30-3-2024：福建探親掃墓大食團day 2(part 1)．不一樣的掃墓、大家族潤餅大放題、玩轉后山老家

話明今次係掃墓團，我哋day 2嘅主要行程就係一個大家族去掃墓啦~今次訂酒店冇訂埋早餐，因為睇地圖見周圍都好多食肆，估計搵食唔困難，想flexible啲，萬一到時想酒店食早餐再俾錢都唔遲~先一晚我哋去埋超市先返酒店，路上都非常熱鬧，周圍都好多嘢食，我哋就更加放心了~姑媽同兩個表姐話要瞓晏啲，我哋早起四人組就一早出去搵食﹗

好精神出動，yeah~

四日三夜之中，根據行程計劃，day 2嘅早上相對冇咁早出發，我曾經幻想過朝早可以做運動，例如游下酒店個恒溫泳池、做下gym，甚至試下泉州路跑一下~我睇地圖，見由酒店去晉江好似只係一條大直路，應該幾好跑，但我太天真了~我完全忘記咗國內電瓶車盛行一事﹗上次去深圳時其實都見識過啲電瓶車自由上行人路，甚至上埋行人天橋，唔好話跑步，連普通行路都動魄驚心，冇可能係呢個陌生嘅都市路跑囉~

至於店鋪方面，日頭同夜晚完全唔係一回事﹗﹗﹗我哋行咗好耐都唔見有開咗門嘅餐廳，好不容易先見到一間粥店，但門面唔太吸引，平時唔鍾意食粥嘅曉都餓到話想食，但平時唔太揀擇嘅爸爸就堅持唔想食，咁我哋行多一陣啦~行多兩步有間便利店，雖然有包有三文治可以食得飽，但今次到我唔同意了，一場去到旅行，未到最後關頭，我都唔想食便利店早餐~所以，買咗一袋小包仔，可以一邊食住先一邊繼續搵餐廳~

最後我哋搵到一間小店，有得食下湯麵呀餃子呀咁，即刻入去去坐低啦，可能大家都冇話習慣出去食早餐，我哋坐低時都未有其他客人~

落咗order之後，爸爸居然話要出去買咖啡先喎，我就餓到唔想郁了~未有得食，唯有飲住水先~冇心機~

可能店員見我哋餓到冇晒力咁，雖然未煮好麵，但煎好嘅蛋就先拎咗出嚟俾我哋食住先，雖然只係荷包蛋+豉油，但已非常感動了~

我哋叫咗一碗米粉一碗麵，另外一份餃子，味道中規中矩啦，但點都好過食便利店凍冰冰嘅三文治啦~

爸爸買唔到咖啡，後來返酒店路上都冇得賣，最後幫襯咗酒店同一building嘅—-Starbucks囉~兩杯咖啡嘅價錢，可能仲貴過食麵食餃子…

返酒店房歎咖啡又真係好正嘅~

夠鐘集合，我哋坐番上去13人車，先去酒店附近嘅大舅父屋企，接埋大舅父大舅母，先去掃墓第一站，我奶奶家姐嘅墓地~慢慢遠離熱鬧嘅城市，去到郊外，到墓園時就同其他親戚會合了，主要就係我奶奶四兄弟姊妹嘅子孫們，雖然冇正式數過，應該有三十人左右吧？因為係基督教家族，我哋唔會帶雞帶叉燒去掃墓，但同香港帶束花去唔同，福建大陣象好多，原來清潔咗墓碑之後，會同鮮花、假花、紙花嚟裝飾，再放禮炮，好熱鬧~大家會係墓碑前影影相~係香港想像唔到吧~下晝嘅掃墓仲大陣象添呀~

大家在墓地忙碌中

我又試下放禮炮﹗不過好實，扭唔開~

話說我哋13人車停咗入墓園裡面，其他親戚嘅車就停咗係出面，咁不如載埋啲婦孺出去大街啦，唔駛行得咁辛苦，於是我哋就試下歡樂滿東華，稍稍逼一逼~

完成上晝任務，大家去老公嘅表哥表嫂(姨媽個仔)屋企坐坐~

參觀下個屋企、食食水果、睇睇舊相、休息一陣~

下一站去二舅父屋企，大家一齊食潤餅﹗因為人太多，所以專登借咗旁邊教會嘅地方擺咗四圍食嘢，聽講仲請咗個廚師嚟幫手整添~呢個位於后山嘅屋企，原址其實就係我奶奶細個時成長嘅地方啦，不過後來有重建、翻新先變成今日二舅父佢哋嘅屋企~

潤餅，福建話讀「倫-bia」，雖然話係春卷，但size其實似wrap多啲~用餅皮嚟包住各種材料嚟食，除咗各種蔬菜絲同肉類之外，其中一定包括有海苔、花生碎、炸米粉，咁先有嗰種獨特嘅風味~以前係老公屋企同佢姑媽屋企都有食過，呢度菜通常都會被形容為「好難得先有得食」嘅菜式，因為功夫好多，由切切切到炒炒炒，真係要準備好耐，所以要懷住感恩嘅心去食~加上香港版冇專用嘅餅皮賣，而用急凍春卷皮代替，今次食嘅應該更地道~

唔可以好似北京填鴨咁包得咁細，要好似Subway啲wrap咁大大條先啱架，再大大啖咁咬嚟食~二舅父佢哋除咗準備咗潤餅之外，仲有牛肉湯、魚肉湯、蚵仔煎呢啲地道美食，食到好飽好滿足呀~因為教會有部鋼琴，主修音樂嘅表姪女食飽飽之後彈咗幾曲俾大家聽，umum…潤餅+古典音樂，少少唔搭調，不過大家都好高興呀~

因為長輩們午飯後要小睡一陣先再出發去下一站掃墓，所以我哋唔瞓晏覺嘅「中」同「青」就有啲自由活動時間~

二舅父屋企前面有片空地，嗰度有啲健身設施，小朋友們就係嗰度玩呀跑呀咁~因為睇完Netflix嘅Physical 100體能之顛2，我哋叫個節目做「大隻佬比賽」，賽前關卡用咗無動力跑步機嚟比賽，曉同詩就好高興咁話我知，佢哋係呢個公園仔發現咗無動力跑步機~

玩到熱，就入去冷氣房，飲下表伯沖嘅茶，佢哋好似每人加加埋埋飲成十幾杯呀﹗就係呢間房，我哋發覺咗表伯講廣東話好叻呀，究竟佢係幾時學同點樣學嘅呢？佢自稱係試下加啲廣東話音調，又講歪少少喎，邊有咁易呀~香港人亂咁講嗰啲普通話都唔見得人啦~

客廳更有電視同零食放題~

食食食食食~

閉路電視都可以玩一餐

我同day就欣賞下花園嘅盆栽，周圍影下相咁~點解啲多肉植物可以種得咁靚嘅？話說早幾日落大雨，我著咗闊腳褲+水鞋，我同詩講話我雖然著得好似農夫，但係一個唔識種嘢嘅農夫~詩話，唔係呀，你識種蕃茄呀﹗(之前係屋企用水耕種，有一粒蕃茄嘅收成^^”)你仲識種蘭花呀﹗(係年宵市場買嘅同埋人哋送架咋喎，而且兩棵都好似開始少少唔係好掂)嗰啲叫謝，唔係死~(多謝你呀詩詩)