標籤彙整: 白浜

26-11-2009：大阪白浜day 3(part 2)．日本三大溫泉鄉之白浜

發佈日期: 作者:
8

結果大大個o既萬博公園(http://park.expo70.or.jp/)我哋行咗「自然文化園」同埋「日本庭園」，啲博物館同埋體育場就冇去了~咁都行到中午啦﹗趕快出番去食lunch之後就要預備搭火車lu~

次次去到日本都有幾樣嘢點都想食一次﹗壽司啦、拉麵啦、一般o既碗飯啦、crepe啦、飯糰啦…其實今次去到關西，關東o既握壽司應該唔上場至啱呀，出奇地街上都有好多握壽司o既鋪頭，而關西出名o既押壽司就係車站便當o既鋪頭比較多見~

位於千里中央站o既小壽司店~

去過日本食壽司，返到嚟香港就唔想去啲迴轉壽司店了，呢個一人份11件壽司set+麵豉湯都係880yen咋，仲要好味過嗰啲元氣元綠十萬倍﹗又有新鮮wasabi加埋係壽司入面喎~

係鋪頭門口睇好咗壽司set係880yen嘛，入到去餐牌見到有兩樣嘢都係寫壽司甚麼又880yen，咪一樣叫一個囉，點知唔小心叫咗個散壽司飯，都好味o既，但就食唔到佢「握」o既功夫囉~

去番新大阪站領取行李，好在有呢啲咁大o既locker啫，我哋咁多li-lo都放得晒(不過都要兩個最巨型嗰種locker)~

行過去JR站嗰邊~因為食壽司唔係好飽嘛，咁諗住上火車晏少少會肚餓，所以我提議不如買啲嘢帶上車食﹗同埋總覺得坐日本o既火車係要食下嘢至似樣~

嘩，第一次見呢種「杮葉壽司」呀，好似將太的壽司入面佢哋解救鳳壽司危機時整o既午市便當，將太整o既關西風壽司就係用葉片包住o架啦，可以保持壽司o既濕潤度，而且入面濃郁o既口味亦係保鮮o既關鍵﹗哇，將太迷嚟到，點都要試下啦~

仲有呢個「草莓大福」﹗都係漫畫入面見過，今次係妙手小廚師，話說陽一要同人比賽整蛋糕，佢係草莓大福搵到靈感，就用豆沙同埋鮮草莓嚟調味，今次見到實物，又一定要試下了，儘管要180yen一粒咁貴…

呢度被偷影，我係度買緊明太子飯糰，200yen一個真係同便利店105yen一個o既大大不同，飯粒軟身好多，餸又多~明太子真係要係日本先容易食到，好好味呀~~~~~~

好，差不多夠鐘去月台了~

車來啦，但啲人落車之後唔准我哋上車住喎~啲職員好齊整咁企晒係度，做咩？原來佢哋要清潔車廂，而且仲係有一式一樣o既方式﹗入車廂後會行三轉，第一轉要拾起見到o既垃圾、將座位反轉係正確o既方向、將窗簾拉番好，第二轉要掃地，先掃右邊座位、再掃左邊，第三轉要拖地，亦係先右後左，哇，要勁OC先做到呢份工﹗我就會覺得，唔，幾乾淨丫，ok啦，咁就唔合格啦~

終於可以上車了﹗

因為買咗手信，又有之前係環球影城抽獎中o既hello kitty床墊，我哋有勁多行李呀﹗所以好似走難咁…:p

車程都有兩個幾鐘，所以我哋較好鬧鐘就呼呼大睡了~鬧鐘專登較早啲，因為要jap jap jap食我哋買上車o既大餐嘛~

杮葉壽司打開後o既模樣，應該係醃青花魚吧？唔係好識啲魚o既名，不過最出名o既關西風味醃壽司就非青花莫屬啦~啲醋味真係濃郁得嚟又溫和喎，好好食~又滲出淡淡o既杮葉味~

呢個草莓大福真係食到人瞇瞇眼呀，因為豆沙係新鮮o既，所以好軟好滑，而且草莓亦好新鮮~但係食完呢一粒唔知幾時先有機會再食lu~呢啲新鮮食物都唔敢買返嚟香港做手信…

風光越來越田園…

又見到無窮無盡o既大海…

就知道嚟到白浜了﹗

首先要解決o既問題，就係要返去民宿﹗唔好睇個天咁黑，其實都只係五點幾咋，但我哋都要趕係六點前番到去，人哋民宿要開飯啦嘛~

白浜o既地圖﹗圖o既右邊係JR白浜駅，大概中間見到個「古賀之井」，我哋o既民宿就係位於古賀浦o既bay lily了~一出閘就見到有巴士可以去到啦~不過嘛，落車之後雖然知道民宿o既方位係邊度，但真係好黑﹗day雖然有帶電筒嚟，但又冇手搵出嚟，都係相信自己，繼續行啦﹗

