入咗高中之後被人賞識，入咗同佢格格不入嘅自行車競技部，呢套漫畫非常熱血、非常感動呢，每個角色，包括對手都好有魅力啊～我又講到離咗題了⋯

參觀鳥巢同水立方，當然要同大大個北京2008奧運影個主題式合照啦﹗

有個相片展覽，帶大家重溫每一個金牌嘅感人時刻﹗

我本來都想買啲鳥巢or水立方嘅紀念品，但鳥巢嗰邊啲product質素真係麻麻地，提唔起購買嘅欲望⋯去到水立方，覺得有趣嘅係呢個：

哇，水立方pattern泳衣﹗﹗睇落有趣，一過著上身就算吧啦～呵呵～

結果我哋嘅消費就只有入場時影嘅紀念照，呢啲相我哋平時真係好少買，但今次佢免費送張2吋相俾你，好似俾RMB20就送個鎖匙扣鑲起你張2吋相，同時連埋張大張連紙咭框，張相又影得係幾靚bor，抵買﹗而家張大相放咗係屋企客廳啦，不過返到嚟個鎖匙扣唔知塞咗係邊添⋯XD我又一張假鳥巢夜景，水立方就留俾day啦，不過呢張相size細啲，偽裝失敗﹗

我哋離開水立方時都差不多中午時份啦，好啦好啦，似乎夠時間去多一個地方先搭飛機走，我哋決定去同北京火車站同一條地鐵線嘅雍和宮，仲有旁邊嘅國子監同孔廟。出到嚟唔見咗個地鐵站嘅？﹗問一問路諗住行過去，但實在太熱熱熱熱熱，結果決定重施故技，好啦，跳上架RMB0.4嘅巴士搵地鐵站啦，結果到咗站都唔係好對路，唔得了，太曬太熱了，再迷路就唔夠時間去雍和宮了，我哋決定⋯搭的士﹗﹗好舒服嘅冷氣啊，refresh一下陣間至有力行嘛～

待續

前往其他中國旅遊blog

Comments

comments