標籤彙整: 關西

25-11-2009：大阪白浜day 2(part 3)．回味無窮松阪牛燒肉

發佈日期: 作者:
6

以為去環球影城已經夠令人流連忘返，原來之後仲有另一個高峰，可以入選今次旅程o既三大優秀經歷呀﹗

第一日o既晚餐，就一次過試咗關西出名o既大阪燒、章魚燒同埋炸串，係旅遊書度講o既關西名物，仲有燒肉同埋河豚﹗day話我，你都唔敢食河豚o架啦~冇錯﹗我的確唔敢食…:p所以燒肉就成為我哋下一個目標了﹗

由universal studios出嚟，決定搭番車過去道頓堀嗰邊，因為嗰邊食肆密集，選擇多~不過去到難波駅有少少迷路…因為難波站好大，個地鐵站都橫跨幾條路線~好在有day安撫下我「怕太夜冇嘢食」o既不安情緒~大約十點左右我哋都坐低咗係餐廳入面~

其實都有好多間燒肉o架，係同一條街有另一間係放題燒肉，不過價錢差不多o既時候，我深信單點o既一定比放題o既質素高好多﹗

結果我哋決定食呢間係法善寺旁邊o既松阪牛燒肉M了﹗

我哋叫咗set，而家陸續為大家介紹啦~

正式o既食物嚟之前，先有呢個小小小食，係有啲濃濃o既麵豉，你可以用條蘿蔔棒去沾嚟食~

應該都算係少少高級o既店，裝潢好舒適，表面上係塌塌米，實質上有地方塞對腳入去o既~因為時間比較晏了，所以成個「cubicle」得我哋一組客人咋~

首先要介紹一下食燒肉o既「配套設施」先~

哇，係久仰大名o既新鮮芥茉﹗係將太的壽司入面就講得多了，百聞不如一見，我哋有機會親手磨啲wasabi出嚟食呀~不過嘛，點解啲wasabi去咗皮o既？唔係話wasabi o既辣味主要集中係皮咩？唔，一邊磨一邊要讚歎，好香呀~

肥肉？冇錯﹗呢舊牛o既肥膏係我哋將要用嚟燒肉o既油，之後就知道點樣用法了~

三款醬料，分別係海鹽、松阪牛燒肉M自家製醬料、同埋配合新鮮芥茉食用o既普通醬油，唔，食過咁多款之後，我都係最鍾意鋪頭o既自家製醬料，味道比較豐富又配合燒肉o既味道吧？

香香又清涼o既新鮮芥茉﹗

正式o既前菜出場了~

右上角o既明顯地係熟牛肉啦，不過係相片睇唔出o既係，其實佢係有用醋醃過o既，左下角o既係新鮮淮山，有黏黏o既口感~而左上角o既睇落好似係蕃茄，點知原來係醋醃生牛肉﹗果然係牛肉全餐呢~不過都唔腥，因為只食到醋醃味~我好傻瓜咁問個waitor，中間嗰個係咩，佢話…係decoration﹗oops﹗好樣衰~:p

第一道菜唔係直接放上去網網上烤，佢放咗塊石板落嚟，我哋就搽油上去，用o既係先前o既肥膏，預備好了﹗

先嚟呢個醃得非常惹味o既牛舌~

就快熟lu，有得食啦﹗因為實在太精美，本身唔食牛舌o既我都勇於嘗試~

係油膩o既燒肉之中食啲清新o既蔬菜沙律真係好good，而且dressing係我喜愛o既和風醬汁﹗

主菜上場了﹗

好靚o既松阪牛呀﹗你睇，啲雪花分佈得幾細緻~有三款，唔同脂肪分佈，唔同脂肪濃度~反而嘛，我最鍾意最少脂肪嗰款喎，因為牛肉味最香濃~heehee，但其實全部都好好味﹗每食一舊都叫我瞇瞇眼好耐~

主食方面可以揀白飯或者茶漬飯，未試過嘛，我哋每樣都叫咗一款~

原來茶漬飯個湯底都好好味o架喎，唔駛餸都可以食晒成碗飯﹗

隨茶漬飯仲附上泡菜同埋酸梅一粒﹗哇，今次日本一行真係發覺唔係好頂得順啲酸梅呀，勁勁勁勁勁鹹﹗

個餐牌show咗幾款唔同級數o既松阪牛燒肉餐，我哋叫o既，當然係最basic但又已經足夠滿足我哋o既3800yen(每人)套餐啦~

精彩o既事情未結束，甜品又係另一驚喜﹗

噢，係好清新o既柚子雪葩呀﹗食過肥膩又濃郁o既燒肉之後，呢個柚子雪葩真係好似吹過o既一陣清風，掃走所有油膩o既感覺呀，太體貼了~

我同大家極力推介﹗如果要去大阪的話，想食燒肉可以試試係道頓堀，法善寺附近o既呢間松阪牛燒肉M﹗正呀~

待續

25-11-2009：大阪白浜day 2(part 2)．環球影城之夜

發佈日期: 作者:
4

繼續努力玩盡各項遊樂設施﹗不過呢，有兩個ride係我哋主動放棄決定唔玩的，第一個係merry-go-round，其實我想玩o架，不過day話我哋大個lu喎…:(

第二個就係jurassic park ride，因為我哋見到人哋玩…噢，好不容易先整乾o既衫褲鞋襪，正享受住難得o既乾爽舒適感覺，我唔想又成身濕晒呀﹗

back to the future﹗細個去LA o既universal studios時都有玩過啦~當時覺得好高科技﹗不過比起而家最新o既4D嚟講又好似遜色少少lu~

原來ET ride而家正變緊身，所以暫時唔開放，剩低一個小小o既ET展覽咋，大家用一雙腳嚟行，跟住個領隊睇下啲ET模型，講下故仔咁~

又有另一個街頭show，載歌載舞呢~

仲有時間準備要睇夜晚o既大show同埋夜光巡遊，啲ride又玩得七七八八，表演呀嗰啲又關晒門咯，我哋不如就周圍影下相啦~

熱情o既園內工作人員﹗我哋冇搵佢哋幫我哋影o架，係佢主動接觸我哋，問駛唔駛幫我地影~優質o既服務態度﹗

又點少得巨型聖誕樹呢~

夜晚o既購物大街又另一番景象~

差唔多夠鐘開show lu~有個大大大型show上演﹗我哋可以欣賞五光十色o既視覺效果，我哋可以聽下重新編曲o既傳統聖誕歌，可惜唔識得聽日語對白，唔知個故事講咩呢~

你睇，個場面幾grand~

不過呢，從呢個畫面，可以知道呢個係一個發生係聖誕節o既愛情故事﹗

臨尾仲有煙花添，哇，好浪漫呀~

天使歌聲~見day影咗咁多張，就俾個面揀一張嚟同大家分享啦，大sony果然非常優秀﹗咁遠都影得咁清~

睇完呢個show仲有少少時間，可以玩一次terminator o既3D show，都幾有趣，因為佢係真人同影像配合o架~有人係個螢光幕度走出嚟，又真係有個真人喎~

凍凍地…

買杯熱朱古力就去搵定個靚位準備睇夜光遊行啦﹗我話嘛，係同day去旅行佢先會咁縱容我﹗容許我買啲唔等駛o既東東﹗heehee~個snoopy紀念杯係咪好靚呢~

我哋好lucky，雖然只係十一月底，但universal studios已經開始咗聖誕o既主題，所以難得地可以碰上呢個咁華麗o既夜光巡遊﹗

由Elmo領航﹗

既有花車，亦有真人演出﹗全部都閃閃發光o架~佢哋一個一個主題、一隊隊咁出現，好有故事性~

有人扮o既華麗孔雀…

亦有好cutie o既大型孔雀花車﹗

遊行隊伍真係好長好抵睇﹗睇到某個位，我心裡面諗，其實去到呢個位就結束我都覺得好滿足o架啦…點知呢個念頭係我心裡面重覆好多次，個巡遊都仲陸續有來﹗

最令人讚嘆o既係灰姑娘隊伍﹗

有可愛o既雀仔開始，之後仲有大雀、小雀、南瓜車、小仙女、城堡、燭台…好多好多o既佈局之後…

先至隆重地有cinderella出場﹗哇~

睇完個夜光巡遊都八點鐘，都差唔多要關門啦，所以隨便再睇睇啲鋪頭就要走lu~

俾我發現咗hello kitty抽獎遊戲﹗記得舊年去金澤o既祭典時都玩過呢啲，嗰次俾300yen係抽鬆弛熊，今次要500yen，抽一張號碼，就知道有咩禮物囉~

我結果抽到呢個大大份o既「蛇墊」呀﹗即是打開嚟就可以做張墊褥嗰啲呢~似乎500yen係賺了，不過嘛，之後咁多日旅程我就要時時照顧住我呢個「伙伴」lu~佢好大隻呀﹗

待續：松阪牛燒肉

25-11-2009：大阪白浜day 2(part 1)．環球影城之日

發佈日期: 作者:
9

嚟到旅行o既第二日，唯一一個大阪o既full day，我哋一早毫無疑問地就決定咗去環球影城，識我o既人都知我係勁鍾意去主題樂園玩o既~(童心未泯？﹗:p)洛杉磯o既環球影城好細個時去過，有啲演出內容依然歷歷在目呢，不過，相隔咁多年，應該都有好多新o既東東吧，而且大阪o既我都未去過，day都一定會enjoy o既~

先享用comfort hotel o既自助早餐~

comfort hotel屬於經濟型旅館吧，陳列簡單，而且好多「西裝友」入住，可能係過嚟大阪出差o既人吧？香港人都多，因為…heehee，佢係東瀛遊package入面o既最經濟o既一間酒店﹗但乾乾淨淨整整齊齊，地點便利，已經夠晒好lu~去日本，特別係大城市又唔係要住靚酒店o既~

早餐選擇都唔算少，每日有兩款熱湯，第一日o既係麵豉湯同埋蔬菜湯，有各款麵包、日式飯糰、腸仔蛋、沙律、乳酪、咖啡茶咁，都唔錯o架~感覺有少少似上次去高雄時住嗰間商務旅館~(7-2-2009：出發台東(Part 1)．美味家鄉菜)

決定直接行過去難波JR站，因為行過去心齋橋地鐵站都一段路，之後又要轉又要行，倒不如一開始行遠少少，直接去搭難波o既大阪環狀線啦~況且又可以係呢個美好o既早晨行一行舒適o既街道~

轉搭前往universal city o既櫻島線，去環球影城o既列車都特別colourful又有好多卡通係上面呢~已俾人一個歡樂o既氣氛lu~

其實universal city係一個旅遊區rather than單單一個主題樂園，落JR之後街上有好多購物商場、酒店、食肆，難怪有啲人買兩日套票啦~

出嚟迎接我哋o既係聖誕裝束o既Elmo﹗

呢個大大招牌無論如何都要影一影o既~到此一遊嘛~

入場之後就覺得，哇，真係好大﹗下一句就係，哇，香港廸士尼真係好細…雖然，我都係香港廸士尼o既捧場者，但細呢樣o野的確係一個fact…

因為係平日吧，好多遊樂設施都唔駛排好耐隊，排得最耐o既都只係蜘蛛俠o既25分鐘，一啲都唔算耐啦~有啲仲可以即刻有得玩添~

入到去先玩咗4D影院，係史力加o既影片，雖然唔識聽日文，唔知道故事內容，但感官上o既stimulation十足，唔識聽都唔係太大問題~同一個劇場下晝四點幾之後換上芝蔴街o既影片，呢個真係oh no no，day悶到瞓著咗…因為唔知佢講乜之餘仲要冇乜刺激新奇o既內容，可能比較適合細路仔吧~

超喜歡呢個hollywood dream過山車﹗我鍾意用玩電腦sims類型game o既用語去形容，呢個過山車嘛，驚嚇度低，嘔吐度低，但歡樂度勁高呀﹗因為佢行得唔算快，甚至可能係坐過o既過山車之中最慢o既，又冇乜倒轉，但係離心力好大，好多free fall，佢o既安全帶又唔會束到你好緊，真係有拋咗出嚟o既感覺o架~耳邊又一邊播住啲勁歌﹗係一個好好o既experience~

