3-2-2024：RR隊參加仁愛堂野外定向慈善賽

自2023年參加過Snoopy Run之後，我變得更加活躍起來，除咗平時有恒常去做gym之外，仲開始咗跑步，又參加各種運動比賽同活動~話說我有個長期patient非常熱愛定向運動，每次覆診時都同我講到眉飛色舞，之前2002年尾參加過一次嘉道理農場嘅定向活動之後都覺得好好玩，除咗跑之外仲有啲task，似乎比一般路跑更乎合我嘅個性，後來2023年11月參加過一次海運週定向賽，之後我一直有留意有咩運動比賽或者活動可以參加~適逢今次仁愛堂野外定向慈善賽係星期六舉行，曉又咁啱唔駛上跳繩班，我就約佢一齊組隊參加~

上次海運週係城市定向，感覺地圖相對容易啲睇，因為公園、建築物、路、水呢啲地形特徵係地圖上同實物上都好分明，但野外定向全部都綠色一片，我都有少少擔心，舉行比賽嘅香港仔郊野公園原來係政府推廣定向運動嘅試點，漁農處網站有地圖俾大家download落嚟自己玩，我事先都download定初級、中級、高級嘅地圖落嚟研究下，我哋親子組估計都唔會出得太難嘅，因為最細嘅參加者應該得4-5歲嘛~

參加當日要早起身，雖然集合時間唔算早，但路途遙遠~去到香港仔要上大斜路去集合點，正好當係熱身運動，去到時間仲好早，我哋周圍逛逛，影下相，做下熱身運動~

首先領取號碼布同埋定向比賽必備指咭~

俾大會攝影師捕捉到我哋拉筋嘅畫面，影得好好~

今次活動冇紀念tee，為咗有多啲team spirit，我哋一齊著之前嘉道理農場活動嗰件tee~

曉發現到鏡頭﹗

冇錯，我哋今次參加嘅活動係「仁愛堂野外定向慈善賽」﹗

比賽要加油啊~

嚟張selfie先~

大會攝影師影嘅相片質素果然同手機影嘅係唔同級數~

我哋預備好啦﹗幾時先開始開幕典禮呀？

大會安排上有少少漏氣，開幕禮遲咗，跟住起步又遲咗，我哋排到第六組先出發，屯門食嘅早餐開始有啲消化晒，曉都差不多要瞓晏覺了~

終於完成典禮，影埋大合照就可以出發啦﹗

開始出發就醒神晒啦﹗一開始話要順序去check point + extra bonus check point，賽前幾日先話改規則，可以唔跟次序去都得，可以增加大家不同策略嘅選擇，指定check point每個100分，bonus每個10分，所以一定要去晒啲指定check point呀~

始終唔係玩慣野外定向，睇地圖搵check point唔算太大問題，但單憑就咁睇一睇地圖，就判斷到自己嘅體力係指定時間內趕唔趕得切就未夠功力，所以早段我哋同意skip兩個睇落比較遠嘅bonus check point，直接去下一個指定check point，我哋知道，呢一刻決定skip咗，之後就唔會夠時間再返嚟啦~亦因為呢個決定，我哋最後得唔到最高嘅滿分，但就成為770分之中最快嘅隊伍，比起時間限制嘅1小時仲快咗15分鐘，但已經冇可能趕返去之前跳過嘅兩個bonus check point，雖然有少少遺憾，但整體嚟講我都覺得好滿意嘅~曉跑得好落力，冇嫌辛苦，最多叫我跑慢啲，但就冇跑到發脾氣或者嗌住要返屋企，做得好呀﹗係山野度跑步比起路跑真係舒服好多，空氣清新啲，用力吸啖氣都舒服啲~