由西湖行返出嚟，諗住搵嘢食下﹗隨意隨意行居然俾我哋行咗去條步行街喎，我之前睇啲旅遊資料時都冇見到呢，後來先知道呢度叫「南宋御街」，係一條幾有特色o既觀光街嚟o架~我諗都有旅遊局o既悉心安排，因為入面真係好古裝呢~

誤打誤撞入咗去步行街區，心諗，好嘢，應該有好多嘢食吧~

兩旁o既店鋪都古色古香，究竟係真舊定仿古我哋都冇去考究了~

精品商店就當然有啦~

呢個揼得咁落力o既花生糖我哋都買咗嚟食，因為聞到好香﹗後來我哋回程時飛機delay都靠佢嚟充飢咋~

茶店o既茶博士都係著古裝﹗但我哋就搞搞震冇幫襯~:p

居然唔覺意又去咗景點胡慶餘堂喎，呢度係一間有好耐歷史o既中藥房，勁大隻字﹗

古裝鬼屋都有﹗好似只係RMB 10？不過我唔好鬼屋嘛，都唔係好關我事呢…

呢啲位就多人圍觀了﹗因為有有獎攤位遊戲，雖然大家對於禮物都唔係特別有興趣，但都想一試身手，呢個鬼佬都擲中咗一個，但乜佢哋唔係好鍾意打baseball o既咩？應該勁啲喎~

手工藝o既攤檔亦唔少，有好多都當場整俾你睇o架，呢位大叔就燒玻璃~我係早段時買咗一幅剪紙，打算送俾朋友做結婚禮物~:)

入去中藥局都好大喎，有得掛號睇醫生啦，有得執藥啦，仲有免費贈飲涼茶﹗有啲人拎成個樽去入呀，真羞家~如果喜歡隻涼茶，可以買返屋企泡添呀~

出到去街口，有酒樓lu，好嘢~望落去裝修得好靚，都擔心會唔會好貴，但睇過餐牌先都ok喎~杭州真係好多抵食o既美食呢~

酒樓叫做「皇飯兒」，有三層，裝修雅緻~坐得都舒服呀﹗去出面旅行，好多時都可以坐得鬆動啲，係香港出街食飯，最唔鍾意就係同隔離嗰枱太近，大家講咩都俾陌生人聽到晒，冇辦法啦，寸金尺土~

其實都有少少叫得多得滯，但我哋都勉力食咗九成半﹗最愛左下角o既粽子肉排，因為有我鍾意o既粽子啦，而且啲排骨勁腍勁入味，yummy~day就最鍾意左上角o既八寶豆腐羹，都好好味呀~右上o既筍同埋上面o既炒豆苗都好good~左邊中間o既鱔炒蝦仁因啲鱔係炸o既緣故，就食唔得多囉~

其實去到杭州都好想食龍井蝦仁o架，但呢間酒樓比較貴少少，打算下次去間平啲o既時先食~雖然最後都冇食到龍井蝦仁，但今次叫咗呢堆餸都冇後悔呀，因為樣樣都好味~如果大家去杭州，我都推薦去下食呢間「皇飯兒」，讚﹗

飽~

外面o既裝潢都好古典呢~

我哋之後出返去大街，似乎啲巴士都唔係好啱搭返去酒店，幸好都花咗唔太多時間截的士~

之後會講更多杭州o既行程呀，請留意~

待續

前往其他中國旅遊blog

Comments

comments