14-4-2012:首爾濟州櫻花遊day 7.笨蛋的奇遇

我有諗過要唔要post呢篇blog,話晒都係將自己o既蠢事曝光,不過蠢事都係史實o既一部份,而家記錄低,將來懷念時可能係深刻o既經驗,蠢唔蠢到時都唔重要了~因為第六晚發高燒+周身痛+軟lai lai o既緣故,我哋第六晚本身想去酒店對面嗰間汗蒸幕,第七日原本想去南山公園、南山塔再睇櫻花的,冇辦法,行程要取消同埋我要同酒店張床為伴了,呀,仲有Panadol~酒店check out時間係中午,我哋係晚上機,所以day落去樓下extend多一晚酒店房間,預計休息到夠鐘至出發去機場,哇,房價係度俾同埋之前網上預訂差好好好大截丫﹗早、午兩餐都靠晒你了~可能因為我哋本身間房個view靚,佢要留番俾一早預訂房間o既客人吧,所以我哋搬咗落去低層冇景觀o既房間,好似大間咗啲添~

本來事情都係我哋預期咁發展,雖然仲係好病,但我哋都係正確時間之內去到機場、check in、過關…

但真係唔知發咩神經,我就懞下懞下,day又唔知點解都懞下懞下,我哋居然miss咗飛機,去到閘口時,國泰o既職員問我哋係咪去香港,佢話飛機已經開走了…但我當時連驚訝or慌張都冇,只係「哦~」,然後跟住佢哋辦手續了…後來先覺得奇怪o既係,乜平時啲人如果check in咗,航空公司唔係點都會開咪搵佢哋出嚟o既咩?唔通我哋真係懞到連廣播都聽唔到?

當晚已經冇其他班機返香港,我哋好擔心要俾錢買過機票,唔知咁樣情況會點,點知跟住國泰職員過番關、領番行李,期間搭過好多似電梯、過咗好多海關o既行李x光機,我哋出番去大堂附近o既國泰office,然後佢哋同我哋講,已經同我哋轉咗第二朝最早o既班機﹗﹗﹗吓?咁好o既?錯o既明明係我哋喎,唔駛罰添喎~總之我哋呢晚搵地方落腳就好了~

我哋先去arrival hall o既詢問處問下最近o既酒店有冇vacancy,但好似都已經full晒,第二朝又好早機喎,出番去首爾市中心好似唔係好值得,於是我哋試咗人生o既第一次「The Terminal」…

原來仁川國際機場有個有得俾人沖涼+休息o既地方,我終於可以一嚐類似汗蒸幕o既地方了,點解話類似,因為嗰度有淋浴,有浸浴,但又似冇各式各樣o既蒸,而且設計都好新穎嗰種,不過似o既地方係,分開男界女界,女人個個係入面赤條條,好似日本咁,就係浴池度浸,我因為都未係非常好精神,所以都唔敢浸咁耐~仲完涼就換上好似中學體育衫o既短衫短褲入去休息區,你可以拎張地蓆、硬硬的枕頭休息,入面好多男男女女,呢一部份最似韓劇入面o既汗蒸幕場景﹗雖然去唔成梨泰院嗰間,但總算有番啲補償(雖然本身係慘事…)~

係啲咁o既環境都唔方瞓得好喇,我哋過咗呢晚,兩個笨蛋第二朝終於成功返到香港了﹗ 閱讀全文

9-4-2012:首爾濟州櫻花遊day 2(part 2).狎鷗亭.濟州黑豚

係首爾大學搭番巴士出嚟已經餓得不得了,其實係首爾大學都有經過學生飯堂,佢哋好早就有人食飯啦,setting令我諗起韓版「惡作劇之吻」…不過當時都冇諗過係嗰度食喎,一來太早,二來見到啲人食o既嘢個樣好辣,三來都唔知點樣落order~我哋出番去地鐵站附近就搵嘢食﹗其實呢度冇影相,我哋落車我見到有銀行我就話不如換錢先,事關係香港時朋友都叫我係香港換少少好喇,去到換個rate好好多,又真喎~每一港元換到137won左右,去到有成147won咁上下,都值得咁做﹗銀行啱啱lunch time,得好少staff做緊嘢,都等咗一段時間,好在啲椅幾舒服~到我哋了,香港啲一千蚊咁多種圖樣,搞到人暈陀陀,佢要上電腦查reference對番我哋啲銀紙真假,仲有個高級少少o既職員一齊對,咁又係o既,應該比較少遊客係呢間分行換錢吧,可能明洞、東大門嗰啲找換店or銀行會熟手啲~嗰頭好多食肆丫﹗我哋揀咗呢間~

好似係食啲fusion鐵板燒的~我哋揭個menu有圖畫,好似都有英文,本來選咗一份雞肉一份炒飯,我哋好簡單咁同個小伙子waiter講「one this, one this」,但佢居然好大反應咁表達出嚟話唔得喎,好用力咁指住雞、伸兩隻手指,又好用力咁指住炒飯、伸兩隻手指,當時我哋都唔係好明…?﹗但佢咁激動,咁我哋改做兩份雞啦…佢就ok了,後來至明點解~ 閱讀全文

