29-3-2024：福建探親掃墓大食團day 1(part 3)．晚宴1號@鯉酒華宴、逛逛大大超市、貼心泉州悅華酒店

行到鐘樓、步行街嘅終點，我哋以為會上番架13人車去晚飯嘅地點~點知表嫂叫我哋分別坐上架電動車~

可以叫做泉州版嘅tuk tuk吧﹗

經過一間教堂，我哋落一落車睇睇+影相，跟住再上車去泉州酒店~

泉南基督教堂—-不過我哋復活節崇拜唔係嚟呢度~稍後再介紹~

下次去佢哋大個女仲肯唔肯做呢啲嘢呢？

我哋今晚去泉州酒店食飯？原來我哋之前去開元寺行得太耐，架13人車停唔到咁耐，逼住去第二個地方pick up我哋，sorry~

今晚，我哋同大舅夫大舅母、大舅夫嘅仔表哥表嫂一家，仲有姨媽嘅仔，即另外一對表哥表嫂同我哋一齊食飯，上一次嚟福建時見識過華麗嘅包廂晚晏，今次終於冇咁大鄉里了~入到去包廂，除咗超大圓枱，仲有獨立洗手間同梳化休息區~

又大又靚嘅包廂都係要影相~

冇電

但今次更誇張嘅係，因為晚鯉酒華宴太大，所以啲職員們工作係踩住電動雙輪平衡車出入，講起呢件事，我媽咪話，好多年前都係國內試過去餐廳時，侍應踩roller上菜，而家諗番轉頭，roller其實所以嘅技術高超好多呢，因為要用自己身體嘅力去前進，碟餸如果堆到好高好滿都幾危險~

當然有好多美食啦，我冇全部影相，所以只講印象特別深刻嘅菜式吧~有一道前菜係炸魚，因為骨比較多，我叫小朋友要小心食，詩詩一邊投訴一邊食得舊魚好乾淨，曉呢，好用心咁食咗一半就想放棄，然後詩居然拎咗家姐舊魚，幫佢拆骨之後俾番家姐食，詩詩家姐又出場﹗

話說上次去完沙巴返到香港，我哋係機場食咗太興，因為好想食港式食物，今次去完福返嚟，我哋又食咗太興，不過今次返到屯門市中心先食，今次係好想食白飯﹗好想食白飯，先回想起，係喎，福建只係廣東省嘅隔離，但我哋食咗咁多餐，一次都冇食過白飯，呢幾餐嘅主食都係麵線糊~

我全餐掛住食食食，冇乜點影相~

呢度集合咗我同老公影咗嘅少數食物相，係喎，唔記得介紹個魚，我諗右下嗰碟魚可能係今晚嘅全場之冠，因為落咗啲花椒去蒸，好香，係我未試過嘅味道，西蘭花唔係裝飾架，啲美味嘅花椒魚汁，吸晒落去朵西蘭花度，正﹗右下嘅水果盤有趣嘅係，除咗一眼認得出嘅西瓜之外，白色嘅其實係馬蹄，估唔到水果盤會放馬蹄，而青色一粒粒嘅係醃青梅，食到咁飽之後清一清喉嚨又幾清爽，不過day食到打冷震~右上嘅冷盤就因為好華麗所以影咗，出場時仲有乾冰出煙添呀~

小朋友個胃仔細，每餐都比我哋早食飽咗，今次爸爸派曉去同每一個人自拍~

佢雖然普通話唔太靈光，但憑住要完成任務嘅幹勁，總算影咗好多相返嚟~

與燕騰表姐合影，燕騰表姐而家係廈門嘅音樂學校讀書，係鋼琴高手嚟架，我好有幸四年前嚟嘅時候，以長輩嘅身份夾硬要佢陪我彈咗少少四手聯彈~

今晚食飯嘅鯉酒華宴~

食飽飽我哋搭番架13人車返酒店，問問司機酒店附近邊度有超市，姑媽佢哋有嘢想買，因為我哋冇訂酒店早餐，大家都順便睇睇有咩適合買定第二朝早餐食~司機停低我哋係一個商場前面，話行兩個街口就返到酒店~

超市好大，有兩層，但…點解著咁少燈嘅？﹗人流的確係好少，但燈光昏暗令購物欲進一步下降…

話說我哋下晝check in酒店時，入到酒店房，家姐冇睇清楚，見唔到免費嗰樽水，唔小心開咗要收RMB15嘅1.5L農夫山泉，一場嚟到超市，順便睇下有冇相同嘅農夫山泉，買到可以補番個位嘛，點知，大大小小嘅農夫山泉，偏偏就冇1.5L嗰種size，係咪特登架？﹗我哋即使買6樽細嘅，都平過RMB好多囉~

研究農夫山泉ing

真係冇嗰隻1.5L囉~

到check out嗰日，老爺又同我講，佢都開咗樽1.5L農夫山泉…哈哈~

個商場好似差不多廢棄嘅程度，好多吉咗嘅鋪位，而營業中嘅鋪頭亦有唔少清貨大減價，見到「大甩賣」呢幾個字，我就甩一下個頭，感受下嗰種意境…>v<

等家姐佢哋買齊嘢，我哋行嗰兩個街口返酒店，哇，果然兩個街口唔可以以香港嘅諗法去估算，個距離遠到Apple Watch問我係咪戶外步行，啲細路係咁問到未，但礙於iphone係國內定位太唔準確，我都有少少擔心行錯路，司機分明話直行兩個街口，我哋就信到底啦，行咗Apple Watch記錄嘅1.32km，因為有大有細+超攰，我哋居然花咗28分鐘04秒，終於返到我哋會住三晚嘅泉州悅華酒店~