23-7-2023：暑假高雄墾丁遊day 3(part 2)．抵食五花馬水餃館、國立科學工藝博物館、家常牛肉麵

由高雄流行音樂中心返到酒店，咁熱當然係去七樓飲下凍嘢(+食青豆啦)，稍稍休息再出發~

每日一七樓

下晝去國立科學工藝博物館(簡稱「科工館」)，我哋打算搭巴士去到嗰頭附近再搵嘢食~

搭巴士完全反映到香港人同台灣人嘅分別，我哋習慣架車一邊行我哋一邊係車上移動嘛，即使小朋友都可以健步如飛，但呢個台灣司機就禁止我哋行車時移動，上車時又要我哋坐定定先開車，差唔多到我哋準備定去道門度(好正常啫)佢又叫我哋坐低，可能佢唔知我哋急咩，其實我哋都唔急，只係慣咗~

落車行兩步就見到呢間五花馬水餃館，而家打blog時一search先知原來係全台灣都有嘅連鎖店，印象係，菜單好豐富、好抵食﹗好似亂咁叫埋單都會好平咁，食得放心~仲有任食小米粥、任飲冰茶﹗

食物未到，食住免費小米粥先~

枱號唔係12345嗰啲，我哋張枱係「劉羅鍋」，一search之知道原來佢係中國古代嘅宰相，仲好常將佢嘅故事拍成劇集添~其他枱好似有諸葛亮嗰啲~

最吸睛嘅係黑麻麻水餃，其實係虱目魚水餃~餃子、麵、青菜、湯樣樣都唔錯，而且因為口味比較清淡，可以日日食都得~

濃厚啲味道有呢個黃金地瓜餡餅，曉特別有興趣要試，因為佢最近睇屁屁偵探個故事，由怪盜B扮成嘅蓓莉就話要整黃金地瓜批俾屁屁偵探食，所以曉都想食下好似特別勁嘅黃金地瓜~係幾好味喎~

食飽飽我哋就過去科工館啦，點知行行下曉突然話緊急要去廁所，我諗當時最近嘅廁所應該都係直奔去科工館啦，好啦，咁行快啲啦，估唔到佢係異乎尋常地急，我唯有放開詩俾爸，然後就拖住曉拔足狂奔，我未見過佢跑得咁快，同急得咁煩躁，佢全速開行摩打腳，我就運用我嘅人生經驗，唔浪費任何時間帶路直達最近嘅廁所—-順利抵壘﹗

同爸詩光年組重新會合之後，去買飛入場，參觀常設展、3D電影，ok﹗不如去嗰邊影張相丫﹗

哇，一發不可收拾，下面原來有個超大遊戲區，落去遊戲區問問，原來呢個特展叫做「熱雪天堂探索樂園」，要另外購票入場，可以單獨去攀爬區或玩雪區，或者一票通行，玩雪都好吸引喎，但兩隻居然淨係有興趣爬高爬低，都係嘅，香港好少見咁大規模嘅攀爬遊戲室~未夠鐘到下一時段，我哋先去參觀展廳啦~

展廳科普內容都比較深，唔係盲目亂按掣，而係真係了解下講咩嘅話都要慢慢解析~

我哋參觀第一個館主要講環保，氣候暖化嗰啲，後來另一個館有關於太空，又睇咗少少關於鏡同力學嘅館~某啲展品非常多人，原來有啲通關任務俾小朋友，跟住指定路線，儲齊咁多個station嘅貼紙，就可以換高架單車搭乘券，睇嚟我哋都唔夠時間過晒所有關卡，所以都冇刻意去排隊了，啲隊好長，而且要過關都唔容易，唔抄人哋答案就要乖乖睇晒其他展覽內容先識得答~

氣候暖化

鏡之樹林，唔好撞埋去呀~

動能變位能，位能變動能

拋物線

運動與健康

好啦，到你哋最期待嘅時間啦，遊戲室﹗我同爸爸都好期待，因為可以二人世界坐埋一邊休息下~

興奮二人組

上咗去啦~

我哋係下面坐下hea下時，估唔到居然會有驚喜﹗

突然間，落雪呀﹗﹗攀爬區旁邊就係玩雪區，玩雪區會隔一段時間落一次雪，我哋居然冇買嗰邊入場券都可以順便玩埋~啲「雪」輕飄飄，用手接住好似泡泡咁，好快消失，上次去韓國經歷過真落雪，都有少少似架~

因為夠鐘睇3D電影，遊戲室session未完我哋都照走了，好在兩個都乖乖肯走~

We are ready~

我哋今次睇嘅3D電影叫做「太空狗月球大冒險」，小朋友玩到咁攰，我有少少擔心佢哋聽唔明之下會瞓著，結果都係我翻譯少少咁啦，內容明與唔明之間吧，講太空狗一家三口係唔同情況下去咗月球，解救危機之類嘅劇情~雖然啲角色都係講普通話，但究竟套影片係咪俄羅斯製作嘅呢？係咁懷疑人哋係美國間諜嘅？

睇完3D電影科工館都差唔多關門了，地下近大門位置有啲類似創意市集嘅小攤檔，有檔住請佢哋兩個食啲餅仔，不過就冇睇啱啲咩要買~

出去嘅戶外空間見到有啲小朋友學滾軸溜冰，地方大真係好，可以安全地俾佢哋練習，好多個都踩得好好啊~

另外又有一條戶外跑道可以俾人踩滑板車﹗香港好多公園都唔准呢樣唔准嗰樣，冇辦法啦，人太多，容易有碰撞~係呢度仲見到一個神奇景象，有廣播帶領大家做「拍拍操」，啲人坐得好遠好開，但大家聽住個咪播放一二三四二二三四，就一齊拍拍自己膊頭，跟住又拍拍大脾之類~

離開科工館開始有啲落雨，仲越落越大，因為冇帶遮出嚟，我哋放棄巴士，call咗Uber返酒店先算~我哋研究，出去食晚餐時，應該擔把細遮去全家買多把大遮丫，定係照two by two擔細遮濕就濕~先試試Plan A啦，酒店都有幾間餐廳，睇下有冇位？食早餐自助餐嘅餐廳，夜晚變成Shabu Shabu自助晚餐，原來已經fully booked了，另外中餐廳係廣東菜我哋又唔太想，既然細雨番，就近近地出去搵食啦~

先一晚已經見到呢間牛肉麵店，感覺真係好家庭式，招牌又細又唔起眼，入去坐嘅房間樸實無華，餐牌選擇都唔多，不過味道ok，而且估唔到嘅係，後來又陸續有人入嚟食嘢~