嚟到十日行程嘅最後一日啦，因為搭下晝三點嘅飛機，只有上午少少嘅時間可以活動，有諗過一朝早衝去首爾站附近嘅汗蒸幕(請參閱：26-7-2014：加州婚禮+夏威夷day 1(part 1)．Silloam Sauna＠서울)沖個靚涼，再搭Arex去機場~我哋去韓國時室內仲係要戴口罩，戴住口罩喺汗蒸幕一啲都唔relax，所以決定唔去了~另一方面，因為雖然嚟咗十日咁耐，但基本要買嘅手信都完全未買，我哋用一朝嘅時間去採買啦~市區嘅大型百貨超市都要十點先開，買完再返酒店拎行李再去機場又好似好趕，上網搵下機場附近有冇shopping嘅地方，原來由機場搭站站停嘅機鐵，三個站距離嘅雲西站，有一間大型樂天超市，仲可以即時退稅，係大家臨走買手信嘅好地方，ok，gogogo~

另一方面，我哋出發時原本返港係機場+ day 2要做核酸，但啱啱改咗policy，變成抵港前要做快測，result自己keep，咁我哋就要拿拿聲買快測棒啦，睇下酒店附近邊度有得賣啦~

點都好，要食咗嘢先~

尋日向景福宮方向行搵咗間cafe食早餐(請參閱：30-12-2022：首爾江原道冬日滑雪行day 9(part 1)．韓服美女與最強侍從遊景福宮)，今日就試下向另一邊發展，呢間Paris Baguette我記得之前都有食過其他分店(請參閱家姐個blog：九個人‧去旅行  首爾加平之旅 – DAY 8 – 首爾路7017)，係有嘢飲賣，有得坐低食嘅麵包店~

我哋揀咗可以叮熱嘅English muffin，咁就可以食到暖暖地先再出去啦~不過唔知係咪店員好少一次叮四個包呢？叮完一次完全唔夠熱~^^”要加碼~

食飽飽睇下地圖邊度有便利店，原來麵包店轉個角就有幾間，格一格價先買，因為比較香港實在太貴了，我哋出發時香港買到最平大概$5左右一個test，我打blog呢一刻可以買到$3.5一個test~

呢種一盒兩個test，每盒12000 won，7-11做緊買二送一，24000 won/6 test，貴到震~

執好行李就出發去機場啦，原本打算搭機場巴士，但按住酒店職員俾嘅時間表去機場巴士站度等，都算有提早到咗丫，但等到過咗時間10分鐘以上都唔見架車嚟，我哋改搭的士算了，我哋四個人搭機場巴士都唔平，所以搭的士都唔算貴得好多，但逼好多﹗﹗韓國的士嘅車尾箱普遍細，放唔到兩件大行李，一件要放司機位旁邊，我哋唯有四個人逼晒喺後面，好似以前讀中學時同啲同學出去食飯時咁(嗰個年代起錶$12.5，搭去附近大商場唔駛跳，每人$2.5，正)~

去到機場甚至可以check in了，寄咗行李就一身輕，帶埋個大摺疊旅行袋買手信去也~

雲西站

基本上冇得慢慢逛，見到啱嘅就掃落架購物車度，時間緊逼呀~

成功採買完畢，搭返鐵路返機場了~

機場鐵路班次比較疏，啱啱走咗架車，我哋玩住「猜櫈仔」等車，好似「猜樓梯」一樣，變成櫈仔版嘅人肉棋囉~

去到機場，排隊安檢同辦離境手續超長龍，等到我哋由時間好充裕變成時間好趕急，我已經心急如焚，一心諗住入到禁區買少少嘢食同嘢飲(未食lunch嘛)，變成個心已經放棄咗買嘢食，再變成入到去要飛奔去閘口，我同定day講，「陣間過咗關你俾晒啲嘢我拎啦」，佢就意會到我意思係佢負責抱住詩拔足狂奔咁解~我個心已經好急，後面仲不停有人走上前話，我要趕上機，可否借借俾我行先，出現咗幾組咁嘅人~其中一組後生女，雖然講英文，但拎住本同我哋一樣嘅passport，我估計佢哋根本就同我哋搭同一班機返香港囉~

雖然我哋寄咗行李先去買手信係輕鬆啲，但出事啦~除咗零食、飲品等之外，我揀咗幾包湯/餸，原來唔可以hand carry上機﹗﹗結果被沒收晒啦，真可惜~

拔足狂奔﹗﹗﹗去到閘口已經登緊機，anyway，順利上機，而好好彩，喺除安全帶標誌熄燈前兩個小朋友冇話要去廁所~

上咗機爸爸分啲零食俾大家頂住檔先~

好在好快就serve飛機餐，特別餐仲要派先，呢個係order兒童餐最大嘅好處，另一個好處就係食得慢吞吞都冇咁快俾人收嘢~

自己乖乖食，乖乖睇電視，媽媽都可以睇自己鍾意嘅節目﹗今次睇埋其他Running Man集數，仲未到，見到有之前韓文老師推薦嘅韓劇衣袖紅鑲邊(請參閱：13-1-2023：《衣袖紅鑲邊》的神奇力量)，咁就試下開嚟睇啦，喺機上睇咗半集，返到香港諗住繼續，原來黃Viu要會員先有得睇﹗開咗個頭冇計，subscribe咗，唔緊要啦，遲啲cut番啦~(次次都係咁講，但通常都會冇咗件事…)

瞓埋覺就仲叻叻喇~

安全抵埗﹗其實三父女都鳥倦知還，早幾日已經開始想返屋企，得最貪玩嘅我覺得可以繼續玩多幾日~打完blog啦，係時候plan下下一個trip，究竟下一個目的地係邊度呢？

首爾江原道冬日滑雪行完滿結束

前往其他韓國旅遊blog

Comments

comments