與其叫民宿，不如叫平民旅館，因為都幾大，有五層咁高，都有好多間房﹗不過佢哋好似真係一家人經營~唔豪華，但乾乾淨淨整整齊齊咁囉~如果住溫泉旅館，成本就會高好多lu~我哋而家和室一泊二食都係每人6000yen一晚咋~

房間就好basic了，但個窗口可以望到海o架~而且只有獨立廁所，冇獨立浴室，但都冇關係啦，有邊個去到白浜唔浸溫泉o既？浸溫泉反正都係浸大浴場好啲了﹗

稍為休息一陣都到dinner時間了~去到二樓o既餐廳，佢哋已經為我哋預備好食物啦~

影呢張相時食物仲未擺齊，但每個晚餐一定有刺身、炸物、煮魚、漬物、麵豉湯、白飯~總之就係擺到一枱都係碗碗碟碟啦~食物唔算豪華，但好豐富，食物都係日本人一貫作風，靚靚的，味道都好好，魚生好新鮮﹗

咁我哋就要分道揚鑣了，各有各去男湯女湯啦~民宿o既溫泉就稍遜啦，唔關水質事，成個白浜基本上都係溫泉，不過陳設比較殘舊少少，而且只有內湯囉~反正我哋都決定之後再出去浸先至會揀住民宿而唔住溫泉旅館啦~

鋪好床，間房就變得好溫暖了~

泡完湯，飲杯茶就更舒服啦~

白浜夜晚冇乜娛樂，所以我哋都係睇下電視咋~之前幾日都勞累了，係時候可以徹底休息休息啦~

待續

26-11-2009：大阪白浜day 3(part 1)．超讚的萬博公園紅葉

發佈日期: 作者:
5

第三日估唔到係出乎意料之外精彩o既一日呢﹗因為下晝買咗三點左右o既JR車飛出發去白浜，所以上晝o既行程唔能夠編得太緊逼呢，我哋只決定去一個景點﹗就係—-萬博紀念公園喇﹗

其實都ok轉折先去到o架，要搭地鐵御堂筋線去到最北北邊o既千里中央站，再轉單軌火車先去到~因為我哋已經拎埋大大件o既行李出來嘛，醒目o既我哋先將行李放入新大阪站o既locker，咁玩完之後咪可以領取番行李咪搭火車囉~

其實決定去萬博紀念公園主要係因為睇咗「二十世紀少年」漫畫，入面o既少年都非常迷1970年萬博，個個都好想趁暑假時去大阪一睹萬博o既盛況，而且個logo太陽之塔亦係漫畫度經常出現﹗但係search關於萬博公園o既資料時，發現原來直至11月29號都仲有紅葉睇呀，所以期待加分呢~

萬博公園好大o架~我哋先參觀咗自然文化園先，仲有日本庭園區，同埋體育館呀、有啲展覽o既地區呀咁o架~

有睇過「二十世紀少年」o既人一定有見過呢個「太陽之塔」﹗之前係facebook post咗呢張相，仲有人re我話，「吓？我以為呢個塔係個作者作出嚟o架咋~」事實上佢係真o架~基本上我都係為咗睇佢先至嚟﹗:p普通遊客都唔會去萬博公園…反而旅遊書都多介紹係鶴見綠地o既花博公園，如果係春夏時節，花博公園就會有好多靚靚花花了~

好，影完太陽之塔就開始遊園了﹗

嘩~~~~~~~~~~~~~~~~~~~~~~~紅葉呀﹗原來真係好迷人﹗我以前都未見過紅得咁誇張，仲要有咁多o既紅葉o架~日本o既紅葉果然明不虛傳﹗果然值得特登去睇~

仲有唔同顏色深淺的~令人係咁影影影影影咗好多相﹗

搵到一個影相伯伯同我哋影張合照，我用咗呢張相嚟做我小dell dell o既wallpaper啦~

青春味道﹗

雖然睇落啲紅葉好似多得好緊要，事實上都係佔公園o既一角o既啫~其餘大多數o既地方都係綠油油o既多~我覺得大多數地方o既feel比較似new york o既中央公園囉，綠樹成蔭，行起上嚟都好舒服﹗(22-6-2006：怡人的中央公園．重遊自然史博物館)

