2-6-2014:三十登長城day 4(part 1).四爺的圓明園

到第三日行程,今日嘅目的地係去圓明園,其實我成日都偠搞亂圓明園同埋頤和園,圓明園通常前面加上「火燒」兩個字,唔唔係喇,睇嘅係頹垣敗瓦,至於頤和園,仲係今時今日keep得好好嘅皇家庭園,兩度位置好近,但範圍都好大,恐怕未必可以去晒兩度,兩邊只夠時間去一度點解我會去睇廢墟instead of靚靚庭園?因為要見證歷史?nonono,其實我都比較膚淺,事關睇咗「步步驚心」,小說中最令我印象深刻嘅其中一段非常浪漫嘅,就係講四爺(即後來嘅雍正皇帝)要避開其他人享受一個人嘅休閒時間,佢就會去圓明園嘅荷花池度泛舟,荷葉好高,遮住佢嘅小舟,人搵都搵唔到佢,有一次佢帶埋若曦去佢嘅私人秘密空間,噢,好浪漫~可惜後來睇電視劇,呢幕嘅CG做得好唔掂,破滅晒我嘅幻想,所以我就好想睇下真正嘅荷花池,同埋睇下有冇得係入面同我個男人泛舟了﹗呵呵~SONY DSC 出發了﹗影影我哋酒店嘅外觀,尋晚最後一晚係木棉花酒店住了,之後嗰晚係邊?繼續留意我個blog咪知道囉~IMG_2960

有鑒於尋日去到目的地發現冇早餐食嘅悲慘情況,我哋決定要食飽飽至去圓明園﹗王府井附近一大早唔多食肆,唔食酒店對面嗰兩間就只好係麥當勞同KFC之間選擇﹗我哋揀咗麥當勞,一場去到外地嘅M記,梗係要試下「地道美食」啦,我揀咗煙肉蛋燒餅,香港冇㗎~上次去西班牙時都專登試咗「地道美食」~(請參閱:7-11-2013:西班牙day 8(part 4).溫暖的鬧市hostel.最後tapas衝刺@Madrid)SONY DSC

呢個商場點解感覺咁香港嘅呢?冇錯﹗佢係新鴻基地產嘅北京apm,難怪有種莫名嘅熟悉感啦~

http://www.beijingapm.cn/

我哋冇逛街,只係稍稍係度借用一下個洗手間,連入面嘅裝修都同觀塘嘅apm同出一轍㗎~SONY DSC

點解連地鐵都咁似香港嘅?記起了,好似話北京有條地鐵線係港鐵投資嘅,八九不離十,應該係呢條四號線了﹗啲裝修同港鐵一模一樣﹗連「小心車門」嗰把女聲都係香港嗰把呢~SONY DSC

好多好多好多個站之後,我哋到咗圓明園站了﹗北京好多地鐵站都有特色設計呢,有啲同嗰個地方有關係嘅東東~之後去嘅雍和宮站都古色古香的~SONY DSC

有麥芽糖公仔丫﹗我記得細個時同爸媽去旅行,佢哋都有買過呢啲麥芽糖俾我同家姐,嗰陣好似係十二生肖嚟㗎呢~SONY DSC

知道圓明園好大,上次爹媽都話差啲迷路,我哋除咗買咗門票之外都打算買張導遊圖,揀咗呢張手繪地圖,好似靚啲又有紀念價值咁,但結果⋯憑裡面嘅景物真係唔係太orientate到自己,結果只成為紀念品﹗SONY DSC

咁恩愛嘅相相留俾後生仔女啦~呵呵~SONY DSC

圓明園有分三部份,分別係圓明園、綺春園同埋長春園,我哋就由綺春園入口進入﹗其實有啲人去圓明園主要睇西洋樓遺址,可能會由另一邊入口入去,我哋反正全部都諗住逛逛,邊個入口入都冇所謂啦~SONY DSC

一家三口嘅古裝攝影好搞鬼,特別係個小baby呢,咁細個都有得扮鬼扮馬~SONY DSC

哇,入到去果然處處都有荷花池呢,邊一個係四爺嗰個?之前話御花園好細,難怪啲皇帝要另外再起啲皇室庭院嚟遊玩遊玩啦,咁至似樣嘛~SONY DSC

荷花真係好優美呢~

SONY DSC

係地圖上完全睇唔出邊個係四爺個荷花池,反正見到有船搭,反正我哋都要去睇西洋樓遺址,上咗船先啦~呢隻船仔其實係交通船,浪漫氣氛就冇喇,前面幾個女人吱吱喳喳咁~我哋結果都有「賞荷花」同埋「泛舟」,不過兩者係分開的,而家賞咗荷花先啦,電動船開到咁快,氣氛係差少少㗎啦~

IMG_2976

我哋自己浪漫啦~SONY DSC

西洋樓遺址有好幾楝倒下嘅building,唔睇介紹就完全唔知道堆頹垣敗瓦係乜東東了~你睇中國人,「禁止攀爬」標誌後面係⋯充滿攀爬嘅人﹗SONY DSC

我哋乖乖的係前面影好了~:)SONY DSC

呢邊太多廢墟,我比較有興趣嘅係呢個迷宮﹗其實呢個迷宮係照以前圖樣重建的,老實講已經唔算係古蹟了,anyway,呢個慈禧太后都嚟玩過三次嘅迷宮我都覺得幾好玩丫﹗SONY DSC

