之前講過morning dash策略，即是入場所選擇o既入口，就要配合你打算「dash」入去o既館，即是嘛，有啲好受歡迎o既館，一般排隊時間要三個鐘呀嗰啲，如果你晨早入場時就衝過去，趁人龍未堆積o既時間，可以節省唔少排隊時間，我哋第一日o既英國館同第二日o既瑞士館都算成功o既，諗住第三日去dash日本館…

最近日本館o既入口係4號門，但4號門冇地鐵到，我哋退而求其次，揀第二近o既5號門入場，哎吔吔，原來差少少就係差少少，我哋入場之後衝過去要花唔少時間，去到日本館時條隊尾已經唔見到個館，即是，排到勁長﹗工作人員話要排大約五個鐘﹗我哋o既morning dash失敗了~

旁邊o既韓國館都唔見得好幾多…我哋行咗唔駛點排o既越南館先…起碼涼一涼冷氣，冷靜一下心情…:p

越南館o既外型同內部都好藤藤o既樣子…

裡面正中有一個大水池同埋佛像，而其他展品、商店就團團圍住個水池行，有各式各樣o既雕塑藝術品、文物等等，裡面又有啲賣工藝品o既地方，可能因為啲展品有啲不設防吧，好似可以好隨面俾人觸摸到，打爛都冇人阻止到o既樣子，彷彿啲展品唔係啲咩名貴o既東東咁？﹗

順道去下旁邊o既亞洲聯合館…

入咗去緬甸館之後，發現唔需要去其他亞洲聯合館o既展館了…空洞洞冇乜嘢睇呢…最搞鬼就係周圍貼住「不准攝影」，但事實上都冇乜令人想影o既嘢…

你睇，啲隊幾恐怖？﹗仲要烈日當空呀~排日本館係望唔到個日本館o架~因為疏導啲人潮去啲空地度打蛇餅，起碼打幾個鐘先至可以貼近個場館繼續排…

我哋決定轉戰浦西園區~

今日好似係三日之中最熱o既一日﹗我第一次提議買雪糕食~

幾個主題館之中，之前行咗城市生命館、城市地球館、城市人館，我哋而家去行埋城市未來館~

我覺得城市未來館o既內容骨幹冇咁清晰，而且我哋兩個都攰攰地，有一段時間係入面睇片時睇到瞓著咗﹗不過陳設就好grand，好大好靚囉~講o既係一啲夢想入面o既城市生活，好似居住係其他星球、居住係綠色城市等等…

見到左邊中間嗰張相嘛？呢個真係國民質素o既經典之一，呢度o既陳設係圖書館，四面牆壁都係書架，但不斷有廣播呼籲遊人唔好拎書架啲書落嚟，因為只係裝飾…講完又講…唔知係咪越講大家越好奇呢？我只係見到四面八方o既人都拎啲「書」落嚟，又再放番上去…唉，叫住都要做o既中國人~

等我同未來海寶影張紀念合照先~

居然俾我哋發現咗一個隱秘館﹗

係城市未來館o既地下，有條隱秘o既路行入呢個「新能源館」，冇人入去喎？﹗唔知點解？場刊地圖嗰啲又冇介紹喎~

我哋係入面玩game…

玩完問答遊戲之後，day仲被冠以「低碳達人」o既榮譽添~

肚子餓了，我哋去食lunch先~開頭見到有間好大o既美食廣場，但入面要用啲儲值卡o既東東喎，一入要入五十蚊一百蚊入去，先至可以扣數，用剩又唔知可唔可以退款，我哋決定去第二度…

發現城市未來館嗰楝building o既樓上有間「雲餐廳」中菜喎~不如去試下啦~

原來入面非常靚~

似乎上海o既中菜都興咁樣呢，茶要一杯杯order，你唔order茶可以飲其他飲品，唔似得香港無論你鍾唔鍾意飲都收咗你茶錢先，而茶錢呢就根據你order o既茶o既名貴程度有所不同，每人一杯，可以全枱人飲唔同款都ok，咁當然啦，亦可以order一壺，如果有四個人以上就會壺裝抵飲啲~我哋揀咗龍井同埋龍珠花，兩樣都有水準呀~

環境靚不特止，坐得舒適，地方闊落，人唔多，而且食物都精緻啊~我哋叫咗三文魚香菜o既前菜，紅棗湯汁浸西洋菜，炸豬柳件，三款都好味，而且勁大碟﹗我哋兩個大食o既人都食到肚子突突~

諗住快少少過番去D區邊緣去睇show…

我哋奢侈地試搭$10一位o既電動車~

真係又快又舒服喎，仲可以睇下風景添，呢張睇到浦東園區o既日本館、中國館同世博中心呢~

唔知係咪記錯咗個show o既時間？我哋總之最後係未睇住，不過去行咗嗰邊幾個館先~

時間只夠入去太空家園館，其他附近o既館，好似可口可樂館、日本產業館等等都要排好長時間呢，國家電館我哋之前又睇咗咯~

同stanley佢哋講一樣，冇乜特別好睇~好似冇乜重要捉得住咁…anyway，我哋都冇花太多時間係度排隊同埋參觀o既，又唔會覺得好唔抵咁，不嬲都係一分耕耘一分收穫o架啦~

旁邊就係外型好靚好閃o既國家電網館，令人印象最深刻o既係「魔盒」，係一個密封空間度，觀眾俾一個四四方方o既房間困住，六個「面」都係螢光幕，展現出唔同o既環境，令你置身於太空之中呀等等~我話，點解唔整成金庫o既畫面，等大家可以試下史高治叔叔係金庫入面暢泳o既感受？

我哋早上拎咗城市足跡館o既預約券，仲有少少時間，四周圍影下相~

空滿夏日feel o既裝飾~

呢度係石油館對開o既空地~幫大家加添唔少涼意呢~小朋友仲豁出去﹗衝入水度玩lu~

待續

Comments

comments