31-5-2014:三十登長城day 2(part 3).貝洛拉維克與捷克愛樂樂團@國家大劇院

我哋係王府井步行街行到咁上下就搭地鐵返過去國家大劇院咯~因為買咗門票去聽音樂會~趁住去旅行,有呢啲咁即興嘅文化活動都好好丫,係香港反而未必會專登去買飛嚟睇添~好似上次去西班牙都聽咗個音樂會﹗(請參閱:2-11-2013:西班牙day 3(part 3).美味夜市場.異國的演奏會)其實今次聽管弦樂都有少少連貫性,咩意思?我去程搭飛機時睇咗本雜誌,入面有管弦樂團嘅航空托運呢,原來運送樂器要特特特別小心,有專人負責監控,最易爛嘅原來係鋼片琴同埋豎琴﹗SONY DSC

原來搭地鐵係天安門西站落車,正確嘅國家大劇院出口,係可以由地鐵站直接連接過去㗎﹗正~IMG_4225

演出開始前一個鐘頭可以開始入場,我都咕嚕做乜咁做俾人入去,諗落都明嘅,因為日間要參觀大劇院要另外收入場費,如果你入去睇show就可以叫做免費參觀~早啲入去就可以好好參觀一下﹗另外去到我哋至知嘅另一個原因就係要預時間做安檢﹗﹗係北京,唔知係咪奧運之後都咁做呢?去親邊度都要安檢,地鐵入站要啦、參觀大小景點要啦,有啲其實都檢得不是太詳細⋯反而國家大劇院都幾認真,大包包都要你全部寄存,細嘅要過X光~我哋仲好啦,個袋揹咗成日可以放低,兩手fing fing入去聽音樂會~只帶咗手機有需要時影下相咋~IMG_4226

記得上一篇blog嗰隻悠然自得嘅鴨鴨嘛?半圓形銀蛋蛋嘅國家大劇院四周有個小水池,由底部望上去就係咁嘅view了﹗IMG_4227

入去各個表演場地嘅途中有好多同音樂藝術有關嘅雕塑~IMG_4229

我哋今晚聽嘅「貝洛拉維克與捷克愛樂樂團」演奏會就係音樂廳舉行了﹗

我哋睇嘅就係呢個表演:

http://ticket.chncpa.org/product-929680.htmlIMG_4231

大劇院好靚呢~我哋兩個嘅裝束真係有啲叫人慚愧~去咁grand嘅大劇院聽咁grand嘅音樂會應該要著得四正啲,但我哋係一日周圍騰嘅遊客嘛,仲要係咁熱嘅北京,梗係T恤短褲方便啲啦⋯IMG_4232

音樂廳﹗其實個結構同上次西班牙嗰個好似呢~我哋坐呢度叫做堂座,係香港啲音樂廳好似比較少有呢啲位~IMG_4233

我哋呢種RMB400嘅屬於中價飛,但我好鍾意呢個位呀﹗相信比最貴價嘅更好~因為呢度好清楚可以睇到樂手嘅演出呢﹗特別係敲擊樂﹗﹗day嘅supernormal視力仲可以睇到佢哋嘅樂譜添﹗﹗IMG_4234

同西班牙嗰次個音樂廳唔同嘅係,嗰度好多古典嘅花花透明玻璃做天花,天然採光,呢度雖然係人工嘅燈光,但美感方面都唔輸蝕~IMG_4235

一樣有超大風琴呢﹗我好想彈一次啊~IMG_4237

睇下day自拍時僵硬嘅表情⋯IMG_4238

今晚有咩曲目呢?IMG_4239

場刊係呢度﹗

佢哋一連表演兩晚,兩場嘅曲目都唔同啊,所以如果有超級fans連續嚟兩晚都唔會悶~雖然我哋唔係好識呢兩組樂曲,但都分辨到唔同樂章嘅風格,同場刊講嘅好吻合呢~一日嘅疲累之後,係「柔版」時真係好有安撫嘅作用,如果有失眠嘅病人都真係應該試下聽古典音樂﹗唔係話個演出悶,其實大多數時候精彩嘅更多,開場嘅「沃爾塔瓦河」更加好聽到起雞皮﹗﹗

我最鍾意睇嗰幾位敲擊樂嘅樂手演出﹗佢哋雖然係一首曲出場嘅次數唔多,但都好專心係演出當中,要係正確嘅地方恰如其份地打唯一一下嘅鼓,唯一一下嘅三角,幫樂曲起到畫龍點睛嘅效果﹗而且啲木管樂都好好睇,好多個人發揮嘅機會呢,呢幾首樂曲俾到我哋一次過見識到每一種木管自己嘅獨特聲音﹗IMG_4240