成個影城都充滿住可以影靚靚相o既地方呢~又要影相又要玩真係好繁忙呀~

有少少美中不足o既係，影城o既schedule冇print係小冊子度俾你拎住，而係周圍有呢啲告示牌，顯示每一個show下一個場次o既時間係幾點鐘，同埋啲ride o既等候時間要幾耐~但咁樣呢，你冇得事實plan點樣玩法囉，好似我哋咁，到最後所有ride都幾乎坐晒，但有啲show就冇睇到lu，因為唔知佢last show係幾點鐘，同埋唔知啲show有幾頻密上演嘛~

間中街頭上有呢啲小小演出，不過我哋都冇坐定定呀，因為唔識聽日文，唔知佢講乜，望一望就夠了~

我哋大小通玩呀﹗大至最刺激最大型o既遊樂設施，小至俾小朋友玩o既東東都照玩~heehee，呢個snoopy studio我哋都逗留咗一陣呢~

同電視入面snoopy打棒球o既小遊戲~

超小型過山車，不過嘛，玩o既反而係大朋友居多呢~我同day坐入一卡已經好逼，唔知嗰啲佬點樣可以兩個人逼入去？﹗

係snoopy studio出嚟有一個滑水道game，我哋坐住一條橡皮艇係滑水道滑落嚟，頭一半路程時覺得，哇，yoho，爽呀﹗不過嘛，滑咗一半之後發覺唔對路…

因為會濕晒o架﹗我仲要「首」當其衝﹗因為坐係前座，所以咪望day「擋風擋雨」囉~頭頭濕到落腳，即使外面有個暖風機俾人吹乾衫褲都冇用，因為我啲衫係擰得出水o架﹗結果去買咗件tee，起碼上身衫乾o既冇咁易凍親，條褲就冇辦法了，慢慢「ngao」乾吧~

換好衫，出嚟就撞正聖誕主題o既巡遊呀﹗hello kitty、傻豹、薑餅人、聖誕樹一齊跟住聖誕歌載歌載舞，充滿歡樂氣氛~

之後仲有大量o既雪人排住隊出場呢~我覺得啲雪人生得好似一個人，heehee，你覺得佢哋似邊個？

臨尾仲落人造雪添~大家可以排隊同演出cast影相﹗

肚餓了﹗係時候食個lunch先~

我哋係snoopy餐廳食咗漢堡飽餐，貴o架，冇辦法啦，都預咗多啲$$食環球影城入面呢餐~我哋打算晚餐就出番去市區先食lu~

下晝繼續玩各式各樣o既ride同埋表演，呢個係「大白鯊」ride之後影o既相﹗好多個show都幾好o架，最令人有驚喜o既應該係蜘蛛俠吧，而家4D show都好普遍，蜘蛛俠仲要係坐住架車行o既4D冒險ride，完全滿足你o既五官刺激呀~啲壞人個個都會好近咁爬上去我哋架車度，我哋又要坐住架車逃脫追捕啦~

之後o既blog繼續同大家講我哋係環球影城o既經歷~

待續：環球影城之夜

24-11-2009：大阪白浜day 1(part 2)．美味芭菲．大阪夜景

發佈日期: 作者:
4

逛完心齋橋筋商店街同埋道頓堀之後，我哋就進發去下一個目的地梅田了~因為總共只去五日，可以spend係大阪市區o既時間就只有第一日，咁唯有趕趕地咁啦，好在有啲地方可以行路來往，唔駛時時都搭地鐵~

嚟到梅田HEP FIVE了，點解咁多個商場要揀呢一間？咪就係因為有個大大o既浪漫摩天輪囉~:p

呢個聖誕裝飾唔單只閃閃咁靚靚咁，而且定時仲會轉燈光o既顏色同埋會配上音樂o架~

hee，少少老土o既係，明明帶咗兩把遮嚟日本，諗住落雨都唔怕，點知第一日，亦係唯一o既一日有落雨，就冇帶啲遮出去喎，唯有買把遮啦~今次買o既又係waterfront o既遮(我平時最常用嗰把青蛙遮都係waterfront嚟o架~第一次係香港買，第二次係日本買~)~呢把透明底有一條條橙色黑色金魚o既遮只係五百幾yen咋~靚﹗

