24-11-2009：大阪白浜day 1(part 2)．美味芭菲．大阪夜景

發佈日期: 2009-11-24 作者: Rita

逛完心齋橋筋商店街同埋道頓堀之後，我哋就進發去下一個目的地梅田了~因為總共只去五日，可以spend係大阪市區o既時間就只有第一日，咁唯有趕趕地咁啦，好在有啲地方可以行路來往，唔駛時時都搭地鐵~

嚟到梅田HEP FIVE了，點解咁多個商場要揀呢一間？咪就係因為有個大大o既浪漫摩天輪囉~:p

呢個聖誕裝飾唔單只閃閃咁靚靚咁，而且定時仲會轉燈光o既顏色同埋會配上音樂o架~

hee，少少老土o既係，明明帶咗兩把遮嚟日本，諗住落雨都唔怕，點知第一日，亦係唯一o既一日有落雨，就冇帶啲遮出去喎，唯有買把遮啦~今次買o既又係waterfront o既遮(我平時最常用嗰把青蛙遮都係waterfront嚟o架~第一次係香港買，第二次係日本買~)~呢把透明底有一條條橙色黑色金魚o既遮只係五百幾yen咋~靚﹗

勁少人搭摩天輪，用我哋只能夠閱讀日文入面o既漢字能力嚟睇啲告示，似乎早幾日呢個HEP FIVE摩天輪免費入場~可能因為咁啦，想玩o既人都玩咗了，今日仲要天氣麻麻地喎，得我哋呢兩個傻瓜堅持要坐上去…:p

本身可以坐四個人o既車廂，兩個坐就非常寛敞舒適了，加上有冷暖氣系統，好似仲可以連接自己o既ipod落去佢o既loud speaker度，播放自己喜愛o既音樂，冇乜景睇都係一種享受嚟啦~

唔，一直落住細細雨，所以都唔係好睇到窗外o既景咋~

雖然玻璃窗上有講你知邊楝building係乜東東~

好快脆，15分鐘o既摩天輪之旅就結束了﹗一場嚟到，都逛一逛呢個HEP FIVE商場啦~我哋行得冇幾步，就俾呢間鋪頭吸咗入去了~

咁cosy o既環境，究竟係做咩o既呢？

原來係食邪惡甜品o既邪惡地域﹗我哋兩個人share呢杯勁勁大o既芭菲都覺得太邪惡呀~每人有好多粒cream puff之餘，入面仲有雪糕啦、yogurt啦、粟米片啦、蛋糕啦…哇，但係好好味~

兩個人好快就jap光光杯超大芭菲了﹗

就係呢間鋪頭了，仲有好多其他款式o既甜品o架~

其中都吸引我哋注意o既有呢杯蕃薯yogurt？﹗好似係熱o既？﹗要介紹俾蕃薯愛好者我爸食呀~坐隔離枱有個妙齡女子都order咗呢個呀~唔知係點o既味o既呢？

櫥窗o既一小角，中間o既人氣no.2就係我哋o個杯芭菲了﹗

之後我哋過去梅田空中花園展望台睇夜景，唔，行過去都花咗少少工夫搵路，因為又有大地盤啦，啲地圖o既landmark又唔係好搵到喎，入去JR車站o既information centre個大叔拒絕同講英文o既我哋交談呀，慘~好在都趕得切係關門前半個鐘入到場~

地下o既空地好似整咗D類似聖誕小鎮o既東東，但因為空中花園快要關門了，我哋趕緊上去先，可惜落到嚟時已經熄晒燈啦~

173米高o既展望台，即是三十幾樓，其實都唔係認真高o既，比起day屋企只係高少少…不過嘛，大阪o既樓宇唔高，要睇夜景嚟講173米就夠晒lu~

空中花園最頂頂係open area，可以睇晒成個大阪o既夜景﹗

地面有好多螢光螢光o既東東，好靚呢~

其實花園出面都好凍，仲要落緊雨又唔准擔遮，我哋行一圈，影啲相之後都忍唔住要盡快入番嚟了~因為入面都仲有其他嘢參觀o架~

聖誕限定﹗入場時每人派一粒星星俾你，大家寫上願望…

掛上一棵棵願望聖誕樹上面﹗我當然唔會講你知我許咗咩願啦，呵呵~

展望台上面仲有cafe啦、精品店啦、少少關於世界上面其他o既塔o既展覽啦、坐得舒舒服服o既椅子啦，如果有多少少時間，天氣又好啲o既話，都可以花長少少時間係度hea o既~

