標籤彙整: 日本

24-11-2009：大阪白浜day 1(part 1)．初到埗大阪走走看+關西美食

發佈日期: 作者:
4

朋友都話：「哇，你又去旅行？」問完我去邊之後就話：「又去日本？」先聲明，我雖然好鍾意去日本(數起嚟今次係第五次去)，但我唔係齋去shopping嗰種女仔嚟o架，我嚮往o既係日本o既美食、美景、賓至如歸o既感覺﹗

有菊姨介紹o既國泰package，早機去晚機返，非常好~可惜我略嫌個早機未夠早，十點二十分起飛，所以去到時都已經接近黃昏呢，第一日有得玩o既時間就比較少囉~

香港機場候機室，暖暖的冬日陽光~好舒服呀~

過關後同day悠閒咁食咗個大家樂早餐，都仲有少少時間悠閒地逛下書店先至上機~

呢張signature相係一定要影的﹗代表住嗰一次旅行o既開始~

機程只有三個幾鐘啫，好快脆就過~又有飲品花生，又有飛機餐，同埋今次坐得長少少了，有得睇戲~我哋揀咗睇「竊聽風雲」，唔知點解淨係可以聽普通話？﹗望住劉青雲、古天樂個樣，又唔係佢哋把聲，怪怪地咁…套戲都ok o既~

yeah~~~~~~~~~抵達關西空港lu~好開心呀﹗唔唔，首先我哋要搞掂搭出市區o既車同埋買好之後o既JR車票﹗

行出去戶外時，哇~「吓？真樹嚟o架？﹗」我真係唔敢相信，去到十一月底都仲有紅葉呢，而且一落機就見到了，呢D紅葉係真樹嚟o架﹗

因為準備得好，係香港時所有資料都搵好，又print晒出嚟，所以買JR車票都冇問題，我哋兩個都唔識講日本嘛，但都好順利咁買好兩程o既JR車飛~

大阪除咗市營o既地下鐵同埋JR之外，仲有好多私鐵，所以個鐵路系統都幾繁複~我哋搭出市區就發現搭呢個南海空港線比起搭JR方便喇，因為可以係難波站落車轉地鐵去心齋橋站~

由心齋橋站行過去我哋o既酒店comfort hotel shinsaibashi都唔困難，冇乜點迷路就行到過去~good呀﹗

as expected，間酒店房勁細間呀﹗不過比想像中好o既係，入廁所唔駛擘大隻腳都關到門~而且麻雀雖小都五臟俱全o既~

係酒店稍稍休息一陣就出動囉~

我哋沿住心齋橋筋商店街行過去難波道頓堀方向~係大阪，地圖上vertical o既都叫「筋」，除咗心齋橋有個「筋」，我哋會搭有條地鐵o既線都叫「御堂筋線」，都係vertical o架~

見到呢個跑步佬，就知道去到道頓堀了，跑步佬係glico o既標誌，glico有好悠久o既歷史，呢度有專門店可以買到glico手信~

睇過大阪旅遊書o既人都一定見過呢個財神爺o既大頭嘜﹗以前呢度呢個商店街算係一個小主題園區，有好多懷舊鋪頭仔，應該都幾有趣~不過今年年頭時執咗粒lu~

道頓堀出名有好多食肆﹗嚟到關西，食品風味上同關東地區好唔同，未嚟之前已決定有幾項關西特色食物係必定要食o既喇~呢個晚餐一次滿足到三個願望呀~

去到鋪頭時好搞笑咁，個店員居然識講普通話﹗於時我哋就用普通話嚟對答，知道有得食大阪燒又有章魚燒~

上次去日本中部參加祭典時都有係街頭食過章魚燒，不過我就覺得呢個D粉漿好似煙靭有彈性少少，而且粒章魚都幾大粒，好味~

大阪名物炸串﹗一盤有七款唔同o既內容，我同day當然每款都share嚟食啦，食炸串有趣o既係，睇外表你估唔到佢係乜~中間圓圓形o既係咩？帶子？馬蹄？蝦餅？no no no~原來係洋葱嚟o架~

