24-7-2023：暑假高雄墾丁遊day 4(part 1)．抵到爛E7play高雄三多店、抵到爛炸花枝羹

出發前plan day 4呢個星期一上午嘅行程時就有啲苦惱，因為下晝出發去墾丁，最好唔好離酒店太遠，星期一好多美術館、博物館、甚麼館都休館，商場又冇咁早開門，太遲開始玩對我哋呢啲早起身嘅人變相浪費咗時間，一心諗住去市區內、有好玩兒童遊樂場嘅凹子底森林公園，但先一晚突如其來嘅大雨，又覺得搵番個室內plan B比較好~

夜麻麻俾我上網搵到呢個叫做E7play嘅室內玩樂場地，唔單止收費平，開放時間仲長到冇人信，係早上8:30至凌晨2:30呀﹗﹗﹗連香港人都覺得驚訝嘅程度，通常target親子客，早極10點開門都好合理，如果target玩到半夜嘅年青人，即使下晝先開鋪都無可厚非，而家呢個營業時間係大中小通殺﹗

店內平面圖(圖片來源：E7play網站)

E7play主打保齡球場，另有桌球、飛鏢、漫畫區、按摩椅區、電腦包廂區、大量遊戲機(機鋪嗰啲遊戲機同Switch/Xbox嗰啲都有)，仲要係一票通行，俾一個價錢，入—-面—-全—-部—-都—-係—-任—-玩—-﹗﹗﹗﹗﹗太太太太太過份了~記得中三時去多倫多讀summer school，學校有一日嘅outing係去Sega打機，又係一卡通，真係好爽~

更離譜嘅係，莫過於可以無限添飲嘅暢飲杯，一般去餐廳，你order無限refill嘅飲品，都要成枱人都叫，如果唔係你叫一個大家share嚟飲咪蝕晒？佢呢度唔理你幾多個人入場，買幾多個杯，因為，個杯唔係單單今日無限添飲，更可以飲一季，我哋嗰隻夏秋季杯，可以飲到今年11月30日呀陰公~如果邊個未來呢幾個月會去台灣嘅E7play，台北兩間分店高雄一間，可以問我借杯囉，真誇張~

我哋搭捷運到五塊厝站，網頁教租共享單車，踩3分鐘到，我哋有大有細行路過去，Google Map都話12分鐘啫~我哋非會員平日上午入場玩三小時，大人NT190，曉學童票NT124，詩免費入場，暢飲杯NT40(另有大杯貴少少，其實好處只在於唔駛行出行入斟得咁密，反正暢飲~)，locker免費~呢個地方唯一壞處係非常嘈，後生仔女職員講嘢快，加上非常嘈，入場解釋啲規則俾我聽都唔係好知佢講乜，最重要應該係輪候保齡球嘅問題，因為人多，球道有限，所以要排隊，好在牆上有個大顯示器，show到排到邊個number，自己要留意住~

咁新奇，梗係周圍行下，又樣樣都試下啦~

免費入場嘅詩點解免費，因為打機能力真係同年齡成正比，當然去到某個歲數開始就會冇關係啦，但玩任何game曉vs詩都係曉壓倒性勝出，理解遊戲、反應、手眼協調詩都只差未夠大個啫~打地鼠、射擊、氣墊球等等都真係要對戰嘛~

所以四個人一齊玩嘅射擊有爸媽贏冇咁唔忿氣~

一齊投籃有啲合作成份又高興啲~

賭徒x3？﹗nonono~不涉及任何金錢/獎品成份~

保齡球到我哋啦~

連借鞋都係全自助，自己度腳size自己試下，記得著完放番對鞋係正確size嘅鞋架就ok了~

因為係親子同樂嘅遊樂場，所以好似詩咁細隻嘅鞋都有~今次我哋冇防落坑球道，好在有發球斜坡台，小朋友可以對準先碌個波落去，都未至於唔夠力或者下下落坑(上次去韓國時雖然有防落坑球道，但小朋友要靠自己力量碌個波出去，詩詩試過個波去到中間停低咗，超爆笑，請參閱：28-12-2022：首爾江原道冬日滑雪行day 7(part 3)．溫馨滿分公仔麵午餐、氣氛包廂韓牛烤肉、笑到碌地保齡球大賽)~

但打保齡球時發生一件小插曲，詩詩打打下波突然大叫媽咪，成手血加上有一片白色嘢係手上，我以為佢隻手俾保齡球夾親夾到爆指甲，定一定神先知佢係甩咗隻牙，冇錯，佢上面隻門牙鬆咗好一段時間，已經鬆到係正上顎嘅正中間(正常隻牙位置係左or右嘛)，而家甩咗舒服晒~