24-7-2023：暑假高雄墾丁遊day 4(part 2)．初抵墾丁凱撒大飯店、小灣海水浴場禁水令

由高雄前往墾丁，可以搭由高雄左營高鐵站出發，叫做墾丁快線嘅巴士路線，如果上午高雄活動後，要食午飯，又要趕返酒店拎行李，再過去左營，加上我哋兩大兩細嘅超慢行動力，應該會花太多時間，所以今次索性經kkday book咗車由高雄嘅酒店接我哋去到墾丁嘅酒店，四個人嚟講都算係包車最抵嘅價錢了~兩個小朋友上車好快瞓瞓瞓，叉足電去到再玩，即刻值回票價~

上網搵住宿時，一見到墾丁凱撒大飯店就鍾意，不過覺得有啲貴，本來打算住兩晚，好好歎下酒店嘅設施，歎下沙灘，然後要早出晚歸好多活動嗰幾日嘛，唔駛住咁貴啦，瞓得舒舒服服就ok，結果個颱風杜蘇芮完全改變咗我哋今次個行程呢~

lobby已經充滿度假風

check in、上房，入到去，小朋友們就好興奮了~

因為有佢哋最愛嘅浴缸同埋露台，首先要係房度騰來騰去，打開晒所有啲櫃嚟研究下先~

去台灣最鍾意係好多酒店都有四人家庭房，有兩張雙人床，可以瞓得舒服啲，後來我哋直接將佢變成特大四人床了~

唔執輸，同一個位都要各自影，連pose都要一樣~哈~

稍稍休息，我哋趁未天黑，去下小灣海水浴場睇下影下相，跟住就去泳池游水啦~個風就快殺到，今日唔游，之後唔知仲有冇機會再游啦~

襯晒滑浪主題嘅泳衣>v<

酒店有條小路可以直達小灣海水浴場，而且係沙灘仲有服務點，可以借毛巾、沙灘椅、玩沙用品等等，本來可以非常歎咁享受陽光與海灘…

但我哋去到時，沙灘已經懸掛紅旗，唔准進行任何水上活動了，爸爸只係想輕輕濕濕隻腳影張相，都幾乎俾兩個女阻止~

小灣海水浴場啲沙好幼滑，無論係濕嘅定乾嘅，踩落去都好舒服~

兩個唔理咁多，即刻玩沙，搵貝殼，收埋石頭，冇工具都咁好玩~哇，仲見到蟹仔添呀~

有咩發現？

好在打風前都仲有藍天白雲~

可以嚟個開心自拍

一場嚟到，點都掂下少少海水啦~確實，我都唔敢再行出多少少了，雖然個風未正式到，但啲浪都開始大了~

影夠相(未)玩夠沙，我哋都要返去啦，因為book咗七點半食自助餐，我哋要返游泳池玩一陣水，仲要預時間沖身換衫，都唔可以太晏~

酒店泳池其實都算大，不過真係好多人﹗

可能大家都係打風前最後一擊要玩水？定係旺季本來真係咁多人？為咗今次旅行，專登買咗對新水袖俾本來已經唔多用水袖嘅詩詩，同埋買咗塊細浮板俾佢帶嚟旅行，果然酒店啲泳池好多時都好深水，上次去澳門，就係成個游泳池冇一忽詩詩係腳到地，於是我同爸爸輪流變成樹熊嗰棵樹~不過今次酒店有得借水泡，為咗省力啲移動，連游水已經游得唔錯嘅曉都話要水泡~

泳池專登劃咗個深水區，有浮波波攔住，講到明嗰邊唔准用任何浮具，啱嘅，啲唔識游水嘅人恃住有水泡走去啲深水區真係有啲危險~點解曉會除低水泡勇往直前呢？因為嗰邊有跳水板呀﹗真係話佢細膽又唔係，大膽又唔係，明明早兩日嗰跳樓機矮到不得了，佢都驚到喊晒，呢個跳水板真係高，跳落去啲水又真係深，佢居然好主動話想挑戰，仲要重覆跳咗好多次﹗﹗最貪玩嘅媽當然都要試下啦，我跳﹗姿勢肯定唔優美，總算…挑戰成功﹗不過跳完第二次之後我決定唔可以跳了，下次要著連身泳衣先好再跳，著bikini跳水…太危險了﹗shhhhh~

之後去bb池泡多一陣就返去沖涼換衫準備食自助餐啦~

去完旅行返嚟已經一個月有多先打blog，啱啱問問day，究竟呢個自助餐有咩特別，佢話睇下相啦…