今個聖誕假期家姐一家去澳洲旅行,我見爹哋生日嘅一月一日家姐佢哋都未返到香港,反正會遲啲先食生日飯,我就約爹媽一齊去個短線旅行~爹之前講過想去潮汕一帶,而我就話未坐過高鐵,於是我哋就參加咗大航假期嘅潮汕三日兩夜高鐵團~
高鐵雖然早上九點幾先開車,但旅行團約我哋七點幾就要係西九龍站集合了,為咗用最少嘅時間一齊出到去,我哋提早預約咗架Uber XL係樓下等,可以載晒我哋一行六個人~
出車時仲係黑麻麻
慢慢日出了
去到領隊度點名之後,我哋就去食早餐,美心MX只有外賣,我哋要坐高鐵站啲櫈嚟食嘢~
有少少狼狽添~
高鐵站有啲節日裝飾,但我哋人太多,遮晒Peter Rabbit添~
高鐵要用實名買飛,你嘅旅遊證件就係門票,所以張回鄉證要出場幾次,入禁區檢票要用,過關要用,到真係「搣飛」入閘時再出示多一次~入到去候車大堂人頭湧湧,詩詩已經想瞓覺爸爸抱住,我同曉同婆婆就坐另一邊,等夠鐘上車~
入閘後人好多,落到月台想影張相都唔容易,而且感覺好趕急,都係快快上車穩陣啲~
到月台
準備上車
我哋好快搵到我哋嘅座位,原本想轉一轉啲座椅嘅方向,我哋六個可以對住坐,但唔知咩原因,我哋個團個領隊阻止咗我哋咁做~
咁暫時三三咁坐啦,我教曉做功課,day坐我旁邊,瞓醒覺嘅詩就去後面同公婆玩~
曉去完沙巴返嚟要寫隨筆,佢開頭要我教佢寫,但寫寫下嫌我煩索性話自己識寫,仲好啦,你叫我教你寫好容易變成我寫,你自己寫反而完完全全係出於你自己嘅idea~
做完功課去後面同婆婆坐
估唔到上車發生一段小插曲,我哋個團竟然有兩個團友冇上到高鐵﹗﹗﹗佢哋一行四人join個團,其中兩人竟然跟甩咗唔知去咗邊,呢件事真係好神奇~開車前領隊好努力問佢哋位置係邊,想教佢哋快快上車,但直至開車都搞唔掂,以上唔到車嘅行動力嚟計,恐怕要佢自己買飛搭下一班,或者採取其他路線join番個團都唔太容易,結果呢兩位團友都係冇重新加入了~
抵達潮汕站了﹗原來高鐵潮汕站位於潮州市、汕頭市同揭陽市嘅中間位置,揭陽市雖然未去過,但個名感覺好熟悉,好似唔少淘寶都係揭陽市發貨咁~我哋呢個tour會去晒潮州、汕頭、汕尾,所以搭嘅車都唔少~
話說呢三日兩夜,同我哋相同行程嘅大航假期旅行團仲有另一團,所以去到邊度都會見到另一團,架旅遊巴仲要一樣係金色,好緊要唔好上錯旅遊巴~
我哋坐咗三日嘅金色旅遊巴~
平時啲導遊領隊講旅遊巴車牌我都唔多點記住,今次真係要記一記,仲要帶住細路,估唔到打blog時已經隔咗兩個半月,我都仲記得我哋旅遊巴個車牌係32160,點解咁記得?因為我哋配咗個車牌落首歌度囉,係詩詩學校首「我們一同拍手哈哈哈」,變成「32160啦啦啦啦」,每次上車都唱一唱,唔會搞錯~講起架旅遊巴,你係唔可以唔扣安全帶架,你一坐低,就咇到你扣為止,好盡責﹗
我哋由高鐵站去第一站潮州古城,都要坐大半個鐘車,小朋友已經肚餓了,上車前一人塞一件餅先,落車時我哋簡直想即刻衝去食嘢~
兩父女上車再瞓過~
潮州古城附近唔准旅遊巴入,要轉搭專用電頩車,坐咗咁耐高鐵+旅遊巴,呼吸一下新鮮空氣,鬆一鬆對腳真好~
未瞓醒嘅曉
好天氣
吹吹風,好舒服呀~
到達潮州古城
唔影你哋兩個啦
落咗車,導遊先帶我哋去之後集合嘅地點再解散,一路經過時已經望到各個招牌,盤算一下之後要食啲咩?目標?太肚餓了,最緊要唔駛等位,快有得order快有得食,食到冇咁餓再去搵好想食嘅嘢食第二round啦~
前往其他中國旅遊blog