噢，十點半了﹗要關門啦~

由地下影番上去就係咁o既樣了~

因為對條路都熟悉少少了，番去酒店就一啲困難都冇啦~累了，goodnight﹗

待續：day 2 o既行程﹗

24-11-2009：大阪白浜day 1(part 1)．初到埗大阪走走看+關西美食

發佈日期: 2009-11-24 作者: Rita

朋友都話：「哇，你又去旅行？」問完我去邊之後就話：「又去日本？」先聲明，我雖然好鍾意去日本(數起嚟今次係第五次去)，但我唔係齋去shopping嗰種女仔嚟o架，我嚮往o既係日本o既美食、美景、賓至如歸o既感覺﹗

有菊姨介紹o既國泰package，早機去晚機返，非常好~可惜我略嫌個早機未夠早，十點二十分起飛，所以去到時都已經接近黃昏呢，第一日有得玩o既時間就比較少囉~

香港機場候機室，暖暖的冬日陽光~好舒服呀~

過關後同day悠閒咁食咗個大家樂早餐，都仲有少少時間悠閒地逛下書店先至上機~

呢張signature相係一定要影的﹗代表住嗰一次旅行o既開始~

機程只有三個幾鐘啫，好快脆就過~又有飲品花生，又有飛機餐，同埋今次坐得長少少了，有得睇戲~我哋揀咗睇「竊聽風雲」，唔知點解淨係可以聽普通話？﹗望住劉青雲、古天樂個樣，又唔係佢哋把聲，怪怪地咁…套戲都ok o既~

yeah~~~~~~~~~抵達關西空港lu~好開心呀﹗唔唔，首先我哋要搞掂搭出市區o既車同埋買好之後o既JR車票﹗

行出去戶外時，哇~「吓？真樹嚟o架？﹗」我真係唔敢相信，去到十一月底都仲有紅葉呢，而且一落機就見到了，呢D紅葉係真樹嚟o架﹗

因為準備得好，係香港時所有資料都搵好，又print晒出嚟，所以買JR車票都冇問題，我哋兩個都唔識講日本嘛，但都好順利咁買好兩程o既JR車飛~

大阪除咗市營o既地下鐵同埋JR之外，仲有好多私鐵，所以個鐵路系統都幾繁複~我哋搭出市區就發現搭呢個南海空港線比起搭JR方便喇，因為可以係難波站落車轉地鐵去心齋橋站~

由心齋橋站行過去我哋o既酒店comfort hotel shinsaibashi都唔困難，冇乜點迷路就行到過去~good呀﹗

as expected，間酒店房勁細間呀﹗不過比想像中好o既係，入廁所唔駛擘大隻腳都關到門~而且麻雀雖小都五臟俱全o既~

係酒店稍稍休息一陣就出動囉~

我哋沿住心齋橋筋商店街行過去難波道頓堀方向~係大阪，地圖上vertical o既都叫「筋」，除咗心齋橋有個「筋」，我哋會搭有條地鐵o既線都叫「御堂筋線」，都係vertical o架~

見到呢個跑步佬，就知道去到道頓堀了，跑步佬係glico o既標誌，glico有好悠久o既歷史，呢度有專門店可以買到glico手信~

睇過大阪旅遊書o既人都一定見過呢個財神爺o既大頭嘜﹗以前呢度呢個商店街算係一個小主題園區，有好多懷舊鋪頭仔，應該都幾有趣~不過今年年頭時執咗粒lu~

道頓堀出名有好多食肆﹗嚟到關西，食品風味上同關東地區好唔同，未嚟之前已決定有幾項關西特色食物係必定要食o既喇~呢個晚餐一次滿足到三個願望呀~

去到鋪頭時好搞笑咁，個店員居然識講普通話﹗於時我哋就用普通話嚟對答，知道有得食大阪燒又有章魚燒~

上次去日本中部參加祭典時都有係街頭食過章魚燒，不過我就覺得呢個D粉漿好似煙靭有彈性少少，而且粒章魚都幾大粒，好味~

大阪名物炸串﹗一盤有七款唔同o既內容，我同day當然每款都share嚟食啦，食炸串有趣o既係，睇外表你估唔到佢係乜~中間圓圓形o既係咩？帶子？馬蹄？蝦餅？no no no~原來係洋葱嚟o架~

