尋日冇可能唔skip一日o既diary，食完早餐，執好行李就出發去機場啦~雖然係下晝一點半o既機，但又要早D去到，JFK機場又比較遠，都係穩陣D好~之前o個晚其實都要好晏先可以正式咁訓覺，因為六姨同佢D friend BBQ完之後，入o左屋熱烈地唱K，然後呢…唔…唱得呢…呢個…比較…其實呀…有D難聽咁o羅~

關o左房門，遠在二樓，都仍然聽得清清楚楚，真係oh no~

結果十一點就早lu，我班機已經開始check-in，排隊輪到我，哎吔，點知遇著個新手，動作極慢，枱面成叠貓紙都搞唔掂，俾少張boarding pass我，行李張貼紙又冇double check，我成功番到o黎、行李又冇寄失都算偷笑﹗

因為個staff冇問我o既緣故，佢俾o左一個最差o既中間位我﹗又冇得靠窗、可以挨下，又冇得靠走廊、出入方便D，坐係中間，挨左又唔係，挨右又唔係，結果十四個鐘都訓得唔好，可能只係訓o左兩三個鐘，其餘時間怒睇戲，睇o左三套﹗大韓航空有樣好喎，唔單止有自己o既獨立電視仔，而且睇戲係自己按掣開始，唔駛限時限刻，要行開一陣又可以停o左佢先喎~我睇o左「賊壇新人王」(占基利過年時o個套笑片，講兩公婆原本生活冇憂，但佢俾個老細「冼」o左一鑊，變得非常貧困，盛怒之下就做o左賊﹗)、「failure to launch」(講有個35歲o既王老五死都要黐住阿爸阿媽住，屋企好好服侍，遇著有女友對佢認真起o黎就飛o左佢，佢父母就請o左個專家o黎幫佢，點知兩人產生真感情~<–好似好老土咁啊可？

但都幾好睇、幾搞笑~)同埋「aquamarine」(中文叫做美人魚之戀，講有條美人魚被逼婚，佢深信係人類o既世界可以搵到真正o既愛情，就o黎o左呢度，接近一個萬人迷，與此同時，結識o左兩個知心好友~<–好睇呀，好感動，但感覺有少少似細路仔戲o羅~)~

其餘時間係咁係度打機，雖然飛機上o個D都只係D無聊game，好似新接龍、踩地雷之類，但都總算消磨時間啦~

聽爸o既意見，係機場買o左本英文小說，都唔錯喎~原來睇英文小說都唔會太過唔明(因為呢D係俾D真正o既成年人睇，唔係以前D ERS會就住我o地o既程度o黎寫，所以都有D擔心D英文會唔明~)o既~但上o左機之後睇小說好似太費神lu，所以都放低o左~

14個鐘真係好難捱，但都總算捱過o左，但之後仲有三個半鐘由首爾轉飛番香港，真係oh no~係機場刷牙洗面，成個人都舒服o左好多~

第二程飛機訓得好好呀，個位又舒服D，我個人又累D，簡直驚自己唔識起身食飯(如果唔係就蝕了﹗

)~我於是貼o左張佢o地提供o既貼紙，寫住「wake me up for meals」，咁就唔怕啦~老實講，大韓航空D飛機餐確係唔錯﹗

但最終我都冇試過韓式呢，次次都係食o左西式~韓式好似都係唔係好o岩胃口，唔敢試~

番到香港lu，實在太太太太高興了﹗

早到o左差唔多半個鐘﹗但姐同day都到了﹗可惜錯失了最美麗動人o既接機時刻，擁抱o個一幕失去了﹗因為佢o地兩個見唔到出o黎﹗換o黎o既係，我拖住我三件重重o既行李，係個接機大堂附近走o黎走去搵佢o地出o黎﹗

電話又冇電到開唔到機，唯有靠最原始o既一對腳去搵﹗終於搵到啦，爸媽先o岩o岩泊好車~我o地直情叫佢o地唔好過o黎lu，最後連停車場錢都慳番(因為短時間之內離開)~

番到屋企，派派手信，洗洗衫，食食糖水，實在太開心了﹗

16日o既旅程真係夠晒數啦~