9-4-2012:首爾濟州櫻花遊day 2(part 1).漫步首爾大學

好早就起咗身了,我哋賴住床,睇住Nox Boutique Hotel嗰個55吋大電視,男人嘛,最鍾意就係拎住個遙控按按按,無論係我爸爸又係,我老公又係﹗是但啦~我哋睇一陣棒球比賽,睇一陣新聞,睇一陣卡通片,居然吸引我哋睇得比較耐o既係呢個節目:

無錯﹗就係教育電視﹗唔知係真係上堂時睇o架丫,定係俾啲學生隨時需要學習就睇o既呢?入面教o既係小學數學,雖然唔識聽韓文,但講緊o既係距離、時速、時間嗰啲o既文字題,又有圖又列式,覺得教得幾好喎~另外一個台就教英文o既,個老師讀完一次句英文之後會「um…um…um…」同埋頭拎拎,意思係expect學生跟住嚟讀咁,都幾搞鬼,兩個台我哋都睇咗一陣﹗哈哈~我忍唔住影低數學堂落嚟…直至肚子餓了,我哋去食早餐+出發玩~ 閱讀全文

8-4-2012:首爾濟州櫻花遊day 1.出發囉~

原來有成一年冇upload過新blog lu~確實,我自從上次pre-wedding之後,中間係去過一次trip啫,之後就到今次了~上次係honeyhoneyhoneymoooooooooon﹗﹗﹗家姐叫我一定要記錄番嗰次咁重要o既旅程,我都贊成﹗所以我寫完今次新鮮熱辣出爐o既首爾濟州trip之後就補番去Fiji o既honeymoon之旅俾大家睇啦﹗今次揀去韓國事緣係要講番一年前我哋去pre-wedding o既事,當時本來係去日本o既輕井澤影櫻花pre-wedding的,就因為日本地震海嘯o既緣故,我哋改咗去上海影pre-wedding了,對於睇唔到櫻花一直耿耿於懷,所以我好想再安排一個trip去睇櫻花﹗雖然我熱愛日本,但係我生baby之前恐怕都係唔去日本住了,盡量希望啲輻射唔好影響小baby啦,所以揀咗去韓國﹗今次第一次用Asiamiles嚟換機票,所以見慳咗啲錢,所以其他地方都希望鬆手啲﹗訂機票時今次的櫻花預測都未報告出來,所以我參考咗2011 o既開花日子咋,而且有接近一星期時間,希望可以捉得到啲櫻花,為咗避免撲個空而且今次時間又足,所以決定去埋濟州島,咁就安全啦~show一show韓國的地圖先,點解話安全啲呢,講一講俾唔清楚o既人知道啦,事關櫻花開o既日子係視乎天氣轉暖,所以會由南至北咁開,如果以日本計,九州o既開花日同北海道o既開花日差唔多差成一個月o架~我哋去咗差唔多係韓國最北o既首爾同埋最南o既濟州,希望早咗遲咗都有得睇到啦~ 閱讀全文

20-6-2006:長長飛行去紐約

DAY 1 @ USA

經過好多好多個鐘o既飛行之後,終於到達七姨屋企啦~

成個六月二十日都好似冇乜做過D乜咁…但偏偏我o既六月二十日又比其他人特別長,多o左足足12個鐘﹗因為紐約同香港o既時差有12個鐘嘛~

諗番起今朝係屋企出發,先去可風「埋周」,再去機場,呢D事彷彿已經係好耐之前發生咁…哎吔吔,激死我啦,原本諗住帶本250個case去埋美國睇,但點知漏低o左係爸個office度﹗

我搭korean air,所以係首爾轉機,除o左去new york o個程delay o左之外(辛苦六姨丈等得好耐了…),整體都算暢順o既,轉機有個幾鐘o既時間,唔算太緊逼,因為好快就搵到下一班機o既閘口,所以好多時間剩,幸好有電視睇,轉播日本o既棒球賽,係巨人隊呀﹗(其實根本我就唔識D棒球隊,知道巨人隊係因為大雄個阿爸係巨人隊o既fans,巨人隊贏波佢同叮噹就會有零用錢,如果唔係就會發脾氣~)

之後o個程飛機好在旁邊o既一對韓國夫婦都唔錯,總之可以各不相干、和平共處,korean air o既食物都幾好味,每一餐都係一款韓式、一款西式任擇,我冇食韓式呀,係D拌飯呀、粥o個D,相對o黎講唔係太o岩胃口,所以冇辦法拎支辣椒醬lu(因為恒仔個媽媽鍾意食o個款醬,家姐叫我拎番o黎俾佢~)~

過關程序上都算順利o既,係人多D、打晒蛇餅o羅,只係後面有個香港大叔聲大夾無準咁發表偉論,10個煩,我好遺憾我聽得明佢講乜,打蛇餅兜幾個彎又講番相同o既o野,又大聲喎,真係想同佢講,全部人都聽到啦,明白晒啦…但唔敢…怕惹o黎殺身之禍…

七姨o既屋企好舒服呀~

我諗我打埋個diary之後都去訓覺lu~今晚同婷婷一間房﹗暫定聽日去美國自然史博物館﹗睇睇情況如何啦~