1-6-2014:三十登長城day 3(part 1).人山人海過生日@八達嶺長城

打咗四篇「三十登長城」一直都未點題,嚟到day 3,我哋終於要「登長城」,而我亦變成「三十」了﹗三十歲感覺好似進入人生另一個階段咁,不過對於幸福嘅女人嚟講,年齡似乎唔係太緊要了,好似媽咪咁,開開心心咁同大家宣佈佢「登陸」,都一樣冇問題﹗所以我都唔介意命名今次個trip嘅標題咯~

講完廢話了﹗出發吧﹗通常一日嘅開頭都係講食早餐,但我哋今日有少少不幸,因為食唔到早餐⋯又唔想尋日今日食埋同一間早餐,出到王府井嘛,又只有麥當勞肯德基開咗門,唔係好甘心嚟到咁遠食呢啲快餐店,諗住去搭巴士嗰度附近搵食,又乜都冇得賣⋯我哋捱住百力滋,靠瞓覺去麻醉自己,下一次有嘢食時已經去到長城咯~SONY DSC

都敏俊xi?我哋經過王府井步行街去地鐵站,一大早就見到都教授企係度賣手機了~果然人氣爆燈﹗subway

搭咗咁多次地鐵都係第一次影下相﹗右下角嗰隻恐龍定哥斯拉唔知賣咩廣告,但佢講出咗我係呢幾日係北京面對街頭小食嘅心聲~嗰三樣時時見到都向我招手嘅東東,最終我都本住「一場嚟到」嘅心態全部試晒,之前出現咗嘅老冰棍、雪梨湯啦,仲有聽日嘅酸奶,都係「想買不敢,不買又想」⋯bus

我哋去嘅八達嶺長城,算係長城旅遊之中最初階、最容易去得到嘅,近啲、交通方便啲、旅遊書肯定有介紹、配套都齊備啲~我哋按旅遊書教嘅到積水潭站去搭巴士,因為見個站離地鐵有啲遠,唔太sure,出門前都上一上家姐個blog,ok,家姐都係咁去,咁就冇問題了~係lobby上網刻意冇close家姐個blog,有冇增加咗收視率?

話說我哋去巴士站其間都發生咗小插曲,行過去都要十幾分鐘,行我哋前面個鬼婆著得有點商務,我哋仲話佢可能係住係北京工作嘅,點知行行下見到佢同前面一個北京大叔講嘢,個大叔好焦急咁向我哋兩個招手,原來佢要問路,都係要去長城﹗解答咗佢之後佢非常感動呢,話如果唔係見到我哋,返到俄羅斯就唔可以同朋友講北京都有講英文講得好好嘅人,當我話我哋其實係香港過嚟嘅遊客時,鬼婆拍一下頭~hee,佢都未遇到~

之前聽家姐講要小心假巴士,似乎相隔幾年,假巴士已經掃蕩成功,到咗箭樓只有乾乾淨淨嘅一條隊~呀,大家真係一定要有「北京八達通」丫,搭所有巴士拍咭都有四折,係四折﹗﹗﹗所以去八達嶺長城,RMB12嘅巴士變成只需要RMB4.8﹗後尾我哋亦因為搭巴士太經濟而任性地隨便跳上車跳落車添~SONY DSC

巴士都幾舒服,我哋一覺醒來已經到咗lu~事關好可憐的冇早餐食,兩人只靠一小包百力滋充飢,我哋嚟到第一件事要食飽飽先~呢度除咗有紀念品店、餐廳之外仲有好多小吃店,其中最吸引我哋嘅莫過於有兩個賣烤串嘅小伙子,佢哋開住強勁節拍嘅音樂,烤串時跟音樂擺動身體,好有幹勁﹗lunch

美食廣場太多人太油煙,我哋揀咗分開嘅一間小店子叫「加洲牛肉麵」,吓?加洲真係California個加洲喎,乜嗰邊啲人食牛肉麵乎?anyway,滿足感就欠奉㗎啦,牛肉麵冇乜幾多粒牛肉,砂窩豆腐貪佢有啲菜食唔會太多油,總算填飽肚子啦~SONY DSC

