標籤彙整: 日本

17-5-2010：東京埼玉trip day 3(part 1)．長瀞激流

發佈日期: 作者:
6

第三日係今次埼玉trip o既另一個重點呢，我哋會去玩長瀞激流﹗主要都係俾旅遊書吸引到先至揀嚟呢度呢~我哋book o既酒店套餐除咗一泊二食之外，仲包埋個激流tour喎，因為成個網網都係日文，都唔係太sure會點，所以都有少少緊張呢~

夜晚時只覺得個窗好大，啲風吹入嚟好涼快…到第二朝…

WOW~原來置身於大自然呢~間房大大隻窗就係對住樹樹樹樹樹~~~~~~~~~仔細睇一下，呢啲樹都係楓樹嚟o架，所以，如果秋天嚟的話，成個窗戶都係紅葉，一定靚到好感動呢~我相信長瀞係一個賞紅葉o既好地方﹗

早餐當然同晚餐一樣大堆頭大製作啦~食得飽飽的﹗真好﹗旅行的確要多啲體力~

好多年前第一次試食納豆，同一般外國人一樣都覺得—-難食﹗多年後再試試放入口，結果都一樣，都係頂唔順呀~幾有營養都冇用啦，放唔到入口~

我哋預約咗o既激流trip係十點半，仲有啲時間，我哋咪隨便係旅館附近逛逛影下相囉~

旅館o既餐廳可以推開落地玻璃門出去陽台位置，嗰度有好多燒烤爐，網上book旅館住宿都有啲係包BBQ o既企劃案o架~如果一家大細嚟，一齊係咁靚靚o既環境BBQ都錯﹗

養浩亭o既counter~

外觀~

出去逛逛，附近全部都係楓樹呢，腦海係度想像秋天o既紅葉景色…

行出少少…

嘩，見到條溪了，清澈見底呢~

我哋book o既就係呢個企劃呢，旅館住宿+玩激流~

時間差不多，我哋參加o既激流tour o既戶外活動公司就正正係養浩亭對面，去到有一男一女笑咪咪非常有善o既年輕日本人招呼我哋囉~佢哋平時實在太少招呼外國人了，所以英文非常生疏呢，我哋不住用body language加簡單o既英文嚟溝通﹗

先換衫﹗佢借咗啲類似潛水衣o既衫俾我哋，原來仲要著埋落水o既專用鞋呢~

套衫好緊呀﹗anyway，準備妥當，出發﹗

原來十點半呢一團得我哋兩個客人﹗就由佢哋兩個招呼我哋~

工具都要由公司搬落去溪邊呀﹗我哋要拎橡皮艇啦，四隻槳，仲有救生用o既繩呀之類…隻橡皮艇好重呀~未開始玩先嚟勞動﹗

係落水之前，好多準備工夫呢，因為我哋從來未玩過呢啲，都要先教一教我哋基本方法，點樣握隻槳啦，點樣follow instruction啦，因為小小橡皮艇航行時，我哋都要聽leader o既說話，合力去控制隻船o既移動、方向、穩定性，所以我哋要識啲command，同埋知道要點做囉~

乜都未開始做，就先被倒頭淋水丫﹗啲水真係勁冰涼﹗始終只係五月中呢~

好喇﹗

實踐一下，有人落咗水時要點樣扶番佢上隻艇度呢？原來唔好拉佢對手，要拉住救生衣，而且拉咗上嚟之後，就反轉嗰個人o既身，有趴係度反成臥係度，即面朝天~呢個之後都幾有用﹗

ULne9XiSs7yuTI6TDI1E1w

呢度講解我哋要點樣「all to the right」，呢個應該係穩定艇仔時要用的…

好，出發，我哋係水流慢o既地方，就跟住指示「划~~~划~~~」，而水流急少少呢，艇仔都會自己前進，我哋又可以休息一下，用別扭o既英文簡單地交談，講下大家o既生活啦，呢度四周o既環境啦，參觀o既地方啦，轉變啦，有趣o既東東啦等等~