演出時當然唔准影相啦(但我前面個女人好唔爭氣地冇較熄電話個聲,「卡擦」咁係演出時影咗兩張,第一張時有三四個人啤住佢,第二張時佢方圓兩米嘅人都啤住佢,但佢好似不以為意咁⋯>.<),所以我都等謝幕時影一張咋~

估唔到古典音樂都有encore部份,仲要encore咗兩次﹗最尾嗰首我哋稱為「冧fans」呢,係我哋耳中就係中國式嘅曲調,靠day嘅驚人視力,先見到樂手嘅樂譜寫住首曲叫做「我的祖國」,明白大家點解咁興奮又要起立歡呼了﹗

關於捷克愛樂樂團,可以睇下wiki:

http://zh.wikipedia.org/wiki/%E6%8D%B7%E5%85%8B%E7%88%B1%E4%B9%90%E4%B9%90%E5%9B%A2IMG_4241

文化真係唔同﹗係香港大家最多會熱烈鼓掌,係北京,原來真係會起身,要喊一聲「好~」以示欣賞﹗﹗

睇完表演,好滿足~by the way,我返到嚟香港,打呢篇blog時search一下,先知道原來捷克愛樂樂團去完北京演出之後下一站就係嚟香港呢~係文化中心演出丫﹗

去衣帽間拎番個袋時一額汗,原本諗住個電子鎖locker係高科技,因為你存包包要用門票嚟嘟,好似好individualized咁,點知我哋一嘟,咦,開嘅唔係原先個櫃,裡面仲要係吉嘅?﹗搵職員再試,又開另一道門﹗﹗點算﹗錢、回鄉證、相機全部都係入面添㗎~後尾都搞得掂,我哋啲東東仲係原本嗰格,原來呢個係有bug嘅低科技⋯>.<

出到去,嘩,忽然落大雨﹗我哋冇帶遮出嚟,但雨勢程度實在冇辦法衝,我哋唯有幫襯大劇院買咗把遮~跟住幾日都冇再用過把遮了,一直帶住跟住我哋搬酒店添,但最後,漏低咗係機場﹗﹗希望有人好好珍惜佢啦~

之後就辛苦咯~我哋搭番地鐵過王府井站,諗住搵嘢食跟住返酒店~原來十點半後嘅王府井已經變成靜英英了,冇嘢食﹗即是要返去酒店對面嗰兩間開得好夜嘅食店啦~我哋第一晚嚟到時一兩點嗰兩間都未關門~

但今次係我哋第一次由王府井站返酒店,地勢係知道的,但唔係太熟⋯結果⋯慘烈地迷路了﹗仲要大風大雨﹗我哋只知道要係王府井轉左入去我哋嘅東華門大街,但我哋唔知東華門大街要延續叫做東安門大街至接駁到王府井大街,所以我哋miss咗個路口,係後一個街口,見到東華門派出所就轉咗入去,一失足成千古恨,越行越遠,後尾再碰到有路人時至轉番去啱嘅方向⋯又累又餓又凍,好慘呀~手上啲地圖實在太簡略了⋯@_@”

我哋開頭諗住唔好早餐晚餐都同一間,所以去咗隔離嗰間,幾分鐘都冇人執枱又冇人招呼我哋,結果都係「變咗紅色」過番去早餐嗰間~我哋都係諗住清清哋叫啲小菜咋~IMG_4242

菜~但⋯中伏了﹗又係油油油油油~IMG_4243

叫咗個蕃茄牛腩煲,一般般啦,而且肉含量極低~IMG_4244個酸辣湯大到嚇死人﹗啲價錢同size唔成正比的﹗﹗因為好平,以為係細細哋兩個人share啱啱好,原來係六個人飲都夠嘅份量﹗冇辦法啦,到尾我哋都係淨係食啲餸囉,湯真係無能為力﹗

累死人了﹗要好好休息~ 🙂

待續

前往其他中國旅遊blog

Comments

comments

在《31-5-2014:三十登長城day 2(part 3).貝洛拉維克與捷克愛樂樂團@國家大劇院》中有 4 則留言

    • 我係香港去開叫埋你啦~管弦樂唔多去,反而過去一年睇咗兩次芭蕾舞,真係好正,會靚到嘩一聲~媽咪成日話芭蕾舞好僵硬,我都想叫佢去睇下改變下觀念~:)

    • 所以我唔夠眼睇唔到嘅嘢有理冇理都會叫佢望下個牌寫乜、前面寫乜之類~

發表迴響

你的電子郵件位址並不會被公開。 必要欄位標記為 *