5-3-2011:澳門戒指團二部day 1.relax@珠海御溫泉

其實去完美國返嚟都只係一個月,都唔係咁快真係要逃離工作去旅行散心,不過有「任務在身」,所以決定係三月頭過去澳門一趟﹗heehee,事關今年年尾就結婚了,之前係日本睇中咗結婚戒指,係佢o既網網問可唔可以趁我去日本影pre-wedding時訂(by the way,我打呢篇blog時其實已經cancel咗去日本o既pre-wedding lu,天災o既嘢冇辦法啦…),但佢話戒指要送番去廠度刻字,前後都要兩星期,所以佢suggest我去佢哋o既澳門分店度買﹗我哋十二月時去咗訂戒指,所以而家有得領取咯~

十二月嗰次已經逛咗澳門,咁短時間之內唔想又花咁多時間係嗰度,所以就決定先去珠海o既御溫泉度一度假,休息一晚,第二日下晝先去澳門拎戒指,睇埋個「水舞間」至走囉~

我哋book咗ok早o既船飛,未夠十一點就已經去到珠海九洲港了,有專車接我哋去御溫泉,係車上當然呼呼大睡啦﹗

去到御溫泉時大概中午吧,都未係好肚餓,所以隨便逛一逛先食lunch,而且我哋間房都未available~

其實計起上嚟我諗好似都第三次去御溫泉lu,覺得呢度環境好舒服,可以relax咁度一個周末,所以嚟過都想再嚟~可以睇下我2006年嗰次去個blog﹗不過以前好似冇呢個小湯鎮喎,新嘢?入去睇下先﹗

有啲影相位…

原來入面模仿一個真o既小鎮,其實最主要就係一個美食廣場啦,有好幾間鋪仔可以食嘢,唔同種類o既都有,粥麵、燒烤、甜品…另外仲有啲假o既鋪頭啦,賭場又有、妓院又有,都係俾大家影下相咁~不過日頭時去o既感覺有少少,吓,好似有種荒廢咗o既感覺…不過我哋夜晚再過去時就完全唔同咯~

好啦好啦,食個lunch先,之後休息一陣先去浸溫泉﹗

兩個人都冇辦法叫大多款嘢食,我哋都係叫咗兩個小菜咋,但都大份都叫救命了~好飽丫﹗

入到房間lu,同以前一樣,都係日式o既房間,都幾舒適﹗heehee~不過景觀就冇乜~

休息一陣我哋就去浸溫泉了,去過o既人都知道啦,御溫泉都好大,總共二三十個池都總有吧?冇正式統計~有唔同味道,同埋聲稱唔同功效o既啦,有啲係水果、酒、花、香薰、中藥…又有個地熱帶可以俾大家瞓下上去休息﹗唔知係咪因為天氣都比較暖呢,點解我受熱o既能力咁差o既?﹗熱少少o既泉落去一陣就要上番嚟﹗而且有啲完全落唔到去添丫﹗

浸夠了,沖個涼,我同day講我都好想去做下按摩,我哋揀咗泰式按摩+香薰推油+面膜,都幾舒服丫﹗全身鬆晒~不過我第一次做推油,個師傅(當然係女啦)會推埋個胸?﹗

做完按摩都差不多到dinner time了,入夜啦,天氣都涼少少~好在都有配襯番件浴衣o既外套﹗

我哋決定去小湯鎮度食dinner~

呢度唔係用錢消費o架,要兌換呢啲「御泉通寶」,每人民幣5蚊一個﹗

係戶外坐,享受晚風~

夜晚o既小湯鎮靚好多丫﹗點點燈火~加添幾分浪漫呢~

啲食物其貌不揚咁,但居然樣樣都好食喎﹗我覺得仲好食過朝早嗰餐~我哋叫咗雲吞河、鹹雞粥、xo醬炒腸粉、醃小黃瓜同埋雙皮奶﹗個腸粉最最最好食呀~

入住御溫泉免費送咗啲小煙花俾我哋玩~雖然唔係咩勁煙花,但都好興奮呢,因為好耐冇玩過煙花了,而且係第一次同day一齊玩煙花﹗

靚~

哇~

我哋之後再入去溫泉浸多一輪先至沖涼返房休息~

記得以前去御溫泉有鬥獸棋放係度俾住客玩,今次就係另一種棋喎,day都係大約知道規矩係點,但啲軍官o既階級佢都唔記得,又冇說明書,所以我哋自己作番啲次序﹗第一次玩,好緊張呀﹗又唔知自己排o既陣式好唔好喎~但個game最後點樣結束?哈,係day大大咁呼吸咗一啖氣,吹跌咗佢自己o既所有棋﹗哈,冇晒底牌了,又俾我知道晒啲陣式,冇辦法玩落去咯~而且我都覺得呢個game太緊張了~:p

休息咯~

待續

Comments

comments

在《5-3-2011:澳門戒指團二部day 1.relax@珠海御溫泉》中有 8 則留言

  1. 御温泉去過兩次,印象不錯,但食店不多,現時多了小湯鎮,吸引力會大很多。浸温泉時還有飲品及小食供應嗎?這是御温泉的特別處呢!
    [版主回覆03/27/2011 11:17:00]replied

  2. Re媽:
    雖然整體都仲係唔錯,不過比起幾年前o既印象差咗少少~可能因為春天吧,溫泉區有啲蚊滋飛下飛下~
    飲品小食都仲有,飲品就只有清水同埋啲涼茶囉,係溫泉池旁邊賣雪糕我就覺得唔係太好,怕會整污糟池水,有一邊有啲小食攤家嘛,而家冇咗lu~而休息室o既水果三文治咖啡奶茶都仲有~我哋就淨係食咗少少水果啫~

  3. 酒店房同溫泉真的不錯!! 休閒~ 好久沒有放煙花了! 很開心 🙂
    [版主回覆04/11/2011 11:53:00]replied

  4. Re day:
    是啊﹗酒店房都幾舒服﹗溫泉都好o既,但係有少少立立亂~人多咗啲﹗
    我都好耐冇放煙花了,同day一齊放煙花仲要係第一次呢~

  5. Re Fion: 確實價錢唔係好記得添…不過好似$1100左右?包無限次進出溫泉、碼頭專車接送~

  6. thanks, 但我覺得呢個價錢去大陸唔多抵, 哈哈!
    [版主回覆04/15/2011 14:14:00]replied

  7. Re Fion: 都唔係咁計o既,一分錢一分貨啦~而且御溫泉比起海泉灣要好~

發表迴響

你的電子郵件位址並不會被公開。 必要欄位標記為 *