29-6-2018:一家九口首爾加平開心旅行day 0

自從詩出咗世之後,個blog一直停頓咗半年,每日實在太忙太忙了,不過難得一家九口大旅行又點可以唔打blog呢?點都要咇啲時間記錄,越遲打就越失去啲精華細節啦~

本來計劃2017年中去呢個家族大旅行,但因為有咗詩係肚入面,就決定等埋佢出世先一齊去,曉間學校比較早放暑假,返到六月底就放,我哋決定等暑假未到最旺時出發,目的地?韓國﹗一定係韓國﹗我讀咗韓文差唔多四年,居然呢幾年一次都冇去過韓國,今次帶住一大棚人去正好大派用場~諗住我識得講韓文,可以去多少少首爾以外既地點,之前有考慮過去東海玩水,特別係韓文課本同埋睇韓劇請回答吧1994都有講過正東津呢個地方,不過見舟居勞頓會比較辛苦,帶住三個小朋友搭遠車唔太適合,又有考慮過去下啲glamping,但太遲book都好full,同家姐商量之後,決定去加平住下pension~講起加平大家可能唔太熟悉,但鍾意去韓國旅行既香港人一定識南怡島,南怡島就係位於加平喇,香港人比較多由首爾day trip咁去南怡島玩,可能同一日去埋小法國同埋晨靜樹木園添,我哋唔想太趕行程,就打算係加平住兩晚~午機去,早機返,頭尾九日,中間七個full day去玩,兩晚住加平,其餘住首爾,呢個trip嘅雛型就出現了~大家各自input一啲idea同埋想去嘅地方,我再整理安排一下,行程都安排好咯!我啲blog可能會出得慢啲,但我期望係下一個trip之前一定要完成,請大家多多支持,等我哦~

六個大人,三個小朋友既trip(分別3歲2個月、1歲9個月、5個月),無論行程定係裝備都要好好思考一下~book首爾酒店方面,我哋一家四口要求咗家庭房,萬一詩瞓唔到張bb床都有走棧空間~加平度假屋我就好放心,因為可以打地鋪~

除咗瞓覺之外,另外最擔心嘅,一樣係小朋友搭飛機乖唔乖,另外一樣就係曉唔肯行路點算~最近兩次帶曉去旅行,21m時去新加坡,28m時去台灣,飛機上面既卡通片已經可以完全俘虜咗佢,本來我都唔太擔心,詩既話有得啜奶奶應該就ok~後來家姐提醒,我哋今次搭既Jin Air恐怕冇電視睇,我即刻如臨大敵,緊急準備曉曉娛樂袋帶上飛機,買定啲貼紙書呀、填色冊呀、棋類玩具呀咁,希望順利咁樣消磨三個半鐘~

行路方面,事先當然落重藥,催眠佢「要自己行、要自己行、要自己行」啦,後來我哋問教友借咗部士的車,可以俾曉瞓覺,個心就定咗好多~

行李方面,四個人去九日,兩隻大喼都唔算太誇張吧,上網睇到我哋首爾住既酒店有自助洗衣房,咁又放心得多啦,即使day同曉有足夠既替換衫,我既餵奶衫同詩既口水肩都肯定唔夠用九日,如果中途要用手洗就太辛苦了,好在結果個自助洗衣都好好用,我哋去旅行未試過帶咁多乾淨衫返香港,返到嚟洗衫壓力都細好多~詩既行李最bulky既係片片,幫佢帶咗五十幾條,佢未開行turbo加固,但我都準備咗少少水果baby food,等我哋食嘢時佢都有得食下(不過最後八包baby food只係開咗一包)~我又為大家準備咗男女老少既旅行平安藥,最後?好有用呀,曉好捧場有食我啲藥…^^”

家姐負責book首爾既酒店同機票,我就負責book加平既pension同埋編行程,未出發就可以開始用我啲韓文牛刀小試啦,同pension既主人e-mail來往問下pick up、購物、交通、燒烤等等既嘢,又經網絡book咗韓式自助餐枱,好有滿足感呢,希望去到韓國都可以盡情咁發揮我既韓文實力﹗