而其中一個長長形o既原來係蒟蒻﹗真係估佢唔到呢~而且好好味，day大讚呀~其餘o既幾款仲有蝦、雞肉、豬肉、魚、茄子~各有各o既風味~

重頭戲–大阪燒﹗

其實佢係事先燒好咗俾我哋o架喇，只係放上嚟鐵板上繼續熱住o既啫，同埋用個鑊鏟仔可以切下切下咁丫嘛~

我哋食o既章魚燒就係係呢度製作o架啦~

待續：美味芭菲、大阪夜景

19-8-2007：沖繩2007第四天@玉泉洞、琉球王國

發佈日期: 作者:
14

DAY 4 @ OKINAWA

最後一日行程lu~但因為超晚機返，所以仲有成日可以去玩﹗今日去玉泉洞、琉球王國、蛇博物館，其實都係同一個area o黎o架~為o左爭取多D時間玩，我o地都係好早出門口了﹗

日本街頭有好多自動販賣機，終於見到有得賣「海洋深層水」了﹗都係沖繩o既特產o黎o架，同埋呢個東東係「將太的壽司」有提過，我同家姐都好想試下，見有得賣梗係試下啦，不過嘛…味道其實同普通蒸餾水冇乜分別﹗

先搭單軌火車去那霸公車總站，再轉巴士去，哇，搭超耐﹗太多站要停了，搭o左成個鐘呀~又再一次證明沖繩o既公共交通非常inefficient﹗

去到lu去到lu~趁爸媽去買門券時我o地影下樣先~

玉泉洞

其實都係同一個area，買一張門券通行，不過佢有條suggest o既路線，即管跟住行啦，第一站去玉泉洞~

其實係天然鐘乳石o既山洞，以為入去睇一睇就冇，哇，原來全程要行25分鐘﹗好抵睇﹗入面濕濕暗暗的，俾著我細個時一定好驚﹗呢D大自然o既景物真係叫人歎為觀止，入面好宏偉﹗原來有別於其他o既鐘乳石洞，玉泉洞D鐘乳石生長得好快o架，你係入面可以感受到個洞o既活力﹗

係入面真係好難影到D靚靚o既相呢，要揀一兩張放係度都好困難…另外，玉泉洞入面有超清徹o既流水，入面仲有魚游o黎游去添﹗

琉球王國

其實有好多景點o架，首先行o左熱帶植物園~

唔講你唔知，呢D係vanilla樹o黎o架~佢放o左少少枝葉出o黎俾我o地聞，真係成陣雪糕味﹗好有趣~

你仔細D望就知道我影o既樹係咩了，冇錯﹗係火龍果﹗從來都冇想像過火龍果係咁o既樣呢~原來生係好似仙人掌咁o既樹上面﹗熟o左就變紅色啦~

之後行玻璃工房~

工房o既相就唔show出o黎啦，day 3都有見過了，但要俾大家睇一睇呢個百合工藝品，哇，太厲害了﹗竟然可以做得咁精細，而且顏色o既運用更加出神入化﹗呢個係非賣品o黎o架~

行緊去其他景點時忽然有隻螳螂爬上去家姐把遮上面，嚇到我o地呱呱叫﹗

呢張咪新o既profile pic o羅，我係度試玩沖繩地道o既「三線琴」，雖然原理同結他差不多，但因為唔熟悉三線琴樂曲o既調子，所以都模仿唔到呢~

入去睇呢個展館，講o左沖繩D獅子o既來歷，原來所有東方o既獅子呀、麒麟呀都係由中東地區傳過o黎o架~

除o左之前睇o左o既玻璃工房之外，仲有好多其他工房，好似呢度就講沖繩出名o既黑糖了，講下甘蔗有咩用途~

此外，仲有關於織布、染布、陶藝、音樂…唔同題材o既工房o羅~

蛇博物館

參觀o左一部份o既展館之後就要先去睇表演﹗

第一個環節係可以俾現場觀眾上台同大蛇影相﹗D小朋友個個都又怕又要影呢，淨係睇佢o地都夠開心了﹗

旅遊書話有貓鼬同蛇o既比賽，我o地幾驚係血腥o既打鬥比賽呀，好在，原來係鬥快游水﹗咁主持人問我o地覺得佢o地邊個會贏丫嘛，我估蛇o架，話晒呢度係佢做主角丫嘛，點知，蛇係大懶蛇﹗放佢出去跑道時佢郁都唔郁﹗太可惡了﹗

