結婚12年有多，今次係第二次跟老公返福建嘅家鄉，上一次係2019年底(請參閱：27-12-2019：熱鬧非凡福建探親觀光團day 1(part 1)．鬧哄哄與食飽飽的開始)，疫情封關前嘅最後一擊trip，嗰陣詩詩兩歲都未夠，搭飛機仲未有自己座位，仲食緊奶^^”，我最深刻嘅記憶，就係家鄉嘅親人非常熱情，非常多美食，食到個胃大咗，平時冇食宵夜嘅我，返嚟香港成個星期都覺得好肚餓，心思思想食宵夜~今次有心理準備，一早知道會不停食，要守住原則，唔理增磅增脂，但求唔好食滯，肥咗就返嚟再減啦~因為我同奶奶都唔想請假，所以決定復活節紅日四日出行，正正紅檔檔呢幾日去，當然機票係貴啲，但計落都冇請假咁貴嘅~我哋四個+老爺奶奶買好機票，後來約埋姑奶同兩個外甥女，佢哋都可以一齊去，咁就更加熱鬧了~

今次搭廈門航空，飛行時間剛剛係午餐時間，究竟有冇飛機餐食都重要，因為曉詩嘅大舅公原本諗住預備非常豐富嘅午餐嚟迎接我哋，check過航空公司，預定飛行時間100分鐘內航班會提供「小食」，咁落機應該唔會食得太多吧？嫲嫲記得要叫大舅公唔好預備太多啦(最後當然都係好多啦)~

十一點半機，早上時間好充裕，鬧鐘未響個個自動自覺醒晒，咁就出去食個靚早餐啦~

麥當奴早餐，多謝邱曉出咗張$20 coupon，係佢上次去學校家教會旅行抽中嘅枱獎，佢當時好失望，點解大家抽到文具玩具，佢抽到冇用嘅現金券？有用有用非常有用呀﹗

因為紅日出遊嘛，所以今次個trip day 1適逢聖週五耶穌受難節，天主教傳統上會守齋，因為今個trip係強大基督教背景嘅老公家族招呼，為免太多是否需要特定日子守齋嘅討論同關注，我自把自為地提早一日聖週四乖乖地守咗齋，記念主耶穌受難，再高高興興地同福建嘅親友一齊記念主嘅復活啦~

我問老公做乜要影我係商場廁所門口打機，佢話要記錄旅程喎~

本來計劃食完早餐可以搭A33X或者E33去機場，點知A33X啱啱走咗班車冇耐，E33要兜得太遠先到客運大樓大概會遲，結果咁早起咗身都係搭咗Uber去機場~

今次四日三夜，本來四個人一隻大喼就夠，好在帶咗摺疊行李袋，先裝到舅公們俾我哋嘅禮物呢，真係又食又拎丫~多謝晒熱情招待﹗﹗

去到機場，爺爺嫲嫲都啱啱到，我同day去排住check in隊先，冇耐，姑媽同兩個表姐都到了~check in手續好順利，職員話閘口比較遠，叫我哋預留多啲時間行過去~

果然係遠呢，呢一部份嘅機場我居然一次都未去過呀~

我哋早到，周圍逛逛~

欣賞下香港嘅手信

又睇下商店嘅書

買咗本書俾曉詩，我有諗過買本英文跑步雜誌，但要$155實在太貴了，安慰自己，上網大把呢啲文章睇啦~

呢邊閘口冇嗰個經典款式嘅「去旅行打咭位」呀，都照影啦﹗

齊人再影多張

我哋今次搭嘅廈門航空飛機

睇得飛機清楚少少

我哋9個人，安排咗3-3-3咁坐，最自然嘅坐法，當然係曉詩同佢哋嘅媽咪坐，表姐們同佢哋嘅媽咪坐，老公？同佢嘅媽咪爹地坐囉~

好在兩個小朋友有係機上好好瞓一覺

兩程飛機都係一登機未起飛就派飛機餐，可能咁樣大家多啲時間食吧，原來份小食係一個穀物包、一包脆脆同一樽水…umum…好在食咗大早餐，呢個份量真係唔可以當lunch呀~麵包愛好者曉同正常食量爸媽都係機上食咗呢份細細嘅飛機餐，唔鍾意食包嘅詩就忍住肚餓，食完包脆脆就等落機食嘢~

瞓醒覺又食咗嘢就玩我哋呢排興嘅圖畫接龍，大家估唔估到係咩詞語呢？

點知飛機遲咗好多起飛呢，我哋抵埗、入境、拎埋行李都兩點有多了，辛苦晒嚟接我哋機嘅表嫂呀﹗

表嫂幫我哋book咗架13人車，跟足四日，坐呢架車嘅人數，由最少2個(某一程係大舅公大舅婆坐嚟接我哋)，至最多>13個都有(超載只係非常非常短嘅路程啫)，好抵用~

泉州好天氣，啲apartment起得好靚，周圍都好多樹木~

第一站我哋直接去大舅公屋企~

雖然四年前去過，屋企裡面仲有印象，但屋苑環境就唔係好記得了，原來大舅公住嘅屋苑同我哋住嘅同苑個名比較，只係多咗兩個字咋，以後都記得了~

個個都肚到扁了，去到洗洗手，相都冇乜點影，只想快啲食食食了~

即使嫲嫲一早叫佢唔好準備咁多，大舅公都預備咗多款、大量嘅福建美食俾我哋一次過品嚐﹗有我最愛嘅牛肉羹(福建話「胡-hiaq-gi」)、煎蠔餅、肉粽、花生湯圓﹗

一輪衝鋒陷陣之後，終於舒服晒~

我真係一張相都冇影，好在老公影咗粒湯圓，呢款湯圓佢都有細個時幫手整嘅回憶呢~

個肚舒服晒就有心情歎呀大舅公好舒服嘅屋企啦~

有個人好快就當正係自己屋企咁~

同曉一樣，我都係最愛呢個超大陽台~

個陽台幾大~

仲有無敵江景，正﹗

走嘅時候經過放咗水嘅池塘，曉話佢扮差啲跌落水喎，哈~

下一站我哋同爺爺嫲嫲分道揚鑣了﹗

前往其他中國旅遊blog

Comments

comments