8-6-2008:漫步高山古老小鎮

日本中部之旅  DAY 4  高山.名古屋

因為之前o個晚係白川鄉搵唔到酒店,我o地比原定提早o左一晚o黎到高山(takayama),好事丫~多D時間周圍去行下o羅~我o地一早就可以出門口啦﹗高山o既酒店唔包早餐,而我o地亦打算第一站行朝市(morning market),應該好多食o野o既機會,所以咁就出去了~

經過尋晚去過o既國分寺,星期日o既早上,感覺大大不同﹗尋晚冷清清的,但今朝就朝氣勃勃﹗有好多人已經擺好攤子賣o野了,食得、唔食得o既都有~我同家姐買o左一份飯糰o黎食呀~冇餡料,但D米係有各式各樣o既穀物係入面,然後鹹鹹地吊下味都幾好~

一路行又一路買下o野食啦~我o地買o左燒糰子,其實係D質感似年糕o既丸子,飛驒地區又另一名產叫做五目餅,唔駛再試啦,應該係一樣o既東東﹗umum…唔係超美味,不過熱辣辣又幾好食o既~之後又食o左「燒蛋磚」(<–個名我改的,因為唔知叫乜~),四四方方鮮黃色,入面好似BBQ棉花糖o既質感,都幾得意~另外又係D攤子度試下食啦~

呢度就係宮川朝市o既入口啦~都幾熱鬧o架﹗不過逛o既主要都遊客o羅~日本遊客最多﹗

經過一間賣好多好多靚靚呱呱o既鋪頭﹗帶番屋企就冇可能啦,影張相啦~(然後…快閃﹗哈~)

食物方面真係好多~見到呢度有D新鮮蔬果啦~後來我o地去陣屋前朝市呢,賣好多醬醃蔬菜,家姐同埋高都買o左醃青瓜呀~好好味﹗

係高山,周圍都係景點﹗因為成個古色古香o既小鎮風情就係佢o既賣點﹗好寧靜、好舒服o既小鎮﹗

去完陣屋前朝市,梗係順住個勢入去高山陣屋參觀啦~

家姐要yeah了,又有得蓋印﹗唔知blog友們有冇留意呢,去日本旅遊的話,周圍都有得蓋紀念印章,就咁放係景點呀、火車站呀o架咋,大家可以隨便去蓋﹗所以家姐而家去親日本都養成帶本簿仔去蓋印o既習慣﹗一來有紀念性啦,二來D印仔好多時都好精美呢~

高山陣屋係古時(大概十七世紀吧)o既政府部門辦公室,不過呢,而家展示o既唔少都係重新裝修o架lu~

其中一間房有一堆女士們「表演」彈奏古琴,umum…遠處聽到時,覺得,呀,係舊建築入面聽到D古代音樂,真係有氣氛喇,但埋到去睇時,噢,原來佢o地係「練習中表演」,heehee,非常業餘呢~一邊數住拍子一邊彈,而且…唔整齊﹗不過呢,精神可嘉~佢o地彈o既時候好投入o架~

參觀完高山陣屋就去食lunch lu~

去o左一間食拉麵烏冬的,我要o左個希靈魚烏冬,都ok啦,不過我更喜歡o既係,咬落去煙煙韌韌o個種烏冬~

我o地進發去東山遊步道,係一條靠山邊o既路,沿路有好多好多間寺廟呢~

好多間寺廟又唔似bodhigaya咁間間有特色喎,相反,睇落去唔係好睇到差別呢~規模有分別吧?而且周圍好靜呀﹗時時都覺得,世界上好似得我o地三個人咁﹗

沿住東山遊步道行,有個位忽然條路唔係好清晰添,點算?﹗跟住條大大地o既路行住先啦,噢,越來越唔對路﹗行o左去墳墓﹗oh no no~好在懸崖勒馬,行番轉頭,咁都搵得番條正路出番去~

之後去高山另一大景點,高山祭屋台會館﹗

高山祭係日本o既祭典之中其中一個最出名o架~每年都有好多好多國內、海外o既人去參加一年兩次o既祭典﹗祭典時,呢D大型、有幾層樓o既屋台就會搬到街上去~高山總共有23座屋台o架,但而家只有五座係呢度展示出o黎,會館會定期轉display o既~呢D屋台造價好貴o架,金色o既東東全部都係真金﹗有咩損壞時,政府會承擔維修~國家o既重要資產嘛~