繼續睇蛇~難得可以捕捉蛇o既大特寫，你覺得佢靚定係核突呢？呵呵~

琉球歌舞表演

今日o既其中一個重頭戲呢~o黎到琉球王國點可以唔睇佢o地o既民族特色表演呀~

表演未正式開始前，主持人邀請D小朋友上台學用D琉球樂器，有呢D好細個o既小朋友，佢o地開心就開心喇，不過，傻呼呼﹗唔知道要點玩D樂器﹗anyway觀眾都睇得好開心o既~

超有震憾力o既演出呀﹗表演者都好落力，好有氣勢，好有魄力﹗實在太精彩了﹗半個鐘o既演出絕無欺場﹗其實跳呢D琉球鼓舞真係要消耗好多體力，佢o地日日跳幾場，係擺靜止post時都不由得喘氣，但音樂一再起時又充滿活力了﹗好good呀，好good呀~去到沖繩必睇項目﹗(睇呢個表演時係度諗，呀，可以係香港搞D「琉球舞瘦身」o既生意喎，呵呵，必瘦呀﹗不如我下年考完final之後o既ssm就o黎學琉球舞啦~)

仲有舞獅呀，一樣咁精彩﹗頑皮o既獅子走上觀眾席開口咬D觀眾，其中一個中招o既係我爸﹗

睇完都要趕番出市區lu~因為夜晚要搭飛機番香港咯~

偷偷影巴士司機﹗佢好好人o架~我o地去程回程都係坐佢o既車﹗

番酒店拎番D行李就要出發去機場lu，都冇時間食埋晚飯先去添，唯有去到機場先搵o野食吧~原來我o地酒店附近有一間俾普通人買餸o既supermarket，D o野真係超級抵呀，我o地之前好多o野都買貴o左了…

係機場買到便當o黎食﹗太高興啦~幾多款餸~點解香港唔興食靚靚便當o架~

順利抵達香港﹗yeah~

18-8-2007：沖繩2007第三天@那霸港、市場、美國村

發佈日期: 作者:
8

DAY 3 @ OKINAWA

只係揀o左D相，尋日未有時間打文字添~但已經有小姑娘同埋墨西re o左我啦，我唔快D補番打好唔得了﹗如果你o地睇埋D文字仲想re re的話，無任歡迎﹗

第三日o既行程終於比較悠閒，之前o個兩日都比較趕~主要下晝去美國村，美國村位於沖繩本島o既中部，本身都有諗過要唔要去其他中部o既景點o架，但搭車都係唔係幾方便，所以決定上晝去那霸附近行行﹗

呢個咪海洋博公園個水族館(day 2 o既行程﹗)o既特價入場券poster o羅，周圍D便利店都有，你認得入面o個條鯨鯊嘛？你可以係水族館個超大玻璃幕牆見到佢o地o架，呢個卡通版，唔知你o地可唔可以係真實版度搵番佢o地呢？我估佢o地都算係鎮館之寶了﹗

第一站去酒店附近o既碼頭~

行過去好近o架咋，10分鐘左右就到lu~

碼頭有得搭船出去那霸對開o既小島，我o地本身都有諗過去o架，不過要花一整日呢，而且似乎o個度主要係去潛水，所以放棄o左lu~

海港~

下一站去那霸市牧志第一市場，行過去要經過國際通，見到有一幢高高o既屋，原來有好多「體驗工房」呢，即是D人可以入去試學沖繩o既各種傳統工藝。

我o地係呢個玻璃工房前面睇o左好耐呀，有一對男女係度燒玻璃杯呢~好靚啊﹗所謂佢o地燒，其實主要都係D師傅燒…佢o地負責少少步驟咁啦~我o地就冇可能去學lu，又唔識日文喎~

市場入口~

其實都似一般o既街市，有各式各樣o既食物賣咁o羅，格局有少少似士美菲，地下買餸，二樓有熟食市場。可以係樓下買o左海鮮之後叫樓上煮o架~當時未到午飯時間，我o地只係係海鮮檔買o左刺身o黎食~

