15-9-2010:台北宜蘭trip day 4(part 1).五峰旗瀑布、聖母朝聖地

浸咗一次溫泉之後,第二日當然要參觀一下礁溪本身o既景點啦~

我哋住o既雅閣溫泉行館有早餐供應的﹗叫做「自助」早餐啦,其實款式唔係真係太多,因為唔係旺季,所以人客都唔多,佢哋自然冇準備太多食物了~主要係啲台式小菜,有啲粥呀咁,最好味係煎雞蛋,因為即刻煎呢,新鮮熱辣﹗

呀,之前都冇講,雅閣溫泉行館大堂同餐廳係有免費wifi的,所以我同爸一人拎住部iphone可以篤篤篤,房間雖然有插LAN線位,但又唔知點解整唔到喎,所以都係出去大堂上網囉~呢個都係選擇呢間溫泉民宿o既好處嚟o架﹗

出發lu~

係宜蘭地區好好,好推廣旅遊業,由火車站呢度有呢啲免費專車去礁溪各個景點﹗而且班次都ok密o架,好似半個鐘一班?唔記得了~我哋住o既雅閣溫泉行館行過去火車站都係十分鐘左右之嘛,所以都好方便,又慳番啲$$喎~

我哋朝早去o既係五峰旗瀑布,基本上呢個景點都算係礁溪o既standard要去o既地方了~

瀑布有三層,越向上行自然越壯觀了﹗都唔係太高,一家大細行上去都唔算辛苦o既~水好清丫﹗

上到去第二層瀑布,我哋係舊大石頭度休息咗一陣﹗因為環境實在太太太舒服了,唔捨得走呢﹗

一場嚟到,梗係上上埋去第三層瀑布啦,但close咗呢,因為雨水太多,有山泥傾瀉o既危險,所以上咗閘唔俾大家去參觀了~

都唔會太可惜o既,因為我哋知道呢度仲有一個地方去行﹗之前上網搵咗,正正係附近有個聖母朝聖地~

相傳幾十年前有一班登山人士係山上迷路,之後係間小屋度避難,後來大家都安好獲救,於是就有人係度起咗教堂,紀念呢件感恩o既事了﹗

聖母朝聖地網網:http://www.catholic.org.tw/wufongcis/index0.html

其實呢度有個更高o既山,本身都有諗過不如爬埋上去,上面有個聖母山莊,但係單程要三個鐘,來回即是要花一整日lu,為咗去多啲其他地方,所以放棄咗呢個idea囉~

聖母朝聖地o既聖殿古色古香呢,採取中式建築設計﹗

天然o既「空調」﹗四面都係大大隻o既窗,所以裡面都通爽,而由聖壇望出去就係個海啦~我哋係度留下印記﹗寫上禱文~

聖殿外面當然有聖母岩啦~

我哋仲逛逛附近,睇下呢度教友信仰生活o既痕跡至走~

落山lu~接送巴士站前有得賣雪條﹗我揀咗金棗味,呢度特產嘛~好清新啊~

待續

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *