其實世博o既第一日嚟講都幾成功，我哋總共行咗18個展館﹗咁當然，其中都有啲「頹」館o既~不過「正」館都有唔少~係盧森堡館行出嚟，其實有少少肚餓，但見到附近o既荷蘭館又條隊郁得好快，又好似有嘢食喎，不如行埋啦~

有別於其他館，荷蘭館採取全戶外o既設計，所以想乘機涼冷氣o既遊客就no way喇﹗因為參觀o既模式係一條路行到尾，先兜上去，再兜番落嚟，所以清條隊清得好快，沿路都有唔少展品咁~主題？講o既都係一啲新科技東東、環保東東咁啦~

令我最深刻o既係佢地面o既人造草皮﹗勁多人係度休憩、野餐﹗(之後都包括我哋兩人﹗)有啲人真係舒服到瞓係地下o架~都算係佢成功o既，留住咁多遊客係度~而且似乎大家都好enjoy~而一隻隻羊咩咩係展品之一？大都騎埋上去休息囉~我都冇機會同啲羊咩咩合照添~

會眼仔碌碌o既bear bear熊﹗佢o既目光會追住你行o架~

荷蘭館有樣唔好，就係成日都要「裝」啲展品，所以大家就堆晒上去喇，逼呀逼，day就叫我：「去睇啦﹗去睇啦﹗」自己就係度影我逼o既樣子然後keekee笑~可惡呀~

我哋行荷蘭館時適逢有花車遊行演出呢，聽朋友講話，路過就望下啦，不過唔需要專登搵個靚位睇，冇錯，講得啱~果然唔太突出，我哋企係呢個位睇咗幾分鐘就繼續行了~

原來Miffy係荷蘭兔嚟o既呢~

我哋都加入野餐休憩一份子~買咗荷蘭特色小食﹗唔記得炸嗰舊叫咩名lu~:p都幾好味o既~不過因為好細，所以我哋後來都要加碼再jap jap jap~

有時排隊都有表演睇，咁就冇咁悶啦，路經法國館，見到呢個揮舞彩帶o既人~我哋排法國館嗰日，有隊band係度演奏添呀~加添節日熱鬧氣氛﹗

因為隨住時間越來越晏，浦東園區呢邊o既人就會越來越多，我哋決定呢個時間過去浦西園區~來往浦東浦西兩邊，可以搭巴士越江線、可以搭地鐵13號線，不過我哋就選擇搭渡輪~

每15分鐘一班，浦東浦西每邊各有三個渡輪碼頭，等船就耐少少囉，不過上咗船搵個位坐，小睡一會，補充體力之後可以再戰江湖呀﹗所以都不失為一個好o既選擇﹗

人人人人人人人人~~~~~~~~~~無論邊度都係咁多人﹗坐船都冇例外﹗諗住搵個甲板最近欄桿o既位坐，可以睇下風景，件事當然冇咁順利啦，我哋坐低無幾耐，自然有一排人企係欄桿前面﹗所以…零風景，只有…人人人人人人人人~~~~~~~~~~

一落船去到D區，首先望見o既就係世博會博物館喇，都幾好睇，講番世博會150年o既歷史~展出咗好多好有歷史價值o既圖片、物件~

先睇一條片，講番咁多屆世博會o既地點、革命性o既展品~

1970年大阪萬博o既太陽之塔﹗如果click去我上次去關西旅行o既blog blog可以見到佢o既真身呀~嗰次去到咁遠o既萬博紀念公園，都主要係要一睹佢o既風采咋(26-11-2009：大阪白浜day 3(part 1)．超讚的萬博公園紅葉)~

出到嚟差唔多兩點鐘了，正好﹗有少林寺o既武術演出~

真係虎虎生風~讚呀﹗雖然實際威力唔知有冇武俠小說入面講o既咁犀利…:p

都有展示俾我哋睇對戰，咁呢啲當然係排演好o架啦~

本身想睇日本產業館or城市足跡館，但勁多人排隊喎，聽朋友講，幾個主題館(城市足跡館、城市未來館、城市人館、城市地球館同埋城市生命館)應該都係唔駛排隊o架喎，所以我哋決定遲少少先去~

於是參觀咗韓國企業聯合館先~

呢個都幾勁，佢只係一片片o既金屬片，唔係screen嚟o架，係唔同角度睇過去，就見到唔同o既圖案~

介紹下啲環保企業東東~

(低沉普通話男聲)海寶、海寶、海寶、海寶、海寶﹗

入唔到去日本產業館，唯有食個草莓刨冰一解相思之苦啦~話說啱啱撞正有個「原宿時裝show」之類的東東係日本產業館要開始，於是霸咗個靚位，諗住有美女子睇下啦，點知開show時間到，一直都係個大screen播啲fashion show o既片，吓？﹗唔係啩？﹗睇咗十五分鐘之後我哋按捺不住走咗了，下次再經過呢個位時，又有一次呢個show，係有啲美女子o既，不過都唔係著住不同靚衫來回走，而係有個主持人問下佢哋感受之類，好似都唔係太吸引…

呢個上海企業聯合館我哋都冇入去呀，不過涼下佢噴出嚟啲霧囉~

待續

Comments

comments