28-11-2009:大阪白浜day 5(part 2).Energyland

唔好爛尾,唔好爛尾,雖然已經相隔一個半月,但都寫埋最後一篇blog blog啦,有頭有尾丫嘛~

之前講到去白浜o既energyland,我哋繼續energyland o既參觀﹗energyland最特別就係俾你「五官o既體驗」,視覺啦、聽覺啦、觸覺啦等等~我哋再入去一個刺激你視覺o既館~

係咪細個時係科學館玩過嗰種?你係個screen前面做各種動作…

之後就會蓋咗個身體o既印係上面了﹗我哋兩個見附近冇人,當然肆無忌憚咁做啲奇怪動作啦~呵呵~

光與影o既奇幻體驗~

之後我哋去「健康之森」,有好多測試你身手o既機會﹗

好似都ok咁?﹗其實嘛…我隻左腳仲未放開﹗兩秒之後o既shot已經跌咗落嚟lu~

做唔做到一個排球選手呢?試試最高觸球點係幾高吧﹗

捕捉完一刻﹗其實下一個shot都係跌咗落地,哈~啲日本人睇到我哋兩個玩睇到佢哋笑騎騎~:p

爬咗上去又跌咗落嚟啦~平時太少做運動了﹗

之後入另一個館,就係吸引我去energyland o既館了,可以影到好多特別o既相o架~啲畫全部都係平面o既、係牆上面o既,但你同佢合而為一就會變得好立體了﹗

無影凳?﹗

hee,我哋照佢o既示範相影o架~

唔係啩?我仲重過大笨象?﹗

oops,跌落去了,危危乎~

巨人rita與小矮人day~「金田一少年事件簿」o既馬戲團殺人事件都有用過呢個計謀呢~

最後逛埋「音之森」~

連續敲晒咁多支鋼管係咪一首歌呢?

通過長長o既管道講秘密﹗

科學館嗰隻碟o既戶外版~

其實energyland都幾有趣o架,好適合一家大細一齊去玩,有益身心﹗我哋呢啲時時都興高采烈o既人都好適合去玩~不過如果去日本係想去睇新潮嘢、睇精品o既就未必適合lu~因為energyland都幾「親親大自然」~

下一站打算去tore tore市場行街街,買多少少手信,又食下啲海鮮,睇下人哋劏超巨型o既吞拿魚咁…

去到tore tore市場,影咗張招牌相之際,咦?﹗點解部小canon唔見咗o既?﹗搵齊咗大家o既衫、袋都搵唔到﹗嗚哇呀~~~~~~~~~~~~~~唔見咗即是唔見咗呢五日一半o既回憶呀﹗點算呀?﹗一定要搵到﹗

既然我係巴士站等車時仲有用過小canon嚟睇相,即是跌咗o既地方係介乎巴士站與巴士車廂之間啦~於是當機立斷,即刻上下一班巴士,趕去總站(好在總站就係白浜JR車站﹗)搵番小canon~去到車站,一開口講英文,車站啲人已經唔想同我講嘢,即刻轉介咗我去遊客中心~但係嘛,遊客中心個小姐都係唔識講英文的(更加唔識講中文啦),結果佢打電話去一個翻譯中心,我同電話入面o既人講英文,佢就用日文解番俾遊客中心小姐聽我想點,點知嘛,激死我了,電話入面嗰個人嫌我啲英文唔好囉~佢聽唔明之嘛﹗我自問英文都冇問題丫,雖然當時我有少少心急啫~不過正係度了解事情時,外面o既人拎住我部小canon飛奔入嚟了﹗搵番啦搵番啦~原來真係跌咗係車廂入面呢~

失而復得o既感覺真好~

但搞一搞,冇時間去tore tore市場了,唯有直接返去民宿執拾行李啦~

原來啲拖鞋排晒出嚟有咁多喎~

呢間民宿o既特色係,可以容許住客帶埋寵物入住,仲有狗狗餐單添﹗係佢哋o既website都有promote呢一點o架~(http://www.baylilly.com/)呢隻係佢哋自家o既狗狗~

嗚嗚,要返歸咯~我哋拎住勁多o既行李去等火車咯~

時間不太充裕,又想食下車站便當(中晒啲漫畫毒),所以我哋係火車站附近買咗便當先上車~

基本上老闆同老闆娘都唔識講英文,而餐牌亦只有日文,冇圖畫or蠟像,我哋結果叫咗我唯一識o既「幕之內便當」同埋「鯛xxxx」o既便當,原來個鯛係押壽司,都好呀,食到關西名產﹗仲有特色過幕之內啦~