勁少人搭摩天輪，用我哋只能夠閱讀日文入面o既漢字能力嚟睇啲告示，似乎早幾日呢個HEP FIVE摩天輪免費入場~可能因為咁啦，想玩o既人都玩咗了，今日仲要天氣麻麻地喎，得我哋呢兩個傻瓜堅持要坐上去…:p

本身可以坐四個人o既車廂，兩個坐就非常寛敞舒適了，加上有冷暖氣系統，好似仲可以連接自己o既ipod落去佢o既loud speaker度，播放自己喜愛o既音樂，冇乜景睇都係一種享受嚟啦~

唔，一直落住細細雨，所以都唔係好睇到窗外o既景咋~

雖然玻璃窗上有講你知邊楝building係乜東東~

好快脆，15分鐘o既摩天輪之旅就結束了﹗一場嚟到，都逛一逛呢個HEP FIVE商場啦~我哋行得冇幾步，就俾呢間鋪頭吸咗入去了~

咁cosy o既環境，究竟係做咩o既呢？

原來係食邪惡甜品o既邪惡地域﹗我哋兩個人share呢杯勁勁大o既芭菲都覺得太邪惡呀~每人有好多粒cream puff之餘，入面仲有雪糕啦、yogurt啦、粟米片啦、蛋糕啦…哇，但係好好味~

兩個人好快就jap光光杯超大芭菲了﹗

就係呢間鋪頭了，仲有好多其他款式o既甜品o架~

其中都吸引我哋注意o既有呢杯蕃薯yogurt？﹗好似係熱o既？﹗要介紹俾蕃薯愛好者我爸食呀~坐隔離枱有個妙齡女子都order咗呢個呀~唔知係點o既味o既呢？

櫥窗o既一小角，中間o既人氣no.2就係我哋o個杯芭菲了﹗

之後我哋過去梅田空中花園展望台睇夜景，唔，行過去都花咗少少工夫搵路，因為又有大地盤啦，啲地圖o既landmark又唔係好搵到喎，入去JR車站o既information centre個大叔拒絕同講英文o既我哋交談呀，慘~好在都趕得切係關門前半個鐘入到場~

地下o既空地好似整咗D類似聖誕小鎮o既東東，但因為空中花園快要關門了，我哋趕緊上去先，可惜落到嚟時已經熄晒燈啦~

173米高o既展望台，即是三十幾樓，其實都唔係認真高o既，比起day屋企只係高少少…不過嘛，大阪o既樓宇唔高，要睇夜景嚟講173米就夠晒lu~

空中花園最頂頂係open area，可以睇晒成個大阪o既夜景﹗

地面有好多螢光螢光o既東東，好靚呢~

其實花園出面都好凍，仲要落緊雨又唔准擔遮，我哋行一圈，影啲相之後都忍唔住要盡快入番嚟了~因為入面都仲有其他嘢參觀o架~

聖誕限定﹗入場時每人派一粒星星俾你，大家寫上願望…

掛上一棵棵願望聖誕樹上面﹗我當然唔會講你知我許咗咩願啦，呵呵~

展望台上面仲有cafe啦、精品店啦、少少關於世界上面其他o既塔o既展覽啦、坐得舒舒服服o既椅子啦，如果有多少少時間，天氣又好啲o既話，都可以花長少少時間係度hea o既~

噢，十點半了﹗要關門啦~

由地下影番上去就係咁o既樣了~

因為對條路都熟悉少少了，番去酒店就一啲困難都冇啦~累了，goodnight﹗

待續：day 2 o既行程﹗

24-11-2009：大阪白浜day 1(part 1)．初到埗大阪走走看+關西美食

發佈日期: 作者:
4

朋友都話：「哇，你又去旅行？」問完我去邊之後就話：「又去日本？」先聲明，我雖然好鍾意去日本(數起嚟今次係第五次去)，但我唔係齋去shopping嗰種女仔嚟o架，我嚮往o既係日本o既美食、美景、賓至如歸o既感覺﹗