去到風平浪靜o既地方，佢哋就叫我哋落水玩lu~

zc8vEKqJu572xAqqUQM1kg

yo~~~~~~~~~~~ho~~~~~~~~~~~~~~~~我明點解要著呢啲潛水衫了，因為啲水真係好凍丫﹗著咗呢啲厚厚衫，落到水都唔凍了，唯一最凍o既就係對手﹗冇嘢保護住丫嘛~

ecQWTjovtnuZjIHCpk0nSw

爽~

cxgSUism46XdTZCWki01zw

係水度掙扎耐咗，我哋兩個都冇力爬番上艇仔…:p要被抽番上來，呵呵~

LShJ_nruQ7UOZ.Kezkni0w

整理一下儀容，影番張靚相先~

xKLScg_2Ul.ZZ_3AOw1TFA

玩各種balance game，game o既end-point？當然係跌落水啦~

6EbsBwLEHCet2UsSvEJMFA

休息一下先~

因為唔係雨季，所以話刺激又唔算刺激，而係好痛快囉~坐住艇仔咁前進，又有風，又涼涼地，又可以欣賞下沿途o既風景，真係幾舒服﹗推薦﹗有別於一般o既觀光木船，有船夫撐船，呢啲自己撐，更有趣吧﹗

去到下遊，我哋幫手拎番啲嘢上岸，原來佢哋有架車泊咗係岸邊呢，我哋就濕漉漉咁坐番過去養浩亭嗰邊喇﹗

佢哋真係好好丫，帶埋相機幫我哋影相，仲免費馬上燒番隻碟俾我哋，送埋去我哋旅館呢~可以留個記念真好~

呢個就係戶外活動公司o既網網：

http://www.outdoornagatoro.com/index.html

佢哋都有其他活動呢~

再享用多一次旅館o既大浴場，沖乾淨就要check-out，繼續行程lu~

待續

16-5-2010：東京埼玉trip day 2(part 2)．i love 日式溫泉旅館@長瀞養浩亭

發佈日期: 作者:
4

離開川越小江戶，我哋就搭番西武鐵道，向秩父進發，我哋訂咗o既日式溫泉旅館叫做養浩亭，為於秩父鐵道沿線o既長瀞，嗰度最出名o既就係嗰條長瀞溪，好多人專登去坐船仔o架~包括我哋﹗原來呢程車都幾遠，我哋轉咗車之後第二程好似都坐咗個幾鐘，結果？咪梗係瞓瞓瞓瞓瞓啦~

越向秩父進發，景色慢慢轉變，變得更多山同埋平房~感覺到大自然呢~

我哋要去秩父市o既御花畑駅轉搭秩父鐵道，秩父鐵道因為係地區路線，所以班次比較疏，一個鐘得兩至三班火車﹗

你睇，車站都比較簡陋，入站都係人手收飛o架咋~我哋去到時啱啱走咗班車，仲要係假日，所以等咗好耐﹗行李又重喎(因為係川越小江戶買咗勁多嘢﹗)，所以又唔可以周圍行下，唯有係個站到呆等啦，又唔敢瞓著，驚瞓到miss咗班車，好在，有小iphone o既apps陪伴我awake﹗

其實最初吸引咗我選擇去埼玉，其實都好關呢個「芝櫻之丘」事，係旅遊書見到呢個漫山花海o既情景，好想去下﹗適逢今次又係五月去，雖然遲咗兩個星期…會唔會都可以睇到少少呢？大家想知o既就要繼續留意我之後o既blog blog~

好不容易…車來囉~好似要搭六個站左右，大約搭左四個字？﹗唔記得了~

但去到上長瀞駅時，天都差唔多黑齊啦~真係oh no no~好在我係google map印好咗地圖，我都事先知道車站同埋旅館o既地理關係o既~好在搵定咋﹗因為車站…同埋四周…零地圖﹗同埋零個人俾我問嘢﹗好在…都係一條路啫，雖然條路靜靜地，我哋兩個女子急急腳行，總算順利冇蕩失路地去到養浩亭﹗

