5-11-2014:慶祝結婚三週年@阿一海景飯店

正式結婚三週年,應該係11月6日,我哋正日都有其他事情,唔緊要,提前一日慶祝,一樣咁開心﹗因為而家肚裡有我哋嘅BB呱,西式好多時好多煙熏呀、冷盤呀咁,日式唔食得刺身就不如唔好食,諗下諗下不如食啲精緻啲嘅中菜啦﹗係Open Rice好容易就搵到isquare嘅呢間阿一海景飯店了﹗IMG_5149

我哋去到,侍應生俾我哋坐落地玻璃窗旁邊嘅位置,睇到維港景色呢,正﹗座位之間間隔夠開,傾計都有足夠私隱~枱面夠大,坐得舒服﹗而且仲俾多一張矮椅子我哋放袋添,非常貼心﹗上次去做孕婦facial得到貼心嘅照顧,今次係第一次係陌生人因為見到我微微隆起嘅肚子而對我有特別待遇﹗侍應生特別問我係咪飲清水,同埋之後叫個餐有送香檳都offer轉鮮橙汁俾我哋~

睇睇餐牌食咩先,發現生咗之後要再嚟多次﹗放棄咗兩個較名貴嘅餐,因為day敏感唔食得大閘蟹,我又都暫時唔食蟹住,鮑魚餐有釀蟹蓋又有西班牙火腿,所以大閘蟹餐同鮑魚餐都下次先了~為咗試多啲款式,instead of散叫,我哋都叫咗一個套餐,應該係平凡之處見真功夫嗰種﹗我諗起黃蓉話煮蒸豆腐同埋炒白菜俾洪七公食,佢特別期待,應該就係呢種狀態~

頭盤係鎮江肴肉同埋素鵝,我哋都先食素鵝,放落口已經好驚訝,邊度有素鵝入面啲冬菇咁厚肉㗎?﹗而且外面腐皮嘅煙熏味又恰到好處,齒頰留香~鎮江肴肉睇落同平時食嘅差不多,但咬落去肉味越來越濃﹗第二第三道菜我認為係全晚最好食,第二道係炸鱈魚,唔知點解已經淋上汁嘅鱈魚個外皮仲係酥脆得咁緊要,唔係炸得好爆炸好熱氣嗰種,而係好酥,魚肉亦好滑好多汁,食到人笑咪咪,食完炸嘢,旁邊兩朵西蘭花正好清爽一下~第三道係椒鹽骨,感覺係真椒鹽,咩意思?即是係用真香料嚟整而唔係家用嘅椒鹽粉囉,同埋我哋係度講,究竟佢用嘅係咪一般嘅新鮮豬肉?定係甚麼特別品種嘅豬?肉味咁香濃肉質咁柔軟嘅?之後係燉牛尾,煮得好軟好滑,薯仔都夠腍又入味,填飽我哋肚子嘅一道菜﹗之後係酸辣湯雲吞,酸辣湯我不嬲都一般喜歡嘅啫,覺得ok咁啦,day嗰碗好似辣油特多,食到我哋兩個都由肚噴晒火出嚟﹗我都相信粒雲吞應該係呢度菜嘅亮點,果然入面啲蝦好大隻好爽丫﹗最後係揚州炒飯同埋紅豆沙,雖然冇話好特別or令人驚訝之處,但都不失為高水準之作~

整體都好滿意呀,上菜速度又恰當,正好食下、傾下、望下景(睇到幻彩詠香江),幾好~唯一要挑剔嘅係,菜單上嘅蔬菜少咗啲,只係兩朵西蘭花,其餘有素食嘅都唔係真係菜~同埋如果個酸辣湯換上一款唔辣嘅湯羹就更合我心意了﹗IMG_5147

臨尾搵侍應生幫我哋影張合照先~Happy 3rd anniversary~~下年就同埋BB呱一齊慶祝啦~

Comments

comments

在《5-11-2014:慶祝結婚三週年@阿一海景飯店》中有 4 則留言

    • 係呀,如果我哋一家人六個一齊去,即使散叫都可以試多幾款餸﹗當然叫餐就一次過試晒佢啲精選啦~睇下媽咪生日有冇興趣食中菜?

    • 係呀,好食到唔敢想像自己返屋企試整﹗
      烤鴨的話恐怕要一早預訂呢~

發表迴響

你的電子郵件位址並不會被公開。 必要欄位標記為 *