MY KITCHEN

網上面的食譜千花百門,質素參差不齊,難得搵到啱用又好味的食譜,就要記低,下次先可以再煮返同樣美味的食物。

中國菜

韓國菜

新加坡菜

日本菜

西餐

瑤柱扒豆苗

平日在家吃豆苗通常都是打邊爐,有一日突然好想食豆苗,諗起屋企有堆已經擺咗好耐的瑤柱,於是上網搵食譜整返個瑤柱扒豆苗,估唔到竟然同係街食差唔多,我都覺得個食譜好勁﹗

材料:

  • 豆苗                 半斤
  • 瑤柱                 按喜好適量
  • 蒜蓉                 半茶匙
  • 糖                     半茶匙
  • 油                     適量

瑤柱汁:

  • 水(浸瑤柱用)    1碗
  • 蠔油                 1茶匙
  • 糖                     半茶匙
  • 麻油                 少許

做法:

  1. 瑤柱用水浸至少2小時,瑤柱水留起備用。
  2. 瑤柱撕碎,用純蒸氣烤焗水波爐STEAM FUNCTION蒸15分鐘,備用。
  3. 豆苗洗乾淨,瀝乾水份。
  4. 鑊燒熱下油,以蒜蓉爆香豆苗,加糖,中火炒菜至軟身後盛起在碟上。
  5. 瑤柱、瑤柱水及其他瑤柱汁料倒進鍋中,中火煮至收汁,其間可逐少加入生粉水來勾芡。
  6. 將瑤柱芡汁舖在豆苗上即成。

參考食譜:瑤柱扒豆苗食譜|冬天做節必吃當造豆苗 想菜葉翠綠光澤有辦法 (hk01.com)

粟米魚肚豆腐羹

恆仔一向都好鍾意粟米魚肚羹,早兩日突然俾我睇一個粟米魚肚豆腐羹的食譜話好似好簡單咁,其實依個湯羮真係好簡單,最複雜就係點樣處理魚肚,即管又上網搵資料挑戰一下,結果非常成功。

材料:

  • 魚肚                 1個
  • 忌廉粟              1罐
  • 蒸煮豆腐          1盒(細)
  • 雞蛋                 1隻
  • 水                     500毫升
  • 薑                     4-5片
  • 蔥                     2棵
  • 鹽                    適量
  • 麻油                 適量
  • 胡椒粉             適量

做法:

  1. 把蔥切段,薑切片,備用。
  2. 用清水沖洗魚肚確保乾淨。
  3. 燒熱一鍋清水,一併放入薑、蔥和魚肚,要留意所有工具都必須無油,否則魚肚會發不起。
  4. 中大火煮10分鐘至魚肚軟身,熜火後再焗20-30分鐘至魚肚完全浸發透。
  5. 用沒有油的工具將魚肚取出,榨出多餘水份後切粒備用。
  6. 將忌廉粟米和清水倒進鍋中煮滾,加入魚肚,再煮15分鐘。
  7. 豆腐切粒,放入粟米湯內,再按口味加入鹽、麻油和胡椒粉調味,再用生粉水埋芡。
  8. 熄火後,拌入己打勻的蛋液即成。

參考食譜:【親子食譜】營養粟米豆腐魚肚羹 豐富滋味 | Oh!爸媽 – Ohpama.com一站式升學、親子網站

浸發魚肚參考:簡易~魚肚浸發方法 【媽媽傳授 只需20分鐘預準時間】 (youtube.com)

梅菜炆豬腩肉

剛剛結婚的時候好流行寫BLOG,也是一個獲取資訊的好地方,當時找尋煮飯靈感的時候就經常瀏覽一個叫做通之廚房的BLOG,BLOG主通少也是剛剛結婚,他主力分享他為太太每天設計不重覆的美味食譜。

近日又開始上網搵食譜,讓我遇返通少,原來他仍然熱愛分享烹飪,今次就試下他教的梅菜炆豬腩肉,唔算太複雜,雖然個汁係有少少鹹,但係撈飯真係好正,最難得係逸逸都肯俾面食下啲梅菜。

材料:

  • 五花腩             1條
  • 冰糖                 1粒(約50g)
  • 甜梅菜             1包(約400g)
  • 蒜頭                 3粒

汁料:

  • 紹興             1湯匙
  • 老抽             1湯匙
  • 蠔油            1茶匙
  • 熱水             500ml

做法:

  1. 梅菜用水浸泡10分鐘,剪開成一條條並將所有摺疊位打開洗淨扭乾,切粒備用。
  2. 五花腩用熱水煮5分鐘,切成厚件(麻將呎吋)備用。
  3. 鑊用中大火燒熱,加入梅菜炒至乾身,盛起備用。
  4. 落油燒熱鑊,將五花腩件用中大火煎至兩面金黃。
  5. 加回梅菜、冰糖和蒜頭炒勻,加入汁料撈勻煮開。
  6. 蓋上蓋轉細火炆20分鐘,熄火後再焗10分鐘。
  7. 開蓋再轉中大火將汁料煮滾,加生粉水埋芡即成。

備註:通少教如果要五花腩更軟身,可以重覆細火炆20分鐘熄火後再焗10分鐘一次,不過我自己煮一次已經好好味。

參考食譜:通之廚房 (tonykarenkitchen.com)

照燒汁焗三文魚

偏食的逸逸比較接受焗三文魚,於是上網搵下簡單的新口味,結果搵依個氣炸鍋照燒三文魚,不過為咗洗少啲嘢用咗焗爐焗,成功食為逸逸今晚晚餐的NUMBER ONE﹗

材料:

  • 三文魚柳      1片(約120g)

調味料:

  • 生抽              1湯匙
  • 魚露              1湯匙
  • 水                  1湯匙
  • 糖                  1湯匙
  • 黑椒              適量

做法:

  1. 三文魚柳解凍後抹乾魚身。
  2. 將調味料表中的醬汁預備好。
  3. 預熱焗爐190度。
  4. 用醬汁調味,醃5分鐘。
  5. 反轉三文魚,再醃5分鐘。
  6. 將三文魚放入已預熱的焗爐焗15分鐘即成。

食譜來源:【氣炸鍋三文魚】5款簡單好味食譜:照燒味/蕃茄檸檬/胡椒鹽/西京燒/豆乳香菇 – 尋補・Blog (tutorcircle.hk)