而其中一個長長形o既原來係蒟蒻﹗真係估佢唔到呢~而且好好味，day大讚呀~其餘o既幾款仲有蝦、雞肉、豬肉、魚、茄子~各有各o既風味~

重頭戲–大阪燒﹗

其實佢係事先燒好咗俾我哋o架喇，只係放上嚟鐵板上繼續熱住o既啫，同埋用個鑊鏟仔可以切下切下咁丫嘛~

我哋食o既章魚燒就係係呢度製作o架啦~

待續：美味芭菲、大阪夜景

9-6-2008：名古屋landmark

發佈日期: 2008-06-09 作者: Rita

日本中部之旅 DAY 5 名古屋．香港

係呢幾日日日都咁攰o既情況之下，時間過得特別快，咁快就o黎到最後一日o羅~呢個trip由名古屋(nagoya)做起點，亦係名古屋做終結。其實呢個trip係名古屋玩得唔多，只係第一日去o左行街同埋祭典，係走之前，點都應該去一去名古屋o既landmark—-名古屋城o既~

由酒店去名古屋城都好方便，搭地鐵就去到了~我o地係酒店食過早餐就出發啦，今次試o左紅豆果醬﹗果然幾好味，hee，不過我冇家姐咁「瞇眼」啦~落o左地鐵，開頭以為，一坐咁大o既城，應該一出o黎就見到啦，呀，點解完全冇名古屋城o既影呢？原來舊時o既保衛深嚴，有好闊o既護城河同埋好多樹木圍住﹗所以嘛，冇可能唔俾o個500yen入場費，係外圍完全見唔到呢~

果然好宏偉﹗而且充滿東方風味~之前去印度睇o左好多好多城堡，都好宏偉，但風格上真係完全唔同呢~

事不而遲，我o地馬上入去參觀吧﹗而家o既名古屋城內部裝修得美輪美奐，變成o左一個現代化o既博物館，最頂係觀景台，都有好多層可以參觀o架~

咁o岩遇著有個繪畫比賽o既展覽﹗質素差別好大，但越原始o既小朋友畫，越見佢o地o既簡單心思~我o地參觀完落番o黎時全部都貼好晒lu~

呢隻獸係名古屋o既代表，好多紀念品都見到佢o既嘜頭o架~隻獸原本係坐係城堡屋頂o既兩個尖尖o架~

入面個museum真係好勁o羅~

犀利咯﹗有3D影片﹗要戴住立體眼鏡睇o個隻﹗又有英文字幕，所以睇得明講乜~仲有卡通版o既德川家康走出o黎同我o地介紹呢~佢咪就係起呢個城o既人o羅~

另一勁勁地點﹗其中一層o既museum係仿照以前o既街道o黎整o既「古裝街」，我o地可以體會下以前o既生活~有少少似香港歷史博物館咁(我其實未去過呢…)~更勁之處係，呢條街o既燈光會轉變o架，有日出日落，夜晚時仲有明月添呢~好詩意啊﹗

行完名古屋城其實都趕趕地lu~我o地要搭2:10pm o既飛機番香港，都要早少少番酒店拎行李去機場呢，因為機場(中部國際空港)都幾遠o架~oooooo~~~~~~~~等火車仲要唔太順利呢，o岩o岩走o左班火車之餘，仲要下一班o黎o既係特快班車，我o地唔夠錢加錢搭，要再等下一班…希望去到機場唔會太狼狽啦~