未到買票口,已經有關於長城嘅裝飾﹗抬頭望都遠遠見到長城了﹗SONY DSC

人太多,我哋遠遠影呢個八達嶺嘅招牌好了~iMcZ_i2fHNliZQm7SioPow

我係咪人生第一次登長城?nonono,其實三歲時就去過啦﹗嗰陣仲同爺爺嫲嫲婆婆爹媽家姐去添~睇番呢個trip啲相時,媽咪總會講,嗰陣你哋兩姊妹著嘅牛仔衫褲以嗰陣嚟講好有型㗎~大家認唔認同呢?SONY DSC

好,27年後我再登長城﹗﹗SONY DSC

入到去可以揀向左走or向右走,我哋預習做得唔多,都唔sure點樣行至啱,睇番書原來好漢坡係北八樓,咁唯有向北嗰邊行啦,由北一樓出發~gogogo~SONY DSC

天氣其實已經冇尋日去故宮咁熱,但大家都行到興合合,最涼快莫過於中間呢個隙﹗SONY DSC

人人人人人~其實都幾多高低起伏,有啲位置都幾斜下添,大家都要靠一靠扶手~有一家人同我哋差唔多位置,最初個小男孩(四五歲左右?)一馬當先,要爸爸讚佢,但行行下再見到呢家人時,小男孩已經係爸爸背上了⋯做家長真辛苦~SONY DSC

大家都向好漢坡進發﹗SONY DSC

咁多人圍住做乜?我話呢盤生意真係好好做﹗佢幫大家整鑄名嘅金牌丫﹗我後來都買咗個呢,heehee~SONY DSC

要落番山除咗靠一雙腿之外,仲有兩個其他機會,係北四樓可以玩滑道,北八樓就有吊車,我好想玩滑道丫~day都話比起吊車想坐滑道多啲,哈,佢係考慮安全因素,滑道始終係地面,但吊車係個天度,如果失靈⋯好似吊車危險啲~:pSONY DSC

老公頒俾我的獎牌﹗三十歲生日嘅金牌有意義啲吧?(雖然只係RMB10貨仔~)SONY DSC

其實搭吊車個view應該都唔錯丫~SONY DSC

哇,連延好遠嘅長城﹗﹗唔知Running Man奔跑嘅係邊一段路呢?SONY DSC

差唔多到北八樓,人越嚟越多,多到好似行花市咁﹗SONY DSC

原來出口好窄,所以好似水喉塞咗咁大家堆晒係度囉,好在尚算有秩序,我哋附近亦冇咩口角衝撞~SONY DSC

啲古人真係好勁好有毅力﹗﹗以現今科技要起成咁樣都難啦,何況二千幾年前嘅古代呢~SONY DSC

我哋由另一條路落番去北四樓搭滑道,應該好快就可以滑落去山腳了~SONY DSC

好難影相,selfie就免了~SONY DSC

咁嘅自拍ok嘛?

滑道比我想像中慢,又冇想像中咁滑,咁都不失為加插嘅一個活動項目嘅~又可以俾疲倦嘅腿休息一下~SONY DSC

落到山有個熊樂園,啲熊被困係細小嘅空間我都唔係好想睇,不過望下周圍嘅小攤子都有趣嘅,我哋講過要買世界各地嘅青蛙擺飾,今次遇到呢隻青蛙木魚,佢唔單止可以敲,用棍子刮刮刮,簡直就係青蛙係度咯咯叫呢,有趣有趣~小攤子叫人驚怕嘅東西都有,北京街頭咪好多烤串嘅,我係呢度見過就唔敢買嚟食了,因為見到有人係垃圾桶度仔細哋揀番竹簽出嚟﹗﹗環保係好事,但烤串竹簽重用我真係唔係好接受到囉~

逛完了,早少少出番市區吧,睇下有咩其他節目~

大家打算去八達嶺長城可以去官方網頁睇睇:

http://www.badaling.gov.cn/SONY DSC係車上揭揭旅遊書,考慮可以去邊去邊,最後落大雨塞車,乜嘢其他計劃都唔關我哋事lu~不過,好味嘅生日飯點都要食嘅,大家留意我下一篇blog哦,我哋要去食烤鴨了﹗

待續

前往其他中國旅遊blog

Comments

comments

在《1-6-2014:三十登長城day 3(part 1).人山人海過生日@八達嶺長城》中有 4 則留言

發表迴響

你的電子郵件位址並不會被公開。 必要欄位標記為 *