曉學校家教會舉辦親子活動，上次一年級時參加過製作手工潤唇膏，有得玩又有嘢拎走都幾開心，今次有得參觀皮革廠，唔知抽唔抽得中都即管報下名參加啦~只有20對親子嘅名額，我哋都好好彩抽中咗有得去，我問曉，你想黐住媽咪定係要手靈巧啲嘅爸爸同你去呢，我好榮幸地當選可以去玩，yeah~
適逢早兩日係曉學校40周年校慶，有啲佈置都仲未拆，今日冇咁多人，可以影下相，不過攝影師(曉同學)可能經驗未係好夠…
曉自拍手勢就唔錯喇﹗不過40個「0」字已經漏氣了…
返到學校集合先知道，原來曉嘅同班同學富善同佢媽媽都有參加，上次去家教會旅行時有一齊玩過又同枱食飯，有熟人一齊去好好呀~點齊人數就上旅遊巴出發去位於葵涌嘅瑞興皮廠~
通告寫話參觀皮革廠，我自己想像係，有啲皮革嚟到廠房，然後生產啲手袋呀、皮鞋呀、皮帶呀、銀包呀之類嘅東東，所以先有我哋DIY咭片套嘅環節~去到有負責人同我哋講解，原來唔係咁樣一回事，嗰位負責人原來係皮廠家族嘅第三代傳人，佢嘅爺爺同外公早係七十年代已經經營皮廠生意，所謂皮廠，原來係屠宰咗食用牛隻之後，會將層皮毛運嚟皮廠，皮廠會用化工材料去加工層皮，去毛、去皮脂、防腐、去濕，變成一張張可以製作皮革產品嘅材料~所以去到皮廠其實都幾大陣味，因為本來就係處理動物身體嘅地方嘛~
加工中嘅皮料
原來呢類轉筒已經算係業界之中嘅小型版本
不過因為本地屠宰嘅牛隻越來越少，而家一年365日，除咗年初一、二、三屠房休息之外，每日都只屠宰30隻牛，所以原材料越來越少，工廠規模比起全盛時期已經縮細咗好多啦~佢介紹完加工牛皮嘅過程、機器之後，我哋就上樓上嘅DIY工作室做手工喇~
坐低興奮等開工
每對親子會合作整一個卡片套，職員事先已經做好皮料嘅剪裁、打窿、部份嘅黏貼了，所以我哋完成埋剩低嘅一半工序就完成啦~我哋主要要黏貼卡片套嘅另外一邊，同埋將幾幅皮用針線縫好~
成功穿針
縫好一條邊，好有成功感~線嘅顏色可以自己配搭架~
導師好有心機咁樣示範同指導我哋做，其實本身都唔難嘅，係要花少少耐性同時間啫，我同曉夾手夾腳輪流做，都好暢順呀~
輪到我整時，人哋問曉，你唔整咩？umum…其實唔係「我幫佢整」，而係我都係參加者嘛，係「我都要整」至真~:p
好專心真係唔知時間過去，剩番10分鐘左右時導師忽然宣佈我哋12點鐘要上番旅遊巴，大家要加快速度，有需要佢哋可以幫手，我同曉想親力親為，我哋即刻開turbo加速，結果都可以順利趕得切做好，只係…
臨尾唔小心縫少咗一針囉，令呢個卡片套變得更獨一無二~
成品﹗yeah~
原來皮廠要轉型，所以開設咗The Lederer呢個品牌，有門市有網店，售賣DIY材料包，亦可以按客人要求訂造皮具，我都有少少興趣試下整啲更複雜嘅嘢呢~導師話Hermes啲手袋都係工匠一針一線咁縫，我哋Reginta或者Rigena品牌都唔差丫~