我哋討論後發現，原來春、夏、秋、冬都應該嚟一嚟萬博公園﹗每個季節都有「當造」o既花草樹木，你睇，呢個而家睇落好荒蕪o既草草堆，其實係夏天時係開滿成個小山坡都係花嚟o架~冬天又有聖誕feature o既太陽之塔同其他裝飾喎~日本人真係好識包裝﹗

我哋後來登上一個瞭望台，可以飽覽成個公園o既風景~

究竟呢啲時節、晨早流流有咩人會嚟行公園？﹗原來最多係啲影相友﹗不過有別於香港近年滿佈後生仔個個拎住個大相機，日本啲影相友都包括一大群o既大叔﹗個個都拎好多「架撐」嚟o架~

公園除咗用嚟「行」、同嚟「睇」…

仲可以用嚟「浸」﹗呢度有個免費o既足湯呀~

水溫適中，又可以眺望公園o既風光，day爆咗一句：「真係想唔長命都唔得啦~」heehee，日本真係一個住o既好地方﹗(<–當事人可能唔係咁覺得？﹗)

雖然免費，不過都有限時o既，每人十分鐘﹗又關乎健康著想啦，浸太耐都唔對路，不過嘛，限咗時，大家排隊都唔駛排咁耐~

公園好大，行唔得遠o既老人家都可以搭小火車遊園﹗

行到公園o既另一邊有個好大好大，開滿晒花o既玫瑰園呀~

我希望將來我哋都要咁﹗即使老到其中一個要坐輪椅了，依然要一齊去郊遊﹗享受大自然o既樂趣，唔係對方o既負累，而係一生一世o既伴﹗

公園入面另一個常見o既「群」，就係幼稚園、小學學生﹗老師們都帶佢哋出嚟戶外教學，玩玩遊戲，學學大自然o既事物~真好﹗

活動結束了，居然放心大家一齊坐公共交通呢，小朋友又都好乖喎，聽聽話話的排隊~

我覺得絕對冇嚟錯萬博公園呀，好舒適、好good o既experience~我都買咗少少萬博公園o既souvenir，買咗個folder俾家姐啦，自己又買咗個環保袋，不過day就買唔成件tee lu，超貴呢，可惜啊~

待續

25-11-2009：大阪白浜day 2(part 3)．回味無窮松阪牛燒肉

發佈日期: 作者:
6

以為去環球影城已經夠令人流連忘返，原來之後仲有另一個高峰，可以入選今次旅程o既三大優秀經歷呀﹗

第一日o既晚餐，就一次過試咗關西出名o既大阪燒、章魚燒同埋炸串，係旅遊書度講o既關西名物，仲有燒肉同埋河豚﹗day話我，你都唔敢食河豚o架啦~冇錯﹗我的確唔敢食…:p所以燒肉就成為我哋下一個目標了﹗

由universal studios出嚟，決定搭番車過去道頓堀嗰邊，因為嗰邊食肆密集，選擇多~不過去到難波駅有少少迷路…因為難波站好大，個地鐵站都橫跨幾條路線~好在有day安撫下我「怕太夜冇嘢食」o既不安情緒~大約十點左右我哋都坐低咗係餐廳入面~

其實都有好多間燒肉o架，係同一條街有另一間係放題燒肉，不過價錢差不多o既時候，我深信單點o既一定比放題o既質素高好多﹗

結果我哋決定食呢間係法善寺旁邊o既松阪牛燒肉M了﹗

我哋叫咗set，而家陸續為大家介紹啦~

正式o既食物嚟之前，先有呢個小小小食，係有啲濃濃o既麵豉，你可以用條蘿蔔棒去沾嚟食~

應該都算係少少高級o既店，裝潢好舒適，表面上係塌塌米，實質上有地方塞對腳入去o既~因為時間比較晏了，所以成個「cubicle」得我哋一組客人咋~

首先要介紹一下食燒肉o既「配套設施」先~

哇，係久仰大名o既新鮮芥茉﹗係將太的壽司入面就講得多了，百聞不如一見，我哋有機會親手磨啲wasabi出嚟食呀~不過嘛，點解啲wasabi去咗皮o既？唔係話wasabi o既辣味主要集中係皮咩？唔，一邊磨一邊要讚歎，好香呀~

