本身諗住去杭州有三日咁多，應該可以去到好多地方，但礙於交通狀況實在太糟糕，結果同我哋想像o既唔係好一樣添…day 1去得西湖少少，好在行咗個南宋御街，day 2淨係去到心目中o既西溪濕地，本身想去埋宋城都唔夠時間，咁day 3點算好呢？去得杭州，個西湖淨係行得嗰右上角少少好似真係唔算去過，連遊船都冇坐，所以我哋決定day 3再去下西湖o既另一邊~
一大早我哋將行李搬咗去火車站先，傍晚我哋就要坐番高鐵返上海，跟住再搭飛機飛返深圳了，如果下晝仲要咁「危險」咁截的士往返酒店拎行李，全日都會心慌慌了~
我哋由火車站行出嚟，想搵車搭返去西湖o既另一邊，umumum…唔係好合心水添~最可靠都係—-腳﹗行呀行，搵返條大路有個巴士站好似都ok喎，去到蘇隄~good﹗
呢個巴士站有個熱心o既大嬸，佢介紹我哋唔好去西湖了，因為太多人，風景又唔係特別好(佢o既個人意見only~)，叫我哋去比起龍井山更要遠一啲o既郊外，但係我哋花費唔起miss咗班火車+飛機o既風險，所以都係去番市區內o既西湖吧~最後因為等得太耐都冇車，我哋都係屈服了，又坐咗的士，去蘇隄時經過雷峰塔景區，今次我哋無緣參觀啦，等杭州地鐵起好之後再嚟過吧~的士司機話，你哋今日嚟唔算多人啦，過多兩日五一黃金周呢啲地方全部都改道呀，塞到不得了~但原來遊客多對佢哋o既生意嚟講仲衰，因為塞車塞晒啲時間去，如果冇咁塞反而可以兜多幾轉~真希望杭州o既交通問題可以及早紓緩~
招牌相﹗
我就影蘇東坡呢邊啦~
人山人海﹗嚇死人~
呢度可以影番過去雷峰塔~
蘇隄附近有另一「西湖十景」當中o既「花港觀魚」，話說係宋朝時大官起o既私家花園，種花養魚，俾人休閒娛樂~
而家都仲有魚池呀，不過花就唔係太多了~
沿住蘇隄行，有「白牌」o既搖櫓船仔，又有「官方」o既觀光船，因為我哋怕咗俾人呃了，都係搭番官方船啦，每位RMB 45，包埋西湖中間嗰個小島「小瀛洲」o既門票了~
隻船都同我哋去西溪濕地時坐嗰啲好似~
啲船夫要係個咁大咁大風o既湖上面撐呢啲船都幾辛苦呢~上岸小瀛洲~小瀛洲呢個島造到島中有湖、湖中有島，築起土堤，圍住中間o既水，形成一個「田」字咁，島o既唔同位置都起咗好多亭台樓閣~
睇o既係西湖十景之中o既三潭印月~陣間再介紹﹗
以前定咗西湖十景，分別係三潭印月、南屏晚鐘、雙峰插雲、雷峰夕照、花港觀魚、柳浪聞鶯、斷橋殘雪、平湖秋月、曲苑風荷同埋蘇隄春曉。不過嘛，即使你去到嗰個景點都唔代表你賞玩咗嗰個西湖十景喎，因為有季節時辰限定的﹗而家又有啲西湖新十景呀，其他幾多咩景呀咁~
三潭印月就係呢三個小石塔築係水面，話滿月o既時候點咗啲蠟燭，唔知點樣計埋好多倒影呀甚麼就會有好多個月o既影像了~
小石塔o既close up版~
後面o既大版畫就係三潭印月o既寫實圖了~
遊船o既門票包前往三潭印月o既trip同埋由三潭印月出返去西湖邊o既trip一共兩程，但起點同終點可以唔同一個地方，我哋決定搭出去岳墳嗰一邊~咁就成功去到西湖o既「左上角」了~
上岸o既位置又十景之中o既「曲院風荷」，但季節唔啱，冇荷花睇呢~唯有影下個招牌吧~肚子餓了，去食飯吧﹗待續
前往其他中國旅遊blog
Rita你的照清字明，値得向你學習! lkuonan
[版主回覆07/02/2011 23:54:00]replied
Rita 有時間請到江蘇一遊.謝謝! lkuonan
[版主回覆07/02/2011 23:54:00]replied
Re Heidi: 你好呀﹗歡迎你到訪我個blog，好高興有個小師妹喜歡我個blog~ 係呀，我係陳瑞芝畢業，而家的確做緊醫生，我2003年中七畢業，算唔算大你好多呢？呵呵~ 你諗住去印度玩？好丫﹗係一個好值得去o既地方~ 你得閒先慢慢煲番我個blog啦，有成八百幾篇，有排你睇，不過睇我最近期嗰啲啦，以前講日常生活嗰啲冇乜好睇，heehee~ 🙂
Re Ikuonan: 多謝你到訪我個blog，歡迎﹗ 多謝讚賞啊~ 我中學時都有同屋企人去過蘇州，但嗰陣跟團，時間唔多，印象唔太深刻，將來一定有機會再去的﹗你來自江蘇？
西湖這個地方很有特色,如有機會的話,我也想到此一遊….
[版主回覆10/05/2011 10:15:00]replied
Re飛毛華腿: 如果去呢，最好等杭州o既地鐵起好再去﹗ 而家啲交通好混亂呢…