既然火車未o黎到，不如買o野食啦~都十二點咯~lunchtime o既時候應該食多D o野，呵呵~我係火車站o既便利店買o左兩個美味o既飯糰，一個三文魚、一個雞(點解香港o既便利店唔賣飯糰o既？﹗應該有得做o架喎，中學女生應該想買o黎做lunch o架，又平，又細細份~)，仲買o左雜果啫喱同埋士多啤梨牛奶~點解有錢買咁多o野？因為係日本，連便利店都可以簽咭o架，好方便(但我o地o既八達通更方便，呵呵~)﹗上到火車先完成埋個牛奶，食到…好…飽…呀~~~~~~~~~~~~~~~

check-in了、過關了，放鬆晒~仲有少少時間可以逛下鋪頭呢~家姐同高都有收獲~

終於離開日本番香港啦~家姐笑說話呢張相呢，好似我o地第一次搭飛機好興奮咁，哈~都興奮o既，因為番屋企啦嘛~「齊人之福」+「媽飯」，唔係好幸福咩？

8-6-2008：漫步高山古老小鎮

發佈日期: 2008-06-08 作者: Rita

日本中部之旅 DAY 4 高山．名古屋

因為之前o個晚係白川鄉搵唔到酒店，我o地比原定提早o左一晚o黎到高山(takayama)，好事丫~多D時間周圍去行下o羅~我o地一早就可以出門口啦﹗高山o既酒店唔包早餐，而我o地亦打算第一站行朝市(morning market)，應該好多食o野o既機會，所以咁就出去了~

經過尋晚去過o既國分寺，星期日o既早上，感覺大大不同﹗尋晚冷清清的，但今朝就朝氣勃勃﹗有好多人已經擺好攤子賣o野了，食得、唔食得o既都有~我同家姐買o左一份飯糰o黎食呀~冇餡料，但D米係有各式各樣o既穀物係入面，然後鹹鹹地吊下味都幾好~

一路行又一路買下o野食啦~我o地買o左燒糰子，其實係D質感似年糕o既丸子，飛驒地區又另一名產叫做五目餅，唔駛再試啦，應該係一樣o既東東﹗umum…唔係超美味，不過熱辣辣又幾好食o既~之後又食o左「燒蛋磚」(<–個名我改的，因為唔知叫乜~)，四四方方鮮黃色，入面好似BBQ棉花糖o既質感，都幾得意~另外又係D攤子度試下食啦~

呢度就係宮川朝市o既入口啦~都幾熱鬧o架﹗不過逛o既主要都遊客o羅~日本遊客最多﹗

經過一間賣好多好多靚靚呱呱o既鋪頭﹗帶番屋企就冇可能啦，影張相啦~(然後…快閃﹗哈~)

食物方面真係好多~見到呢度有D新鮮蔬果啦~後來我o地去陣屋前朝市呢，賣好多醬醃蔬菜，家姐同埋高都買o左醃青瓜呀~好好味﹗

係高山，周圍都係景點﹗因為成個古色古香o既小鎮風情就係佢o既賣點﹗好寧靜、好舒服o既小鎮﹗

去完陣屋前朝市，梗係順住個勢入去高山陣屋參觀啦~

家姐要yeah了，又有得蓋印﹗唔知blog友們有冇留意呢，去日本旅遊的話，周圍都有得蓋紀念印章，就咁放係景點呀、火車站呀o架咋，大家可以隨便去蓋﹗所以家姐而家去親日本都養成帶本簿仔去蓋印o既習慣﹗一來有紀念性啦，二來D印仔好多時都好精美呢~

高山陣屋係古時(大概十七世紀吧)o既政府部門辦公室，不過呢，而家展示o既唔少都係重新裝修o架lu~

其中一間房有一堆女士們「表演」彈奏古琴，umum…遠處聽到時，覺得，呀，係舊建築入面聽到D古代音樂，真係有氣氛喇，但埋到去睇時，噢，原來佢o地係「練習中表演」，heehee，非常業餘呢~一邊數住拍子一邊彈，而且…唔整齊﹗不過呢，精神可嘉~佢o地彈o既時候好投入o架~