搭車去機場都好順利呀,雖然要轉三程車,但都唔困難,日本仔啲嘢果然好good﹗同埋我哋又一早買好飛,一早print好咗啲開車時間,咩站轉車嗰啲啦,所以都好ok~

去到機場最高興o既莫過於買到兩樣之前買唔到o既手信﹗一樣係買俾家姐o既「加藤先生」figure,好多人會買唔同地方限定o既hello kitty,但加藤先生係一個傳統o既日本佬,我哋第一次同佢相遇係係九州,當時家姐就決定要儲日本唔同地區o既加藤先生~唔知點解今次玩o既地方都見唔到佢o既蹤影呀,係機場先見到大阪限定o既一款﹗另外就係買到柿葉壽司,係大阪見過之後,去到白浜就冇再見過lu,但之前太早買又唔夠新鮮嘛,好在係機場o既最後一間店鋪買到﹗

回程lu~好美滿o既trip﹗期待下一次旅程~

28-11-2009:大阪白浜day 5(part 1).白良浜、Energyland

最後一日o既旅程lu~不過節目依然豐富﹗本身想盡早盡早山到發去玩,咁就可以用剩低o既時間去到最多o既地方,不過嘛,白浜o既明光巴士班次真係太疏,如果搭早少少的班次,民宿早餐又唔可以開咁早喎,所以都冇計啦~

不過我哋無計中o既計就係…食完早餐之後…行路去目的地﹗今日o既plan一定會去energyland,一定會去白良浜海水浴場,而且希望擠到啲時間浸多一次外湯或者去tore tore市場~

雖然,節省到o既時間唔係真係咁多,不過呢,沿途可以睇下嘢~而且…

可以食到呢個咁特別o既豉油味雪糕﹗其實要唔要食都掙扎咗好耐,因為晨早流流食雪糕好似唔係好對路,但本著「唔食就冇機會食o架lu喎」o既心態,結果都係食咗﹗唔,味道嘛,又唔係太豉油o既,都幾好~

趁住energyland未開門,我哋先去睇咗出名水清沙幼o既白良浜海水浴場先~

因為白浜呢個地方又有溫泉、又有靚靚海灘、臨近海又多美味o既海鮮、又係潛水勝地,所以全年都係遊玩o既季節﹗

旅遊書話,有松樹係沙灘上面呢個景象只有日本先至會出現喎,我都影一影呢個combination先~

因為係冬天,所以海灘上基本上係冇人﹗

不過嘛,有工作人員係度整緊聖誕燈飾呀~~~~~~~~~~哇,咁整好咗夜晚嚟睇咪勁浪漫?﹗沙灘o既吸引力唔一定係夏天至有o既~

有一件老土o既事﹗話說我哋係香港準備出發時,日日我都提day,要帶腳架呀要帶腳架呀,結果果然有帶嚟日本,點知日日出咗門口去玩之後先至諗,oops,又冇帶隻腳架出嚟﹗到咗第五日我哋先有帶丫~真係oh no no~好在,佢都可以幫我哋係最後一日影到少少合照~唔駛時時都「放係舊石上面」or「放係欄桿上面」之類…

白良浜海水浴場嗰度其實有個免費o既露天溫泉o架,因為係著泳衣嚟浸(少有的),所以可以男女同浴,不過嘛,相對其他古雅的古老溫泉,呢種就遜色好多lu~

好啦,我哋去第二站energyland了﹗

energyland係好早時就吸引我嚟白浜o既一個地方,佢係一個適合一家大細嚟玩o既主題樂園,冇啲驚險刺激o既遊戲,主要係「身體五官o既體驗」﹗我就帶大家一齊去玩啦﹗樂園地方唔大,佢個官方網站話大約玩兩小時,所以預一晝時間就ok了~

入場後有各個演出o既時間表,咦,「太陽之街」開show lu喎~

呢度係一個城市o既模型,後面有動畫,佢哋嘰呢咕嚕咁講解一啲事情,睇介紹話,呢個係一個環保o既故事,講各種可再生能源~因為唔識聽,所以我哋睇咗一陣就去下一站lu~

之後我哋入咗一間木屋,有少少似以前去過美國o既mystery spot﹗(29-6-2006:神奇點)

