因為回程時落大雨勁塞車，所有額外嘅行程都唔關我哋事啦，返到去積水潭站，我哋搭番地鐵出嚟～生日飯喎，應該要食得好啲，如果可以食到鴨，達成嚟北京嘅其中一個重大目的就更perfect了﹗記得家姐話，慕名去食嘅鴨多數唔好，隨便入去嘅又有驚喜，搞到我哋唔敢跟旅遊書搵嚟食，search下啲唔駛上網嘅apps睇下有冇好idea啦～見到有間「那家小館」，咦，係咪家姐話好正嗰間？定係「那家花園」？唔記得了，因為冇確實地址，只有地圖上嘅一個pin⋯

我哋即管試下搵啦(係天黑之前^^”)～結果係嗰一點嘅四圍行來行去都冇啲類似嘅嘢﹗﹗oh no no～退而求其次，附近見到有間食烤鴨又似樣啲嘅就算啦⋯但係北京實在太太太太大，唔係話行兩步就有間餐廳嘅境況⋯而且雨都落得比較密，又好狼狽了～好不容易有間靚靚酒樓，入去一問，原來食揚州菜，冇烤鴨～

唔得﹗﹗我要食鴨﹗﹗結果只好去我哋記得嘅唯一一間烤鴨，就係時時經過王府井大街時見到個招牌嘅「大董烤鴨」﹗其實有少少擔心，因為佢係出名嗰類，唔知中唔中家姐講嗰啲有名無實呢？

入到去，原來係裝修時尚type，全店座無虛席呢～

好似都要等成30張枱左右﹗哇，連張籌號都咁精美～

大家等位時大董絕對唔會待慢你～有無限飲品免費供應﹗除咗呢度見到嘅檸水酸梅湯之外，仲有汽水，好似紅酒都有添～

而且可以欣賞師傅們烤鴨﹗

大家見住啲油亮亮、香噴噴嘅烤鴨，應該唔會唔耐煩走咗去吧？

似乎大董烤鴨真係大有來頭呢，拎過咁多獎～有興趣可以睇下佢哋個網頁：

http://www.dadongdadong.com/

其實大董有提供大家免費wifi，但老土嘅事情係，你要先關注佢微博，問題係，我哋冇網絡又點關注佢微博，從而去享用佢嘅免費wifi呢？

好在有更重要嘅事情要做，我哋趁等位嘅時間揭揭佢超巨型嘅餐牌先，如果已經餓到腳軟，入座時先再揀菜式就有排都未食得﹗你見到個餐牌巨得有幾誇張就知～

入座了～我哋呢個廳坐咗六張兩人枱左右，俾著係香港，呢啲size嘅枱絕對會俾你坐夠四個人，好好丫，大家都有私人空間，而且擺放餸菜都唔會太逼～你睇，個餐牌巨得幾緊要﹗﹗我哋其實揀好啦，要揭定啲頁數等叫waitress過嚟時唔會咁狼狽﹗

好可愛嘅筷子座～會唔會唔忍心食烤鴨？

大董烤鴨屬於比較精緻嘅餐廳，價錢都唔平，飲品之中其實比較經濟嘅選擇係汽水呀、鮮榨果汁呀嗰啲，茶反而仲貴，而且要逐位叫，但感覺上食中菜都係飲茶搭調啲，我哋揀咗平時少啲飲嘅菊花～上次去上海時遇著相同嘅狀況又係飲咗菊花呢～(請參閱：16-6-2010：上海世博遊day 1．南京路步行街)

前菜我哋叫咗呢個－－好靚嘅花束﹗底部嘅脆脆好似係北京嘅傳統小食，唔記得叫咩名了，上面配咗各樣鮮果，再加上花花配襯，睇起嚟賞心悅目，食落去清新又開胃﹗我哋一口一個，兩個人share，全部口味都試齊了～

係貴貴菜式之中居然都有平價產品，RMB8一個嘅素包子，冇圖片咁晶瑩剔透，食落味道就更平凡了～

鮮百合蝦米炒蠶豆其實係好清新、好適合夏天嘅一道菜，但⋯有啲飽肚﹗﹗尤其係食咗鴨之後～

見係生日飯，我哋豪啲叫咗兩款湯，一黑一白﹗白嘅呢個成杯cappuccino咁嘅？﹗面係泡沫，其實裡面係烏魚子湯，好鮮美～

黑嘅雖然外表先聲奪人，但墨魚湯口味唔夠突出，白湯好味啲﹗

主角準備要上場啦﹗「day day day~你扮影我，影下師傅片隻烤鴨啦～」

配菜都要影一影﹗另外收費㗎～的確好精心安排嘅～香港一般只有大葱同青瓜、醬就只有一款，但呢度有好豐富選擇呢﹗醬料方面除咗有我哋熟悉嘅甜醬之外，有食脆皮專用嘅砂糖啦，不得不提蒜蓉，因為佢起到畫龍點睛嘅功用﹗配料除咗有大家常食嘅大葱同青瓜之外，我好欣賞甜甜嘅哈蜜瓜條﹗另外仲有酸菜粒粒呢～咁多配菜令烤鴨口味更豐富更精彩呢～

夾住烤鴨用嘅餅除咗薄餅之外仲有個芝麻包，我就鍾意薄餅多啲～

主角出場了﹗其實鴨總共有三碟﹗﹗我哋係餐牌上見唔到有半隻嘅option，所以我哋兩個人食咗一隻﹗﹗所以「兩隻肥嘢」就係咁嚟㗎啦～(兩隻肥嘢嘅典故請參閱：25-5-2013：釜山麗水day 1(part 3)．麗水世博之Aqua Planet水族館)北京烤鴨同香港食嘅烤鴨最大嘅分別係，佢哋每件都係皮連肉，而且鴨比較瘦(家姐話呢個係大董烤鴨嘅特色而唔係北京烤鴨嘅特色喎)，皮之下就係肉了，冇乜肥膏～所以口味相對淡，又唔會太膩，可以食多幾舊﹗兩件夾落一塊薄餅入面就最good﹗

好好味丫～

我哋食到咁上下，waitress走過嚟好卷脷地問我哋「鴨架子要外帶還是xx？」repeat咗兩次都聽唔到個xx係咩⋯總之唔外帶啦～

哦，原來係用鴨架子嚟滾湯～早知包湯就唔需要叫嗰兩個湯啦～當然嗰兩個湯都好有特色應該一試～結果飲咗好多湯﹗﹗唔，因為係即時滾，而且冇落好多配料，所以味道比較淡，如果住係北京，真係應該帶個鴨架子返屋企﹗

好滿足嘅一餐，而且極度飽﹗雖然有好多好吸引嘅甜品，我哋都無能為力啦～

後來返到嚟同家姐講起，原來佢嗰次去北京都食咗大董烤鴨呢，而且仲係專登book咗枱先去，好似都係慶祝甚麼呢～我都推介大董烤鴨﹗特別係適合慶祝時食，食物精緻好味，環境舒服寛敞，又可以坐耐啲，好好～

食飽飽，慢慢散步返酒店啦～今次唔會迷路啦﹗

待續

前往其他中國旅遊blog

Comments

comments