哇，去到就覺得，噢，好值得呀~因為實在太靚了﹗今次係我今大個女以來最豪氣咁book o既旅館嚟o架~

先帶大家參觀一下我哋o既房間~

呢度係玄關位置，左手邊布簾入面係廁所同埋浴室，不過我哋一次都冇用過呢個浴室呢，沖咗兩次涼，兩次都係大浴場嗰度沖﹗hee，環境又靚，又有得浸浴嘛~

入屋要脫鞋子，但係旅館走動嘛，可以著上…膠屐﹗哈，表面上個樣係木屐，但其實係膠拖鞋，都幾舒服喎~

房間好大，即使之後鋪咗床鋪，張小几附近依然可以坐~外面仲有坐椅呢，第二朝至知道佢o既好處﹗不過呢，間房咁大間，個電視就細咗少少，我記得嗰晚電視有播「神奇四俠」﹗

好咯，安頓一下，我哋出發食dinner咯，你睇，因為係我預約o既房間，所以房門口貼咗「胡樣」呢~後來發覺原來旅館大門口都有o架~

今次book o既旅館包埋朝夕食，其實我都專登揀的，因為好喜歡呢啲日式大大份o既set，係香港真係一般價錢食唔到，上次同day去白濱時，即使係好平o既民宿，晚餐都好大份呢，真高興~點解我同connie要對角咁坐？

因為實在太多食物了~呵呵~真高興﹗

介紹一下先，右上係刺身啦，有魷魚、吞拿魚、白肉魚(品種唔識分啦~)，中上o既天婦羅睇個樣真係估唔到佢係乜，原來白白色o既係腐皮蝦卷、黑色o既係菇菇、綠色o既係大家估得中o既青椒，左上o既係凍o既炸魚，骨比較多啫，左二左三都係啲醬醃菜啦，如果冇乜餸，呢啲濃味o既東東都可以配白飯食﹗左下o既係烤豬肉，味道有少少似德國咸豬手呢，中間o既係海鮮鍋，其實啲蔬菜仲好味過啲海鮮呢，因為吸收晒海鮮o既精華呀~

以下呢個要特別介紹﹗我哋一人有一個飯煲﹗服務員指手劃腳地同我哋講解，終於明白佢同我哋講，話，個火熄咗o既時候，飯就煲好了~

我小心奕奕地準備打開個飯蓋，影張相留念先，第三格o既我絕對係真情流露o架﹗忍唔住「哇」咗出嚟，原來唔係白飯，係野菜炊飯呀~~~~~~~~~~~oooooooooo~~~~~~~yummy~

呢碗飯嘛，唔駛有枱上任可o既菜式，都可以就咁食兩三碗丫﹗有野菜、飯亦用上湯嚟煲成，太好味了，可以當選枱上o既第一名﹗

晚飯o既餐廳~可能因為我哋比較晏吧，都唔見其他客人，第二朝早就有其他人都食早餐了~

真係食到勁飽呀~要休息一陣先可以去沖涼~

養浩亭o既浴場有內湯同外湯，外湯其實係半室外吧，因為就有蓋遮頭o既，不過就有個無敵大大大窗，可以望到外面o既樹同埋少少長瀞溪，亦可以呼吸到室外o既空氣，晚間涼涼的，浸起嚟都好舒服，外湯又有兩個池，兩度輪流浸下~爽呀~

浸時冇得影相，唯有copy佢個網o既圖片俾大家睇下啦，右下o既係內湯，因為外湯太吸引了，所以內湯都得唔到我哋垂青呀~呵呵~

日本人o既服務真係好體貼﹗我哋沖好涼之後，係換衫嗰度咁connie吹頭嘛，咁我其實prefer自然風乾啲頭髮，於是我坐係旁邊等佢，咁旅館o既職員到佢自己嚟沖涼喎，見到我冇風筒用咁，佢就令令林林跑咗出去，搵咗一個風筒俾我呀，實在太令人感動了~你話丫，日本令人想去完又再去，真係有理由o架~

我哋去食飯其間，旅館o既職員已經為我哋鋪好床lu~真體貼呢~

因為夜晚天氣夠晒涼，房間又有紗窗，所以我哋都冇開冷氣就瞓呢，溫度正適中﹗good呀~goodnight~

呢間好好o既旅館叫做養浩亭，大家如果會去秩父，一定要住呢度呀：
http://www7.ocn.ne.jp/~youkotei/top/top.htm

係網上就可以book+馬上confirm了~

待續

15-5-2010：東京埼玉trip day 1．新宿歌舞伎町．居酒屋

發佈日期: 作者:
7

真係積落咗好多旅行blog blog債呀~二月去o既郵輪blog都未寫好添~而家點著咗幾個火頭﹗樣樣都寫下~唔緊要啦，興之所至就寫邊度啦~

今次講番五月嗰次去日本o既trip，以去日本五日嚟講，我都鍾意咁樣玩法，一半去城市，一半去郊外，既可以享受日本城市o既五光十色，靚靚又新鮮o既玩意兒、精品，又可以去下鄉郊，享受大自然、溫泉等等~今次o既目的地係去東京+埼玉縣，其實埼玉都主要係長空閃閃系列旅遊書之中嗰本「東京近郊」挑選出嚟o既，我俾長瀞o既激流吸引了~我同行o既connie嘛，知道我鍾意出主意，所以都幾乎全權將個plan交俾我了~

