今日行程豐富，點解溜冰嗰節明明已經開始咗，都要買飛而唔等下一節呢？因為我哋買咗5:00pm嘅門票，準備欣賞The Painters塗鴉秀，時間好趕呀~由首爾廣場前往睇show嘅劇場無論地鐵定巴士都唔太方便，行路過去係遠就遠啲，但都係一條大直路，打算中途坐低飲啲嘢，啲小朋友應該都頂得住啩？
路上見到呢啲著咗冷衫嘅樣樹﹗﹗大家都好高興，因為織得好靚，仲要件件都唔同款，大家都衝埋去自己最鍾意嗰件度影相~
彩虹冷衫樹~
詩詩操刀幫我哋影嘅粉紅小花冷衫樹~
呢張都係詩詩影嘅小黃花冷衫樹~
紅白間條冷衫樹~
呢件紫色冷衫應該係家姐嘅favourite，出現喺佢啲相入面，原來我同詩詩喺後面出現咗呀~
一路上總算行得輕鬆，因為啲小朋友們自己邊傾計邊行，自得其樂~
中途見到呢個劇場附屬嘅小cafe好似唔錯，就決定入去飲啲嘢~
居然逸逸都坐埋嚟我哋張枱喎~估唔到連day都揀non-咖啡飲品~我哋叫咗栗子latte、蕃薯latte同埋煉奶latte，因為latte都係指「奶」嘅意思嘛，所以我同小朋友們解釋係咩飲品時煉奶latte就變成「煉奶奶」，詩詩勁鍾意呢個名~飲落去蕃薯latte最有特色，栗子感覺唔太栗子，反而有少少苦味(?!)，煉奶奶咪就係有泡嘅煉奶囉~
詩詩乜都ok，最緊要夠甜~
講起呢間cafe，除咗喺入面享受咗啲溫暖同埋飲品之外，就係我哋幫襯咗個廁所，仲要好多次，曉詩兩姊妹又開大又開細，又入又出，真係飲嘢飲得抵~
就係呢間cafe了~
前面都仲有幾間其他cafe，間間睇落都好雅緻，不過我哋坐嗰間就店面比較大，我哋大棚人坐起嚟方便啲，又冇咁怕會嘈到其他客人~
行多冇耐就到The Painters塗鴉秀嘅劇場了~
原來Klook買咗飛都要去counter換實體票~
職員話我哋知，原來因為有旅行團，所以upgrade咗我哋嘅座位去VIP席，正~
點解要嚟睇呢個塗鴉秀呢，因為多年前嚟首爾旅行，睇過有個亂打秀(請參閱：12-4-2012：首爾濟洲櫻花遊day 5．Heyri Artvalley．Nanta)，同今次嘅塗鴉秀一樣都係無語言障礙嘅show，用表情、動作、聲效去演一個故事，嗰次實在超精彩拍爛手掌，啱啱睇番嗰邊舊blog，我有被邀請上台參與一小部份？﹗我完全唔記得呢回事，我做咗啲乜？當年啲blog堅持一日一篇，所以比而家嗰啲內容少好多，冇寫啲details，聽日問下day睇下佢記唔記得先~原來亂打show由2009年開始上演，我哋睇時係2012，到今日2023都仲表演緊每日1-2場，所以再嚟首爾都打算再搵類似嘅show嚟睇，見到有甚麼拌飯秀、功夫秀，我最後揀咗呢個塗鴉秀，詳細內容我都唔太知，總知知道係同即場畫畫有關，同埋Klook入面睇完show嘅遊客個個都話正啦~
因為upgrade咗坐VIP席，個位又前又正中呀~
我同爸爸自拍時曉冇發覺，姨媽逸逸自拍時又識得加入嘅？
頭先行路過嚟劇場時曉曉咪同逸逸好friend嘅，所以佢哋兩表姊妹都話要一齊坐，點知開場熄燈全黑時佢就開始有啲後悔，後來個show一路進行時，我有喺詩詩耳邊細細聲解釋俾佢聽發生咩事，曉又聽唔到，但嗰陣已經換唔到位啦，我只能夠遠遠同細膽曉講「唔係驚嘅內容嚟架」，希望可以令佢個心定啲~
演出期間唔准影相，所以後面幾張相都係謝幕後大會批准大家隨便影嘅~大致上嚟講，係四個演員用唔同技巧即席畫出多幅平面美術作品，配合音樂、舞蹈、多媒體、光影效果去演譯唔同嘅創作，一個字去講就係「勁」﹗中間有好多爆笑位，其中最搞笑係邀請咗兩位現場觀眾上去參與，一位係少少怕醜嘅亞洲女仕，估計來自東南亞，另外一位係鬼佬，玩番幾個演員轉頭，總之我哋就笑到咭咭聲啦~內容都係唔好講咁多了，等大家自己去睇啦~今次我自己冇份上台，唔駛寫咁詳細了~
四位演員各有自己嘅character，散發唔同嘅魅力~
即席畫梵高，勁~
呢幅估計都係名畫，但我哋中間冇人講得出，大家知唔知？
我哋出嚟後討論，究竟係咩人可以做到呢啲show呢？唱歌跳舞或者可以train，但即席喺有限時間內即現場畫畫唔係人人都做得到，train都未必做得到，仲要跳住舞、演住默劇嚟畫~我心目中嘅答案係，讀美術出身、熱舞社成員、超強表演欲嘅人，經過長時間嘅排練而成﹗70分鐘嘅演出，見到佢哋出晒汗，真係唔容易，我哋去睇嗰日，8:00pm仲有多一場，心諗，嗰場應該有另外一組人演啦啩？不過而家去番網頁再睇，每日都得5:00pm嗰場揀lu~
唔算大，但好多機關嘅舞台~
離場時有少少影相位~去官網睇，原來總共有4 team演員輪流演出，不過除咗首爾有The Painters劇場之外，濟州都有另一個劇場，會唔會每度兩team？對番幾位當日演出嘅演員，原來我哋睇嘅係Team Dali，官網仲可以連到去佢哋嘅IG添(應該係工作個人IG吧？)~
一出到去，家姐就話佢哋要返酒店先了，睇嚟逸逸已經攰到有啲唔ok，連同我哋食埋晚飯都搞唔掂吧？我哋喺附近搵咗間餐廳食~
呢間日式餐廳味道價錢座位樣樣都正正常常，唔知點解冇乜客人，我哋食成餐飯嘅期間都得一個半個其他客人，有大量吉位，不過就有少少人買外賣嘅~小朋友有得食平時食慣嘅冷蕎麥麵、湯烏冬同酸蘿蔔，當然醒神好多啦，對佢哋嚟講可惜嘅係，啲壽司原來好正宗地抹咗wasabi喺魚肉同壽司飯之間，咁唯有俾我哋食啦~
今日確實係漫長嘅一日，著韓服遊景福宮、溜冰、聚精會神睇show全部都係消耗體力嘅活動，小朋友之中只有詩詩午餐等位時小睡咗一陣，曉、逸都辛苦啦~所以結論係，我哋冇力去光化門廣場睇燈會lu，只夠力飛的返酒店休息…聽日day 10就返香港啦，所以我哋同咗家姐、逸逸佢哋byebye之後，就係返香港再見啦，佢哋仲有一個full day，當然唔同我哋一齊行動了~
The Painters塗鴉秀網站：
https://www.thepainters.co.kr/
前往其他韓國旅遊blog