肥肉？冇錯﹗呢舊牛o既肥膏係我哋將要用嚟燒肉o既油，之後就知道點樣用法了~

三款醬料，分別係海鹽、松阪牛燒肉M自家製醬料、同埋配合新鮮芥茉食用o既普通醬油，唔，食過咁多款之後，我都係最鍾意鋪頭o既自家製醬料，味道比較豐富又配合燒肉o既味道吧？

香香又清涼o既新鮮芥茉﹗

正式o既前菜出場了~

右上角o既明顯地係熟牛肉啦，不過係相片睇唔出o既係，其實佢係有用醋醃過o既，左下角o既係新鮮淮山，有黏黏o既口感~而左上角o既睇落好似係蕃茄，點知原來係醋醃生牛肉﹗果然係牛肉全餐呢~不過都唔腥，因為只食到醋醃味~我好傻瓜咁問個waitor，中間嗰個係咩，佢話…係decoration﹗oops﹗好樣衰~:p

第一道菜唔係直接放上去網網上烤，佢放咗塊石板落嚟，我哋就搽油上去，用o既係先前o既肥膏，預備好了﹗

先嚟呢個醃得非常惹味o既牛舌~

就快熟lu，有得食啦﹗因為實在太精美，本身唔食牛舌o既我都勇於嘗試~

係油膩o既燒肉之中食啲清新o既蔬菜沙律真係好good，而且dressing係我喜愛o既和風醬汁﹗

主菜上場了﹗

好靚o既松阪牛呀﹗你睇，啲雪花分佈得幾細緻~有三款，唔同脂肪分佈，唔同脂肪濃度~反而嘛，我最鍾意最少脂肪嗰款喎，因為牛肉味最香濃~heehee，但其實全部都好好味﹗每食一舊都叫我瞇瞇眼好耐~

主食方面可以揀白飯或者茶漬飯，未試過嘛，我哋每樣都叫咗一款~

原來茶漬飯個湯底都好好味o架喎，唔駛餸都可以食晒成碗飯﹗

隨茶漬飯仲附上泡菜同埋酸梅一粒﹗哇，今次日本一行真係發覺唔係好頂得順啲酸梅呀，勁勁勁勁勁鹹﹗

個餐牌show咗幾款唔同級數o既松阪牛燒肉餐，我哋叫o既，當然係最basic但又已經足夠滿足我哋o既3800yen(每人)套餐啦~

精彩o既事情未結束，甜品又係另一驚喜﹗

噢，係好清新o既柚子雪葩呀﹗食過肥膩又濃郁o既燒肉之後，呢個柚子雪葩真係好似吹過o既一陣清風，掃走所有油膩o既感覺呀，太體貼了~

我同大家極力推介﹗如果要去大阪的話，想食燒肉可以試試係道頓堀，法善寺附近o既呢間松阪牛燒肉M﹗正呀~

待續

25-11-2009：大阪白浜day 2(part 2)．環球影城之夜

發佈日期: 作者:
4

繼續努力玩盡各項遊樂設施﹗不過呢，有兩個ride係我哋主動放棄決定唔玩的，第一個係merry-go-round，其實我想玩o架，不過day話我哋大個lu喎…:(

第二個就係jurassic park ride，因為我哋見到人哋玩…噢，好不容易先整乾o既衫褲鞋襪，正享受住難得o既乾爽舒適感覺，我唔想又成身濕晒呀﹗

back to the future﹗細個去LA o既universal studios時都有玩過啦~當時覺得好高科技﹗不過比起而家最新o既4D嚟講又好似遜色少少lu~

原來ET ride而家正變緊身，所以暫時唔開放，剩低一個小小o既ET展覽咋，大家用一雙腳嚟行，跟住個領隊睇下啲ET模型，講下故仔咁~

又有另一個街頭show，載歌載舞呢~

仲有時間準備要睇夜晚o既大show同埋夜光巡遊，啲ride又玩得七七八八，表演呀嗰啲又關晒門咯，我哋不如就周圍影下相啦~

熱情o既園內工作人員﹗我哋冇搵佢哋幫我哋影o架，係佢主動接觸我哋，問駛唔駛幫我地影~優質o既服務態度﹗

又點少得巨型聖誕樹呢~

夜晚o既購物大街又另一番景象~

差唔多夠鐘開show lu~有個大大大型show上演﹗我哋可以欣賞五光十色o既視覺效果，我哋可以聽下重新編曲o既傳統聖誕歌，可惜唔識得聽日語對白，唔知個故事講咩呢~