一層一層的,雖然圍牆未至於高過人頭,要走到中心嘅亭子都唔係咁容易㗎~SONY DSC

yeah,到達終點,成功了﹗呢張自拍王雖然唔太成功,我都要post出嚟,大家請留意day嘅post,哈,我哋出發北京trip之前去咗五月天演唱會,話說嗰日有個狂自拍嘅少女觀眾,都唔知係咪真係鍾意五月天的,由開場到散場都不停咁自拍,我唔係特別留意佢,但佢坐係我哋十點鐘方向,每次擰個頭向嗰邊都見佢自拍緊,所以嗰期呢個post同表情成為咗我哋嘅笑話⋯:pSONY DSC

呢個要特別影,因為呢個就係水力鐘了,水力鐘咪就係十二生肖獸首嘅位置囉,啲富豪幫手係海外買番嚟爭一啖氣嘅就係for呢個水力鐘了﹗其中返到中國嘅真身我哋今個trip就冇緣觀賞,但就睇咗成龍拍戲用嘅仿製品,而家放咗係鳥巢,day 5我哋就去參觀了,大家要繼續留意我個blog啊~SONY DSC

呢度有介紹多啲水力鐘噴泉同十二生肖獸首了﹗SONY DSC

人人人人人人人~~~~

肚子餓了~明明北京應該有好多美食,但天時地利人和都好似唔係好對路,所以我哋又隨隨便便食咗一餐啦~SONY DSC

小攤子之中揀咗睇落比較可靠嘅炸醬麵一人一碗,肉碎就欠奉喇,好在汁都好多,麵嘅質感都算ok,總算填飽咗肚子﹗IMG_2998

滿足感仲差少少,叫多個煎餅啦,即叫即煎仲放塊脆脆落去,好似唔錯咁噃?SONY DSC

超熱+超薄膠袋+冇餐具⋯有少少狼狽添,唔,冇預期中咁好食添,個脆脆夾咗落去原來會變成腍腍~SONY DSC

路過紀念品店,俾呢個皇帝啤牌吸引咗,點解個個一樣樣嘅呢?因為都係宮庭畫師嘅作品吧?作為皇庭畫師應該畫風都唔可以太出位?結果呢副啤牌就冇買到,後來反而買咗副老子語錄啤牌俾爹爹,有冇拎出嚟玩?SONY DSC

哇,見到有自己撐船仔嘅地方啦﹗雖然呢度冇荷花,但都好想玩下﹗水上單車vs電瓶船,我哋既然目的係泛舟,唔需要咁快啦,水上單車啱我哋了﹗踩、踩、踩⋯我哋原來揀咗樣好攰嘅嘢嚟做﹗﹗順便運動啦~SONY DSC

撐船仔嘅湖都幾大,我哋被呢一角嘅小橋楊柳吸引咗過嚟~SONY DSC

我摸到楊柳啦~

結果太累、又怕overrun要罰錢,我哋提早咗少少回航,過咗癮就值回票價啦~IMG_3001

口渴渴買下嘢飲啦~今次終於試咗北京周圍都見到有賣嘅酸奶了﹗今次終於見到啲酸奶係放係雪櫃入面﹗如果唔係我都唔敢買呢~奇嘅係,我買冰凍酸奶時有個男人居然要求要室溫酸奶,莫非佢想乳酸菌含量更高?﹗明明天氣咁熱應該冰凍好味啲丫?唔,三樣試咗嘅街頭冰品飲品之中,我最愛酸奶﹗口感味道好豐富,而且好自然清新~正~諗起上次斯里蘭卡嘅正正酸奶甜品呢~(請參閱:11-12-2012:斯里蘭卡day 4(part 4).舒適的家@Nuwara Eliya)SONY DSC

繼續有一個又一個嘅荷花池~未算好盛開呢~SONY DSC

荷花真係好靚啊~我哋發覺呢度啲荷花都冇話生得好高,係季節未到定品種問題?可能荷花之間嘅小舟應該係作者想像吧?

時間差不多,腿又好累了,我哋離開圓明園,因為今晚入住嘅地方好特別,我哋要趁天黑之前去到,都係早少少返木棉花酒店拎行李穩陣啲咯~

待續

前往其他中國旅遊blog

Comments

comments

在《2-6-2014:三十登長城day 4(part 1).四爺的圓明園》中有 2 則留言

  1. 我個時都有食煎餅,脆脆繼續都係脆脆個喎~可能你食個檔本身個脆脆已經係腍腍,另外,我係圓明園的時候都係食炸醬麵…
    你有無去全景模型展覽館附近?我覺得最似既荷花池係個個~

    • 因為其他嘢睇落認真麻麻地⋯
      我哋冇去到全景模型呀,不過附近的荷花池都有逛過的~酸奶下面嗰張相應該係嗰邊附近﹗

發表迴響

你的電子郵件位址並不會被公開。 必要欄位標記為 *