訂咗東瀛遊o既東京三日兩夜package，包機票+兩晚酒店，我哋自己extend多一晚酒店，埼玉縣就住一晚~早機去晚機返，非常好﹗出發嘛，點都要係機場影一樣出發紀念相o既~機上面睇咗阿凡達﹗第一次睇阿凡達o既2D小screen版﹗哈，因為我之前係去IMAX戲院睇3D版的﹗大大不同呢~

去到成田機場，搭番鐵路出嚟市區，都幾方便o既，我哋係寧靜o既車廂裡面呼呼大睡﹗都唔得閒觀賞沿途o既風景咯~

大家見我成日都去日本旅行，其實我都好多年冇去過東京了，係細個時同爸媽去過一次咋，所以都零印象﹗同一個全新o既地方冇分別~新宿車站勁大﹗人好多，成個旺角咁，我哋拎住大大件行李要搵啱o既出口都有少少難度~

我哋住o既新宿飛鳥酒店﹗第一次去時覺得由新宿車站行咗好遠呀~後來來回行多幾次就覺得個距離合理啲了~唔，我覺得呢間酒店真係麻麻地呢，建議大家唔好book呢間酒店，第一嘛，位置唔算太方便啦，行得都遠遠地，同埋呢有少少舊+up dup，入到大門，原本個lobby荒廢了，要落地庫一層去check in，上到樓啲裝修、傢俬全部都好舊，灰灰暗暗的，佢又唔係特別平，我就覺得唔係好值囉，同埋額外加錢住嗰一晚都要接近$1000 o架~

我哋安頓好，稍稍休息一陣就出去行下，其實第一日去到都晏，所以都係打算逛逛街同埋食個dinner~

走上新宿街頭，真係諗起周國賢嗰首「地下街」o既頭一句：「新宿街頭十餘萬人…啦啦啦…」真係勁多人呀~好似旺角、銅鑼灣咁多人~呢個地球上我去過o既地方，除咗香港同埋印度之外，東京都算係一個好多人o既地方﹗

轉入歌舞伎町逛逛，見到好多畢挺西裝長金毛後生男子，莫非佢哋係鴨鴨？定係扯皮條？總之覺得唔係咩正經人物啦~唔敢停低望咁耐、亦唔敢影佢哋相…:p

經過呢間拉麵店，諗起「為食神探」o既情節，啲人等食拉麵排隊排到出街，但高野偵探嘛，佢會邊叫住拉麵外賣，邊食住外賣嚟排隊食拉麵﹗

係東京呢，靚o既東西真係令人目不暇給，連muji都特別大間，貨品特別齊全~

行到咁上下，我哋都有少少餓，決定搵個地方食嘢~香港好多日本餐廳都稱自己做「居酒屋」，但係旅遊書睇到，居酒屋其實係有種特定模式，我哋決定要感受一下呢種餐廳~我哋去呢間居酒屋，全部食物飲品都係290yen﹗

都要等一陣先有得入座，鍾意居酒屋o既係，大家要脫鞋子入內﹗感覺非常free~不過如果有臭臭腳就會尷尬了~:p

呢度落order係自助o架喎，好似去唱K點歌咁~係個touch screen上面篤篤篤就可以點菜了~有漢字+圖畫，我哋兩個唔識日文o既人大致上都點到食物，但飲品嘛…真係no idea﹗總之我哋嘗試避免點啲酒精濃度高o既飲品就算數了~