好古怪呀﹗入面啲引力全部都走晒樣,而且你想行直線都行唔到~

企都企唔穩﹗

之後我哋睇咗一齣3D電影,比起迪士尼、universal studios嗰啲大製作,呢啲小地方o既一定冇咁震撼啦,故事講一隻狗仔幻想自己係一隻蟲蟲o既夢,都幾清新~

下一站我哋入迷宮﹗

要額外俾錢果然唔同啲,真係幾有趣而且要用下腦~例如…

咁多個門柄,究竟邊一隻先至可以開到門呢?﹗

入面一道又一道o既門,有啲係開唔到o既門、又有啲係通去死胡同、又要記住邊道門係通去邊度,都考你工夫o架~我哋o既任務…

係要蓋印仔,蓋滿十個check point﹗

yo-ho,搵到出路了﹗

雖然10個check point我哋結果只搵到9個,但counter個哥哥都念住我哋咁努力,都俾咗紀念品我哋,就係一人一包零食﹗都好啦,個過程最重要﹗

朝早時天氣唔係太好,天陰陰的,個沙灘都唔係太靚,晏少少太陽出來咯,勁靚呀~點解我哋好似冇影到相o既?﹗掛住玩乎?﹗

園內又有足湯﹗係白浜真係冇嘢多,最多就係溫泉了﹗個足湯屬於「健康體驗」o既group~

Energyland未玩完o架,之後嗰篇blog blog我會帶大家睇埋未去o既地方﹗

待續

27-11-2009:大阪白浜day 4(part 3).白浜町之平草原、長生之湯

其實第四日係白浜o既玩法參考咗白浜觀光協會個網頁,佢建議一條步行路線,幾個景點總共行70分鐘,沿海行完幾個景點之後,我哋出發去最後一站「平草原」~望住地圖行呀行~

點解咁荒蕪o既?﹗行行下有架小巴停低,個司機伸個頭出嚟對住我哋嘰呢咕嚕講咗一堆嘢,我哋指一指地圖上o既平草原俾佢睇,佢就點點頭,示意我哋o既方向正確~點解佢會特別咁問?

