28-8-2016:北海道三人行day 1(part 1).「順利」抵埗札幌

終於嚟到出發嘅日子,期待已久嘅旅行呢~今次香港航空嘅飛機,唔單止平,仲要早機去晚機返,九點幾就起飛,即是我哋未夠七點就要出門口了,而家有call的士app真係方便好多,一起身時預約定的士幾點鐘嚟到接我哋,咁就放心晒啦~話說我哋出發前幾日有條新巴士線開通,叫A33,屯門西鐵站出發直去機場,唔駛再係東涌同機場附近兜,而一個鐘三班車之中會其中一班經我哋樓下青山公路,不過咁早又冇車,我哋又帶b又帶行李,都係的士算數了~睇下將來有冇機會享用啦~

IMG_0001

離境大堂留影

check in、過關都好順利,同之前兩次旅行一樣,有b同行對於液體嘅管制都會寛鬆啲,曉曉水樽同埋125ml嘅細細盒麥精都可以順利過到security~入咗禁區我哋直奔去食早餐先﹗

早餐都係麥當勞最抵食啦,曉曉最近已經升級至自己食一個開心樂園餐,通常我哋叫個雞蛋雜菜扭扭粉俾佢,佢除咗隻雞蛋食唔晒之外其他可以吃清光,橙汁就要留番佢食到七七八八先可以開始飲,唔係呢隻橙汁怪會一次過飲晒,個乳酪我哋就留起帶上飛機﹗

螢幕快照 2016-09-13 下午11.34.35

食呢餐早餐我印象最深刻嘅係,我哋兩母女先爸爸買食物過來時先坐好,曉曉居然指住餐枱枱角嗰張綠色貼紙話:「三角形﹗」係佢自己發現呢,叻叻~

螢幕快照 2016-09-13 下午11.34.41

陌生嘅閘口號碼原來係terminal 2,嗰邊真係少人好多又新淨好多,曉曉可以開心跑步步,係咪放咗一輪電所以飛機上特別乖?

螢幕快照 2016-09-13 下午11.35.10

垃圾桶污糟小朋友唔好搞?對曉來說,呢啲係「紅色﹗」「黃色﹗」「綠色﹗」「藍色﹗」絕對有教育意義呀~

螢幕快照 2016-09-13 下午11.34.46

上次去旅行11m仲係一舊飯飯,今次16m識多好多嘢了,可以教佢呢架係我哋搭嘅飛機﹗

螢幕快照 2016-09-13 下午11.35.05

Terminal 2嘅免費電腦都高貴啲,全部都係靚靚Mac機呢~

螢幕快照 2016-09-13 下午11.34.59

以前冇小朋友唔會留意呢啲,但而家就好喜歡呢啲family friendly嘅廁所﹗小馬桶我哋曉曉未識得用住,但有得暫時坐住等媽咪嘅bb椅就非常好用呢~屯門市廣場邊個廁所邊一格有我都有留意呢~

螢幕快照 2016-09-13 下午11.34.53

兩父女開心排排坐,準備出發﹗

IMG_0004

指定動作﹗

今程飛機唔full,可能乘客只係occupy咗三分之一,甚至三分之一都冇,所以好鬆動,我哋後來都可以坐下呢度坐下嗰度冇咁逼~起飛時當然乖乖坐自己位,曉曉又扣好bb安全帶啦~

IMG_0005

令人震驚嘅係,我抱住曉曉,起飛時隨便哼住歌,佢居然就咁瞓著咗?﹗平時日間要抱抱行路唱歌睡,晚上要埋身啜啜睡,而家居然咁簡單?﹗太令人難以置信了﹗我要馬上影相留念,然後馬上enjoy自己嘅時間,好好彩,去程時曉曉瞓得好,我睇咗集Running Man,又順利食咗個飛機餐,咁就過咗個幾兩個鐘﹗不過個飛機餐嚟得太早,我哋食完麥當勞早餐冇耐,但飛機起飛後飛定咗冇耐就派餐,我哋又唔太食得落,加上又係食早餐,曉曉又瞓著咗miss咗派餐時間,呢個實在唔太理想~炒麵、水果都好難留俾佢,所以我哋留低咗兩個麵包,加埋佢個開心樂園餐嘅乳酪,應該都頂得到落飛機啩?抱住曉唔容易食嘢,靠day幫下手都順利食完而曉冇成頭都係麵~:p

螢幕快照 2016-09-13 下午11.35.20

後來佢醒咗之後剩低嘅兩個幾鐘都算ok呀,同佢玩下,睇下書~

螢幕快照 2016-09-13 下午11.35.15

睇下飛機提供嘅卡通片(估唔到佢只對而家流行嘅妖怪手錶嘅片尾跳舞曲有興趣),換片又爆片又換片又換褲,搞一輪又花費多少少時間,跟住又同佢食下嘢,咁就剩低一個鐘﹗最後大半個鐘係最辛苦嘅時候囉,佢開始有啲唔耐煩,開始降落又要坐定定,好在有絕招--提子乾﹗憑住慢慢逐粒逐粒執嚟食,我又同佢唱下歌,終於抵埗了﹗媽媽好感動呀~

過關時最搞笑嘅係,我抱住曉一齊過,我要套手指模,又要影相,一影相時曉係螢光幕見到自己個樣,即刻搶鏡頭,逼走我個頭,再對住個鏡頭笑囉,唔知笑死定激死,啲關員姐姐個個都笑佢呢~最沮喪嘅係,正係過關時,我突然發覺我唔記得print我編好咗嘅行程拎過嚟日本,oh no no,行程好在大多已經深深印係腦海,但我揀好嘅火車班次要重新再搵過了~好失敗呀~

曉曉搭飛機咁乖乖,仲唔係順利抵埗?Anyway,我哋抵達北海道了﹗Hello札幌﹗

前往其他日本旅遊blog

Comments

comments

在《28-8-2016:北海道三人行day 1(part 1).「順利」抵埗札幌》中有 2 則留言

發表迴響

你的電子郵件位址並不會被公開。 必要欄位標記為 *