逛o左咁多地方,大家都累了,我o地去o左一間靚靚cafe tea一tea﹗cafe叫做rakuda cafe,環境唔係華麗或者新潮o個種,而係好warm、好cosy o既感覺~

因為又食o野又飲o野太貴了,我只係叫o左一杯iced chocolate,估唔到咁可愛呢~cream上面o既居然放o左pretzel,鹹鹹脆脆又幾襯過,上面仲有兩粒杞子,又配色,又吊味~

cafe入面放o左一本簿,俾顧客隨意寫下o野、塗下鴉﹗我又係度努力「做功課」﹗

哇,寫滿o左一版呢~居然仲畫o左我最唔擅長o既畫添~哈哈~

餐牌都好cute o架,用手寫,圖片就用手畫~kawaii~~~

餘下落o黎o既時間,我o地只係係附近行下街咋~逛到咁上下,去買便當食,之後就要搭長途巴士番去名古屋lu~

原本想食車站o既便當,但貴好多呢,便利店入面o既款式都幾靚丫,我揀o左呢款以三文魚做主菜o既便當,佢o地仲幫我叮熱o左添~但係呢,個三文魚麻麻地,反而其他餸菜好令人有驚喜,厚燒蛋好蜜味啦,又有一粒芋丸,軟綿綿o既豆腐都好好食~另外我加多一塊50yen o既飛驒牛薯餅呀(雖然有飛驒牛,但百分比大約只佔1%,哈~都唔知算唔算有~)~熱辣辣,好好味~呢餐平平地但都好滿意呀~

之後我o地就上車lu~巴士好舒服,兩個半鐘o既時間好快過~又唔眼瞓喎,我o地三個人一齊聽五月天度過搭車時間~

6-6-2008:遊金澤.祭典once more

結果隔o左咁耐先繼續打D日本旅遊blog blog呢~今日其實call緊(去旅行時仍然係一個medical student,打blog時已經變成houseman啦~),不過暫時「得手」,可以去common room上上網、打打blog~

旅程o既第二日,我o地出發去金澤~

食早餐先﹗

我o地名古屋o既旅館走外國風情路線,食o既係西式早餐,播o既係爵士樂,環境都非常relax,又可以望下街景,good﹗

好鍾意呢個果醬牛油packaging呢﹗只要係中間一「啪」,果醬同埋牛油就會係D洞洞擠出o黎,非常乾淨俐落,又可以混合得好好﹗家姐好鍾意隻紅豆味~不過對於高高o黎講就慘D啦,因為佢唔鍾意食牛油~

好喇,搭JR出發去金澤lu~搭日本o既火車,諗起印度o既火車…印度o既火車有分唔同等級:冇劃位o既second class、冇冷氣但有床瞓又有好多唔關事o既人擠係度o既sleeper class、有冷氣好舒服o既2-deck AC或者3-deck AC、我未入過去o既first class…唔同等級真係差好遠…但日本o既JR嘛,只分自由席或者指定席,即是分有冇劃位,但冇其他等級都唔重要了,因為實在已經太舒服了﹗

去到金澤lu,呢個牌D字全部都係小噴水池o黎o架~仲會不斷變化呢,會變成英文,又會變成時間、天氣等等~

咦,有宣傳關於…祭典?﹗又俾我o地遇到祭典咁lucky?叫做百萬石祭,家姐去問清楚之後,原來夜晚有放燈籠o既活動呢~一定要去參加了﹗

o黎到都晏晏地啦,去火車站o既商場食lunch先啦~哇,有壽司店﹗

我o地叫o左set o黎食,唔算貴喎,起碼平過去食元氣壽司,但好食十萬倍﹗今日最佳o既壽司係—-左上角o既吞拿魚﹗非常鮮美~其餘當然都唔錯啦~

之後就正式開始參觀lu~第一站係野村家~其實成個金澤都充滿古典味道,有好多古老o既街、古老o既房屋,特色就係呢D武士o既舊居,最出名o既就係野村家喇﹗

招牌點都要影下啦~

我o地都有入去參觀~

好鍾意呢道手工精細o既紙門~

野村家o既庭園都好出名o架,係全國第三good o既庭園,無奈我o既相機唔係廣角鏡,影唔到成個佈局~

之後…又去jap jap jap﹗哈,我o地食完lunch冇幾耐,又去tea﹗去一間靚靚o既cafe坐低o左~日本周圍都好多cafe,間間都想去呢﹗

我同高高都食pancake,我揀o左朱古力香蕉cream餡,好肥,但好味﹗家姐就食cheese cake,佢o地仲飲埋咖啡添呢~不過我唔捨得一個tea食咁貴呀…當時o既我仲係一個冇收入o既學生嘛~

