29-6-2018:一家九口首爾加平開心旅行day 0

自從詩出咗世之後,個blog一直停頓咗半年,每日實在太忙太忙了,不過難得一家九口大旅行又點可以唔打blog呢?點都要咇啲時間記錄,越遲打就越失去啲精華細節啦~

本來計劃2017年中去呢個家族大旅行,但因為有咗詩係肚入面,就決定等埋佢出世先一齊去,曉間學校比較早放暑假,返到六月底就放,我哋決定等暑假未到最旺時出發,目的地?韓國﹗一定係韓國﹗我讀咗韓文差唔多四年,居然呢幾年一次都冇去過韓國,今次帶住一大棚人去正好大派用場~諗住我識得講韓文,可以去多少少首爾以外既地點,之前有考慮過去東海玩水,特別係韓文課本同埋睇韓劇請回答吧1994都有講過正東津呢個地方,不過見舟居勞頓會比較辛苦,帶住三個小朋友搭遠車唔太適合,又有考慮過去下啲glamping,但太遲book都好full,同家姐商量之後,決定去加平住下pension~講起加平大家可能唔太熟悉,但鍾意去韓國旅行既香港人一定識南怡島,南怡島就係位於加平喇,香港人比較多由首爾day trip咁去南怡島玩,可能同一日去埋小法國同埋晨靜樹木園添,我哋唔想太趕行程,就打算係加平住兩晚~午機去,早機返,頭尾九日,中間七個full day去玩,兩晚住加平,其餘住首爾,呢個trip嘅雛型就出現了~大家各自input一啲idea同埋想去嘅地方,我再整理安排一下,行程都安排好咯!我啲blog可能會出得慢啲,但我期望係下一個trip之前一定要完成,請大家多多支持,等我哦~

六個大人,三個小朋友既trip(分別3歲2個月、1歲9個月、5個月),無論行程定係裝備都要好好思考一下~book首爾酒店方面,我哋一家四口要求咗家庭房,萬一詩瞓唔到張bb床都有走棧空間~加平度假屋我就好放心,因為可以打地鋪~

除咗瞓覺之外,另外最擔心嘅,一樣係小朋友搭飛機乖唔乖,另外一樣就係曉唔肯行路點算~最近兩次帶曉去旅行,21m時去新加坡,28m時去台灣,飛機上面既卡通片已經可以完全俘虜咗佢,本來我都唔太擔心,詩既話有得啜奶奶應該就ok~後來家姐提醒,我哋今次搭既Jin Air恐怕冇電視睇,我即刻如臨大敵,緊急準備曉曉娛樂袋帶上飛機,買定啲貼紙書呀、填色冊呀、棋類玩具呀咁,希望順利咁樣消磨三個半鐘~

行路方面,事先當然落重藥,催眠佢「要自己行、要自己行、要自己行」啦,後來我哋問教友借咗部士的車,可以俾曉瞓覺,個心就定咗好多~

行李方面,四個人去九日,兩隻大喼都唔算太誇張吧,上網睇到我哋首爾住既酒店有自助洗衣房,咁又放心得多啦,即使day同曉有足夠既替換衫,我既餵奶衫同詩既口水肩都肯定唔夠用九日,如果中途要用手洗就太辛苦了,好在結果個自助洗衣都好好用,我哋去旅行未試過帶咁多乾淨衫返香港,返到嚟洗衫壓力都細好多~詩既行李最bulky既係片片,幫佢帶咗五十幾條,佢未開行turbo加固,但我都準備咗少少水果baby food,等我哋食嘢時佢都有得食下(不過最後八包baby food只係開咗一包)~我又為大家準備咗男女老少既旅行平安藥,最後?好有用呀,曉好捧場有食我啲藥…^^”

家姐負責book首爾既酒店同機票,我就負責book加平既pension同埋編行程,未出發就可以開始用我啲韓文牛刀小試啦,同pension既主人e-mail來往問下pick up、購物、交通、燒烤等等既嘢,又經網絡book咗韓式自助餐枱,好有滿足感呢,希望去到韓國都可以盡情咁發揮我既韓文實力﹗

因為要執四個人既行李,我(好誇張地)出發前嗰日請咗假,哈哈,其實執行李係其次,最重要係曉散學禮嗰日親自去接佢放學啫,佢期待咗好耐啦~

萬事俱備,6月30日就可以出發啦~

29-5-2013:釜山麗水day 5(part 2).買手信去.期待已久的Spaland

上回提到,我哋搵搵下巴士就發現咗有間Home Plus分店係左近,既然都冇特定plan好一定要點行,我哋不如就係度辦好手信,食埋個lunch,先再過去Spaland啦~

入到去,既然未餓,先搵locker放好袋袋,輕輕鬆鬆購物去~~

IMG_0883我唔係諗住買超多先堆架咁大o既車o架,咁佢真係得啲咁大o既車仔嘛~ 繼續閱讀

29-5-2013:釜山麗水day 5(part 1).海雲臺.冬柏島

雖然我哋住係海雲臺旁o既Sunset Hotel,但都係去到第五日我哋先第一次踏足呢個釜山最出名o既景點—-海雲臺海水浴場~佢以又長又白又細o既沙灘而聞名,係海雲臺的戀人們入面影到夏日o既景色,有好多美男美女o既海灘,真係好吸引~但呢幾日天氣真係陰陰暗暗,唔落雨都偷笑~SONY DSC

一落到海灘,見到呢個﹗我鍾意~無煙o既海灘至啱家嘛~ 繼續閱讀

28-5-2013:釜山麗水day 4(part 3).肥美烤貝.美麗的鑽石項鍊廣安大橋

行完現代美術館我哋經過Bexco過去Centum City~SONY DSC

Bexco就好似香港o既會展一樣,我哋都諗住睇下有冇啲啱睇o既展覽去八卦下,不過有啲有趣o既就要再隔個禮拜至有,有啲一般般有趣o既又要行好遠o既行人天橋先過到去另一楝building,算啦,叫做到此一遊算了~ 繼續閱讀

28-5-2013:釜山麗水day 4(part 2).恬靜與哀愁的戰爭紀念、現代美術館

由釜山博物館步行就去到我哋下一個目的地—-聯合國紀念公墓~SONY DSC

呢個地方點講呢,有一種複雜o既感覺,環境非常優美,樹呀、草地呀都好翠綠,玫瑰花都開得好燦爛,照顧得一絲不苟,但因為主題係記念戰爭中死亡o既士兵,所以充滿住哀愁,好似唔應該「享受個綠油油o既環境」咁~ 繼續閱讀