原來平草原勁遠呀﹗遠離熱鬧o既街道,深入民居、會所、哥爾夫球場…

經過呢啲咁寧靜o既道路,行咗肯定唔止觀光協會所描述o既距離呀~抑或我哋之前買手信買得太多太重,所以行起上嚟特別遠?﹗

不過,行得高行得遠都有價值o既~

唔爬得高又點睇到咁遠o既靚景呢?咦嗰個左邊中間o既小島…

咪就係白浜其中一個landmark圓月島?嗰度最出名睇日落o架,個太陽會係中間個窿窿透光出嚟~我哋就趕唔切落去嗰度睇日落喇,但係度見下佢一面都好啦~

我哋自拍o既技述簡直可以自豪呀~

原來手信o既梅酒係咁用o既~

影出嚟o既效果好好o架~

好喇,休息到咁上下又要上路了~因為我哋仲未正式去到平草原呀~

我咪話我哋買咗好多東東o既,又有浸溫泉o既換出嚟o既衫呀毛巾呀咁喎~要執一執行裝先~

好在day個背囊有好多帶帶扣扣啫~

終於到喇~~~~~~~~~~~~~~好不容易…

其實個公園都好多嘢行o架,不過都四點鐘lu~五點鐘公園就關門,而且仲會天黑添呀~

又有靚靚o既玫瑰花呢~

公園入面有免費o既溫泉資料館~

雖然唔知寫乜,但都睇得津津有味~

溫泉資料館入去要除鞋o架,有室內拖鞋俾你換~理論上可以好舒服咁逛,但係我哋拎住啲嘢真係好重呀~~~~~

公園入面仲有啲康體活動o既東東,又有遊樂場~

heehee,我哋都好有童真o架~

yeah﹗

日落時份
了,係白浜o既差不多最高點,可以望遠啲,睇下日落~

我哋之後就要趕緊係天黑之前番去民宿啦~同埋都趕住番去開飯了﹗又要期待一下晚飯有咩食~

照樣係非常豐富o既全餐~

day一食完某樣食物之後就拎起相機,對住我,叫我你食丫食丫食丫~我幫你影﹗

原來係佢預知我會食到瞇瞇眼o既帶子刺身﹗真係好新鮮呀~

尋晚浸過民宿o既浴場,我哋決定今晚出去浸下附近o既名湯「長生之湯」~

日頭o既長生之湯就影過俾大家睇喇,夜晚o既係咪另一番風味呢~長生之湯每人收費500yen~

我同day係門口分別後就各自去enjoy lu~入面都好新淨喎,女湯有一個內湯一個外湯,而入面都有唔少人浸,比起日頭o既白浜溫泉公園熱鬧得多~浸一浸個內湯,哇,水溫好適中,正呀﹗再出去浸外湯,我真係唔知用咩詞語去形容嗰一刻o既感受,熱熱o既溫泉水,抬頭望,樹o既影,明亮o既月光,人生一大享受~唯一唔好o既就係嗰一刻冇人同我分享囉,如果可以好似嗰幾個太太咁傾下計、坐下上水休息下、又再浸下咁就更正lu~

浸完溫泉出嚟最想就係飲番啲凍嘢,我哋試下呢樽森永牛乳先~

哇,長生之湯呢度有隻靚靚o既貓貓呀~我哋都爭住同佢玩~

見到佢係咁用隻耳仔luen下luen下我隻腳、傢俬…佢隻耳仔好痕?﹗我輕輕幫佢抓一抓,佢就肯乖乖的坐係度可以影下相lu~

貓仔合埋兩隻腳安靜地企係度時真係好優雅呀~

我哋浸完溫泉就返民宿休息咯~

待續

27-11-2009:大阪白浜day 4(part 2).白浜町之可愛cafe、三段壁

其實過去千疊敷時已經經過呢間cafe,知道有嘢食我已經決定要係度食lunch﹗因為實在太靚了﹗所以行完千疊敷之後我哋就返過嚟食嘢~

係一間靚靚o既木屋仔,好有歐陸風情呀~其實去日本除咗要食傳統o既食物之外,都會好想去下呢啲靚靚cafe,上次去日本中部時都去過一間好靚的cafe(8-6-2008:漫步高山古老小鎮)~

我哋揀咗望海o既室外枱椅﹗曬住暖暖o既太陽,又有風景睇,真好~

食物o既選擇唔多,我哋揀咗比較飽肚o既印尼炒飯同埋咖喱飯套餐,食物水準唔算突出,但都屬中上之選,我哋咪share兩份餐一齊食囉~

呢個咁cute o既貓頭鷹係咩嚟o既?揭開佢個「頭」原來係雪糕嚟o架~

係老闆娘為我哋預備咖啡時,佢好落力叫我哋上二樓睇下…

周圍都裝飾得靚靚的,已經有聖誕佈置lu~…原來二樓係賣精品o既~

咖啡都好精緻﹗仲附上兩件小餅呢~好味~相片上方o既鈴鈴係用嚟call waiter的~

成間cafe都好cosy~我都好想開一間咁樣o既cafe呀﹗

食飽飽之後我哋去下一站了,就係去三段壁+洞窟~

難得有兩個日本女生搵我哋幫佢哋影合照,我哋仲唔把握機會搵佢哋幫番我哋影~三段壁睇o既係險要o既懸崖,可以坐電梯落去底部o既洞窟參觀~

有個老土招牌俾人影相,day一手就捧起個牌,俾嗰兩個日本女生keekeekee咁笑呀~

附近有美女+可愛o既貓貓~

呢間屋企係咩?咪就係搭電梯落去洞窟o既入口囉,哈,睇唔出吧?

附近有間紀念品店o既店員超熱情呢,係咁用廣東話同我哋推銷,又俾我哋試食,所以我同day都買咗少少手信,買咗梅酒同埋帶子~

洞窟內部~聽講好似係以前同軍事有關o架,但詳細係點旅遊書又冇講,我哋又睇唔明啲介紹囉~

好似話對腸胃好o既溫泉水…但係試飲後…哇,好難飲﹗鹹o既?﹗

有拜神o既地方,頭頂係啲公司o既獻燈~

以前將軍o既起居室?﹗

洞窟入面啲水都好洶湧﹗

可以扮下日本軍,我哋兩個都有扮嚟影,但我哋兩個扮都冇呢個鬼佬扮咁搞笑﹗

洞窟外面o既樣子~

有雪糕食﹗唔知我講過味呢?和歌山縣o既紀州好出名出產梅,所以周圍都係賣梅o既產品﹗我哋都試咗呢隻梅味雪糕,umum,好味又唔算得上,都幾得意,叫做試過咁囉~

待續

27-11-2009:大阪白浜day 4(part 1).白浜町之海中展望塔、溫泉公園、千疊敷

充足休息之後又再出發旅程﹗第四日一個full day都係白浜入面玩~有參考下白浜觀光協會o既網頁啦,再加豐富少少,但都要「睇餸食飯」,始終未行過呢個城鎮,唔知道地圖o既scale係實物上有幾大~