下一站去日本四大名園之一o既兼六園﹗

行過去時,哇,寧靜優美o既街道﹗真係人少、車少、污染少,好舒服呢~

兼六園有各式各樣o既亭台樓角、花草樹木,環境係靚o既,不過我覺得比較起中國o既園林就比較遜色lu~

我o地再去逛二十世紀美術館,入面展出好多有特色o既藝術品﹗其中一個最特別o既係一個「泳池」,表面上係一個泳池,實際係一個地下室,水深只有幾吋﹗然後係地面o既人望落水入面,係地下室o既人就好似係水底咁,而係下面o既人望上去,又好似係水底o既view咁,都幾有趣~

另外又有一個要除晒鞋、飾物、手錶,「用身體去感受」o既藝術品,好大型o架,好似細個時玩o既波波池咁大,不過成個structure都係用D粉紅色、粉紫色o既薄網網組成,我o地踩落去軟綿綿的~雖然唔明白藝術家想表達D乜,但都係一個特別o既體驗~

又有呢D用一張張細相組成o既大相,變得好立體呢~

by the way,呢個美術館都係「最美麗的第七天」o既取景場地o黎o架,雖然我唔想同周麗淇扯上任何關係,但都for your information講講俾大家知啦~

行完美術館,我o地要趁早食個dinner﹗因為要趕住參加祭典啦~

有趣o既餐牌﹗全部都係用絨絨造成o既呢~好cute﹗我o地今餐食o既全部都係最普通o既食堂菜式,就好似日之出食堂賣o個D,食o左咖喱飯、鰻魚飯、豬扒飯,雖然普通,但樣樣都好好味o架~

都未完全食晒,就聽到外面有鬧哄哄o既聲音lu,拿拿聲埋單出去湊熱鬧,哇,原來有好多小學生係度巡遊緊啦~

佢o地個個都拎住燈籠,係鼓聲、音樂聲帶動下行去一個方向﹗後來我o地就見到佢o地集合o既地方啦~播o既音樂就好似…動物奧運會o既feel﹗好歡樂呢~

行下行下就見到祭典o既攤檔lu~因為係名古屋o個晚參加o左一次,雖然依然高興,但都已經冇咁誇張地興奮…賣o既小食都大同小異~不過我玩o左抽獎遊戲﹗

全檔都係鬆弛熊o既精品﹗每局300yen,參加遊戲o既人只需要抽一張咭,入面有大、中、細、安慰獎等字樣,跟住就揀禮物咯﹗

我好lucky地抽到細獎,回本咯~我揀o左鬆弛熊拖鞋﹗而家係宿舍都著緊佢呀~好good好good﹗

終於去到百萬石祭放燈籠o既河邊lu~

好靚啊﹗一個個四方形o既、有大有細o既燈籠,順住水由上游至下游咁飄,D人將願望寫上去,祈求事事平安吧﹗

去到放燈籠o既河岸,原來有電視台報導,仲搵o左加賀小姐(選美之類的)o黎做宣傳添~我o地難得的可以企到咁埋同佢o地影相﹗

走時都晏晏地啦~等極巴士都等唔到,索性行路lu﹗少少累,但都唔係花太多時間就番到酒店,反正金澤就唔係一個好大o既城市~

酒店都非常令人期待呢,第一,呢間係洋和式o既房間,即是有兩張床、有兩份瞓榻榻米o既床鋪,我一早就講o左我要瞓地下lu﹗呵呵~第二,呢間酒店我好想好想揀o架,因為有溫泉﹗又有室內o既、又有室外o既,玩o左一日,浸一個熱水浴,真舒服,消除疲勞呀﹗浴室仲有一個乘涼o既地方,浸完浴可以坐下,望下月光、望下天,真好~呢間酒店係幾間之中我最鍾意o既呢~

5-6-2008:名古屋「咁過祭」

只係由印度、台灣番o黎香港一星期,我又去另一個trip啦~因為可能今次係最後o既長長假lu,家姐又拎到假期,所以我o地決定兩姊妹plus家姐o既friend高高,一行三人去日本中部玩~高高係家姐o既中學同學,所以我三年級時…即是家姐讀中一時我已經識佢lu~