我哋叫o既食物﹗右上o既係梅子味蘿蔔片，就好似唱K時o既果盆同埋nuts一樣，係居酒屋o既基本消費，無論你叫幾多食物，佢都一定會每人收番一份呢個前菜o既$$，盛惠每位290yen，難怪其他嘢咁抵食啦~人哋問我，樣樣都290yen，咁啲嘢食係咪好細碟？我就話喇，啲貴嘢咪細碟，啲平嘢咪大碟囉~你睇，個炒麵幾大，個三文魚刺身幾細~我要特別介紹一下中間o既蛋卷，睇圖片就想食呢啲日式煎蛋，如果上面嗰pat係茄汁，我都好滿意了，但居然係我愛o既明太子呀﹗真闊綽﹗之前去荃新天地間Waraku食明太子湯烏冬，啲明太子得好細好細堆咋~另外，我哋仲食咗煮蕃茄、三文魚同埋甜品﹗嗰兩杯飲品都幾好，我諗酒精成份可能得5%左右，似果汁多啲，啱晒我哋~

呢度就係居酒屋o既入口，都幾大o架，有兩層﹗

正門口，下次同day嚟東京唔知搵唔搵得番呢？

我哋慢慢散步返去酒店，路經…

鬧市中o既神社﹗

都好寧靜喎，夜涼似水，好適合夜晚去散步呢~

我哋臨返去時，去一去西武新宿站睇一睇，睇下買飛呀、班次呀嗰啲，因為我哋第二日就要搭西武新宿線過去埼玉縣啦~順道買咗呢個﹗

東京o既八達通﹗有兩個system，Pasmo同埋Suica而家combine了，感覺上冇八達通咁方便呢，出站時顯示唔到張咭仲剩番幾多錢，又唔肯「捱義氣，賒住先」，你入咗站如果你張咭啲$$唔夠你嗰程車o既車費出站，你嘟出站時又會卡住咗，要補票先出到站，真係好蠢呀~

呀，我哋行過便利店買咗有趣o既東東~

係勁多餸o既麵豉湯呀，居然有原隻蜆肉呀﹗好誇張，而且味道好新鮮呢，另外一款係三文魚薯仔，兩款都好好味呀~後來返到嚟香港原來吉之島都有得賣呢~

第一日o既行程就係咁囉~之後o既行程會更精彩呢﹗

待續

27-11-2009：大阪白浜day 4(part 1)．白浜町之海中展望塔、溫泉公園、千疊敷

發佈日期: 作者:
8

充足休息之後又再出發旅程﹗第四日一個full day都係白浜入面玩~有參考下白浜觀光協會o既網頁啦，再加豐富少少，但都要「睇餸食飯」，始終未行過呢個城鎮，唔知道地圖o既scale係實物上有幾大~

我哋o既民宿bay lily門口~雖然話係「民宿」，其實似間旅館多少少，因為都幾大間~去日本自由行要搵住宿的話可以去jalan.net呀，可以按價錢、旅館類別、人氣度等等去search，都幾方便，今次bay lily就係嗰度搵到的了，如果時時去日本旅行，jalan.net仲可以儲分添o架~

由bay lily行出去巴士站就會經過呢個小海灣，停泊咗好多船，唔知點解早午晚都有好多佬係度釣魚o架喎~

巴士站﹗係白浜如果唔自己駕車的話，都要坐明光巴士嚟玩，原本諗住買1500yen o既三日任搭乘車券o架，結果大部份時間都可以行路喎，好在冇買啫~不過呢，坐巴士雖然大部份景點都可以去到，但係班次好疏囉~

巴士未夠鐘嚟，我哋行一行附近~

原來一個悠久歷史o既名湯「長生之湯」就係我哋住o既地方附近咋~睇下有冇機會嚟浸下啦~睇嚟好古色古香咁~

我哋先去第一站「海中展望塔」~

浪漫o既一條直路出去海中心，因為時間早，所以未有其他遊客~遠處o既小屋仔其實係個塔嚟o架，行樓梯落去海度…

睇魚魚﹗

唔駛潛水，就可以睇到魚魚﹗因為有放啲餌係塔附近，所以都有唔少魚聚集附近囉~聽講有時能見度唔好的話，景觀就差好多lu~

海中展望塔睇魚係唔錯…但更surprise o既係…嗰條長長o既行出海中心o既路可以睇到…

光脫脫男人﹗其實呢度係「崎之湯」，有千幾年歷史o既另一名湯﹗我哋都好想去浸下o架~男湯嗰邊可以赤條條同大海親近，應該幾爽o架~不過要冒住俾人見到o既危機﹗:p

我哋下一站都係去浸溫泉，不過唔係去崎之湯~

而係去白浜溫泉公園~呢度算係一個「主題樂園」吧？男湯女湯都各有幾個溫泉池，內湯外湯都有，而且有啲都可以望到好靚o既景o架~每人收費1000yen，貴就貴少少(其他多數300-500yen)，但都試下啦~

