好多年前已經想去神山一趟，當年應該係睇過啲旅遊節目，對於攀登上神山山頂好嚮往，不過今時今日嘅我哋，上山肯定唔係一個option啦，起碼十年八年後兩個女先夠大去爬山吧~今次先參加local tour，遠觀一下呢個東南亞最高峰吧~由亞庇市區出發車程都要兩個鐘左右，所以導遊約我哋6:50am酒店lobby pick up，好在酒店早餐6:30am開始有得食，我哋計劃一開閘就衝入去食，我負責出去拎食物，務求最快速度拎到小朋友食得最快最多嘅食物，爸爸就帶領飲品小隊~雖然冇得悠閒地歎酒店自助早餐，總算填飽肚子出發吧~

美麗早晨good morning

Klook呢個local tour入面都有好多顧客comment讚導遊Jeff，我哋好好彩都係由Jeff帶我哋去玩，就一個導遊兼司機，帶住我哋一家四口嘅private tour，又自在又舒服~Jeff係馬來西亞土生土長嘅華人，主要講普通話，但都識少少廣東話可以同兩個小朋友講兩句，年紀同我哋差不多，所以傾起上嚟好舒服~大家咁早起身，當然上車就眼瞓啦，小朋友好快就倒下，咁就啱啦，儲番啲精力，今日好多行程呀~

幾日嘅day tour都係，當見到呢座清真寺，就知道離開市區，當回程時見番佢，就知道就快返到酒店了~

不停轉換睡姿嘅瞓、瞓、瞓﹗

之後就開始源源不絕嘅山路，慢慢上山都分唔到周圍嘅應該叫佢做雲定係霧了，好在Jeff駕車好穩定，可以坐得好安心~佢雖然係吉隆坡長大，但嚟到沙巴做導遊之後專帶神山同螢火蟲行程，對神山熟得不得了，最高峰試過一個月去20次﹗佢話嗰排行山行得多，身體都壯健咗~

我哋第一站停係一個小鎮度，叫做納巴魯集市(Nabalu Market)，最主要嗰度可以遠眺神山，影影靚相，順便去去洗手間同買下手工藝紀念品同當地時令水果~我哋去到時啱啱有雲遮住神山山頂，真可惜呢，咁冇理由停係度等啲雲走嘛，唯有照影啦~

本來應該望見嘅山

完全睇唔出係乜嘅山

但Jeff都好認真地幫我哋影咗好多張全家福~

去親旅行上山呀、觀景塔呀，總會有啲俾人入錢租用嘅座地式大型望遠鏡嘛，呢度都有呢啲「見錢開眼」，但係有幾個手提式望遠鏡掛係欄桿，大家有興趣就隨便入錢落錢箱自行取用吧~

榴槤樹，唔講都唔知呢，但仔細觀察，真係見到一個個榴槤掛係樹上面喎~

當日啱啱係主日，經營手工藝紀念品店嘅原住民好多都係天主教徒，佢哋要去聖堂就唔開鋪了，有趣嘅係，我哋沿路上山都見到好多聖堂嘅招牌，中、英、馬拉文齊晒，仲要啲招牌嘅格式、字體全部都一式一樣添~

Jeff話我哋知呢隻母貓懷孕，果然成日嚟嘅人連呢啲事都知~

手工藝品店雖然冇開門，但見到啲用籐嚟紮嘅球，曉話俾我聽佢最近係學校踢過古代足球—-蹴鞠，其他有咩賣唔記得晒都好，呢一刻我都仲記得有呢樣~

係呢個小鎮曉第一次見識到付費廁所，本來佢見要收錢唔想去，冇理由去廁所都要俾錢嘛，但之後啲廁所都可能要俾錢喎，結果都去咗，後來佢就比較唔同收費廁所嘅質素同服務，我都記得細個時見到歐洲啲華麗收費廁所(法朗1.3﹗隔咗廿年都仲記得﹗而家人哋用歐羅用咗好耐啦~)，同埋大陸啲污糟收費廁所(樟木頭啲up dup商場，地面超濕滑嘅廁所)，兩者都一樣令人嘩然~

我哋離開小鎮之前，雲散開咗，神山居然出咗嚟呀，太lucky了﹗

終於影到張靚靚相，你睇大家笑得幾滿足，詩，你唔開心咩？

你明明都好自豪咁話我聽你影到架~

再搭好一陣車，下一站我哋去樹頂吊橋~

進入波令溫泉Poring Hot Spring範圍~

Jeff一再詢問我哋有冇人畏高，同埋體力可否應付上山一段路，講真，我都難以預測曉會唔會驚，細膽曉確實有可能會驚，但一場嚟到冇理由唔試下就打退堂鼓嘛，點都試下啦~行山反而唔太擔心，如果時間唔係太趕，慢慢行點都行得掂嘅~

有唔少梯級，但未至於太難行~

200年歷史嘅古樹

而家睇番我當日Apple watch啲紀錄，其實由上山開始，到行五條吊橋，到落山，成件事都係58分鐘45秒，距離1.64公里，確實總爬升高度都有173米嘅，點解唔夠2公里都要差不多一個鐘，咪就係因為吊橋嗰段囉~

出發吊橋去

吊橋又窄又搖，加上落雨，我哋只能好似螞蟻咁嘅速度慢慢向前移動~曉差不多進入吊橋路段就開始緊張，開始行就喊，一路驚一路喊一路行，行行下就變成好嬲，一路嬲一路鬧設計條橋嗰個人，後來開始接受就變得沉默，默默地行埋剩低嘅部份~

慘慘曉樣

詩：我哋完成五條吊橋中嘅四條啦﹗

我哋頭頂嗰啲唔係汗，而係俾雨淋濕晒呀~

由上山到吊橋到落山係單程路一條，一旦上咗第一條吊橋，就冇緊急出口，一定要頂硬上行埋佢~曉雖然細膽，但都好有韌性，驚得嚟都總捱得過，回想番又冇覺得咁恐怖~後來講起，之後間酒店都有tree top walk嘅tour，問佢想唔想再去，佢居然話可以考慮喎~今個trip嘅另一驚嚇行程係day 4出海嗰程船，又係驚到喊驚到嬲，後來又順利克服咗，叻叻曉~至於詩嘛，都不知幾鍾意條吊橋，後來俾佢帶頭行先仲一支箭標去前面，我都跟佢唔切添~

果然，「上山容易落山難」真係講得冇錯，上山時雖然有啲樓梯級，但行起上嚟都唔算太辛苦，但落山時可能因為落過雨添，路面非常濕滑，要行得非常小心，感覺行咗好耐好耐好耐都未落到山腳~

我哋係咪可以去浸溫泉了？

前往其他馬來西亞旅遊blog

Comments

comments