你睇，個場面幾grand~

不過呢，從呢個畫面，可以知道呢個係一個發生係聖誕節o既愛情故事﹗

臨尾仲有煙花添，哇，好浪漫呀~

天使歌聲~見day影咗咁多張，就俾個面揀一張嚟同大家分享啦，大sony果然非常優秀﹗咁遠都影得咁清~

睇完呢個show仲有少少時間，可以玩一次terminator o既3D show，都幾有趣，因為佢係真人同影像配合o架~有人係個螢光幕度走出嚟，又真係有個真人喎~

凍凍地…

買杯熱朱古力就去搵定個靚位準備睇夜光遊行啦﹗我話嘛，係同day去旅行佢先會咁縱容我﹗容許我買啲唔等駛o既東東﹗heehee~個snoopy紀念杯係咪好靚呢~

我哋好lucky，雖然只係十一月底，但universal studios已經開始咗聖誕o既主題，所以難得地可以碰上呢個咁華麗o既夜光巡遊﹗

由Elmo領航﹗

既有花車，亦有真人演出﹗全部都閃閃發光o架~佢哋一個一個主題、一隊隊咁出現，好有故事性~

有人扮o既華麗孔雀…

亦有好cutie o既大型孔雀花車﹗

遊行隊伍真係好長好抵睇﹗睇到某個位，我心裡面諗，其實去到呢個位就結束我都覺得好滿足o架啦…點知呢個念頭係我心裡面重覆好多次，個巡遊都仲陸續有來﹗

最令人讚嘆o既係灰姑娘隊伍﹗

有可愛o既雀仔開始，之後仲有大雀、小雀、南瓜車、小仙女、城堡、燭台…好多好多o既佈局之後…

先至隆重地有cinderella出場﹗哇~

睇完個夜光巡遊都八點鐘，都差唔多要關門啦，所以隨便再睇睇啲鋪頭就要走lu~

俾我發現咗hello kitty抽獎遊戲﹗記得舊年去金澤o既祭典時都玩過呢啲，嗰次俾300yen係抽鬆弛熊，今次要500yen，抽一張號碼，就知道有咩禮物囉~

我結果抽到呢個大大份o既「蛇墊」呀﹗即是打開嚟就可以做張墊褥嗰啲呢~似乎500yen係賺了，不過嘛，之後咁多日旅程我就要時時照顧住我呢個「伙伴」lu~佢好大隻呀﹗

待續：松阪牛燒肉

25-11-2009：大阪白浜day 2(part 1)．環球影城之日

發佈日期: 作者:
9

嚟到旅行o既第二日，唯一一個大阪o既full day，我哋一早毫無疑問地就決定咗去環球影城，識我o既人都知我係勁鍾意去主題樂園玩o既~(童心未泯？﹗:p)洛杉磯o既環球影城好細個時去過，有啲演出內容依然歷歷在目呢，不過，相隔咁多年，應該都有好多新o既東東吧，而且大阪o既我都未去過，day都一定會enjoy o既~

先享用comfort hotel o既自助早餐~

comfort hotel屬於經濟型旅館吧，陳列簡單，而且好多「西裝友」入住，可能係過嚟大阪出差o既人吧？香港人都多，因為…heehee，佢係東瀛遊package入面o既最經濟o既一間酒店﹗但乾乾淨淨整整齊齊，地點便利，已經夠晒好lu~去日本，特別係大城市又唔係要住靚酒店o既~

早餐選擇都唔算少，每日有兩款熱湯，第一日o既係麵豉湯同埋蔬菜湯，有各款麵包、日式飯糰、腸仔蛋、沙律、乳酪、咖啡茶咁，都唔錯o架~感覺有少少似上次去高雄時住嗰間商務旅館~(7-2-2009：出發台東(Part 1)．美味家鄉菜)

決定直接行過去難波JR站，因為行過去心齋橋地鐵站都一段路，之後又要轉又要行，倒不如一開始行遠少少，直接去搭難波o既大阪環狀線啦~況且又可以係呢個美好o既早晨行一行舒適o既街道~

