其實今年都去咗好多次旅行，呢排返工又唔太辛苦，其實呢一刻對於去旅行放鬆心情o既渴求都並非太大，但點解無情情會去咗中山玩呢？而且上年年底至去過一次之嘛~話說我有訂閱travelzoo呢個旅行網站o既newsletter，得知中山最近新開咗「長江水世界」，哇，好想去玩水上樂園呀﹗而且仲要係新開喎，係大陸嘛，啲嘢開得耐咗就會日久失修…:p，所以都係趁新鮮時去下好~

於是早一兩個星期講之嘛，訂車票，訂酒店，馬上成行﹗又咁啱呢個weekend星期六日我同day都off，唔駛專登請假喎，真好~

我哋搭中旅社o既中山快線，可以直接由屯門栢麗廣場上車，十幾分鐘就去到深圳灣口岸，去到中山都係三個鐘頭左右，係車上呼呼大睡，馬上就到﹗好過專登出市區坐船啦，而且坐船應該貴少少，而家我哋來回直通巴士都係$160，係咪好平就唔太sure，但就真係好方便~

話說搭車中間有段小插曲…其實都去到中山市啦，因為臨時封路，咁司機平時淨係駕呢條路線之嘛，要改路線佢唔熟家嘛，就忽然大叫：「有冇係中山人o架？我轉左定轉右好？」我哋都呆咗，唯有靜觀其變，我哋都唔識o架，好在後來都好快入番去正確嗰條路~但我哋旁邊嘛，坐咗一對夫婦，兩個都係咁係度嘈，話個司機做乜唔識路，聽到我火都嚟埋﹗心諗，果然要好好揀老公，聽佢講十分鐘都爆炸，如果對成世點算？﹗

我哋去到京華酒店落車，都十二點幾lu，而且我哋o既酒店比較近郊，所以應該唔多食肆，所以我哋都決定食埋嘢先過去check-in~上次嚟中山就係嗰間「大長今韓國餐廳」食，其實都好好味，再食都無妨，不過呢個商場咁大，都可以試下其他o既…

我哋就去咗四樓o既食街喇﹗呢度開咗張咭之後，大家就出去唔同o既攤檔揀喜歡o既食物，選擇都好多呢，全國各地o既特產都有，連其他東南亞國家o既食品都有~

我哋得兩個人，所以都試唔到好多款式咋…由day話事，我哋食咗釀青椒、腸粉、小籠包、涼拌豆豆青瓜、黃鱔炒飯~樣樣都唔錯﹗

我哋之後就搭的士過去長江水庫附近o既「中山雅居樂長江酒店」check-in lu~今次都係攜程網訂房，最鍾意就係可以係屋企click click click就買到心頭好o既感覺﹗酒店大致上都好令人滿意呀~揀呢間酒店o既主要原因，就係佢正正位於長江水世界旁邊~而且又好有度假feel~

第一個反應係…間房勁大﹗可以係入面打前空翻、後空翻、側手翻…不過我唔識打﹗(笨蛋﹗講呢啲做咩~)

而且景色開揚~因為酒店正正係雅居樂長江哥爾夫球會旁邊，所以我哋露台o既景就係golf場地~不過天氣太熱了，都冇好好享用個露台呢~

好，出去行下啦~呢張係…「自拍王」﹗

其實中山真係唔係一個旅遊城市，各方面都可以做得好啲，如果網上資訊多啲、update啲都幫助好大，我哋上網搵咗啲景點，但都唔知點去，問問secu大叔先~

聽講中山有個中山十景，「長江叠翠」係其中一景，我哋行過去睇下，但搵唔到入口﹗唔通已經唔存在？行到條路o既盡頭，一邊係長江水世界入口，一邊係哥爾夫球場，一邊係呢個城牆…

當年有個「長江樂園」，聽講係一個機動遊戲o既主題樂園， 但後來執咗粒，剩低咗呢個城場入口，但已經已經變成咗停車場lu…

唔知點咁…我哋當機立斷，決定坐番巴士出市區，行下其他地方啦~見到呢架006號巴士，可以去到「紫馬岭公園」，係網頁都有講過，應該可以去行下o既~搞鬼o既係，係正確巴士站落咗車之後又搵唔到個入口，好似今次問到人入到去啫~

正門有呢個紫馬奔騰o既雕塑~

點解一定要說普通話呢？咁我哋o既肉酸普通話咪要展露於人前？﹗:p

今日真係好熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱熱~~~~~~~~~~~~~~~~~~~~~~~~~~~~~~~~

呢個公園好唔好行？其實都唔係太多嘢睇，不過叫做可以同day出嚟玩下，relax下都係好o既~

鍾意呢度﹗因為有樹蔭﹗但可能真係人流太少，我唔明點解熱到咁都冇啲汽水檔o既？﹗一定賺到笑喎~

荷花都未開放呢~

另外紫馬岭公園都有得睇動物~

有個叫做「嚶鳴谷」o既小小動物園係入面，都有啲雀仔睇下~有啲好大o既孔雀﹗令我諗起當年係印度見到o既野生孔雀呢，不過都係未見過孔雀開屏~

一個咁頹o既公園，居然都養咗三隻大黑熊喎~估唔到呢~

我哋係好曬好熱o既天氣之下、捱住口渴，邁向另一個出口，希望沿路可以有嘢飲賣…但都係…冇﹗

臨到出口呢邊有玫瑰園呢，大就大o既，不過啲花開得麻麻地靚咋~

係出口影番張招牌相先，呢張都係「自拍王」嚟o架~

要搵飲品呀~好渴渴渴渴渴~~~~~~~~~~~

出口對面係呢個類似會議中心o既地方，咁新穎、咁巨型，感覺上應該會有超涼o既冷氣同埋coffee shop之類，但結果係…冇﹗只有兩個secu，成座building靜英英的~真係oh no no~

穿過會議中心有個大型屋苑，好似有商場喎，一定有餐廳食肆啦，要坐低飲個凍飲呀~點知…得好多裝修公司、琴行，但飲品嘛…都係未發現蹤影添~

行到尾尾了，見到呢間洗衣店，好在發現到佢個凍櫃﹗原來都係間便利店嚟o既~我哋入到去一人一支綠豆雪條，未夠喉，再飲埋凍茶同埋汽水至收手﹗爽呀~

我哋都返酒店lu，因為都累啦，天氣太熱了，而且酒店o既餐廳都早早地就關門，所以都要早少少返去~

未食dinner，享用下酒店設施先，打乒乓波﹗

dinner我哋係golf club嗰邊o既西餐廳食，水準一般般啦，但環境都好舒服o既，樓底高，寛敞，人唔多，可以舒適地享用晚餐~

Comments

comments