日本中部之旅  DAY 3  金澤．白川鄉．高山

一朝早就要搭長途巴士離開金澤，出發去第三個目的地白川鄉lu~

當然要食飽飽先行啦﹗

係火車站呢間西式cafe食o左大大份早餐﹗你話係咪丫，日本o既食物唔係單單用舌頭o黎品嚐，仲要用眼o黎睇o架~內容雖然好普通，但幾靚~

咖啡都好認真沖o架，係用呢D好似實驗室o既flask o黎煮o既蒸餾咖啡﹗

搭車都搭o左唔係好耐之嘛~仲係好早就去到白川鄉lu~落車第一件事，要book酒店﹗好慘呀~我o地一早係香港預約好o既民宿，臨出發前先通知我o地冇房間喎，搞到少少論盡添~精明o既家姐決定我o地去到白川鄉先搵地方住，搵唔到就直接去下一站高山住~白川鄉只係一個小地方，果然到處o既民宿都好full呢，好啦，順便係度book埋巴士o既座位啦~

好快就見到呢條河了~難道佢就係「白川」？

真係好清好清好清﹗我話，如果唔係天氣咁涼，我一定要跳落去呀~家姐話：「咁好在天氣唔係太熱咋…」哈哈~

你睇呢個人幾自在、幾悠閒，可想而知呢度環境有幾舒服~

白川鄉其實地方真係唔大，全個鎮(or只算係一條村？﹗)都可以步行，我o地沿住大街行，一邊進發去景點之際，一邊又俾兩旁o既鋪頭吸入去…哇，好大o既吸力呀﹗

我o地去o既幾個地方通稱為飛驒地區，飛驒地區出名飛驒牛，等我試下飛驒牛奶先~唔，好鮮美啊﹗雖然唔係哇一聲咁好味，但都不失為一支好味o既鮮奶~我之後o個日又買o黎飲呢~

o黎到白川鄉，最重要就係去睇D「合掌屋」喇，和田家正係一間典型o既合掌屋~合掌屋最特別就係個屋頂喇，話說係專登起o黎抵擋風雪o架，外面望落去就好似鋪上厚厚o既乾草，整到好似刷子咁o既樣喇~我o地入去參觀先﹗

好多日本o既古老房屋都有好大好大o既窗，我笑說，漫畫入面D情節，最興就係D繼母由呢D大窗推D繼子落樓…不過呢一刻呢，我只想坐係度，望下窗外靚靚景色，一間間充滿古典味道o既合掌屋，然後有好大遍o既稻米田，仲有遠處o既山，哇~觸覺上又有涼涼o既風，真係可以係度坐好耐呢~

合掌屋要注意o既就係個屋頂了，屋頂o既內部就係咁o架啦~

o個隻「繼子窗」望出去就係咁o既景色喇﹗

下一站…我o地跑入去大自然，要登少少山呀﹗因為要去瞭望台，望一望成個白川鄉o既全貌﹗

係日本好興有呢D牌仔，係D「標準影相位」俾人將地名、日期拍埋入去真係不愧係世界文化遺產呀，你睇，D合掌屋多到…我都要老土地影番張咁o既相~係呢個位置，我唔單止用相機影相，仲特登開o左電話，將呢度o既景色變成我手機o既wallpaper﹗靚~

山下面有D咁o既免費足湯俾人浸下疲倦o既腳腳呢~如果唔夠喉(which is expected by the owner)，可以俾錢入去浸全身﹗我o地唔夠時間入去浸啦~

飛驒地區o既吉祥物sarubobo﹗周圍都係佢o既嘜頭呢~所有紀念品店都有佢o既蹤影﹗我都買o左個藍色，代表事業運o既俾自己呢~

食飯lu~

雖然貴o左D(1300yen)，但都叫o左一份飛驒牛味噌燒o黎試下，一人一片試下啦~真係…真係好好味呀﹗難怪大家對和牛咁著迷啦~不過呢，都係名古屋o個晚祭典入面食o既和牛串燒抵，份量多D又平D~

我自己就叫o左味噌豬扒定食，好大份，但因為太好味了，我食光光呀﹗

o黎到出名飛驒牛o既地方，梗係要買D相關o既手信啦，但其他飛驒牛產品太貴了…只係買得起…飛驒牛味脆脆片﹗哈，一D和牛o既感覺都冇添~

下晝我o地去參觀「野外博物館」，o個度將一條合掌村o既原貌展現俾遊客睇~

其中呢一間「A型」合掌屋就係以前有咩災難，有村民無家可歸時，佢o地就會暫時搬入o黎呢種建設簡單o既屋仔住住先~

係野外博物館，我o地仲參觀o左好多間合掌屋，又睇o左好多舊陣時村民生活要用o既日用品添~

我o地買好四點鐘o既巴士飛，差唔多時間就要過番去巴士站lu~

上車前食個雪糕先~叫做唔知咩木o既果實味…不過食落去同vanilla差不多添~

去到高山，入住酒店之後時間依然尚早，我o地出去逛逛街同埋食dinner~

又係飛驒牛﹗而且仲聲稱係最高級o既5A級飛驒牛，不過嘛，咁高級o既牛…又唔係俾得多錢…即是…勁薄﹗你見啦，咁細塊，但只有1mm厚o架咋~慘~但真係好好味啊~好濃牛味之餘，又好多好多肉汁，嗚哇呀~~~~~~~~~~

