焢窰之後第二項活動就係釣魚了﹗我從來都未釣過魚，農場方面為我哋準備o既用具係極原始o既工具，一支幼幼o既藤做釣桿，然後有一set魚絲連鈎連浮鏢，仲有一小包o既黏黏魚餌~

於是我哋就動手砌好呢set嘢，開始係小魚塘度釣魚…

我都試下先~

其實魚塘入面o既魚非常多，我都唔知好彩定唔好彩，我第二次放魚餌落去就有魚上鈎了…但我唔係真係想食啲魚嘛…

即刻塞俾爹爹，大叫快啲放番佢出嚟…於是爹爹就幫我拆番條魚出嚟，放番佢落水喇…因為我太怕又會釣到，所以我就收手了，主要負責影相~最後，爹媽每人都各釣到一次，我哋都將全部魚放生~釣魚節目到此結束﹗

梳洗一下，我哋就去燒烤lu~

見到農場o既工作人員已經set好晒啲東東，有我個名o既燒烤爐同用品放係戶外o既帳篷之下，而室內地方亦放好晒啲食物，包括生o既肉類、蔬菜~仲有啲唔需要烤o既食物，有自助沙律、水果、甜品同埋竹筒飯﹗

竹筒飯已經蒸熟係蒸籠入面，大家只要破開就ok了，媽咪都似模似樣o架~

裡面係調好味o既糯米飯~

我哋都唔可以整係食啲熟食家嘛…

得到旁邊一位台灣男士o既協助，我哋個火生好了﹗

食物種類都好多，但一開始時火力唔均勻，所以好難烤得靚，所以最初時最好食o既就係薄豬扒，火力容易掌握嘛，而最失敗就係雞翼﹗因為仲要係雞全翼呀，特別難烤得靚~港式燒烤就唔同呢，可以自己控制支叉同埋個火o既方向、距離，會易啲烤得靚，但放晒上個網度烤o既反而難烤得好~好在，個火越燒越旺，亦越嚟越均勻，我哋o既第二批雞翼靚咗好多啦~而我哋有烤好幾次o既，亦包括煙肉葱卷，宜蘭o既三星葱係當地o既特產呢~

除咗放係裡面o既自助食物之外，係室外亦有農場o既員工為大家包雲吞，即包即燙，yummy~

到個火變成最最最最最靚時，大家都食飽晒lu~好可惜啊~

夜晚o既最後一項活動就係DIY自製天燈，天燈係台灣o既特色「勞作」，大家寫上願望，將天燈放上天空許願~

首先由老師示範一次點樣做~

做法都好簡單，做天燈o既五片紙已經裁好合適o既size同形狀，我哋只要依次序黏貼好就ok~

黏好就要寫上願望咯~媽媽寫咗「選舉順利、平安喜樂」，因為聖堂o既牧民議會選舉快到啦嘛，爹爹就寫咗「燭願、祝願」，希望燭光基金將要出版o既十週年特刊一切順利，而我就寫咗「知足常樂、笑口常開」，呢個唔係最重要咩？

老師最後教大家點樣纏好藤圈，之後再測試天燈個頂係咪密不透風，測試完畢就可以點著佢，將天燈放上天，亦即是將願望一齊放上天咯~

一人一邊寫咗願望之後，仲有一邊，我哋三人合作寫埋最後嗰邊，我唔知點解諗起呢句迪士尼o既歌詞：「when you wish upon a star，there’s no difference who you are~」可能形容緊o既就係我哋呢一班許願o既人吧~大家再畫上色彩繽紛o既星星，完成﹗

原來點著咗天燈之後，想影多幾張相都唔得呢，因為個紙罩會變得非常燙手，你一定要let it go~

我哋個天燈放咗上天lu~佢昇得好快呀~~~~~~~~~~~~~~~~~~~~~~~~~~~~~

聽講，我哋今次個天燈都算好成功，因為飛到好高好高，佢消失踪影時，係因為飄咗係樹遮住o既位置，如果唔係，可能一直都trace到佢o既去向呢~

農場o既第二日仲有豐富o既節目，大家密切留意~

待續

前往其他台灣旅遊blog

Comments

comments