今次疫情都唔知會持續到幾時，冇得出街食飯，冇得去外地旅行，反而造就咗不停挑戰新菜式﹗先前買落咗麵粉、糯米粉係度，利用材料嚟search下有咩新搞作，發現原來台灣食到既蛋餅早餐原來好容易整咋~

睇咗幾個icook愛料理既食譜，綜合咗之後就整咗個粉漿，主要都係麵粉、少量糯米粉(如果屋企冇應該可以唔落，只係令口感更煙韌)、少量鹽、水嚟撈成~

我用Bruno嚟煎，比較容易控制，首先倒粉漿落去，等佢自然散開成圓形薄餅，大半熟之後反轉，加蛋液，再鋪芝士片，同埋先前蒸熱咗既急凍粟米粒，煎熟咗捲捲捲就食得喇﹗ 閱讀全文 →

停課咁耐，每一日都不停諗下有咩同啲小朋友玩，少出街少外食就成日都想食濃味嘢同埋甜嘢，又要有得玩又要有得食，最好就係屋企整嘢食啦﹗所以停課早期我就買定麵粉呀糯米粉呀呢啲必備材料係屋企，睇下幾時整~

呢一個星期六，夜晚過去婆婆度食飯，不如就整啲甜品一齊分享啦~湯丸其實好耐之前都有搓過，記得嗰陣仲住係華都，曉都未出世，嗰次唔記得用咗蕃薯定南瓜嚟搓啲湯丸，因為冇再放內餡，印象中味道係比較淡，質感係比較實多過軟滑~事格咁多年，今次上網搵定食譜，決定集眾家之大成~

用熱水+糯米粉+少量糖+少量食油嚟整個皮，比例略略參考網上食譜，不過都係靠手感去調整，搓好粉糰就可以包內餡啦，我帶咗片糖同朱古力粒嚟，決定試下朱古力粒啦，其實呢啲係焗曲奇餅或者muffin用既朱古力碎，用嚟包入湯丸都好方便~

原本想叫曉嚟一齊包，佢上次包既餃子都似模似樣，不過呢一日曉冇午睡，狀態不佳，包咗一粒就走咗~結果都係兩母女一齊包，不過係我同我媽既親子活動，哈哈~ 閱讀全文 →

小朋友停課最起碼到三月頭(我估應該唔止停咁短)，日日窩係屋企又悶又冇得放電，家長最頭痛，買咗activity book又教佢寫多啲字都消磨唔到幾多時間~我知道，又kill time又開心又實用既，一定係同小朋友一齊煮嘢食，所以到咗星期六放假，可以試下啦~

平時兩隻都鍾意食屋企自己包既餃子，平時我多數係街市買餃子皮，自己整內餡嚟包，星期五嗰日去街市，年初七未有得賣餃子皮，星期六早上去超級市場都搵唔到~把心一橫，即管試下自己搓皮啦，又唔係未試過，20+年前讀中學時家政堂都試過自己搓皮整鍋貼啦，而家又有網絡可以睇食譜，屋企又有廚師機可以幫我出力，應該ok啩？所以買唔到餃子皮，買咗包麵粉嚟代替~

小朋友午睡醒咗就可以開工了﹗用廚師機絞碎急凍梅肉豬扒(今時今日既新鮮豬肉太貴，又儲存得耐)，打碎咗紅蘿蔔同雲耳，解凍咗粟米，跟住就預備今次既重頭戲—-餃子皮了~

曉曉幫手絞肉~ 閱讀全文 →

爸爸同事結婚要去婚宴，得我哋三母女係屋企食飯，呢種情況我哋通常有三個選項，一係出街食順便去行街買嘢，二係去婆婆屋企食，三係自己屋企煮~但自己屋企煮嘛，梗係要揀啲煮得方便，佢哋食得叻，唔駛我勞氣既食物就最好啦，之前成日煮曉口中既「芝士麵」—-白汁pasta類，加上無限芝士+/-芝士粉，兩個都食得好好，最近我就鍾意整電飯煲一鑊熟既懒人飯(我娘家叫呢啲做「有味飯」，day屋企叫呢啲做「鹹飯」)~

爸爸去飲時我哋食既芝士南瓜飯~ 閱讀全文 →

上次母親節day同曉曉合力整咗個朱古力慕絲蛋糕送俾我，今次day生日，我同曉曉點樣同爸爸慶祝時，提到整個生日蛋糕俾佢，問day想要咩蛋糕，因為佢近年不停發福，好多批褲都陸續唔啱著，所以佢既要求係—-唔肥既蛋糕~上網搵下「低脂、低卡」蛋糕食譜，就search到今次整既乳酪蛋糕喇﹗食譜本身係芒果乳酪蛋糕，但靚既芒果可遇不可求，好多時仲要買返嚟放幾日先熟(買既時候唔知究竟係放三日五日定七日囉，可能道行未夠深)，我睇，轉藍莓或者士多啤梨應該都ok~呢排啲藍莓又大粒又甜，就藍莓啦﹗結果變成藍莓乳酪芝士蛋糕，day話，點解變成曉曉鍾意既蛋糕既？umum…我真係諗住整俾你食架，唔知點解會發展成咁…

材料都好容易係Taste買齊，Taste搵唔到既魚膠粉呢，上次有用剩咗可以用番~除咗水果主題改動之外，個乳酪由原味改咗做藍莓味乳酪，噢，似乎越嚟越唔瘦了~

我見個蛋糕容易整，打算安排適合既steps俾曉曉幫我手，但估唔到既係，詩詩都好想幫手囉﹗﹗﹗詩話：「我要攪呀~我要攪呀~」兩姐妹仲要爭住幫，搞到我一頭煙~哈哈~要係廚房加熱既部份我就禁止佢哋入嚟，但我一拎任何嘢出嚟佢哋就擁過嚟啦~

大家整碎個餅底，多數用桿麵既木棒，我哋屋企有玩具鎚仔喎，好啱用~好在入咗double膠袋咋，如果唔係一定一地都係餅﹗ 閱讀全文 →