其實飯後「逛街」都只係逛條街，因為大多鋪頭五點鐘就關門o架啦~我o地隨意逛逛之後都番酒店休息lu~

入住酒店發生小插曲…我o地第一間房係一間三人房，但個冷氣有D問題喎，出去dinner前有個職員o黎幫我o地整好了，但番到o黎時又唔著，佢o地唯有幫我o地換房啦~o個間房都有D奇怪o架，係地下o個層，仲要冇房號o架﹗入到去…哇﹗有石鋪o既豪華玄關o架﹗五人房﹗哇，浴室有浴缸﹗我o地因禍得福啦~

電視播緊男排比賽，原來係爭取打入奧運o既決賽呀~日本隊vs阿根廷，好緊張呀﹗要打到第五局先分勝負，而且仲要deuce好多分添﹗最後日本隊出線，到北京奧運時真係要留意下佢o地表現如何呢~

只係由印度、台灣番o黎香港一星期，我又去另一個trip啦~因為可能今次係最後o既長長假lu，家姐又拎到假期，所以我o地決定兩姊妹plus家姐o既friend高高，一行三人去日本中部玩~高高係家姐o既中學同學，所以我三年級時…即是家姐讀中一時我已經識佢lu~

因為plan行程時我人仲係印度，所以由可靠o既家姐全權負責，家姐揀o既一定好，所以我一D都唔擔心，只係負責執行李同埋去玩﹗點解去日本中部呢？因為travelzoo咁o岩有超抵o既機票去名古屋，因利成便，我o地就決定去名古屋+附近o既地方，分別係金澤、白川鄉，同埋高山~一個簡單D o既講法，就係「拍最美麗的第七天o個度」o羅~(雖然我唔想同周麗淇扯上任何關係…)

o個一朝搭超早機出發去名古屋~

所以去到名古屋都仲係好早咋~之前都坐過「香港快運」，因為係平平航空公司，所以飛得比較低，氣流亦比較大，所以坐得辛苦少少~但根據家姐講，D飛機餐有進步喎~我都唔記得上次係點lu…

我o地坐鐵路由機場出番去城市先，有別於其他日本大城市，名古屋o既平房比較多，我o地話，好似大雄住o既地方咁呀~

去到酒店落腳喇，今次住o既酒店係西洋風，地方都幾靚~不過要晏少少先有得check-in，所以我o地放低行李就出去逛逛先lu~

第一日o既行程都唔係好packed，我o地主要去逛逛街同埋參加祭典﹗所以都唔趕~

係香港機場同埋飛機總共食o左兩次早餐，所以一直都唔餓，直至行街行到四五點，我o地先搵地方食下o野~結果去o左一間地下街入面o既小食堂食飯~入面好多佬呀﹗個個掛晒D西裝褸係牆上o既掛鉤，o岩o岩放工吧？

我o地食o左呢度好出名o既味噌豬扒﹗炸得香脆，再加上濃濃o既味噌，真係好好食呢~我都食到上o左癮，後來去白川鄉時，自己食o左一整份﹗好味道﹗

之後差不多時間到今日o既重頭戲了，就係要去參加熱田神宮o既獻燈祭+煙花大會，日本o既祭典啊﹗平時成日睇漫畫都會提及祭典，總係講到好熱鬧，好令人期待o既樣子，估唔到我有機會親身參加呢~係咁o岩撞正，家姐又發現到o架咋~其實獻燈祭係做乜我都唔係好知，只知道，祭典會好似年宵咁夜晚有好多攤檔，食下o野呀，然後D女孩子會著住浴衣，打扮得靚靚咁去o羅~

沿路上見到有個屋企外面掛住好多晴天公仔，係要祈求祭典呢一日唔好落雨吧？

初初去到時都未係好多人住，個個攤檔都作好做生意o既準備，主要都係賣小食啦，好似香蕉朱古力呀、串燒呀、燒八爪魚丸呀、炒麵呀之類…同漫畫o既描述好compatible呀﹗

果然遇到浴衣女生呢﹗佢o地仲會專登set埋頭添o架~好想搵佢o地同我合照，但我都係唔夠膽問呢…

我o地幫襯o左呢位大叔買八爪魚丸~

原來蘸沙津醬食真係好味D o架喎~o岩o岩煮好，熱呼呼的都幾好食，不過粒八爪魚好細粒呢…咁樣係正宗乎？

仲有初次體驗和牛﹗500yen一串o既燒和牛，實在太太太太太太太好味了﹗好多汁、好濃牛味﹗係我食過最好味o既牛串，or even最好味o既牛﹗我o地實在唔應該三個人share一串呢，應該每人起碼食一串﹗自此之後，我o地都瘋狂地愛上飛驒牛了﹗

除o左呢兩樣之外，我o地都仲有食其他o野o架，不過唔逐樣show張相出o黎了~後來又買o左燒餅，去睇煙花時一邊睇一邊食~

獻燈會當然有燈啦~

其實好多地方都睇到煙花，所以係街上只要有個望到煙花o既地方，就會見到D人一堆堆咁樣聚集~

最尾我o地企定定係呢個地方睇煙花o羅~香港D煙花匯演咪噼噼啪啪咁怒放o既，日本祭典o既煙花唔係咁o架，而係一朵一朵咁放上去，唔震憾，不過比較浪漫feel o羅~大家唔係睇到哇哇聲，而係可以係煙花之下傾下心事咁(只限情侶)~

番酒店lu﹗呢度o既地鐵都有ladies’ compartment呢~諗番起係印度o既孟買，一個咁冇秩序o既地方都有﹗係o個度好重要o架﹗如果唔坐ladies’ compartment就要同D佬逼，接踵摩肩，唔係一個pleasant o既感覺…

買o左香蕉番酒店食﹗日本D水果好貴o架~難得有精明ta﹗呵呵~見到有抵食少少o既香蕉，即刻買﹗yeah~

養精蓄銳，第二朝出發去金澤了﹗