轉搭前往universal city o既櫻島線，去環球影城o既列車都特別colourful又有好多卡通係上面呢~已俾人一個歡樂o既氣氛lu~

其實universal city係一個旅遊區rather than單單一個主題樂園，落JR之後街上有好多購物商場、酒店、食肆，難怪有啲人買兩日套票啦~

出嚟迎接我哋o既係聖誕裝束o既Elmo﹗

呢個大大招牌無論如何都要影一影o既~到此一遊嘛~

入場之後就覺得，哇，真係好大﹗下一句就係，哇，香港廸士尼真係好細…雖然，我都係香港廸士尼o既捧場者，但細呢樣o野的確係一個fact…

因為係平日吧，好多遊樂設施都唔駛排好耐隊，排得最耐o既都只係蜘蛛俠o既25分鐘，一啲都唔算耐啦~有啲仲可以即刻有得玩添~

入到去先玩咗4D影院，係史力加o既影片，雖然唔識聽日文，唔知道故事內容，但感官上o既stimulation十足，唔識聽都唔係太大問題~同一個劇場下晝四點幾之後換上芝蔴街o既影片，呢個真係oh no no，day悶到瞓著咗…因為唔知佢講乜之餘仲要冇乜刺激新奇o既內容，可能比較適合細路仔吧~

超喜歡呢個hollywood dream過山車﹗我鍾意用玩電腦sims類型game o既用語去形容，呢個過山車嘛，驚嚇度低，嘔吐度低，但歡樂度勁高呀﹗因為佢行得唔算快，甚至可能係坐過o既過山車之中最慢o既，又冇乜倒轉，但係離心力好大，好多free fall，佢o既安全帶又唔會束到你好緊，真係有拋咗出嚟o既感覺o架~耳邊又一邊播住啲勁歌﹗係一個好好o既experience~

成個影城都充滿住可以影靚靚相o既地方呢~又要影相又要玩真係好繁忙呀~

有少少美中不足o既係，影城o既schedule冇print係小冊子度俾你拎住，而係周圍有呢啲告示牌，顯示每一個show下一個場次o既時間係幾點鐘，同埋啲ride o既等候時間要幾耐~但咁樣呢，你冇得事實plan點樣玩法囉，好似我哋咁，到最後所有ride都幾乎坐晒，但有啲show就冇睇到lu，因為唔知佢last show係幾點鐘，同埋唔知啲show有幾頻密上演嘛~

間中街頭上有呢啲小小演出，不過我哋都冇坐定定呀，因為唔識聽日文，唔知佢講乜，望一望就夠了~

我哋大小通玩呀﹗大至最刺激最大型o既遊樂設施，小至俾小朋友玩o既東東都照玩~heehee，呢個snoopy studio我哋都逗留咗一陣呢~

同電視入面snoopy打棒球o既小遊戲~

超小型過山車，不過嘛，玩o既反而係大朋友居多呢~我同day坐入一卡已經好逼，唔知嗰啲佬點樣可以兩個人逼入去？﹗

係snoopy studio出嚟有一個滑水道game，我哋坐住一條橡皮艇係滑水道滑落嚟，頭一半路程時覺得，哇，yoho，爽呀﹗不過嘛，滑咗一半之後發覺唔對路…

因為會濕晒o架﹗我仲要「首」當其衝﹗因為坐係前座，所以咪望day「擋風擋雨」囉~頭頭濕到落腳，即使外面有個暖風機俾人吹乾衫褲都冇用，因為我啲衫係擰得出水o架﹗結果去買咗件tee，起碼上身衫乾o既冇咁易凍親，條褲就冇辦法了，慢慢「ngao」乾吧~

換好衫，出嚟就撞正聖誕主題o既巡遊呀﹗hello kitty、傻豹、薑餅人、聖誕樹一齊跟住聖誕歌載歌載舞，充滿歡樂氣氛~

之後仲有大量o既雪人排住隊出場呢~我覺得啲雪人生得好似一個人，heehee，你覺得佢哋似邊個？

臨尾仲落人造雪添~大家可以排隊同演出cast影相﹗

肚餓了﹗係時候食個lunch先~

我哋係snoopy餐廳食咗漢堡飽餐，貴o架，冇辦法啦，都預咗多啲$$食環球影城入面呢餐~我哋打算晚餐就出番去市區先食lu~

下晝繼續玩各式各樣o既ride同埋表演，呢個係「大白鯊」ride之後影o既相﹗好多個show都幾好o架，最令人有驚喜o既應該係蜘蛛俠吧，而家4D show都好普遍，蜘蛛俠仲要係坐住架車行o既4D冒險ride，完全滿足你o既五官刺激呀~啲壞人個個都會好近咁爬上去我哋架車度，我哋又要坐住架車逃脫追捕啦~

之後o既blog繼續同大家講我哋係環球影城o既經歷~

待續：環球影城之夜