離開大舅父屋企之後，我哋就兵分兩路，爺爺嫲嫲去爺爺鄉下探親，之後去二舅父屋企過夜，我哋七個先返酒店check in放低啲行李，之後就就跟住曉詩嘅表伯娘，即是day嘅表嫂去遊覽，我哋今日去開元寺同西街~

我同家姐去辦check in手續時，爸爸就帶住四隻嘢去周圍影相~

呢個係咩主題？

自助餐廳門口嘅太空兔子，我哋第三日係度食早餐呢~

上房放低啲嘢我哋就出發啦﹗

落車之後就好明顯係旅遊區，有好多掃街小食店，有啲鋪頭可以俾遊客換裝，扮靚靚去影下相，曉即刻兩眼發光，好想著嗰啲特色衫同整頭，但我哋今日得一個鐘左右，時間應該唔太夠吧，表伯娘話之後可以安排到著，咁都冇咁失望~確實上次去韓國時有換韓服嚟影相(請參閱：30-12-2022：首爾江原道冬日滑雪行day 9(part 1)．韓服美女與最強侍從遊景福宮)，又真係好開心呢~

兩個表姐好快就出手，買咗個打咭靚靚竹筒雪糕，我同day都冷靜地盡量要保持實力—-即是限制自己唔好食到飽，夜晚好快又食大餐嘛，食立雜嘢之前要先評估一下有幾想食先好食~行多兩步，表姐們再食個frozen yogurt，會唔會激進咗啲呀？

去到開元寺，表伯娘安排我哋七個自己入去行，佢會係外面等我哋~兩次嚟福建探親我都完全冇預備行程，book咗機票酒店執個行李就出發，乜都冇prep到，所以有咩出名景點都唔太知道，但見到呢度遊客、旅行團多嘅程度，都知道係出名嘅景點~以前返國內旅遊，去呢啲寺廟類嘅古蹟，如果唔係超靚建築或者超級出名，其實興趣一般，尤其聽導遊講解啲歷史、典故、建築風格等等，都係一半聽唔明，聽得明嗰啲都左耳入右耳出，但今次冇預備咁去，又冇包袱話要做到啲乜，反而可以輕鬆有趣咁享受呢段時間，我哋好隨意隨心咁影咗好多靚相呢~

話說都未清楚呢個係咩地方就入咗嚟，突然間門口就出現好多佛寺都有嘅四大天王，未見過世面嘅細路們就被嚇到wee wa鬼叫，都係嘅，勾起我細個時都好驚嘅回憶，啲高你好多倍嘅雕像碌大隻眼咁望住你，塊面仲要又紅又綠，都真係幾得人驚，入去時曉超驚，之後就戰戰兢兢唔敢周圍望，到離開時要再次經過嗰座建築物，都要係我掩護下出去，「我唔望，我合埋對眼，出咗去你話我知啦﹗」

開元寺入面有兩座高塔，我哋去睇下影下相~

高塔之一，我都唔知呢座係東邊嘅鎮國塔定西邊嘅仁壽塔了~

總之係景點，影就啱了﹗

要記錄低6歲詩詩嘅攝影技巧，將來影得太好，影唔番呢啲相~

見啲後生仔好青春咁坐係度影，我又要啲青春少女陪我一齊影~

扮睇魚，其實冇水~

我哋扮得似唔似？

開元寺裡面有個好大嘅花園，小朋友們就開心囉，張相入面你搵到邊個？

我哋又入去個假山度探險…

四人組…呀唔係…五人組﹗

三個美少女

yeah~要註明一下，我哋唔係嗰度攀爬架，我哋係後面條路正正經經行上去架~守規矩曉係唔會做犯規嘅事~

開心大發現，原來獅子裡面個波波係可以郁架~因為太神奇，呢件事曉寫咗落去隨筆功課度呢~

見到呢棵樹，我話我細個時都影過一張扮托起棵樹嘅相，三個就好合作咁去扮晒嘢，表情正呀﹗

cute cute~

L-O-V-E———–love﹗

離開開元寺，表伯娘帶我哋逛西街，西街係步行街，充滿特色小食，如果認真逐樣試，真係可以直接食飽﹗我哋知道正餐一定有正嘢食，所以打算盡量保守，唔主動出擊~但我哋同表伯娘會合嘅嗰一剎那，佢已經買好幾支冰糖葫蘆請我哋食﹗

呢支係士多啤梨冰糖葫蘆，唔似年宵市場賣嗰啲雪到硬晒凍冰冰，呢支冰糖葫蘆入面啲士多啤梨好新鮮，外面甜甜硬硬嘅糖，包住裡面少少酸味味嘅新鮮士多啤梨，好好味呀~不過真係唔敢食得多~

邊行邊食先夠風味~

西街大多數鋪頭都係賣食嘅，忽然有一間好靚靚嘅鋪頭吸引咗曉目光~

原來係hand cream專賣店，一盒盒hand cream嘅design都係唔同種類嘅花朵，仲有「生日hand cream」，女生們即刻好高興咁樣搵自己嘅生日日期，仲揀埋俾其他家人，我哋變咗大客戶呀~

開心shopping

因為係走精緻路線，所以俾錢時店員將啲hand cream包靚靚，先入盒子，再逐一縛蝴蝶結~縛下縛下之際，曉忽然有啲情緒出咗嚟，原來個盒遮住咗個生日日期，佢好擔心撈埋一堆，搵唔番自己嗰啲hand cream~唔怕唔怕，我哋後來示範俾佢睇，其實好容易打番開嚟檢查，慢慢先冷靜番落嚟~講到尾，其實都係佢開始有啲攰，先容易變得沉不住氣啫~

行多兩步，表伯娘又買咗蔗汁請我哋飲，係好可愛嘅竹造型樽~

好似上次去潮州時見過嘅潮州古城造型雪條，呢度有鐘樓雪條呢~不過我哋冇幫襯呀~

西街與鐘樓地標

行呀食，食呀行，去到鐘樓就係步行街嘅盡頭啦﹗

前往其他中國旅遊blog

Comments

comments