特別係呢個男湯o既「絕景溫泉」﹗我就無緣浸喇，但都羨慕下啦~因為溫泉公園入面影唔到相，我downlaod咗少少網頁o既相俾大家睇睇﹗

上面三個係男湯入面o既有馬皇子溫泉、絕景溫泉同埋吉宗公溫泉，三面三個係女湯o既溫泉，全部我都有浸呀，係安珍清姬溫泉、明正館溫泉同埋草原之湯~因為女人要受保護多啲吧，所以景觀就差少少囉，草原之湯都係俾好多樹圍住o架咋~唔知係咪因為時間早呢？好少人﹗我同day分別浸咁耐，一個其他人都冇見到﹗呢度啲水熱咗少少囉，所以唔浸得太耐，不過浸完之後都渾身舒泰、疲勞盡消o既~不過有樣嘢都幾搞笑，因為幾個溫泉位置上有少少差異，其中有兩個湯仲要搭lift先去到，所以浸完幾個之後要著番衫，搭lift先再除衫再浸囉~

好喇，我哋沿住海岸線行去下一個景點﹗千疊敷~

MZGC8t4xyEEhxk3zZU2EUg

影下個招牌先~右邊銀銀地色好似塊葉o既上面寫住「和歌山縣朝日夕陽百選」，我哋係其他地方都有見到，好似白良浜海水浴場、平草原公園，都係睇日出日落靚o既地方嚟o架~

TJ1ZLsPx3DPPD9x.5SiEZQ

千疊敷係海邊…

但要睇o既係…

q.EDe_Idd6RXSeAXrU4sQ

呢啲一層層o既沖積岩~

9S_GS8VLHnhJFECD_AKZXw

有啲似台灣o既小野柳(9-2-2009：台東海線(Part 1)．小野柳)~

吹吹海風，都好舒服呀~之後仲有好多其他地方行﹗

待續

26-11-2009：大阪白浜day 3(part 2)．日本三大溫泉鄉之白浜

發佈日期: 作者:
8

結果大大個o既萬博公園(http://park.expo70.or.jp/)我哋行咗「自然文化園」同埋「日本庭園」，啲博物館同埋體育場就冇去了~咁都行到中午啦﹗趕快出番去食lunch之後就要預備搭火車lu~

次次去到日本都有幾樣嘢點都想食一次﹗壽司啦、拉麵啦、一般o既碗飯啦、crepe啦、飯糰啦…其實今次去到關西，關東o既握壽司應該唔上場至啱呀，出奇地街上都有好多握壽司o既鋪頭，而關西出名o既押壽司就係車站便當o既鋪頭比較多見~

位於千里中央站o既小壽司店~

去過日本食壽司，返到嚟香港就唔想去啲迴轉壽司店了，呢個一人份11件壽司set+麵豉湯都係880yen咋，仲要好味過嗰啲元氣元綠十萬倍﹗又有新鮮wasabi加埋係壽司入面喎~

係鋪頭門口睇好咗壽司set係880yen嘛，入到去餐牌見到有兩樣嘢都係寫壽司甚麼又880yen，咪一樣叫一個囉，點知唔小心叫咗個散壽司飯，都好味o既，但就食唔到佢「握」o既功夫囉~

去番新大阪站領取行李，好在有呢啲咁大o既locker啫，我哋咁多li-lo都放得晒(不過都要兩個最巨型嗰種locker)~

行過去JR站嗰邊~因為食壽司唔係好飽嘛，咁諗住上火車晏少少會肚餓，所以我提議不如買啲嘢帶上車食﹗同埋總覺得坐日本o既火車係要食下嘢至似樣~

嘩，第一次見呢種「杮葉壽司」呀，好似將太的壽司入面佢哋解救鳳壽司危機時整o既午市便當，將太整o既關西風壽司就係用葉片包住o架啦，可以保持壽司o既濕潤度，而且入面濃郁o既口味亦係保鮮o既關鍵﹗哇，將太迷嚟到，點都要試下啦~