有菊姨介紹o既國泰package，早機去晚機返，非常好~可惜我略嫌個早機未夠早，十點二十分起飛，所以去到時都已經接近黃昏呢，第一日有得玩o既時間就比較少囉~

香港機場候機室，暖暖的冬日陽光~好舒服呀~

過關後同day悠閒咁食咗個大家樂早餐，都仲有少少時間悠閒地逛下書店先至上機~

呢張signature相係一定要影的﹗代表住嗰一次旅行o既開始~

機程只有三個幾鐘啫，好快脆就過~又有飲品花生，又有飛機餐，同埋今次坐得長少少了，有得睇戲~我哋揀咗睇「竊聽風雲」，唔知點解淨係可以聽普通話？﹗望住劉青雲、古天樂個樣，又唔係佢哋把聲，怪怪地咁…套戲都ok o既~

yeah~~~~~~~~~抵達關西空港lu~好開心呀﹗唔唔，首先我哋要搞掂搭出市區o既車同埋買好之後o既JR車票﹗

行出去戶外時，哇~「吓？真樹嚟o架？﹗」我真係唔敢相信，去到十一月底都仲有紅葉呢，而且一落機就見到了，呢D紅葉係真樹嚟o架﹗

因為準備得好，係香港時所有資料都搵好，又print晒出嚟，所以買JR車票都冇問題，我哋兩個都唔識講日本嘛，但都好順利咁買好兩程o既JR車飛~

大阪除咗市營o既地下鐵同埋JR之外，仲有好多私鐵，所以個鐵路系統都幾繁複~我哋搭出市區就發現搭呢個南海空港線比起搭JR方便喇，因為可以係難波站落車轉地鐵去心齋橋站~

由心齋橋站行過去我哋o既酒店comfort hotel shinsaibashi都唔困難，冇乜點迷路就行到過去~good呀﹗

as expected，間酒店房勁細間呀﹗不過比想像中好o既係，入廁所唔駛擘大隻腳都關到門~而且麻雀雖小都五臟俱全o既~

係酒店稍稍休息一陣就出動囉~

我哋沿住心齋橋筋商店街行過去難波道頓堀方向~係大阪，地圖上vertical o既都叫「筋」，除咗心齋橋有個「筋」，我哋會搭有條地鐵o既線都叫「御堂筋線」，都係vertical o架~

見到呢個跑步佬，就知道去到道頓堀了，跑步佬係glico o既標誌，glico有好悠久o既歷史，呢度有專門店可以買到glico手信~

睇過大阪旅遊書o既人都一定見過呢個財神爺o既大頭嘜﹗以前呢度呢個商店街算係一個小主題園區，有好多懷舊鋪頭仔，應該都幾有趣~不過今年年頭時執咗粒lu~

道頓堀出名有好多食肆﹗嚟到關西，食品風味上同關東地區好唔同，未嚟之前已決定有幾項關西特色食物係必定要食o既喇~呢個晚餐一次滿足到三個願望呀~

去到鋪頭時好搞笑咁，個店員居然識講普通話﹗於時我哋就用普通話嚟對答，知道有得食大阪燒又有章魚燒~

上次去日本中部參加祭典時都有係街頭食過章魚燒，不過我就覺得呢個D粉漿好似煙靭有彈性少少，而且粒章魚都幾大粒，好味~

大阪名物炸串﹗一盤有七款唔同o既內容，我同day當然每款都share嚟食啦，食炸串有趣o既係，睇外表你估唔到佢係乜~中間圓圓形o既係咩？帶子？馬蹄？蝦餅？no no no~原來係洋葱嚟o架~

而其中一個長長形o既原來係蒟蒻﹗真係估佢唔到呢~而且好好味，day大讚呀~其餘o既幾款仲有蝦、雞肉、豬肉、魚、茄子~各有各o既風味~

重頭戲–大阪燒﹗

其實佢係事先燒好咗俾我哋o架喇，只係放上嚟鐵板上繼續熱住o既啫，同埋用個鑊鏟仔可以切下切下咁丫嘛~

我哋食o既章魚燒就係係呢度製作o架啦~

待續：美味芭菲、大阪夜景