參觀完高山陣屋就去食lunch lu~

去o左一間食拉麵烏冬的，我要o左個希靈魚烏冬，都ok啦，不過我更喜歡o既係，咬落去煙煙韌韌o個種烏冬~

我o地進發去東山遊步道，係一條靠山邊o既路，沿路有好多好多間寺廟呢~

好多間寺廟又唔似bodhigaya咁間間有特色喎，相反，睇落去唔係好睇到差別呢~規模有分別吧？而且周圍好靜呀﹗時時都覺得，世界上好似得我o地三個人咁﹗

沿住東山遊步道行，有個位忽然條路唔係好清晰添，點算？﹗跟住條大大地o既路行住先啦，噢，越來越唔對路﹗行o左去墳墓﹗oh no no~好在懸崖勒馬，行番轉頭，咁都搵得番條正路出番去~

之後去高山另一大景點，高山祭屋台會館﹗

高山祭係日本o既祭典之中其中一個最出名o架~每年都有好多好多國內、海外o既人去參加一年兩次o既祭典﹗祭典時，呢D大型、有幾層樓o既屋台就會搬到街上去~高山總共有23座屋台o架，但而家只有五座係呢度展示出o黎，會館會定期轉display o既~呢D屋台造價好貴o架，金色o既東東全部都係真金﹗有咩損壞時，政府會承擔維修~國家o既重要資產嘛~

逛o左咁多地方，大家都累了，我o地去o左一間靚靚cafe tea一tea﹗cafe叫做rakuda cafe，環境唔係華麗或者新潮o個種，而係好warm、好cosy o既感覺~

因為又食o野又飲o野太貴了，我只係叫o左一杯iced chocolate，估唔到咁可愛呢~cream上面o既居然放o左pretzel，鹹鹹脆脆又幾襯過，上面仲有兩粒杞子，又配色，又吊味~

cafe入面放o左一本簿，俾顧客隨意寫下o野、塗下鴉﹗我又係度努力「做功課」﹗

哇，寫滿o左一版呢~居然仲畫o左我最唔擅長o既畫添~哈哈~

餐牌都好cute o架，用手寫，圖片就用手畫~kawaii~~~

餘下落o黎o既時間，我o地只係係附近行下街咋~逛到咁上下，去買便當食，之後就要搭長途巴士番去名古屋lu~

原本想食車站o既便當，但貴好多呢，便利店入面o既款式都幾靚丫，我揀o左呢款以三文魚做主菜o既便當，佢o地仲幫我叮熱o左添~但係呢，個三文魚麻麻地，反而其他餸菜好令人有驚喜，厚燒蛋好蜜味啦，又有一粒芋丸，軟綿綿o既豆腐都好好食~另外我加多一塊50yen o既飛驒牛薯餅呀(雖然有飛驒牛，但百分比大約只佔1%，哈~都唔知算唔算有~)~熱辣辣，好好味~呢餐平平地但都好滿意呀~

之後我o地就上車lu~巴士好舒服，兩個半鐘o既時間好快過~又唔眼瞓喎，我o地三個人一齊聽五月天度過搭車時間~

7-6-2008：拜訪合掌村@白川鄉

發佈日期: 2008-06-07 作者: Rita

日本中部之旅 DAY 3 金澤．白川鄉．高山

一朝早就要搭長途巴士離開金澤，出發去第三個目的地白川鄉lu~

當然要食飽飽先行啦﹗

係火車站呢間西式cafe食o左大大份早餐﹗你話係咪丫，日本o既食物唔係單單用舌頭o黎品嚐，仲要用眼o黎睇o架~內容雖然好普通，但幾靚~

咖啡都好認真沖o架，係用呢D好似實驗室o既flask o黎煮o既蒸餾咖啡﹗

搭車都搭o左唔係好耐之嘛~仲係好早就去到白川鄉lu~落車第一件事，要book酒店﹗好慘呀~我o地一早係香港預約好o既民宿，臨出發前先通知我o地冇房間喎，搞到少少論盡添~精明o既家姐決定我o地去到白川鄉先搵地方住，搵唔到就直接去下一站高山住~白川鄉只係一個小地方，果然到處o既民宿都好full呢，好啦，順便係度book埋巴士o既座位啦~

好快就見到呢條河了~難道佢就係「白川」？