我哋o既民宿bay lily門口~雖然話係「民宿」,其實似間旅館多少少,因為都幾大間~去日本自由行要搵住宿的話可以去jalan.net呀,可以按價錢、旅館類別、人氣度等等去search,都幾方便,今次bay lily就係嗰度搵到的了,如果時時去日本旅行,jalan.net仲可以儲分添o架~

由bay lily行出去巴士站就會經過呢個小海灣,停泊咗好多船,唔知點解早午晚都有好多佬係度釣魚o架喎~

巴士站﹗係白浜如果唔自己駕車的話,都要坐明光巴士嚟玩,原本諗住買1500yen o既三日任搭乘車券o架,結果大部份時間都可以行路喎,好在冇買啫~不過呢,坐巴士雖然大部份景點都可以去到,但係班次好疏囉~

巴士未夠鐘嚟,我哋行一行附近~

原來一個悠久歷史o既名湯「長生之湯」就係我哋住o既地方附近咋~睇下有冇機會嚟浸下啦~睇嚟好古色古香咁~

我哋先去第一站「海中展望塔」~

浪漫o既一條直路出去海中心,因為時間早,所以未有其他遊客~遠處o既小屋仔其實係個塔嚟o架,行樓梯落去海度…

睇魚魚﹗

唔駛潛水,就可以睇到魚魚﹗因為有放啲餌係塔附近,所以都有唔少魚聚集附近囉~聽講有時能見度唔好的話,景觀就差好多lu~

海中展望塔睇魚係唔錯…但更surprise o既係…嗰條長長o既行出海中心o既路可以睇到…

光脫脫男人﹗其實呢度係「崎之湯」,有千幾年歷史o既另一名湯﹗我哋都好想去浸下o架~男湯嗰邊可以赤條條同大海親近,應該幾爽o架~不過要冒住俾人見到o既危機﹗:p

我哋下一站都係去浸溫泉,不過唔係去崎之湯~

而係去白浜溫泉公園~呢度算係一個「主題樂園」吧?男湯女湯都各有幾個溫泉池,內湯外湯都有,而且有啲都可以望到好靚o既景o架~每人收費1000yen,貴就貴少少(其他多數300-500yen),但都試下啦~

特別係呢個男湯o既「絕景溫泉」﹗我就無緣浸喇,但都羨慕下啦~因為溫泉公園入面影唔到相,我downlaod咗少少網頁o既相俾大家睇睇﹗

上面三個係男湯入面o既有馬皇子溫泉、絕景溫泉同埋吉宗公溫泉,三面三個係女湯o既溫泉,全部我都有浸呀,係安珍清姬溫泉、明正館溫泉同埋草原之湯~因為女人要受保護多啲吧,所以景觀就差少少囉,草原之湯都係俾好多樹圍住o架咋~唔知係咪因為時間早呢?好少人﹗我同day分別浸咁耐,一個其他人都冇見到﹗呢度啲水熱咗少少囉,所以唔浸得太耐,不過浸完之後都渾身舒泰、疲勞盡消o既~不過有樣嘢都幾搞笑,因為幾個溫泉位置上有少少差異,其中有兩個湯仲要搭lift先去到,所以浸完幾個之後要著番衫,搭lift先再除衫再浸囉~

好喇,我哋沿住海岸線行去下一個景點﹗千疊敷~

MZGC8t4xyEEhxk3zZU2EUg

影下個招牌先~右邊銀銀地色好似塊葉o既上面寫住「和歌山縣朝日夕陽百選」,我哋係其他地方都有見到,好似白良浜海水浴場、平草原公園,都係睇日出日落靚o既地方嚟o架~

TJ1ZLsPx3DPPD9x.5SiEZQ

千疊敷係海邊…

但要睇o既係…

q.EDe_Idd6RXSeAXrU4sQ

呢啲一層層o既沖積岩~

9S_GS8VLHnhJFECD_AKZXw

有啲似台灣o既小野柳(9-2-2009:台東海線(Part 1).小野柳)~

吹吹海風,都好舒服呀~之後仲有好多其他地方行﹗

待續