刺身真係好抵好抵好抵食o架~~~~~~~~我o地呢份刺身只需要500 yen﹗即是三十幾蚊港紙，你諗下喎，係香港，三十幾蚊只買到四片刺身﹗呢度？嘩~太痛快了﹗另外我o地仲買o左海葡萄~不過呢，D刺身只連wasabi，但冇豉油，我o地又冇筷子，點算好？﹗heehee，不過係街市嘛，還怕買唔到？我o地買埋呢兩樣，價錢依然平過香港﹗兩款魚肉唔算有驚喜，係新鮮o既，不過未至於瞇瞇眼，但甜蝦就真係好good﹗

lunch係拉麵博物館食，所謂博物館其實係一個美食廣場集合o左好多間好多間麵店，我o地可以揀自己鍾意o既o黎食o者~

呢碗就係我碗麵了﹗其實麵上面o既餸都係大同小異，多數都係呢D燉肉(之前提過o既「三枚肉」呀~)，我估分別在於麵質同埋湯底o羅~我呢個都幾好味，有好多餸呀，三件排骨三件豬軟骨o羅~不過我唔係太鍾意食豬軟骨~

美國村

食飽飽就坐公車去美國村lu，都要坐車坐一段時間~美國村對面係美軍基地，呢一區有大量o既食肆、娛樂、shopping mall就係for D美軍同埋佢o地o既家屬o羅，真係幾有美國風味，貨品呀、陳設呀~而且D貨品價錢都幾相宜o架~我o地係jusco行o左好耐…似乎係咁耐以o黎行過最平o既supermarket，又買o左D特產，好在有locker放﹗娛樂方面有戲院、保齡球、遊戲機中心，我o地都係睇人o地玩多~

我o地逛到大概五點幾先去海灘，冇咁曬丫嘛~

海灘叫做sunset beach，有個靚靚o既名呢~(呢張應該係我o地游完水之後先影o既，o個陣天氣已經變差~)

帶o左個水泡去實在係明智o既決定呀﹗雖然唔係特靚，靚到叫人嘩嘩聲o既海灘，但有得落下水浸下我已經好高興了~

晚餐去o左jusco入面o既一間日式西餐廳(即是似pokka o個D呢~)~

我同家姐都叫o左超豐富o既西式套餐呀﹗見到都覺得大吧﹗有湯、沙津、蒜蓉包、main course(炸魚)、芝士茄子焗飯、肉醬意粉、cheese cake同咖啡﹗咁大份，一定食唔晒？錯了﹗我同家姐都食到清光光﹗

走時已經天黑lu，影影美國村標誌o既摩天輪先~

待續

16-8-2007：沖繩2007第一天@首里城、玉陵、國際通、鄉土料理

發佈日期: 作者:
20

DAY 1 @ OKINAWA

出發lu﹗出發lu﹗期待已久o既旅行﹗因為之前實在太耐太耐冇休息過啦，好想出去玩下輕鬆一下﹗

今次只去四日，所以發覺自己駕車去機場比起call車更化算，另一方面又快D又坐得舒服D啦，仲可以聽自己o既CD﹗哈哈，我逼o左佢o地聽新買o既五月天CD~

早機去，晚機返，所以去到先食早餐﹗check-in過關後仲可以悠閒的食個大家樂早餐，可惜今次冇得食我最愛o既「家鄉銀針粉」呢~

今次坐o既航空公司係hong kong express，恐怕係間細o既航空公司，都未坐過，登機要搭巴士去停機坪，雖然有D唔方便，但咁樣先可以影到飛機o既超近鏡呢~

直航去沖繩只需要兩個幾鐘咋，係暑假期間o既加班機先有直航，平時一般要係台北轉機~所以今次全班機都係香港人﹗係飛機上時間好易過，睇下景、睇下書、食個(頗難食o既)飛機餐，咁就到達沖繩那霸空港了﹗

我o地住o既酒店位於那霸市(Naha)，由機場去只需要坐一程單軌火車就到了，都幾方便﹗番到去酒店拎o左房，洗個面就出發去玩咯~第一日時間唔多，主要去那霸附近o既首里城同埋玉陵。

我o地間酒店最近o既單軌火車站叫「美榮橋」~

要去o既首里城同玉陵都可以坐單軌火車去到呢~所以都幾方便﹗

認住獅子﹗呢D獅子(or我o地時時叫佢o地做瑞獸)係沖繩o既其中一個標誌，係佢o地守護獸，家家戶戶都有一對獅子放係門口o架~呢個呢…heehee，只係cute版o者~

落車後行過去玉陵途中見到有雪糕店﹗呢隻雪糕牌子「blue seal」我o地睇「飲食男女」時有介紹過o架﹗有好多特別味道，一定要試下﹗爸食o左苦瓜味、媽同我食o左黑糖味、家姐食o左菠蘿味﹗呢幾款東東都係沖繩特產﹗好多紀念品都係用佢o地做主題o架~我呢個黑糖味雪糕都好好味，而且黑糖o既風味好有特色﹗