仲有呢個「草莓大福」﹗都係漫畫入面見過，今次係妙手小廚師，話說陽一要同人比賽整蛋糕，佢係草莓大福搵到靈感，就用豆沙同埋鮮草莓嚟調味，今次見到實物，又一定要試下了，儘管要180yen一粒咁貴…

呢度被偷影，我係度買緊明太子飯糰，200yen一個真係同便利店105yen一個o既大大不同，飯粒軟身好多，餸又多~明太子真係要係日本先容易食到，好好味呀~~~~~~

好，差不多夠鐘去月台了~

車來啦，但啲人落車之後唔准我哋上車住喎~啲職員好齊整咁企晒係度，做咩？原來佢哋要清潔車廂，而且仲係有一式一樣o既方式﹗入車廂後會行三轉，第一轉要拾起見到o既垃圾、將座位反轉係正確o既方向、將窗簾拉番好，第二轉要掃地，先掃右邊座位、再掃左邊，第三轉要拖地，亦係先右後左，哇，要勁OC先做到呢份工﹗我就會覺得，唔，幾乾淨丫，ok啦，咁就唔合格啦~

終於可以上車了﹗

因為買咗手信，又有之前係環球影城抽獎中o既hello kitty床墊，我哋有勁多行李呀﹗所以好似走難咁…:p

車程都有兩個幾鐘，所以我哋較好鬧鐘就呼呼大睡了~鬧鐘專登較早啲，因為要jap jap jap食我哋買上車o既大餐嘛~

杮葉壽司打開後o既模樣，應該係醃青花魚吧？唔係好識啲魚o既名，不過最出名o既關西風味醃壽司就非青花莫屬啦~啲醋味真係濃郁得嚟又溫和喎，好好食~又滲出淡淡o既杮葉味~

呢個草莓大福真係食到人瞇瞇眼呀，因為豆沙係新鮮o既，所以好軟好滑，而且草莓亦好新鮮~但係食完呢一粒唔知幾時先有機會再食lu~呢啲新鮮食物都唔敢買返嚟香港做手信…

風光越來越田園…

又見到無窮無盡o既大海…

就知道嚟到白浜了﹗

首先要解決o既問題，就係要返去民宿﹗唔好睇個天咁黑，其實都只係五點幾咋，但我哋都要趕係六點前番到去，人哋民宿要開飯啦嘛~

白浜o既地圖﹗圖o既右邊係JR白浜駅，大概中間見到個「古賀之井」，我哋o既民宿就係位於古賀浦o既bay lily了~一出閘就見到有巴士可以去到啦~不過嘛，落車之後雖然知道民宿o既方位係邊度，但真係好黑﹗day雖然有帶電筒嚟，但又冇手搵出嚟，都係相信自己，繼續行啦﹗

與其叫民宿，不如叫平民旅館，因為都幾大，有五層咁高，都有好多間房﹗不過佢哋好似真係一家人經營~唔豪華，但乾乾淨淨整整齊齊咁囉~如果住溫泉旅館，成本就會高好多lu~我哋而家和室一泊二食都係每人6000yen一晚咋~

房間就好basic了，但個窗口可以望到海o架~而且只有獨立廁所，冇獨立浴室，但都冇關係啦，有邊個去到白浜唔浸溫泉o既？浸溫泉反正都係浸大浴場好啲了﹗

稍為休息一陣都到dinner時間了~去到二樓o既餐廳，佢哋已經為我哋預備好食物啦~

影呢張相時食物仲未擺齊，但每個晚餐一定有刺身、炸物、煮魚、漬物、麵豉湯、白飯~總之就係擺到一枱都係碗碗碟碟啦~食物唔算豪華，但好豐富，食物都係日本人一貫作風，靚靚的，味道都好好，魚生好新鮮﹗

咁我哋就要分道揚鑣了，各有各去男湯女湯啦~民宿o既溫泉就稍遜啦，唔關水質事，成個白浜基本上都係溫泉，不過陳設比較殘舊少少，而且只有內湯囉~反正我哋都決定之後再出去浸先至會揀住民宿而唔住溫泉旅館啦~

鋪好床，間房就變得好溫暖了~

泡完湯，飲杯茶就更舒服啦~

白浜夜晚冇乜娛樂，所以我哋都係睇下電視咋~之前幾日都勞累了，係時候可以徹底休息休息啦~

待續