DAY 7 @ USA

聽日就出發去康皓珊度啦﹗好期待啊﹗陣間都仲要執行李添…聽朝又要早起~

今日10個累﹗因為行o左好多好多好多好多路~而且都運o左好多好多好多好多吉﹗(<–今次唔關我事o架~個間公司有新人加入了﹗)

一 早起身，上晝都冇乜做到D乜，六姨車o左我去辦個social security card，話第時要係美國搵工定申請銀行戶口都要用呢個social security number喎~去到D手續都好快搞掂，其實都只不過係填份form，然後個職員將D資料入落電腦罷了﹗好簡單，一陣就走得啦~

之後六姨車我去staten island ferry個碼頭(其實應該係st george ferry pier，呀，以前係toronto番summer school時個地鐵站都叫做st george﹗)，我去到downtown會合六姨丈，佢今日會帶我去玩﹗我架船雖然慢，但去到o個邊都等o左佢差唔多半個鐘，好在今日有帶到本da vinci code去睇﹗哇，越來越精彩呀﹗好想追住o黎睇﹗

原本諗住去bronx zoo o架(bronx係new york北邊o既一個區，o個度有個都幾大型o既動物園﹗)，但又落住雨喎，天氣唔好D動物都唔走出o黎啦﹗於是六姨丈提議去睇航空母艦(好威水啊﹗)﹗ 坐subway去到42街，向西邊行，我o地中途停低食o左lunch，終於去o左subway了﹗subway係一間連鎖店，專賣submarine (長形的sandwich~)，我要o左燒牛肉，其他配料任揀o架~我要o左好多蔬菜的﹗好好味啊﹗

係香港開都有得做﹗o岩D OL做lunch﹗食飽飽之後，我o地一直向西行就見到隻艦啦﹗真係好大，隻艦由第二次世界大戰開始服役，到1974年退下火線，而家變o左museum。我o地買o左套票，包入場同兩個rides﹗

一 入到去就有個guided tour要開始啦，我o地個領隊係一個老伯﹗佢講o野好細聲呢~但留心聽o既話都可以得到好多資訊﹗佢帶我o地好brief咁行o左一轉，解釋番隻船o既 結構、改進、內部運作等等俾我o地聽，同tour仲有一個男人帶住兩個小朋友，同埋兩個女人，佢o地全部都係英文人呀，聽得明晒(我估咋…)，我又有時要 估估下，D專有名詞又唔識(例如「魚雷」o既英文…oops﹗而家又唔記得了﹗)~去到隻船o既flight deck，有好多隻戰機放係度展覽，有一隻「隱形戰機」，原來隱形o既意思係指佢飛得好高，而且機身油o左一種特別o既油，radar偵測唔到，所以就隱 形啦~(我問六姨丈點解唔所有戰機都油o個種油，哈﹗我係笨蛋﹗

因為，如果隻機飛得唔高，機身油乜都冇用啦，用眼都睇到咯﹗radar偵唔偵測到都冇關係﹗)

之後去玩o個兩個ride，一個叫4D，一個叫G-force。4Do個個就小兒科D，係一個張椅會郁o既3D電影，再加D觸感o既effect(噴水o個D~)，都幾得意o既，不過做得唔夠仔細o羅~G-force就犀利咯，我o地兩個坐係個cabin入面，要駕駛戰機，攻擊敵人，但個cabin o既郁動就跟住我o地入面o既駕駛，所以可能係三百六十度轉，或者半天吊的﹗但我o地兩個都駕駛得麻麻地啦~目標又擊唔中﹗

之後我o地睇埋一個關於隻航空母艦o既video同埋逛埋旁邊隻潛水艇(今次真係童叟無欺o既submarine﹗)就走lu~

運吉正式開始啦﹗

因為六姨丈今朝拎o左架車去整，我o 地行完個museum咪去拎番架車o羅，但間車房係brooklyn(新唐人街，都頗遠的~)，去o個邊都需要D時間﹗於是我o地行番好遠o既距離(比中 環站去香港站遠得多﹗)搭番地鐵，去到brooklyn，趕頭趕命，要係間舖六點鐘關門之前去到﹗點知，去到間車房就發覺已經關門啦，只遲o左一個字(咁 都唔等﹗)﹗去到咁遠，唔甘心﹗

所以打電話番黎問六姨有冇餸要買，買o左磅(冇錯﹗係磅，而唔係斤﹗呢度D叉燒比香港貴，但又冇咁好食…)叉燒啦~

因為冇車直接番去staten island，所以要坐番地鐵出去downtown，再坐ferry，然後17個站o既火車，番到去時已經八點幾lu~(慘﹗)雖然如此，但車費都只係US$2﹗因為地鐵US$2，ferry免費，兩個鐘之內轉車(都包括火車)又唔駛錢~咁都不幸中之大幸o既…

我都好累啦，頭先食完飯坐係張梳化度睇御用閒人，坐低o左都唔想郁﹗執行李﹗訓覺﹗