玉陵

其實玉陵都係順道去o既o者，主要都係去首里城，玉陵聽個名都知道係陵墓之類啦，係呀，呢個係古代o既皇室o既陵墓，但我o地冇得入去o架，只可以係墓門外面望下咁o羅~不過100 yen入場費就差不多啦~另外仲有個歷史資料館，介紹一下o個陣D集俗，同埋玉陵葬o左邊個邊個等等~

首里城

沖繩有好多城池，其中首里城算係一個比較大規模o既，有好多城池係戰爭時都炸爛晒啦，得番遺址or少少城牆，但首里城有保持不斷修葺，而損壞o左o既都有重建，所以應該同原貌差不多~呢個大概係入口附近啦，係個山上面，都幾有氣勢o架~

除o左有城牆、城門之外，仲有其他景點，好似呢個「活潑潑地」，hee，我o地貪個名可愛可以要可愛一番咁影張相﹗

日本好興係D景點度「蓋印仔」，我諗一方面俾人留個紀念，另一方面可以保持住D小朋友o既趣味吧﹗首里城o既印仔好完備，入場拎o個張單張已經設計到俾你點樣蓋，你跟住佢suggest o既路線o黎行就可以蓋滿晒啦，家姐非常熱烈的蓋蓋蓋，哈~

難得o既四人合照﹗

其實首里城有好大範圍都唔收費o架，係入到去廣場同埋幾個大殿先收入場費o者，特別o既係，入D大殿要脫鞋﹗hee，我仲鍾意啦，舒服D~

出到o黎有一段小插曲，首里城外圍仲有D池塘、花園、寺廟之類，咁係其中一個池塘我o地見到有鴨媽媽同埋一隻小鴨，鴨媽媽快快的跳上岸，丟低小鴨係後面，由池塘上陸地都有一小截斜路，對小鴨o黎講好困難，但鴨媽媽冇等佢喎，我o地都非常憤怒，有冇搞錯？﹗後來見到，原來岸上面有一大群小鴨﹗哇，呢隻鴨媽媽唔係丟低o個隻小鴨唔理，而係特登番去搵佢呀~唔知係小鴨論盡跟唔上，定係佢唔乖唔跟實，總之成班兄弟姊妹鴨鴨都上晒o黎喇，得佢一隻未上，咪要鴨媽媽番去搵佢o羅~相入面就係佢o地一家人了﹗

搭番車出去市區，我o地夜晚去逛逛國際通同埋去食飯~

國際通係那霸入面最旺o既一條街，好多食肆、好多舖頭，特別係專賣紀念品o既舖頭﹗我o地好快就揀定一間餐廳入去了，太好了，第一日就食到沖繩o既「家鄉料理」﹗

當然唔少得特產海葡萄啦，呢D唔係魚子，係海藻o黎o既，一粒一粒咁，質感真係有D似三文魚籽﹗點D汁o黎食味道都ok o既~爸就好鍾意喇﹗

除o左海葡萄之外，我o地仲叫o左苦瓜炒飯(記得嗎，苦瓜係沖繩特產o黎o架﹗)、三枚肉soba(呢款都係好typical o既食品，度度都食到﹗soba即是沖繩湯麵，比較粗o既麵~)、墨魚汁麵(typical﹗)、紅芋天婦羅(紅芋，即是紅色o既蕃薯，都係沖繩特產﹗)，差不多係咁啦~間餐廳氣氛都好好，一路播住琉球o既傳統音樂，而裝修佈置都好有風味﹗係香港用相同o既價錢真係必定必定食唔到﹗

食完墨魚汁麵D牙會變成咁…呵呵~

食完飯，再逛多陣都番酒店lu，第一日o既行程就係咁啦，好累好累啊~

呀，講多一樣啦，雖然我o地住o既酒店係西式o既酒店(in contrast當然有和式酒店啦，以前去九州時就有住過~)，但都有日本人所喜愛o既大浴場，有個人工溫泉，我o地晚晚都有去浸呀，不過日本o既浴場係男女分開，要光脫脫的，不過去九州時已經試過，習慣了，所以都唔會尷尬o既~而且遇到o既都係日本人，佢o地都唔尷尬咯，我o地有咩好尷尬o既呢~浸一浸浴，一日o既疲勞盡消﹗