因為plan行程時我人仲係印度,所以由可靠o既家姐全權負責,家姐揀o既一定好,所以我一D都唔擔心,只係負責執行李同埋去玩﹗點解去日本中部呢?因為travelzoo咁o岩有超抵o既機票去名古屋,因利成便,我o地就決定去名古屋+附近o既地方,分別係金澤、白川鄉,同埋高山~一個簡單D o既講法,就係「拍最美麗的第七天o個度」o羅~(雖然我唔想同周麗淇扯上任何關係…)

o個一朝搭超早機出發去名古屋~

所以去到名古屋都仲係好早咋~之前都坐過「香港快運」,因為係平平航空公司,所以飛得比較低,氣流亦比較大,所以坐得辛苦少少~但根據家姐講,D飛機餐有進步喎~我都唔記得上次係點lu…

我o地坐鐵路由機場出番去城市先,有別於其他日本大城市,名古屋o既平房比較多,我o地話,好似大雄住o既地方咁呀~

去到酒店落腳喇,今次住o既酒店係西洋風,地方都幾靚~不過要晏少少先有得check-in,所以我o地放低行李就出去逛逛先lu~

第一日o既行程都唔係好packed,我o地主要去逛逛街同埋參加祭典﹗所以都唔趕~

係香港機場同埋飛機總共食o左兩次早餐,所以一直都唔餓,直至行街行到四五點,我o地先搵地方食下o野~結果去o左一間地下街入面o既小食堂食飯~入面好多佬呀﹗個個掛晒D西裝褸係牆上o既掛鉤,o岩o岩放工吧?

我o地食o左呢度好出名o既味噌豬扒﹗炸得香脆,再加上濃濃o既味噌,真係好好食呢~我都食到上o左癮,後來去白川鄉時,自己食o左一整份﹗好味道﹗

之後差不多時間到今日o既重頭戲了,就係要去參加熱田神宮o既獻燈祭+煙花大會,日本o既祭典啊﹗平時成日睇漫畫都會提及祭典,總係講到好熱鬧,好令人期待o既樣子,估唔到我有機會親身參加呢~係咁o岩撞正,家姐又發現到o架咋~其實獻燈祭係做乜我都唔係好知,只知道,祭典會好似年宵咁夜晚有好多攤檔,食下o野呀,然後D女孩子會著住浴衣,打扮得靚靚咁去o羅~

沿路上見到有個屋企外面掛住好多晴天公仔,係要祈求祭典呢一日唔好落雨吧?

初初去到時都未係好多人住,個個攤檔都作好做生意o既準備,主要都係賣小食啦,好似香蕉朱古力呀、串燒呀、燒八爪魚丸呀、炒麵呀之類…同漫畫o既描述好compatible呀﹗

果然遇到浴衣女生呢﹗佢o地仲會專登set埋頭添o架~好想搵佢o地同我合照,但我都係唔夠膽問呢…

我o地幫襯o左呢位大叔買八爪魚丸~

原來蘸沙津醬食真係好味D o架喎~o岩o岩煮好,熱呼呼的都幾好食,不過粒八爪魚好細粒呢…咁樣係正宗乎?

仲有初次體驗和牛﹗500yen一串o既燒和牛,實在太太太太太太太好味了﹗好多汁、好濃牛味﹗係我食過最好味o既牛串,or even最好味o既牛﹗我o地實在唔應該三個人share一串呢,應該每人起碼食一串﹗自此之後,我o地都瘋狂地愛上飛驒牛了﹗

除o左呢兩樣之外,我o地都仲有食其他o野o架,不過唔逐樣show張相出o黎了~後來又買o左燒餅,去睇煙花時一邊睇一邊食~

獻燈會當然有燈啦~

其實好多地方都睇到煙花,所以係街上只要有個望到煙花o既地方,就會見到D人一堆堆咁樣聚集~

最尾我o地企定定係呢個地方睇煙花o羅~香港D煙花匯演咪噼噼啪啪咁怒放o既,日本祭典o既煙花唔係咁o架,而係一朵一朵咁放上去,唔震憾,不過比較浪漫feel o羅~大家唔係睇到哇哇聲,而係可以係煙花之下傾下心事咁(只限情侶)~

番酒店lu﹗呢度o既地鐵都有ladies’ compartment呢~諗番起係印度o既孟買,一個咁冇秩序o既地方都有﹗係o個度好重要o架﹗如果唔坐ladies’ compartment就要同D佬逼,接踵摩肩,唔係一個pleasant o既感覺…

買o左香蕉番酒店食﹗日本D水果好貴o架~難得有精明ta﹗呵呵~見到有抵食少少o既香蕉,即刻買﹗yeah~

養精蓄銳,第二朝出發去金澤了﹗