因為要執四個人既行李,我(好誇張地)出發前嗰日請咗假,哈哈,其實執行李係其次,最重要係曉散學禮嗰日親自去接佢放學啫,佢期待咗好耐啦~

萬事俱備,6月30日就可以出發啦~

30-4-2017:橫琴長隆海洋王國day 2.緊湊的下半集

雖然話係兩日一夜,其實可以玩嘅都係一個黃昏至夜晚同埋一個早上加午餐,因為要晚飯前返到香港嘅話,下晝就要搭接駁車出返去珠海九洲港了~

曉曉專用床欄,幾好用~

梳洗好,當然係食個靚早餐先啦~ 繼續閱讀

29-4-2017:橫琴長隆海洋王國day 1(part 1).到達企鵝酒店

呢個trip嘅起源嘛,原本係爹爹有兩張free嘅橫琴長隆海洋王國入場門券俾我哋,於是就研究下幾時去,點玩法,但發覺原來要分開買船飛、接駁車、酒店而唔要入場券原來有啲麻煩同埋仲貴(?﹗),而且只係兩日一夜嘅trip嚟講,入場一日實在太少了,結果挑起條筋要去玩,但我哋反而冇用到張免費飛,索性係中旅社買咗兩日一夜嘅package,可以兩日都入園,仲有一餐酒店自助餐~

早兩個星期一家八口去澳門兩日,上次好好可以係屯門上船,今次要出番去上環上船,本身諗住出到上環先食早餐,時間預得鬆動少少,點知曉呢個小人仔真係完全唔餓得,好在有早一日食剩嘅麵包俾佢頂住檔先,等車時咬幾啖,落車又咬幾啖,到我哋買咗麥當勞早餐時佢又分少少~

記得再對上一次我哋一家三口去澳門嗰次又係上環搭船,碼頭嘅廁所入面有換片枱,今次去珠海嗰邊 繼續閱讀

13-1-2017:new新加坡day 1(part 1).曉之第四次出征

day打算轉工期間休息長少少時間,話晒畢業第一份工做到而家,都未真真正正好好休息過,放假好多時都俾我拉咗去旅行,既然諗住休息一兩個月,我哋去一個星期旅行都ok吧?heehee~逸bb嘅百日宴之後個星期我哋就出發了,好學生嘅我,星期四要返學,當然後星期五出發星期三返香港啦﹗

目的地方面,我再一次要係去唔去韓國之間掙扎,未學韓文之前成日去韓國,計埋今個學期我學咗兩年半了,反而呢段期間未去過,但今次一月係韓國全年入面最凍嘅時間,行李又會好多,揹住曉又會好辛苦,曉(同埋我)又唔係好捱得凍,結果都係理性地打消咗呢個念頭~最合理嘅目的地當然係新加坡了,可以避寒之餘,美姨移民去新加坡咁多年我一直都未去探過佢,加上而家新加坡多咗咁多新嘢玩,好多家庭帶小朋友出門第一個選擇唔係去沖繩就係去新加坡了,好吧,gogogo﹗

今個trip嘅blog命名為「new新加坡」,因為講我自己去新加坡嘛,嚴格嚟講真正有入境去旅行嘅算係第三次,但頭一、兩次都係小學時嘅事lu,一次就係跟旅行團去「星、馬」(當年新加坡仲係普遍地稱為星加坡呢),另一次就係去澳洲時飛新加坡,回程時停留多兩日,呢兩個trip印象唔係完全冇,但就只剩低零零碎碎嘅記憶片段,對於我嚟講今次係全新新加坡啦﹗

日日都好忙,結果出發前只係book咗機票同酒店,去嘅地方都只係略略咁睇過,大景點就有同美姨商量過少少,見步行步吧﹗第一日去到只有晚飯,第二、三日我哋都同美姨一齊,唔駛plan咁多住嘅~

collaged1p101

曉曉,唔夠位啦,帶唔到Daisy同Dora去啦~

出發嘅早上執埋行李, 繼續閱讀

28-8-2016:北海道三人行day 1(part 1).「順利」抵埗札幌

終於嚟到出發嘅日子,期待已久嘅旅行呢~今次香港航空嘅飛機,唔單止平,仲要早機去晚機返,九點幾就起飛,即是我哋未夠七點就要出門口了,而家有call的士app真係方便好多,一起身時預約定的士幾點鐘嚟到接我哋,咁就放心晒啦~話說我哋出發前幾日有條新巴士線開通,叫A33,屯門西鐵站出發直去機場,唔駛再係東涌同機場附近兜,而一個鐘三班車之中會其中一班經我哋樓下青山公路,不過咁早又冇車,我哋又帶b又帶行李,都係的士算數了~睇下將來有冇機會享用啦~

IMG_0001

離境大堂留影

check in、過關都好順利,同之前兩次旅行一樣,有b同行 繼續閱讀