今年o既幾個旅行其實都編得幾密，頭呢半年就出咗三次trip玩，真好，如果唔係去下旅行，辛苦o既工作都好難捱呢~去完日本返嚟幾個星期又再出發lu，我今次都湊一湊熱鬧，去超級多人o既上海世博逼一逼﹗

世博對我嚟講，其實第一次有接觸就係睇「二十世紀少年」，講一班少年對於1970年o既大阪世博充滿憧憬，而上次去大阪旅行，都專登去一去萬博紀念公園，一睹太陽之塔o既風采，今次去上海，可以感受一下嗰班少年對世博o既狂熱~

其實屋企人+其他家族成員會係六月底組團去世博，不過因為拎唔到假期，唯有同day組成兩個人o既旅行團自己去啦~之前聽爹媽家姐講，係深圳飛都幾方便，而且平少少，所以今次我第一次試下自己係攜程網訂機票訂酒店，安排起嚟都幾方便，只要坐係屋企click click click就訂好晒了~

到咗出發呢一日，我同day一早就搭巴士去深圳灣口岸，再轉搭8號巴士去深圳寶安機場，係攜程網訂機票呢，係來回程分開揀航班o既，而且可以揀唔同航空公司，我哋去程就搭中國國際航空，而回程就搭南方航空~

我估以前都有係深圳機場搭過飛機o既，不過都唔係近期o既事，所以都唔係太記得lu~今次o既印象嘛，機場都幾新淨舒適~因為係內陸機，所以check-in、登機手續都非常快捷簡單~

飛機餐﹗莫非咁快就飛咗上去天空？﹗

no no no~我哋係飛機上開餐時仲係地面﹗咁都得？﹗冇錯﹗如果唔係上次爹媽有類似經驗，否則我都唔能夠相信~我哋上咗飛機之後先知道會勁delay，但完全講唔實會delay幾耐囉，而坐低冇幾耐，空姐就開始派餐，真係oh no no，即是起碼delay大半個鐘啦，要食餐+執拾…結果嘛，我哋架飛機delay咗兩個半鐘丫﹗好在帶咗天龍八部去睇囉~而我哋亦冇話排咗密密麻麻o既行程，冇話非要去晒不可o既~

好不容易去到上海，但已經比預定o既時間旅咗好多lu…去到上海，就馬上感受到濃濃o既世博氣氛，因為度度都見到佢—-海寶﹗係呢個trip中，我同day都好鍾意扮啲街上賣老翻海寶o既小販叫賣聲，低沉哋重覆「hai bao hai bao hai bao hai bao」~

上一次去上海係2004年，當時仍然未有磁懸浮列車呢，雖然貴少少，但都試下啲新科技啦，憑住當年登機證/機票，可以以優惠價40人民幣乘搭~

係咪特別舒適呢？其實無論外貌定座位，感覺都好似平時返樟木頭o既和諧號感覺差唔多，不過真係好快o既~你睇，佢最快時開到超過300km/h o架~day話，可以開得咁快o既車，條路線咁短真係徙晒~其實都節省咗唔少時間o既，相同來回龍陽路同機場o既2號線地鐵，有成十個站咁遠o架~

我哋係龍陽路站轉搭2號線去人民廣場站，拖住重重行李轉搭8號線就去到我哋酒店了~

今次住o既酒店係2007年新開幕o既連鎖式酒店，全國有好多間呢啲星程xx酒店，以世博期間，有338人民幣一晚，質素又過得去o既酒店，真係好難得咯~設備唔算特別好，又唔算豪華，不過佢最優秀o既地方就係地利喇﹗由酒店行去最近地鐵站老西門站只需要2分鐘﹗

我哋呢種房係除咗「無窗特價房」之外最經濟o既房型「無窗套房」，既然隻窗都冇乜景睇，不如試下有廳有房o既套房啦~

原本打算第一日去埋城隍廟、豫園，但飛機delay咗咁耐，唯有直接去尾站南京路步行街啦~

要埋到身去影個牌真係勁多人呀，不如影外圍算啦~

2010年o既南京路，比起2004年嚟講，我覺得更繁華、更熱鬧、更乾淨美觀、商店貨品更吸引~我哋係度買咗一人一件海寶tee呀，你追看我o既第二日blog blog就見到啦~

呢個咁大咁靚o既酒店+商場係2004年時都未起好o既~聽我兩個啱啱去完世博o既friend講，佢哋就係住呢間靚靚酒店了~我哋嘛，就入去搵食﹗

最後揀咗呢間叫做「俏江南」o既中菜食飯~裝飾得靚靚呢~開頭waiter揀咗張梳化椅俾我哋，但我哋見食嘢唔方便，都係轉坐一般o既枱椅比較好~

原來上海興咁樣o架？去茶酒食飯冇茶o架，茶要分開order，有好有唔好o既，一order嘛，茶錢就比香港貴，但你唔飲嘛，就連嗰少少茶錢都唔駛俾~我哋兩個蠢材，驚order一杯茶佢會唔幫我哋添熱水，所以叫咗一壺﹗

所以呢壺60蚊o既菊花茶要好好品嚐呀~勁貴﹗我面前o既係冷盤咸蛋鴨肉卷~如果多幾個食就冇咁膩了~

睇下壺茶有咩咁巴閉要60蚊？﹗內容確實幾豐富o既，而且味道都好好~我哋仲叫咗頭盆鮮果鮮百合，同埋元蹄、雪菜炒竹筍~樣樣都好有水準﹗啲頭盆細細碟咁，估唔到啲主菜咁夠份量，食到我哋兩個捧住肚子走呀~

行一行呢個大商場先至落番南京路步行街，見到呢間「I’m David」時裝店﹗不過David佢本人揀唔到適合o既衫衫呢~

嚟到南京路o既重點，當然係行到黃埔江邊，一睹外灘同埋東方明珠塔o既醉人夜景啦~不過景色還景色靚，但…真係勁逼人呀﹗好多人好多人好多人好多人﹗

外灘o既夜景同當年一樣都係咁靚，而且而家o既相機進步咗，可以影得更好呢~

哈哈，搵番呢張陳年舊相出嚟﹗你睇我幾年輕同埋幾瘦…:p

當然仲有明珠塔啦~

返到酒店已經累到不得了，要好好休息，因為第二日就要正式入去世博闖啦~

待續

Comments

comments