上次2019年嚟福建時係毫無防備地嚟，咩毫無防備？我指食嘢呀﹗未嚟到真係唔知會食得咁誇張~今次有晒心理準備，所以亦好期待食每一餐yummy yummy food，「yummy yummy food」係曉創嘅…口號？定急口令？總之，佢食到正嘢時，就會好有節奏地唸：「yummy yummy food, yummy yummy food, yummy yummy yummy yummy yummy yummy food﹗」你要想像yummy yummy呢四個音節係一組四個16分音符，個food就係一個4分音符囉~越講越複雜，越講越離題~果然餐餐都有驚喜﹗今次係家族掃墓後嘅大餐，四圍枱，好熱鬧呀~
明珠灣海鮮樓係石獅海邊，樓梯上去左邊一間間廂房，右邊就係無敵大海，我諗起以前去好朋友珊珊美國嘅婚宴場地呢(請參閱：27-7-2014：加州婚禮+夏威夷day 2(part 3)．珊珊big day之Bay Area臨海晚宴)~我哋四圍枱要兩間廂房先擺得晒，不過中間有道門打通兩邊~我哋四個同家姐佢哋三個，仲有「嫁碗」(音譯>.<“)表哥一家三口坐一圍~
開頭大家見我哋嗰圍細路仔多都唔睇好，點知食到八八九九之後，原來我哋戰鬥力都不弱喎，唔知係細路都食得多定我哋幾個大人食得超多，哈~
食物方面，我冇逐碟影相，但今個trip食過咁多美食，美味no.1就係呢一餐出現啦﹗
好在爸爸有影，就係一道土鍋芋頭粉圓，芋頭塊蒸到又軟又鬆化，上面一粒粒煙煙韌韌嘅粉圓，再加上甜蜜蜜嘅汁係上面，真係好好味~I love碳水﹗yeah~即使呢道菜出場時已經食到中後段，明明已經飽，又知道後面應該仲有其他嘢未嚟，但都忍唔住夾咗幾次~
好味嘅炸物太遲出現啦~只可以每種試一粒咋~
爸爸仲影咗魚
同佢敏感食唔到嘅蟹~而家連詩詩都識得自己食蟹，我可以更安樂地自己剝自己食啦~
曉點名話要同呢個包影，同扣肉一齊上嘅呢個包，以為係冇餡包同嚟包住扣肉嚟食，原來入面有啲甜甜嘅花生粗糧內餡，搭住扣肉一齊食又真係幾正~
小朋友每次都冇可能食到最後嗰幾道菜，因為上菜上到一半左右已經食飽咗了，穎妍同曉、詩就一齊出去玩，三表姊妹自己走出去跑下就好高興，每次我哋俾樣任務佢哋，例如，出面有幾多支旗呀，佢哋去數完返嚟話我哋知，樓下啲魚缸有幾多種蝦呀，落去數完返嚟又報告結果~
到連大人都食飽埋，大家出去走動走動，見到有言語障礙嘅兩堆小朋友們似想玩但又唔知點樣一齊玩時，靈暉堂兒童崇拜資深導師又係時候出場了，永遠嘅大衛哥哥，即係爸爸，又係帶遊戲嘅時候，聽番啲表姐/表妹/表嫂(我真係唔係好分到…我估下一次再去我應該得架啦)講，原來2019年嗰次我哋嚟，老公教啲小朋友玩咗幾個遊戲(請參閱：27-12-2019：熱鬧非凡福建探親觀光團day 1(part 2)．祖屋探秘、三代同堂家族聚餐)，後來佢哋都有自己玩~所以大家都有少少期待緊爸爸再帶大家玩遊戲~
今次小朋友們都大個咗，玩嘅又唔同，我哋玩咗解手，又玩咗兩款搶水樽遊戲，大家都係少少怕醜囉~
呢個時候，老公嘅其中一個表哥，提議之後去放煙花呀~~~~~~~~~~呢個真係我冇想像過會出現嘅節目，好興奮呀~
呢啲係咩pose？後面就係我哋食飯嘅一間間望海廂房，可能日頭食個view會靚啲，夜晚食黑麻麻乜都睇唔到啦~如果坐出啲，打開晒落地玻璃，吹住海風嚟食應該幾正~
大家各自上車，放煙花嘛，我自己一廂情願以為去沙灘放，尤其係聽到司機同爸爸係度講個位置係邊，點樣去，司機又叫爸爸share個location俾佢，跟住又等邊個邊個回覆~終於架車轉入啲小街，咦，呢度咁熟口面嘅？原來我哋係返二舅父屋企放煙花呀﹗
因為搵路搵得太耐，其他表姊妹們已經開始咗啦~
我其實都躍躍欲試，因為好多年冇放過烟花了，兩個女係第一次，有啲驚，正好我陪佢哋放，yeah~其實都係大人們點好咗先轉過嚟我隻手，我再用曉/詩隻手握住支煙花，我再握住佢哋隻手，我哋只要握實嚟好好欣賞就得啦~
未夠膽玩時，玩住細個時去澳門或者返大陸時，用力掉落地會炸開「啪」一聲嗰啲粒粒先啦(嗰啲叫咩名？)~
放煙花嘛，開頭仲戰戰兢兢，後來就越來越開心啦~
穎妍試下埋去點
開心
曉都可以自己拎住，樂在其中了~
仲有啲好勁嘅煙花，好似有三至四段層次變化添呀~
我哋嘈嘈共放煙花時，原來長輩們都好歎，係個花園度歎歎茶、傾傾計~
煙花放到差唔多，我哋要返酒店啦，由石獅返去泉州嘅酒店都要坐一個鐘車，梗係要去一去廁所先走啦，雖然二舅父屋企有好多個洗手間，但我哋咁多人梗係有先有後去啦~講起呢個簡直係不停食食食嘅經典場面，好似係我同詩去完廁所先，等緊其他人陸續去完之際，二舅母就插咗支飲管落個酸奶度俾我哋飲，要知道啱啱嘅晚餐係食到幾咁飽，出嚟嘅人見到我哋飲緊，二舅母就繼續插更多嘅飲管~
飲完嘅人，等緊未飲完嘅人之際，二舅母又拎啲雪條出嚟俾大家食，真係食極都仲有呀~到終於開始上車時，佢仲包咗一大包嘢食俾我哋帶走，我話酒店雪櫃唔夠凍又唔夠大，結果只拎咗小蕃茄同益力多，乳酪同另外一樣水果就冇拎了，搞唔掂丫，結果啲小蕃茄食到返香港，益力多就飲到上飛機嗰個早上~
玩到好盡興，冇晒電啦，返酒店叉一叉，day 3見~
前往其他中國旅遊blog